Unit 9: Day 3

Jacob 1–2

Pasiuna

Human sa kamatayon ni Nephi, ang mga Nephite misugod sa “[p]agpatuyang sa ilang mga kaugalingon sa ingon og dautan nga mga kalihokan” ubos sa pagmando sa bag-ong hari (Jacob 1:15). Ang duha ka manghud nga lalaki ni Nephi, si Jacob ug Joseph, gipahinungod ni Nephi isip mga pari ug magtutudlo sa katawhan, ug makugihon silang naghago aron sa pagdani sa mga tawo sa paghinulsol ug pagduol ngadto kang Kristo. Si Jacob misunod sa sugo ni Nephi sa pagrekord sa sagrado nga mga pagtulun-an, mga pagpadayag, ug mga panagna diha sa gagmay nga mga palid. Matinud-anon ngadto sa iyang balaanong gihatag nga responsibilidad, si Jacob miawhag sa iyang mga katawhan sa paghinulsol, nagpasidaan kanila sa mga sala sa garbo, sa gugma sa mga katigayunan, ug sekswal nga imoralidad. Siya mitudlo mahitungod sa mga peligro ug mga sangputanan niining tulo ka komon nga mga sala.

Jacob 1:1–2:11

Si Jacob nagpasidaan sa katawhan sa ilang pagkadautan

Ikonsiderar kon unsay imong isulti sa mosunod nga sitwasyon: Usa sa imong mga higala sa Simbahan nagpahayag og negatibong kinaiya ngadto sa iyang mga lider sa priesthood ug miingon, “Daw wala sila makasabut sa kalibutan ug unsay mga paagi niini. Nagsige sila og pasidaan mahitungod sa mga pagpili nga dili ingon kaimportante. Hinaut nga dili unta sila mogahin og sobrang panahon sa pagsulti kanato sa tanang dili maayong mga butang nga kinahanglan natong likayan. Kinahanglan nga positibong mga butang lang ang ilang hisgutan.”

Jacob teaching

Hunahunaa kon nganong ang mga lider sa priesthood usahay magpasidaan batok sa sala. Si Jacob mirekord nga human sa kamatayon ni Nephi (tan-awa sa Jacob 1:9), ang mga katawhan misugod sa pag-apil sa dautan nga mga kalihokan. Basaha ang Jacob 1:15–16, ug hibaloi kon unsay gibuhat sa mga tawo nga nakapabalaka ni Jacob.

Mahimo nimong linginan ang pulong nga nagsugod sa Jacob 1:15–16. Nganong usa man ka panalangin nga adunay mga lider sa priesthood nga mopasidaan kanato mahitungod sa mga problema nga moabut o gani sa dili pa kini moabut?

Basaha ang Jacob 1:6–8, ug hibaloi nganong si Jacob ug ang iyang kauban nga mga lider nanambag sa mga katawhan ni Nephi batok sa sala. Ngano kaha nga ang mga lider sa priesthood diha sa inyong pamilya, ingon man usab sa lokal ug kinatibuk-ang mga lider sa priesthood, nagpasidaan kanimo mahitungod sa sala ug makugihon kaayo nga nagtudlo kanimo sa ebanghelyo? Mahimo nimong markahan ang mga pulong sa Jacob 1:7 nga nagtudlo sa mosunod nga kamatuoran: Ang mga lider sa priesthood makugihon nga nagtrabaho sa pagtabang kanato nga moduol ngadto kang Kristo.

Basaha ang Jacob 1:17–19, ug pangita og dugang nga mga rason nganong si Jacob ug ang iyang igsoon nga si Joseph makugihon kaayo nga nagtrabaho sa pagtudlo sa mga katawhan.

Unsa kaha ang gipasabut nga makadawat og “sugo gikan sa Ginoo” (Jacob 1:17)?

Mahimo nimong markahan ang uban pa nga mga pulong nga makatabang sa pagtudlo sa mosunod nga baruganan: Ang mga lider sa priesthood adunay balaanong hinatag nga responsibilidad sa pagtudlo sa pulong sa Dios ug pagpasidaan batok sa sala.

Pamalandungi sa makadiyot kon nganong importante nga masabtan nga ang mga lider sa Simbahan dunay tulubagon sa ilang mga paningkamot sa pagtudlo kanato kon unsay gusto sa Ginoo nga atong mahibaloan.

Samtang imong basahon ang Jacob 2:1–3, 6–7, 10–11, pangita og mga pulong nga nagpakita kon unsay gibati ni Jacob mahitungod sa iyang lisud nga buluhaton nga manawagan sa iyang mga katawhan sa paghinulsol.

1. Hunahunaa kon unsay gitudlo kanimo sa mosunod nga mga pulong mahitungod sa rason ni Jacob sa pagkompleto sa iyang lisud nga buluhaton: “Ako niining adlawa gibug-atan uban sa dako nga tinguha ug kabalaka alang sa kaayohan sa inyong mga kalag” (Jacob 2:3) ug “Ako kinahanglan gayud nga mobuhat sumala sa higpit nga mga sugo sa Dios” (Jacob 2:10). Pagsulat diha sa imong scripture study journal og tubag sa mosunod nga mga pangutana:

   1. Kanus-a nimo nabati ang gugma ug kahingawa sa usa ka lider sa priesthood alang kanimo?

   2. Kanus-a nimo nabati nga ang mga pulong o mga lihok sa usa ka lider sa priesthood gidasig sa Dios aron sa pagtabang kanimo?

Hinuktuki pag-usab ang sitwasyon nga gipresentar sa sinugdanan sa leksyon. Hunahunaa kon unsaon nimo pagtubag ang imong higala base sa unsay imong natun-an karon.

Paggamit sa mga Kasulatan sa Atong Inadlaw nga Pagpakabuhi

Samtang magtuon ka sa mga kasulatan, importante nga mohunong kadali ug mamalandong sa unsang paagi ang usa ka piho nga baruganan magamit sa imong kinabuhi. Hunahunaa kon unsaon nimo paglihok kon nakasabut ug nagsunod ka sa usa ka baruganan nga gitudlo sa mga kasulatan. Niini nga sitwasyon, ang pagpamalandong kon unsaon nimo pagtubag ang usa ka higala nga adunay negatibong panghunahuna mahitungod sa mga lider sa priesthood makatabang nimo nga makasabut nganong ang atong mga lider nagpasidaan kanato batok sa sala.

Jacob 2:12–21

Si Jacob nagpanton sa iyang katawhan tungod sa ilang garbo

Aron sa pagtabang kanimo nga mangandam sa pagtuon sa unsay gisugo sa Ginoo nga itudlo ni Jacob, paghunahuna og mga panalangin nga gihatag sa Ginoo kanimo sa mosunod nga mga kahimtang: pamilya, mga higala, mga lider ug mga magtutudlo sa Simbahan, mga abilidad sa musika ug art, mga kahanas sa paugnat sa kusog, mga talento, pang-eskwela, mga oportunidad sa paglambo, kahibalo sa ebanghelyo, ug materyal nga mga butang. Paghunahuna og ubang mga paagi nga ang Ginoo mipanalangin kanimo.

Basaha ang Jacob 2:12–13, ug hibaloi kon unsay gipangita sa mga Nephite. Bantayi nga si Jacob mitudlo nga “ang kamot sa magbalantay” mipanalangin og mga bahandi ngadto sa mga Nephite. Kini nga mga pulong nagpasabut sa atong Amahan sa Langit.

2. Isulat sa imong scripture study journal nganong importante nga hinumduman nimo nga ang Ginoo mihatag sa mga panalangin ug mga abilidad nga anaa kanimo.

Kon dili kita magmatngon, mahimong magmapasigarbuhon kita human kita makadawat sa mga panalangin nga atong gitinguha, sama sa gibuhat sa mga Nephite. Diha sa luna nga giandam, isulat kon unsa kaha ang gipasabut sa “gibayaw sa garbo sa inyong mga kasingkasing.”

Sumala sa narekord sa Jacob 2:13, unsay gisulti ni Jacob nga maoy pipila ka mga hinungdan sa garbo sa mga Nephite?

Hunahunaa ang usa ka moderno nga tawo o grupo sa mga tawo kinsa moabuso, mobaliwala, o modaug-daog sa uban tungod kay sila “nakabaton og labaw pa ka daghan” kay sa niadtong ilang giabusohan (Jacob 2:13). Sama pananglit, tungod kay ang ubang mga tawo mas daghan og kwarta, mas daghan og higala, mas may abilidad sa paugnat sa kusog, o gani mas dako og kahibalo sa ebanghelyo kay sa laing tawo, sila tingali masayop sa paghunahuna nga mas maayo sila kay sa uban o gani modaug-daog kanila. Pamalandungi kon duna bay panahon sa imong kinabuhi nga milihok ka sa mapasigarbuhon nga paagi.

Basaha ang Jacob 2:17–21, ug markahi ang mga pulong nga makatabang kanimo sa pagbuntog sa garbo.

3. Sa imong scripture study journal, pagsulat og duha o labaw pa ka mga hugpong sa mga pulong nga imong makita sa Jacob 2:17–21, ug ipasabut kon sa unsang paagi kadto nga mga hugpong sa mga pulong makatabang kanimo sa pagbuntog sa garbo. Ang pipila sa mosunod nga mga pangutana tingali makatabang nga hunahunaon samtang imong kompletuhon kini nga assignment: Unsa kaha ang gipasabut sa pagpangita sa gingharian sa Dios? Aron makabaton og paglaum sa kang Kristo? Sa unsang paagi ang pagpangita sa gingharian sa Dios ug pag-angkon og paglaum sa kang Kristo moimpluwensya kon unsaon nimo pagtan-aw ug pagtratar sa uban?

Hunahunaa nga ang imong inahan, amahan, o lider nangutana nimo kon unsay imong gitun-an karon. Pagsulat og usa ka baruganan gikan sa Jacob 2:17–21 nga mahimo nimong gamiton sa pagtubag niini.

Usa ka baruganan sa Jacob 2:17–21 mao ang: Kinahanglang mangita kita sa gingharian sa Dios labaw pa sa uban nga mga interes.

4. Pagsulat sa imong scripture study journal og usa ka paagi nga imong magamit ang mga panalangin ug mga oportunidad nga gihatag sa Ginoo kanimo sa pagtabang sa pagtukod sa gingharian sa Dios ug sa pagpanalangin sa kinabuhi sa uban.

Jacob 2:22–30

Si Jacob nagpanton sa iyang katawhan tungod sa sekswal nga imoralidad

Ang mosunod nga pamahayag gihimo ni Presidente Ezra Taft Benson. Tag-ana kon unsang tulo ka mga pulong ang ibutang diha sa mga blangko:

Ang nagkatap nga sala niini nga henerasyon mao ang “ (”Cleansing the Inner Vessel,“ Ensign, Mayo 1986, 4; tan-awa ang katapusan sa leksyon alang sa husto nga tubag).

Basaha ang Jacob 2:22–23, 28, ug markahi ang mga pulong nga gigamit ni Jacob sa paghulagway sa kaseryuso sa sekswal nga imoralidad. Mahimong makatabang ang pagsabut nga ang mga pulong nga malaw-ay nga mga buhat nagpasabut sa sekswal nga mga sala.

Elder Richard G. Scott

Si Elder Richard G. Scott sa Korum sa Napulog Duha ka mga Apostoles mipasabut sa pipila ka mga binuhatan nga nahisupak sa balaod sa Ginoo sa kaputli: “Bisan unsa nga sekswal nga kasuod gawas sa bugkos sa kaminyoon—gipasabut nako ang bisan unsang intensyonal nga pagtandog sa sagrado, pribadong mga bahin sa lawas sa lain, aduna o walay sinina—usa ka sala ug gidili sa Dios. Usa usab ka kalapasan nga tuyoon sa pagpukaw kini nga mga emosyon sa inyong kaugalingong lawas” (“Making the Right Choices,” Ensign, Nob. 1994, 38).

Ang homosekswal nga mga buhat ug ang pagtan-aw og pornograpiya nakalapas usab sa balaod sa Ginoo sa kaputli.

Tan-awa kon sa unsang paagi ang mga Nephite nangita og pasangil sa ilang mga sala, sumala sa narekord sa Jacob 2:23–24. Gahini kadiyot og panahon sa paghunahuna kon sa unsang paagi ang mga katawhan nangita og pasangil sa sekswal nga imoralidad karon.

Usa sa mga sala sa mga Nephite mao ang walay pagtugot nga buhat sa dinaghan nga kaminyoon [pagpangasawa og daghan]. Si Jacob mitudlo sa sugo sa Ginoo nga ang usa ka tawo kinahanglang maminyo sa usa lamang ka asawa (tan-awa Jacob 2:27). Ang pagka-adunay sobra sa usa ka asawa nga walay pagtugot sa Ginoo pinaagi sa Iyang gitudlo nga mga lider sa priesthood usa ka ehemplo sa sekswal nga sala. Sa mata sa Dios, ang sekswal nga mga sala seryuso kaayo (tan-awa sa Alma 39:5).

Ang katawhan sa Ginoo tugutan lamang sa paghimo og dinaghan nga kaminyoon kon gimando sa Ginoo (tan-awa sa Jacob 2:30). Sa lain-laing panahon sa kasaysayan sa kalibutan, ang Ginoo mimando sa Iyang mga katawhan sa paghimo og dinaghan nga kaminyoon. Sama pananglit, ang dinaghan nga kaminyoon gihimo sa mga panahon sa Daang Tugon nila ni Abraham ug Sara (tan-awa sa Genesis 16:1–3; D&P 132:34–35, 37) ug sa ilang apo nga si Jacob (tan-awa sa D&P 132:37), ug gihimo sa usa ka panahon sa sayong bahin sa gipahiuli nga Simbahan, nagsugod ni Propetang Joseph Smith (tan-awa D&P 132:32–33, 53). Hinoon, gisugo sa Dios ang Iyang propeta nga si Wilford Woodruff nga hunungon ang paghimo sa dinaghan nga kaminyoon (tan-awa sa Opisyal nga Pahayag 1 diha sa Doktrina ug mga Pakigsaad).

Basaha ang Jacob 2:31–35, ug markahi ang mga pulong nga nagpakita sa pipila ka negatibong mga sangputanan sa sekswal nga sala.

5. Tubaga ang mosunod nga mga pangutana diha sa imong scripture study journal:

   1. Sumala ni Jacob, sa unsang paagi nga ang sekswal nga imoralidad makaapekto sa mga pamilya?

   2. Ang pipila sa mga kabatan-onan tingali mangatarungan nga pwede silang mahimong imoral sa sekswal nga paagi tungod kay dili sila minyo ug, busa, wala magluib ngadto sa kapikas, ug sila walay mga anak. Sa unsang paagi ang imoralidad makaapekto sa usa ka tin-edyer ug sa iyang pamilya?

   3. Ngano kaha nga gikonsiderar sa Ginoo ang imoralidad nga ingon ka seryuso nga sala?

Ribyuha ang sinugdanan sa Jacob 2:28, ug markahi kon unsa ang kahimut-an sa Ginoo. (Hinumdumi nga bisan tuod si Jacob piho nga naghisgot sa kababayen-an niini nga bersikulo, tinuod usab nga ang Ginoo mahimuot sa kaputli sa kalalakin-an.) Kini nga bersikulo nagtudlo sa baruganan nga: Ang Ginoo nahimuot sa kaputli.

Base sa unsay imong nakat-unan karon, hunahunaa kon nganong ang Ginoo mahimuot sa kaputli sa Iyang mga anak. Hunahunaa ang imong pamilya, ingon man ang pamilya nga imong gilauman nga maangkon sa umaabut. Sa unsang paagi ang pagpakabuhi sumala sa balaod sa Ginoo sa kaputli mopanalangin kanimo ug kanila? Pamalandungi kon sa unsang paagi ang mga pagpili nga imong gihimo aron mahimong putli ug limpyo makapahimuot sa Ginoo.

Makahimo ka sa pagpabiling limpyo. Kon nakasala na ka sa balaod sa kaputli, makahimo ka sa paghinulsol ug mahimong limpyo pinaagi sa Pag-ula ni Jesukristo. Tinguhaa ang giya sa Balaang Espiritu samtang maghunahuna ka og usa o sobra pa nga mga paagi nga mas mabantayan nimo ang imong kaugalingon batok sa pagsupak sa balaod sa kaputli. Kon nakahimo ka og sekswal nga kalapasan, buhata ang bisan unsa nga gikinahanglan, lakip ang pakigkita sa inyong bishop o branch president, aron sa pagkumpisal sa unsay imong nahimo nga kalapasan sa balaod sa Ginoo sa kaputli.

O My Father

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Jacob 1–2 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo:

Tubag sa kulang nga mga pulong sa kinutlo diha sa sinugdanan niini nga leksyon: Si Presidente Benson miingon, “Ang nagkatap nga sala niini nga henerasyon mao ang sekswal nga imoralidad.”