Unit 24: Day 4

3 Nephi 11:1–17

Pasiuna

Wala madugay pagkahuman sa dakong kalaglagan ug tulo ka adlaw nga kangitngit, mga 2,500 ka mga lalaki, mga babaye, ug mga bata ang nagpundok libut sa templo sa yuta sa Bountiful (tan-awa sa 3 Nephi 17:25). Ilang nadungog ang usa ka tingog, nga sa sinugdanan wala nila masabti. Sa ilang pagpaminaw pag-ayo, nasabtan nila nga kadto mao ang tingog sa Langitnong Amahan nga nagpaila sa Iyang Anak, nga si Jesukristo. Ang Manluluwas sa kalibutan nagpakita.: Midapit si Jesukristo sa katawhan sa pagduol tagsa-tagsa aron personal nga mosaksi nga Siya namatay tungod sa mga sala sa kalibutan pinaagi sa paghikap sa samad sa iyang kilid ug sa agi sa mga lansang sa Iyang mga kamot ug tiil.

3 Nephi 11:1–7

Nadungog sa mga tawo ang tingog sa Amahan nga nagpahibalo sa pagpakita sa Iyang Anak

Lakaw sa gawas nga magdala og usa ka lapis ug kining giya sa pagtuon, ug paminaw sulod sa 60 segundos. Isulat ang daghang mga tingog kutob sa imong mahimo sa lugar nga gihatag:

Karon butangi og bitoon tupad sa kada tingog nga sa imong hunahuna lisud ilhon o dili nimo mamatikdan kon dili maminaw. Dayon balik sa sulod.

Sa wala madugay human sa dakong kalaglagan ug kangitngit nga nagtimaan sa kamatayon ni Jesukristo, ang katawhan nagpundok sa templo sa yuta sa Bountiful. Samtang sila naghisgot sa unsay nahitabo, usa ka talagsaong kasinatian miabut nga sa sinugdanan wala nila masabti. Basaha ang 3 Nephi 11:1–3, ug pangitaa kon unsay nalisdan nga sabton sa katawhan. Mahimo nimong markahan giunsa paghulagway ang tingog sa Dios ug ang epekto niana nga tingog niadtong nakadungog niini.

Paggahin og makadiyot sa paghunahuna kon sa unsa nga paagi nga ang matang sa tingog nga nadungog sa katawhan sama sa mga pag-aghat nga atong madawat gikan sa Espiritu Santo. Unsa nga kamatuoran ang imong makat-unan gikan sa 3 Nephi 11:1–3 mahitungod kon sa unsa nga paagi ang Ginoo ug ang Espiritu Santo kasagaran makigsulti kanato? Usa ka doktrina nga atong makita nga gihulagway niini nga mga bersikulo mao kini: Ang Espiritu Santo sa kasagaran makigsulti nato pinaagi sa hinagawhaw, hinay nga tingog nga atong mabati sa atong mga kasingkasing.

Si Presidente Boyd K. Packer, Presidente sa Korum sa Napulog Duha ka mga Apostoles, mipasabut kon sa unsang paagi nga ang tingog sa Ginoo, pinaagi sa Espiritu Santo, mosulod sa atong hunahuna ug kasingkasing:

“Tingali ang usa ka butang nga mahinungdanon kaayo nga akong nakat-unan sa pagbasa sa Basahon ni Mormon mao nga ang tingog sa Espiritu moabut sama sa usa ka pagbati imbis usa ka tingog. Kamo makakat-on, sama nako, sa ‘pagpaminaw’ niana nga tingog nga mabati imbis nga madungog. …

“Ang gasa sa Espiritu Santo … mogiya ug manalipod ug gani mokorihir sa inyong mga lihok. Usa kini ka espirituhanong tingog nga mosantup sa inyong hunahuna samtang ang panabut o pagbati ibutang sa inyong kasingkasing” (“Tambag ngadto sa mga Kabatan-onan,” Ensign o Liahona, Nob. 2011, 17–18).

1. Hunahunaa ang panahon sa dihang mibati ka sa tingog sa Ginoo o ang mga impresyon sa Espiritu miabut sa imong hunahuna o kasingkasing. Isulat diha sa imong scripture study journal ang imong kasinatian ug gibati.

Ang mga Nephite nakadungog sa tingog makaduha ug wala makasabut niini. Basaha ang 3 Nephi 11:4–7, ug pangitaa unsay gibuhat sa mga Nephite nga lahi sa ikatulong higayon aron masabtan ang tingog. Unsa sa imong hunahuna ang gipasabut nga ang mga tawo miabli “[sa ilang mga dunggan] aron madungog” ang tingog? (3 Nephi 11:5).

Si Presidente Boyd K. Packer mihatag sa mosunod nga tambag mahitungod sa unsay atong kinahanglang buhaton sa pagpaminaw ug pagsabut sa tingog sa Ginoo pinaagi sa Espiritu Santo. Badlisi ang mga pulong nga makatabang nimo nga makahibalo unsay buhaton, o unsay likayan, aron mas makadungog sa tingog sa Ginoo pinaagi sa Espiritu Santo.

“Ang Espiritu dili mokuha sa atong atensyon pinaagi sa pagsinggit. Dili gyud kini mouyog nato sa bug-at nga kamot. Ang Espiritu mohunghong. Sa pagkatinuod,hinay kini nga mohapuhap, nga kon kita busy kaayo mahimong dili gayud nato mabati kini.

“Usahay, ang Espiritu igo lang nga moduot kanato og gamay o kon kanunay man aron kita magtagad; apan sa akong kasinatian, kasagaran, kon dili kita maminaw sa malumo nga pagbati, kon dili kita maminaw niadto nga mga pagbati, ang Espiritu mopahawa ug maghulat hangtud nga kita mangita ug maminaw, pinaagi sa atong kinaiya ug sa atong ekspresyon” (“How Does the Spirit Speak to Us?” New Era, Peb. 2010, 3).

Mahimo nimong isulat ang mosunod nga baruganan sa imong mga kasulatan tupad sa 3 Nephi 11:5–6 ug diha sa imong scripture study journal: Samtang makat-on kita sa pagpaminaw sa tingog sa Ginoo pinaagi sa Espiritu Santo, makasabut kita sa Iyang isulti kanato.

2. Tubaga ang mosunod nga mga pangutana diha sa imong scripture study journal:

   1. Unsay nakatabang nimo sa pag-andam sa imong hunahuna ug kasingkasing sa pagpaminaw ug pagsabut sa tingog sa Ginoo?

   2. Kanus-a ikaw nakasabut sa gisulti sa Ginoo nga tingali wala unta nimo makat-uni kon wala pa ikaw maningkamot sa pagpaminaw niini?

   3. Kanus-a ikaw nakadawat og pag-aghat gikan sa Espiritu Santo nga labaw sa kausa sa wala pa ikaw makasabut ug makasunod niini?

3 Nephi 11:8–17

Si Jesukristo nagpakita ug nagdapit sa katawhan sa pagduol tagsa-tagsa sa paghikap sa Iyang mga samad

Sulayi sa pag-visualize ang mga panghitabo sa 3 Nephi 11:8–10 samtang magbasa ikaw niini.

Ihulagway diha sa Imong Hunahuna Unsa ang Nahitabo

Kon magtuon sa mga kasulatan, makatabang kasagaran ang pagsulay sa pag-visualize unsay nahitabo o sa paghunahuna kon unsa kaha ang bation nga tua pa didto uban niadtong nakasinati sa maong mga panghitabo. Kining kahanas sa pagtuon makahimo sa mga panghitabo ug sa katawhan diha sa mga kasulatan nga mas tinuod nganha nimo ug makahatag nimo og mga oportunidad nga mobati sa impluwensya sa Espiritu Santo.

3. Samtang imong ikonsiderar kon unsa kaha kon nakasaksi pa sa pagpakita sa nabanhaw nga si Jesukristo ngadto sa katawhan sa Basahon ni Mormon, isulat diha sa imong scripture study journal unsa nga mga hunahuna ug mga pagbati nga imo untang nasinati kon didto pa ikaw.

Si Elder Jeffrey R. Holland sa Korum sa Napulog Duha ka mga Apostoles namulong sa kaimportante sa pagpakita sa Manluluwas ngadto sa mga Nephite:

“Kana nga pagpakita ug kana nga deklarasyon naglangkob sa importante nga punto, sa makahuluganong higayon, sa tibuok kasaysayan sa Basahon ni Mormon. Ang pagpakita ug sugo mao ang nakapahibalo ug nakadasig sa matag Nephite nga propeta sulod sa milabay nga unom ka gatus ka tuig, nga dili maghisgot sa ilang mga katigulangan nga Israelite ug Jaredite sulod sa liboan ka tuig sa wala pa kana.

“Ang tanan naghisgot kaniya, nagkanta mahitungod kaniya, nagdamgo kaniya, ug nag-ampo alang sa iyang pagpakita—apan siya sa tinuod ania. Ang adlaw sa mga adlaw! Ang Dios nga miusab sa matag mangitngit nga kagabhion ngadto sa mahayag nga kabuntagon miabut” (Christ and the New Covenant: The Messianic Message of the Book of Mormon [1997], 250–51).

Hinumdumi nga ang nahabilin nga mga Nephite ug mga Lamanite bag-o lang nga nakasinati og makalilisang nga kalaglagan ug tulo ka adlaw sa hingpit nga kangitngit. Basaha ang 3 Nephi 11:10–12, ug pangitaa unsay gusto ni Jesukristo nga mahibaloan sa katawhan mahitungod Kaniya ug unsay Iyang nahimo panahon sa Iyang mortal nga pangalagad. Hain sa mga pamahayag sa Manluluwas sa imong hunahuna mao ang labing makahupay alang nimo nga imong madunggan kon ikaw didto pa? Pamalandunga ngano nga kana nga pamahayag dako kaayo og kahulugan kanimo. Mahimo nimong markahan ang mga pulong nga labing makahuluganon nganha nimo diha sa imong mga kasulatan.

Basaha ang 3 Nephi 11:13–15, ug markahi unsa ang gidapit ni Jesukristo nga buhaton sa mga tawo aron makadawat og personal nga kahibalo nga gusto Niya nga ilang maangkon kabahin Kaniya. Hunahunaa ang mga tubag sa mosunod nga mga pangutana: Sumala sa 3 Nephi 11:14, unsa ang gusto sa Manluluwas nga mahibaloan sa katawhan gikan niini nga kasinatian? Ang pagkonsiderar nga dihay mga 2,500 ka mga tawo nianang higayuna (tan-awa sa 3 Nephi 17:25), unsa kaha kini ka dugay? Unsa ang gitudlo niini kanimo mahitungod sa Manluluwas?

4. Diha sa imong scripture study journal, tubaga ang mosunod nga mga pangutana:

   1. Ngano sa imong hunahuna nga ang Ginoo gusto nga ang mga tawo makakita ug makahikap Kaniya sa “tagsa-tagsa”?3 Nephi 11:15.

   2. Sa unsa nga paagi kini makaapekto kanimo sa paghikap sa mga samad nga nadawat sa Manluluwas samtang nag-ula alang sa imong mga sala?

Ikonsiderar ang pagsulat sa mosunod nga kamatuoran diha sa imong mga kasulatan duol sa 3 Nephi 11:11–15 o diha sa imong scripture study journal: Si Jesukristo midapit nako sa pagdawat og personal nga pagpamatuod nga Siya mao ang akong Manluluwas.

5. Tubaga ang mosunod nga mga pangutana diha sa imong scripture study journal:

   1. Unsa ka lig-on ang imong gibati sa imong personal nga pagpamatuod sa Manluluwas? Sa unsa nga paagi kini mitubo ug nahimong mas lig-on karong bag-o?

   2. Unsa nga mga kasinatian ang migiya kanimo sa pag-angkon sa imong kaugalingong personal nga pagpamatuod sa Manluluwas, o unsay imong mabuhat aron makaangkon og mas lig-ong pagsaksi?

   3. Unsaon nimo pagkahibalo nga ang Manluluwas nakaila nimo sa indibidwal nga paagi?

Basaha ang 3 Nephi 11:16–17, ug pangitaa unsay gibuhat sa katawhan human sila makasinati niining personal nga kasinatian uban sa Manluluwas. Tingali makatabang ang pagsabut nga ang “Hosanna” usa ka pagtuaw sa pagdayeg ngadto sa Ginoo.

Tan-awa pag-ayo ang 3 Nephi 11:15, ug hibaloi unsay gibuhat sa katawhan human sila personal nga nakahikap sa mga samad sa Manluluwas. Tungod kay ikaw wala didto aron personal nga mohikap sa mga samad sa Manluluwas, sama sa nahisulat bahin sa mga tawo sa 3 Nephi, unsaon nimo pagkahibalo nga si Jesus mao ang Kristo? (Tan-awa sa Juan 20:30–31; Moroni 10:3–7; D&P 46:13–14 alang sa pipila ka posible nga mga tubag.)

Sa pagpahisama sa 3 Nephi 11:15 sa imong kaugalingon, kompletuha ang mosunod nga pamahayag: Sa higayon nga ako makadawat og personal nga pagpamatuod ni Jesukristo, ako adunay responsibilidad sa .

Paghunahuna og mga paagi nga ang usa ka tawo nga dunay pagpamatuod ni Jesukristo “makapamatuod” Kaniya.

Si Presidente Boyd K. Packer mitudlo sa mosunod mahitungod sa mga pagpamatuod: “Ikaw dili makapamugos sa espirituhanong mga butang. Ang usa ka pagpamatuod dili ikahatag diha-diha nimo; motubo kini. Ug ang pagpamatuod usa ka pagpamatuod, ug kinahanglan nga tahuron kini, bisan og gamay o dako. Mas motaas kita sa atong pagpamatuod sama sa paagi nga kita motubo sa atong pisikal nga panglawas ug dili kita makabantay nga kini nahitabo kay moabut kini pinaagi sa pagtubo” (“How Does the Spirit Speak to Us?” 3).

6. Tapusa kini nga leksyon pinaagi sa pagsulat sa imong pagpamatuod ni Jesukristo diha sa imong scripture study journal. Mahimo nimong iapil unsay imong nabuhat aron makaangkon sa imong pagpamatuod o unsay imong plano sa pagpalig-on niini. Kon maaghat pinaagi sa Espiritu, basaha kini ngadto sa usa ka tawo o pagdapit og tawo sa pagbasa niini.

7. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang 3 Nephi 11:1–17 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: