Pasiuna sa Enos
Nganong Kinahanglang Tun-an Kini nga Basahon?
Ang basahon ni Enos nagpakita sa gahum sa Pag-ula ni Jesukristo sa paglimpyo sa mga tawo gikan sa sala ug sa paghimo kanila nga hinlo. Si Enos nakigbisog atubangan sa Dios diha sa mainitong pag-ampo sa wala pa mapasaylo ang iyang mga sala. Dayon nag-ampo siya alang sa espirituhanong kaayohan sa mga Nephite ug mga Lamanite. Gigahin niya ang nahabiling panahon sa iyang kinabuhi sa paghago alang sa ilang kaluwasan. Samtang magtuon ka sa basahon ni Enos, makadiskubre ka og importanting mga leksyon mahitungod sa pag-ampo, paghinulsol, ug pagpadayag. Makat-unan usab nimo nga samtang ang mga indibidwal makadawat sa mga panalangin sa Pag-ula, magtinguha sila sa pagpakigbahin niana nga mga panalangin ngadto sa uban.
Kinsa ang Nagsulat Niini nga Basahon?
Si Enos, ang anak ni Jacob ug apo ni Lehi ug Sariah, mao ang nagsulat niini nga basahon. Si Enos mirekord nga ang iyang amahan mitudlo kaniya “diha sa pagmatuto ug sa pagpahimatngon sa Ginoo” (Enos 1:1). Sa hinapos nga bahin sa iyang kinabuhi, si Enos misulat nga siya mipahayag “sa pulong sumala sa kamatuoran diin anaa kang Kristo” (Enos 1:26) sa tibuok niya nga mga adlaw. Sa wala pa siya mamatay, gipasa ni Enos ang gagmay nga mga palid ni Nephi ngadto sa iyang anak, si Jarom. Gitapos ni Enos ang iyang rekord pinaagi sa paglipay sa adlaw nga siya mobarug atubangan sa iyang Manunubos. Mideklarar siya, “Unya ako makakita sa iyang panagway nga may kahinangop, ug siya moingon ngari kanako: Duol ngari kanako ikaw nga bulahan, may dapit nga giandam alang kanimo sa mga mansyon sa akong Amahan” (Enos 1:27).
Kanus-a ug Diin Kini Gisulat?
Gitapos ni Enos ang iyang rekord pinaagi sa pagdeklarar nga 179 ka tuig na ang milabay sukad si Lehi mibiya sa Jerusalem (tan-awa sa Enos 1:25). Niana mabutang ang petsa sa iyang pagsulat sulod sa gibana-bana nga 544 B.C. ug 420 B.C. Gisulat ni Enos kini nga rekord samtang nagpuyo sa yuta sa Nephi.