Unit 22: Day 4

Helaman 6–9

Pasiuna

Human sa misyonaryo nga mga paningkamot nila ni Nephi ug Lehi, milambo ang pagkamatarung sa mga Lamanite. Walay swerte, niining higayuna ang mga Nephite nahimong dautan ug misuporta sa mga tulisan ni Gadianton, nga miresulta nga ang Espiritu sa Ginoo mibiya kanila. Si propeta Nephi nanagna nga kon ang mga Nephite magpadayon sa pagpakadautan, sila malaglag. Agig tubag, ang dautang mga maghuhukom miawhag sa daghang mga katawhan nga masuko batok ni Nephi, samtang ang ubang mga tawo maisugong nanalipod sa propeta. Isip usa ka tugon nga ang iyang mga pulong matuman, gipadayag ni Nephi nga ang labaw nga maghuhukom gipatay sa iyang igsoon. Sa dihang napamatud-an ang mga pulong ni Nephi, ang ubang mga tawo midawat kaniya isip usa ka propeta.

Helaman 6

Ang mga Lamanite nahimong matarung ug nakig-away batok sa mga tulisan ni Gadianton, samtang ang mga Nephite misuporta sa tinago nga mga kalihokan

1. Drowinga ang mosunod diha sa imong scripture study journal, nga magbilin og lugar nga kasulatan sa ibabaw ug ubos sa diagram.

   

   Samtang magtuon ikaw sa basahon ni Helaman, nakita nimo nga ang mga Nephite mihimo og mga pagpili nga maoy nakaingon nga mibiya ang Espiritu sa Ginoo gikan sa ilang kinabuhi, samtang ang mga Lamanite mihimo og mga pagpili nga nakadapit sa Espiritu nga molambo sa ilang kinabuhi. Basaha ang Helaman 6:1–5, 16–17, 34–36; pangitaa unsay gibuhat sa mga Lamanite nga nakapalambo sa Espiritu sa Ginoo; ug isulat kini sa ibabaw sa arrow. Sa samang mga bersikulo, pangitaa unsay gibuhat sa mga Nephite nga maoy nakapawala sa Espiritu sa Ginoo, ug isulat kini sa ubos sa arrow.

Usa ka importante nga baruganan nga atong makat-unan gikan sa mga Nephite ug mga Lamanite mao nga: Kon kita motuo ug mosunod sa mga pulong sa Ginoo, ibu-bu Niya ang Iyang Espiritu ngari nato. Ang kaatbang niini nga baruganan tinuod usab: Kon dili kita andam nga motuo ug mosunod sa mga pulong sa Ginoo, ang Espiritu sa Ginoo mopalayo kanato.

Tan-awa unsay imong gisulat sa diagram diha sa imong scripture study journal. Hunahunaa sa unsa nga paagi nga kadtong mga aksyon sa ibabaw mga ehemplo sa pagkaandam sa pagtuo ug pagsunod sa mga pulong sa Ginoo, samtang kadtong anaa sa ubos mga ehemplo sa pagkatig-a og kasingkasing ug dili andam nga maminaw sa Ginoo.

2. Tubaga ang mosunod nga mga pangutana diha sa imong scripture study journal:

   1. Pagpili og usa sa positibo nga mga aksyon (sa ibabaw sa imong diagram) nga imong gihimo o nahimo sa imong kinabuhi. Sa unsa nga paagi nga kini nga aksyon nakadapit sa Balaang Espiritu nganha sa imong kinabuhi?

   2. Tan-awa ang mga aksyon sa ubos sa imong diagram. Nganong gusto nimong likayan ang pagbuhat niining mga butanga?

Pagpili og usa ka butang nga imong mahimo sa pagdapit sa Espiritu sa Ginoo nga molambo sa imong kinabuhi, ug paningkamuti ang pagbuhat niana sa umaabut nga semana.

Helaman 7

Nagsangyaw si Nephi ngadto sa dautan nga mga Nephite ug misugo kanila sa paghinulsol

Si propeta Nephi nagserbisyo isip usa ka misyonaryo sa yuta sa amihanang bahin sulod sa unom ka tuig. Mipauli siya sa iyang kaugalingong balay human maningkamot sa pagtudlo sa mga Nephite, kinsa misalikway sa iyang mga pulong ug nagpabilin sa ilang dautan nga kahimtang. Nawad-an siya sa paglaum. Basaha ang Helaman 7:6–11 aron makahibalo unsay gibuhat ni Nephi.

Human magpundok ang mga tawo aron makapaminaw ni Nephi nga nag-ampo diha sa tore sa iyang tanaman, nagsugod si Nephi sa pagtudlo kanila (tan-awa sa Helaman 7:12–29). Mipasidaan siya kanila sa mga sangputanan sa ilang mga desisyon ug mipasabut og maayo niini nga baruganan: Kon magdumili kita sa paghinulsol sa atong mga sala, mawala kanato ang panalipod sa Ginoo ug ang mga panalangin sa kinabuhing dayon.

Helaman 8:1–26

Ang dautan nga mga maghuhukom miawhag sa mga tawo nga masuko batok ni Nephi

Unsa ang pipila ka mga impluwensya nga makapabalda nimo sa pagpaminaw sa mga pulong sa mga propeta? Samtang ikaw magtuon sa Helaman 8, pangitaa ang mga ideya unsay kinahanglan nimong buhaton kon mag-atubang sa maong mga impluwensya.

Basaha ang Helaman 8:1–6, nga mangita kon unsay reaksyon sa mga maghuhukom nga Nephite (kinsa mga tulisan usab ni Gadianton) sa pagtulun-an ni Nephi. Samtang basahon nimo, pamalandunga ang mosunod nga mga pangutana: Unsa ang nag-unang mensahe sa mga maghuhukom ngadto sa katawhan? Sumala sa Helaman 8:4, nganong ang mga maghuhukom dili modakop ni Nephi?

Hunahunaa unsay imong buhaton kon dunay mosulay sa pagdani kanimo sa pagbaliwala sa unsay gitudlo sa mga propeta. Sa Helaman 8, ang pipila ka mga tawo namulong batok sa unsay gisulti sa mga maghuhukom mahitungod ni Nephi. Basaha ang Helaman 8:7–9, ug ikonsiderar ang paghatag og importansya sa unsay gisulti sa mga tawo sa pagsuporta ni Nephi.

Tan-awa sa Helaman 8:10, ug timan-i ang epekto sa ilang mga pulong bahin sa sitwasyon. Mahimo nimong isulat ang mosunod nga baruganan tupad sa Helaman 8:7–10: Kon batukan nato ang dautan, mapugngan nato nga molambo kini.

3. Diha sa imong scripture study journal, pagsulat og mubo nga paragraph nga magpasabut ngano sa imong hunahuna nga ang baruganan nga gipahayag sa ibabaw importante sa atong panahon.

4. Tubaga ang usa o sobra pa sa mosunod nga mga pangutana diha sa imong scripture study journal:

   1. Unsaon nimo pagbatok sa mga impluwensya nga mosulay sa pagdani nimo sa pagbaliwala o pagbatok sa mga pagtulun-an sa propeta?

   2. Unsa kaha ang tukma nga mga paagi sa pagsulti batok sa maong mga impluwensya ug pagsuporta sa mga propeta sa Ginoo?

   3. Kanus-a ikaw o ang usa ka tawo nga imong nailhan mibarug batok sa maong mga impluwensya? Unsa ang mga resulta?

Sumala sa narekord sa Helaman 8:11–23, gipahinumduman ni Nephi ang mga tawo sa propeta human sa usa ka propeta kinsa nagpamatuod ni Jesukristo. Gitudloan niya ang mga Nephite niini nga baruganan: Kon kita mopakita og hugot nga pagtuo ni Jesukristo ug magmasulundon, makadawat kita og kinabuhing dayon. Bisan pa sa kadaghan sa mga propeta kansang mga pagtulun-an mikumpirmar sa mga pulong ni Nephi, gisalikway sa mga tawo si Nephi ug ang iyang mensahe. Basaha ang Helaman 8:24–26, ug ilha ang mga sangputanan nga giatubang sa mga Nephite kon sila magpadayon sa pagsalikway sa mga pagpamatuod sa mga propeta. Dayon pamalandunga ang mosunod nga pangutana: Ngano sa imong hunahuna nga kadtong kanunay nga mosalikway sa kamatuoran ug mosukol batok sa Dios mag-atubang sa maong bug-at nga mga sangputanan?

Helaman 8:27–9:41

Gipadayag ni Nephi nga ang labaw nga maghuhukom gipatay sa iyang igsoong lalaki

Isip ebidensya nga ang mga tawo anaa sa makasasala nga kahimtang ug nga unsay iyang gisulti nila mahitungod sa ilang kalaglagan matuman, gipadayag ni Nephi nga ang labaw nga maghuhukom sa mga Nephite gipatay. Gipahayag usab ni Nephi nga ang gipatay nga tawo ug ang iyang igsoong lalaki mga sakop sa mga tulisan ni Gadianton. (Tan-awa sa Helaman 8:27–28.)

5. Diha sa imong scripture study journal, isulat ang mosunod nga baruganan: Ang mga pulong sa mga propeta matuman. Hunahunaa nga ikaw usa ka detective nga nag-imbestigar sa pagpatay sa labaw nga maghuhukom. Pangitaa ang mga tubag sa mosunod nga mga pangutana pinaagi sa pagbasa sa mga bersikulo nga anaa sa parentheses. Isulat ang imong mga tubag diha sa imong scripture study journal.

   Unang Adlaw sa Imbestigasyon:

   1. Sa dihang ang lima ka mga tawo miimbestigar sa gisulti ni Nephi, unsay ilang nakita? Ngano nga sila natumba sa yuta? (Helaman 9:1–5

   2. Kinsa ang gidudahan sa mga tawo nga mga mamumuno? (Helaman 9:7–8)

   Ikaduhang Adlaw sa Imbestigasyon:

   3. Kinsa ang napamatud-an nga inosente? (Helaman 9:10–14, 18)

   4. Kinsa ang giakusahan? (Helaman 9:16, 19)

   5. Unsa nga ebidensya sa iyang pagkainosente ang gihatag ni Nephi? (Helaman 9:25–36)

   6. Kinsa ang mamumuno? (Helaman 9:37–38)

Ikonsiderar ang pagmarka sa mga tubag sa mosunod nga mga pangutana diha sa imong mga kasulatan:

• Sumala sa Helaman 9:5, unsa ang gituohan ug gikahadlukan sa lima ka tawo kinsa nakadiskubre sa gipatay nga labaw nga maghuhukom?

• Sumala sa Helaman 9:36, unsa ang gisulti ni Nephi nga ipamatuod ni Seantum sa iyang pagkumpisal sa pagpatay sa iyang igsoong lalaki?

• Sumala sa Helaman 9:39–41, ngano nga ang ubang mga tawo mituo ni Nephi?

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Helaman 6–9 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: