Ang mga Pulong ni Mormon nagsilbi nga koneksyon tali sa gagmayng mga palid ni Nephi ug sa pagpamubo ni Mormon sa dagko nga mga palid ni Nephi. Gisulat sa hapit 400 ka tuig human sa pagkatawo ni Jesukristo, kini nga basahon naglangkob og mubo nga pagpasabut kon unsa ang gagmayng mga palid ni Nephi ug nganong gibati ni Mormon nga kinahanglan kining ilakip kauban sa uban pang sagrado nga mga sinulat. Ang mga Pulong ni Mormon naghatag usab og bililhong panabut nganong si Haring Benjamin adunay ingon ka dako nga impluwensya sa iyang katawhan.
Ang gagmayng mga palid ni Nephi kasagaran gipahinungod ngadto sa espirituhanon nga mga butang ug sa pagpangalagad ug mga pagtulun-an sa mga propeta. Ang dagkong mga palid ni Nephi naglakip sa kadaghanan sa sekular nga kasaysayan sa katawhan nga gisulat sa mga hari, nga nagsugod diha ni Nephi. (Tan-awa sa 1 Nephi 9:2–4.) Gikan sa panahon ni Mosiah, hinoon, ang dagkong mga palid naglakip usab sa mga butang nga adunay dakong espirituhanong importansya.
Ang mga palid ni Mormon, o ang mga palid nga bulawan nga gihatag ngadto kang Joseph Smith, naglangkob og usa ka pinamubo ni Mormon gikan sa dagkong mga palid ni Nephi, uban sa daghan nga mga komentaryo. Kini nga mga palid nga bulawan naglakip usab og usa ka sumpay ni Mormon sa kasaysayan ug mga pagdugang sa iyang anak nga si Moroni.
Imahe
bridge diagram
Ang Mosiah 1 usa ka rekord sa mga pagtulun-an ni Haring Benjamin ngadto sa iyang mga anak nga lalaki. Mitudlo siya kanila nga ang mga kasulatan nagtabang kanato nga makahinumdom sa Dios ug mosunod sa Iyang mga sugo. Sa hapit na mamatay si Haring Benjamin, nagtinguha siya nga mamulong ngadto sa iyang katawhan mahitungod sa iyang pagserbisyo isip hari ug sa pag-awhag kanila nga magmasulundon ngadto sa Dios. Ang pagpamulong ni Haring Benjamin girekord sa Mosiah 2–5 ug naghulagway sa pag-antus ni Kristo ug sa Pag-ula, ang tahas sa kaangayan ug kalooy, ug ang panginahanglan sa pagdala nganhi kanato sa ngalan ni Kristo pinaagi sa pakigsaad. Sa sinugdanan sa iyang pakigpulong, nga girekord diha sa Mosiah 2, si Haring Benjamin mihatag og gibug-aton sa panginahanglan nga moserbisyo sa Dios pinaagi sa pagserbisyo sa uban ug ang malipayon nga kahimtang niadtong nagsunod sa mga sugo.
Si Mormon nagtudlo nga ang Dios mipreserbar sa nagkalain-laing mga rekord alang sa usa ka maalamon nga katuyoan
Imahe
Mormon Abridging the Plates
Hunahunaa ang panahon dihang gibati nimo nga gi-aghat ka sa Espiritu sa pagbuhat og usa ka butang. Nahibalo ka ba kon unsay tanang mahitabo kon imong sundon kini nga pag-aghat? Unsay mihatag kanimo sa determinasyon ug pagsalig sa pagsunod sa pag-aghat?
Si propeta Mormon gimandoan sa Dios nga pamub-an ang mga rekord sa iyang katawhan, nga nahisulat diha sa mga palid ni Nephi. Sa mga A.D. 385, sa dihang hapit na niya itugyan ang iyang gipamubo nga mga rekord ngadto sa iyang anak nga si Moroni, iyang gisunod ang usa ka pag-aghat bisan tuod wala siya masayud sa sangputanan.
Dunay nakit-an si Mormon samtang nagsiksik siya sa mga rekord. Basaha ang Mga Pulong ni Mormon 1:3 aron madiskubrihan kon unsay iyang nakit-an. (Ang “niini nga mga palid” nagpasabut ngadto sa gagmay nga mga palid ni Nephi, nga naglangkob sa 1 Nephi hangtud Omni.) Basaha ang Mga Pulong ni Mormon 1:4–6, ug ikonsiderar ang pagmarka sa imong mga kasulatan nganong nahimuot si Mormon sa dihang iyang nadiskubrihan kon unsay anaa niining gagmayng mga palid.
Basaha ang Mga Pulong ni Mormon 1:7, ug hibaloi nganong gilakip ni Mormon kining gagmayng mga palid sa iyang pagpamubo sa mga palid ni Nephi. Mahimo nimong markahan kini nga baruganan diha sa imong mga kasulatan: “Ang Ginoo nasayud sa tanan nga mga butang.” Pinaagi sa pagsabut ug pagtuo niini nga kamatuoran, makapalambo ka og hugot nga pagtuo nga motuman sa mga pag-aghat sa Espiritu Santo nga imong madawat.
Ang Ginoo misugo kang Nephi sa paghimo sa gagmayng mga palid ug pagsulat sa sagrado nga mga butang sa iyang katawhan diha niini (tan-awa sa 1 Nephi 9:3). Nianang panahona, si Nephi mideklarar, “Ang Ginoo nagsugo kanako sa paghimo niini nga mga palid alang sa usa ka maalamon nga katuyoan diha kaniya, diin nga katuyoan ako wala masayud” (1 Nephi 9:5).
Imahe
gold plates
Kini nga katuyoan nahimong klaro paglabay sa mga siglo, niadtong 1828, sa dihang si Propeta Joseph Smith misugod sa paghubad sa mga palid nga bulawan. Una niyang gihubad ang 116 ka mga pahina sa manuskrito gikan sa pinamubo ni Mormon sa dagkong mga palid ni Nephi, ug unya kini nga mga pahina nawala o gikawat sa dihang gitugutan ni Joseph si Martin Harris nga modala niini. Ang Ginoo misulti ni Joseph nga dili usbon paghubad ang nawala nga bahin tungod kay ang dautang mga tawo nagplano sa pag-usab sa mga pulong diha sa nawala nga mga pahina ug sa ingon dauton ang katinuod sa Basahon ni Mormon. Ang Ginoo misulti kaniya sa paghubad sa kasaysayan diha sa gagmayng mga palid, nga naglangkob sa samang panahon. Kini nga kasaysayan mas nakatutok sa sagrado nga mga butang. (Tan-awa sa D&P 10:10, 41–43; tan-awa usab sa 1 Nephi 9:3–4.)
Kini nga kasinatian importante nga ebidensya nga ang Ginoo nasayud sa tanang butang nga umaabut. Siya nasayud nga ang kasaysayan diha sa gagmayng mga palid mahimong kinahanglanon, ug gidasig Niya si Mormon sa paglakip sa mga palid uban sa iyang gipamubo.
Sa unsang paagi ang pagkahibalo niini nga kamatuoran makatabang kanimo kon makadawat ka og mga pag-aghat gikan sa Espiritu?
Ihulagway diha sa imong scripture study journal ang usa ka higayon sa dihang ikaw o imong kaila misunod sa pag-aghat gikan sa Espiritu Santo bisan kon ikaw o sila wala makasabut sa pag-aghat sa sinugdanan. Isulat kon sa unsang paagi kaha nga mas makaandam ka sa pag-ila ug pagtubag sa mga pag-aghat sa Ginoo. Hinumdumi nga samtang mas magmatinud-anon ka sa mga pag-aghat sa Espiritu sa Ginoo, Siya “[mo]lihok [diha kanimo] aron sa pagbuhat sumala sa iyang kabubut-on” (Mga Pulong ni Mormon 1:7).
Gibuntog ni Haring Benjamin ang mga Lamanite ug naghari sa pagkamatarung
Si Haring Benjamin usa ka matarung nga hari kinsa nakasinati og daghang mga babag atol sa iyang pagmando, lakip na ang gubat batok sa mga Lamanite ug ang doktrinal nga mga panagbingkil taliwala sa iyang mga katawhan. Si Haring Benjamin nangulo sa kasundalohan sa mga Nephite “diha sa kusog sa Ginoo” batok sa ilang mga kaaway ug sa katapusan nakaestablisar og kalinaw sa yuta (tan-awa sa Mga Pulong ni Mormon 1:13–14). Uban sa tabang sa “daghan nga balaan nga mga tawo”, siya naghago sa pagbadlong sa mini nga mga propeta ug mini nga mga magtutudlo nga maoy hinungdan sa panagbingkil taliwala sa katawhan, sa ingon nag-establisar sa kalinaw nga nagagikan sa pagkamatarung (tan-awa sa Mga Pulong ni Mormon 1:15–18).
Basaha ang Mga Pulong ni Mormon 1:12–18, ug sulati ang mga blangko sa ubos sa mga numero sa mga bersikulo nga makatudlo kaayo kanimo sa mosunod nga mga kamatuoran:
Ang Ginoo nagtawag og mga propeta nga makadala sa katawhan ngadto sa kalinaw bisan pa sa mga hagit.
Makakaplag kita og kalinaw pinaagi sa pagsunod sa dinasig nga pagpangulo sa mga propeta.
Diha sa kalig-on sa Ginoo, makabuntog kita sa mga hagit.
Si Haring Benjamin nagtudlo sa iyang mga anak sa kaimportante sa mga kasulatan
Hunahunaa kon unsa kaha ang imong kinabuhi kon ikaw walay mga kasulatan nga mabasa, matun-an, ug matudloan gikan niini.
Si Haring Benjamin mitudlo sa iyang mga anak kon sa unsang paagi nahimong lahi ang ilang mga kinabuhi kon wala sila makaangkon sa mga kasulatan. Sumala sa narekord sa Mosiah 1:3–5, katulo siya migamit og kaanggid-anggid sa mga pulong nga “kon dili pa tungod niini nga mga butang [mga kasulatan]” sa pagtabang sa iyang mga anak nga makasabut sa kaimportante sa mga kasulatan.
Samtang imong basahon ang Mosiah 1:1–8, pangitaa ang mga panalangin nga nawala unta sa mga Nephite kon wala pa sila makaangkon sa mga kasulatan. Itandi ang unsay imong nakat-unan diha sa Omni 1:17–18. Sa imong scripture study journal, pagsulat og tulo o upat ka mga sentence nga mokompleto sa mosunod nga mga pulong: Kon wala akoy mga kasulatan …
Ikonsiderar ang pagsulat sa mosunod nga baruganan diha sa imong mga kasulatan tupad sa Mosiah 1:1–8: Ang pagsiksik sa mga kasulatan makatabang kanato nga mahibalo ug mosunod sa mga sugo.
Imahe
In the Service of Your God
Si Haring Benjamin mitudlo sa iyang katawhan sa kaimportante sa pagkahimong matinud-anon sa mga sugo ug mipasabut kon unsay mahitabo niadtong nahimo nga dautan human nahimong “pinalabi kaayo nga mga katawhan sa Ginoo” (Mosiah 1:13). Basaha ang Mosiah 1:13–17, ug itandi ang Mosiah 1:13 ngadto sa Alma 24:30. Dayon hibaloi ang dili mominos lima ka mga sangputanan nga modangat niadtong nagpahilayo gikan sa Ginoo. Mahimo nimong markahan o numeruhan kini nga mga sangputanan diha sa imong mga kasulatan.
Nagpundok ang mga Nephite aron sa pagpaminaw sa mga pulong ni Haring Benjamin
Basaha ang Mosiah 2:1–9, ug pagsulat og mga tubag sa mosunod nga mga pangutana:
Kinsa ang gihiusa pagpundok?
Asa man sila nagpundok?
Unsay gibuhat aron ang dakong pundok sa katawhan makadungog sa mga pulong ni Haring Benjamin?
Aron mas masabtan ang kinaiya ni Haring Benjamin, basaha ang Mosiah 2:11–15 ug tan-awa ang mga pulong nga nagpakita nga si Haring Benjamin nakatutok diha sa pagkamatarung ug pagserbisyo kay sa posisyon o pasidungog.
Imahe
President Howard W. Hunter
Dayon pamalandungi ang mosunod nga pamahayag ni Presidente Howard W. Hunter: “Ayaw og paghunahuna kaayo sa posisyon. Nakahinumdom ka ba sa tambag sa Manluluwas kalabut niadtong nagtinguha sa ‘labing maayong mga lingkuranan’ o sa ‘mga halangdong dapit’? ‘Ang labing dako kaninyo ma-inyo siyang sulugoon.’ (Mat. 23:6, 11.) Importante nga dayegon. Apan kinahanglang nakatutok kita diha sa pagkamatarung, dili sa pasidungog; sa serbisyo, dili sa posisyon” (“To the Women of the Church,” Ensign, Nob. 1992, 96).
Tun-i ang Mosiah 2:16–17, ug markahi ang baruganan nga atong makat-unan mahitungod sa pagserbisyo gikan kang Haring Benjamin: Kon nagserbisyo kita sa atong isigkatawo, nagserbisyo kita sa Dios. (Ang Mosiah 2:17 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)
Paghunahuna og panahon sa dihang dunay tawo nga nakapanalangin sa imong kinabuhi pinaagi sa pagserbisyo kanimo. Giunsa nimo (o unsaon nimo) sa pagpakita sa imong kamapasalamaton ngadto sa Dios alang sa tawo nga miserbisyo kanimo ug sa Dios diha sa pagkamatarung? Giunsa nimo sa pagpakita sa imong kamapasalamaton nianang tawhana?
Human tudloi ang iyang katawhan mahitungod sa panginahanglan sa pagserbisyo sa uban, mitudlo si Haring Benjamin mahitungod sa daghang mga paagi nga ang Dios mopanalangin kanato ug sa atong panginahanglan nga magmapasalamaton Kaniya.
Samtang magtuon ka sa Mosiah 2:19–24, 34, hunahunaa ang daghang mga paagi diin ang Dios mopanalangin kanimo. Hunahunaa kon sa unsang paagi ka makapakita sa imong pasalamat ngadto Kaniya. Dayon tubaga ang mosunod nga mga pangutana diha sa imong scripture study journal:
Nganong gitawag man ni Haring Benjamin ang iyang kaugalingon, ang iyang katawhan, ug kita nga “dili mapuslanon nga mga sulugoon”?
Nganong importante man alang kanato nga hinumduman ang atong pagkaadunay utang ngadto sa Dios?
Ang mga pulong ni Haring Benjamin nagtudlo kanato nga kon kita mobati nga utangan ngadto sa Dios, gusto kita nga moserbisyo sa uban ug madugangan ang atong pagkamapasalamaton.
Sa Mosiah 2:34, si Haring Benjamin mitudlo nga kita kinahanglang “[mo]tugyan” ngadto sa Dios sa tanan nga anaa kanato. Ang pagtugyan nagpasabut sa “paghatag o pagnunot.” Mahimo nimong isulat ang kahulugan tupad niini nga pulong diha sa imong mga kasulatan. Pamalandungi kon sa unsang paagi imong mahatag ngadto sa Dios ang tanan nga anaa kanimo. Hinumdumi nga kon magsunod ka sa mga sugo sa Dios ug magtinguha sa paghatag og kinasingkasing nga pagserbisyo, Siya mopanalangin kanimo tungod niini.
Ang katapusang mga bersikulo sa Mosiah 2 naglakip og usa ka importante nga pasidaan gikan kang Haring Benjamin ngadto sa iyang katawhan. Nakakita ka na ba sukad og usa ka timaan nga nagsulti kanimo sa “pagbantay”? (Sama pananglit, usa ka timaan tingali magpasidaan kanimo kabahin sa tag-as og bultahe nga mga wire, nangahulog nga mga bato, ihalas nga mga mananap, o kusog nga sulog.) Basaha ang Mosiah 2:32–33, 36–38 aron madiskubrihan kon unsay gisulti ni Haring Benjamin ngadto sa iyang katawhan nga angayng bantayan. (Ang pulong nga kaalautan diha sa bersikulo 33 nagpasabut sa “kagul-anan ug kamakalolooy.”) Pagsulat og usa ka sentence nga naghulagway kon unsay mahitabo niadtong “dayag nga [nag]sukol batok sa Dios” (bersikulo 37) o tuyo nga nagsupak sa mga sugo sa Dios.
Basaha ang mosunod nga pamahayag: “Ang ubang mga tawo motuyo og supak sa mga sugo sa Dios, nagplano nga maghinulsol sa kaulahian, sa dili pa sila moadto sa templo o moserbisyo og misyon. Ang maong tinuyo nga pagpakasala nagbugal-bugal sa Pag-ula sa Manluluwas” (Alang sa Kalig-on sa mga Kabatan-onan [booklet, 2011], 28).
Si Elder David A. Bednar sa Korum sa Napulog Duha ka mga Apostoles mikomentaryo sa kaimportante sa pag-ila kon gipalayo na nato ang atong mga kaugalingon gikan sa Espiritu:
Imahe
Elder David A. Bednar
“Angay sab kitang … maningkamot sa pag-ila kon kita ‘mopahilayo sa [atong kaugalingon] sa Espiritu sa Ginoo …’ (Mosiah 2:36). …
“Ang sumbanan klaro. Kon adunay butang nga mahunahuna, makita, madungog, o mabuhat nato nga makapalayo nato sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga kalingawan dili para kanato. Tungod kay ang Espiritu dili makapuyo nianang bulgar, mahugaw, o dili ligdong, nan klaro nga ang ingon nga mga butang dili gayud para kanato. Tungod kay atong gibugaw ang Espiritu sa Ginoo kon kita mohimo og mga kalihokan nga nahibaloan nato nga dili angay, nan ang ingon nga mga butang dili gayud para kanato” (“Nga Kita Unta sa Kanunay Makabaton sa Iyang Espiritu uban Kanato,” Ensign o Liahona, Mayo 2006, 30).
Pamalandungi kon unsay mawala sa mga tawo—nga usahay dili gani makaamgo niini—kon ilang ipalayo ang ilang mga kaugalingon gikan sa Espiritu. Basaha ang Mosiah 2:40–41, ug hibaloi kon unsay gusto ni Haring Benjamin nga atong hunahunaon ug kon unsay gusto niyang atong hinumduman.
Sa imong scripture study journal:
Pagsulat og pipila ka mga kasinatian nga nagtudlo kanimo nga kon magmasulundon ka sa Ginoo, mapanalanginan ka sa temporal ug espirituhanon nga paagi.
Pagpili og usa ka aspeto sa imong kinabuhi nga gusto nimong mahimong mas masulundon sa mga sugo sa Dios. Pagsulat og usa ka tumong nga molambo sa niana nga aspeto.
Basaha ang Mateo 22:36–40; 25:40; ug Mosiah 2:17. Paghimo og lista, kutay, o hugpong sa kasulatan pinaagi sa pag-cross reference niini nga mga kasulatan. Kini nga paagi sa pagtuon sa kasulatan makatabang sa pagpatin-aw sa mga kahulugan ug mopalapad sa panabut.
Ipasabut ang koneksyon tali sa mga tudling nga imong gisumpay.
Pamalandungi ang mosunod nga mga pangutana:
Kanus-a ka mibati nga nagserbisyo ka sa Dios pinaagi sa pagserbisyo sa laing tawo?
Unsang piho nga mga butang ang imong mabuhat alang sa usa ka tawo diha sa imong kinabuhi nga buhaton sa Manluluwas kon Siya nia pa?
Human sa imong paningkamot sa pagsag-ulo sa Mosiah 2:17, isulat kini gikan sa panumduman diha sa imong scripture study journal.
Isulat ang mosunod diha ubos sa mga assignment karong adlawa diha sa imong scripture study journal:
Akong natun-an ang Mga Pulong ni Mormon–Mosiah 2 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: