2 Nephi 3

Pasiuna

Sa 2 Nephi 3, si Lehi mihatag og mga tambag ug panalangin ngadto sa iyang kamanghurang anak, si Joseph. Sa pagbuhat niini, si Lehi misugilon sa panagna ni Jose sa Ehipto kabahin sa tahas sa pinili nga manalagna nga si Joseph Smith Jr. sa pagpatungha sa Basahon ni Mormon. Niini nga leksyon aduna kay oportunidad sa pag-angkon og mas dakong pagsabut ni Propeta Joseph Smith ug mas lig-on nga pagpamatuod sa iyang balaang tahas sa Pagpahiuli sa ebanghelyo.

2 Nephi 3:1–25

Si Lehi misugilon sa panagna ni Jose sa Ehipto mahitungod ni Propeta Joseph Smith

Si Lehi mipadayon sa iyang katapusang tambag ngadto sa iyang pamilya pinaagi sa pagtudlo sa iyang anak nga si Joseph mahitungod sa laing tulo ka mga tawo nga ginganlan usab og Joseph. Pagdrowing og linya gikan sa scripture reference diha sa 2 Nephi 3 ngadto sa Joseph o mga Joseph nga imong nakat-unan gikan niana nga bersikulo.

Kini nga leksyon magtutok sa panagna ni Jose sa Ehipto mahitungod ni Propeta Joseph Smith—nga gihatag sobra sa 3,000 ka tuig sa wala pa matawo si Joseph Smith!

Pagsugod og lista diha sa imong scripture study journal sa mga panghitabo ug mga pagtulun-an nga moabut sa hunahuna samtang maghunahuna ka mahitungod ni Propeta Joseph Smith ug sa iyang tahas sa Pagpahiuli sa ebanghelyo. Imong dugangan kini nga lista samtang makadiskubre ka og dugang nga impormasyon niining tibuok nga leksyon, mao nga pag-andam og luna nga masulatan.

Basaha ang 2 Nephi 3:6–8, ug pangitaa ang mga pulong nga gigamit ni Jose sa Ehipto sa paghulagway ni Propeta Joseph Smith ug ang buhat nga iyang tumanon. Idugang ang bisan hain niini nga mga pulong nga imong gibati nga importante ngadto sa imong lista mahitungod sa Propeta diha sa imong scripture study journal. Niini nga mga bersikulo si Jose sa Ehipto mipamatuod nga ang Ginoo mipadako ni Propeta Joseph Smith aron motabang sa pagpahinabo sa Pagpahiuli sa ebanghelyo. Samtang magpadayon ka sa pagtuon sa 2 Nephi 3, pangita og dugang nga mga kamatuoran mahitungod ni Propeta Joseph Smith nga makapalig-on sa imong pagpamatuod sa iyang balaan nga misyon ug idugang kini sa imong lista.

Aron sa pagtabang kanimo nga mas makasabut sa panagna ni Jose sa Ehipto, timan-i kon kapila ang pulong manalagna migawas diha sa 2 Nephi 3:6–7, 11, ug 14. Mahimo nimong sulatan ang margin tapad sa usa niini nga mga bersikulo nga ang usa ka manalagna mao ang usa ka tawo nga makahibalo sa mga butang nga nangagi, sa karon, ug sa umaabut (tan-awa sa Mosiah 8:13–17).

Sa 2 Nephi 3:7, si Jose sa Ehipto miingon nga ang Ginoo misulti kaniya nga si Joseph Smith “mohimo og usa ka buhat … diin mahimo nga labing bililhon” ngadto sa iyang mga kaliwatan. Siksika ang 2 Nephi 3:11–15, 19–21 nga mangita kon unsa ang buhat “nga labing bililhon” nga buhaton sa Ginoo pinaagi ni Propeta Joseph. Ang mga tabang sa pagtuon nga anaa kanimo (mga summary sa kapitulo, mga footnote, Giya ngadto sa mga Kasulatan, ug ang susama niini) makatabang kanimo sa pagsabut sa daghang mga detalye nga gihisgutan ni Jose sa Ehipto. Samtang makakita ka og bag-ong impormasyon mahitungod sa tahas ni Propeta Joseph Smith, idugang kini ngadto sa lista diha sa imong scripture study journal.

Kon ang mga kasulatan maghisgut og “bunga sa mga bat-ang [sa usa ka tawo]”, kini nagpasabut sa mga kaliwat niana nga tawo. Nanagna si Jose sa Ehipto nga si Propeta Joseph Smith, usa sa iyang mga kaliwatan, mopagula sa Basahon ni Mormon sa ulahing mga adlaw.

Sa 2 Nephi 3:12, ang mga pulong nga “ang bunga sa imong mga kaliwat [mga kaliwat ni Jose sa Ehipto] mosulat” nagpasabut sa sinulat nga mga rekord sa kasulatan—ang Basahon ni Mormon—nga gihimo pinaagi sa mga kaliwat ni Jose (tan-awa sa 2 Nephi 3:4). Gipanagna nga ang Basahon ni Mormon “magkahiusa” sa Biblia, usa ka sagrado nga rekord nga gisulat sa “bunga sa mga kaliwat ni Juda.” Siksika ang 2 Nephi 3:12 alang sa mga pulong nga naghulagway sa epekto sa Basahon ni Mormon ug Biblia sa kalibutan samtang kini magkahiusa.

Si Jose sa Ehipto nanagna usab nga si Propeta Joseph Smith mobuhat og importanting tahas sa plano sa Langitnong Amahan sa “[pag]dala sa akong mga katawhan ngadto sa kaluwasan” (2 Nephi 3:15).

Tubaga ang mosunod nga mga pangutana diha sa imong scripture study journal aron sa pagtabang kanimo nga padayong magpalapad sa imong pagsabut sa tahas ni Joseph Smith sa plano sa Langitnong Amahan alang sa kaluwasan:
1. Unsa ang pipila ka mga ehemplo sa mga pakigsaad, awtoridad, o mga ordinansa nga gipahiuli pinaagi ni Propeta Joseph Smith nga makatabang sa pagdala og kaluwasan sa katawhan?
2. Unsa ang kalainan nga nahimo niini nga mga panalangin diha sa imong kinabuhi?

Pangita og mga pulong nga naghulagway ni Propeta Joseph Smith diha sa 2 Nephi 3:24, ug idugang kini sa lista diha sa imong scripture study journal. Samtang imong basahon ang mosunod nga kinutlo gikan ni Presidente Gordon B. Hinckley, idugang sa imong lista ang bisan unsang dugang nga pagtulun-an ni Propeta Joseph Smith nga nagpamatuod nga siya “usa ka instrumento diha sa mga kamot sa Dios”:

“Tuguti ako sa pagsulti og pipila ka mga doktrina ug mga gituohan nga nakapalahi kanato sa ubang mga simbahan, ug ang tanan miabut pinaagi sa pagpadayag ngadto sa batan-ong Propeta [Joseph Smith]. …

Ang una niini, siyempre, mao ang pagpakita sa Dios Mismo ug sa Iyang Hinigugmang Anak, ang nabanhaw nga si Ginoong Jesukristo. …

Kini nga kahibalo sa Dios, natago gikan sa kalibutan sulod sa gatusan ka tuig, mao ang una ug importante nga butang nga gipadayag sa Dios ngadto sa Iyang pinili nga sulugoon. …

“Ang Basahon ni Mormon miabut pinaagi sa gasa ug gahum sa Dios. …

“Ang lain [kontribusyon ni Propeta Joseph Smith] mao ang napahiuli nga priesthood. …

“Laing importante ug lahi nga pagpadayag nga gihatag ngadto sa Propeta mao ang plano sa kinabuhing dayon sa pamilya. …

“Ang pagka-inosente sa gagmayng mga bata maoy laing pagpadayag nga gihatag sa Dios pinaagi ni Propeta Joseph. …

“… Ang importante nga doktrina sa kaluwasan alang sa mga patay dinhi ra niini nga Simbahan. …

“Ang mahangturong kinaiya sa tawo gipadayag na. …

“… Aduna pay kinahanglan nga akong hisgutan. Kini mao ang baruganan sa moderno nga pagpadayag. …

“… Sa iyang mubo nga 38 ka tuig ug tunga nga kinabuhi, miabut nganha [ni Propeta Joseph Smith] ang dili matandi nga paghatag sa kahibalo, mga gasa, ug doktrina” (“Ang Pinakaimportanting mga Butang Nga Gipadayag sa Dios,” Liahona, Mayo 2005, 80–83).

Human sa pagkamartir ni Propeta Joseph Smith, si Presidente John Taylor misulat sa unsay nahimong Doktrina ug mga Pakigsaad 135. Basaha ang Doktrina ug mga Pakigsaad 135: 3, ug pamalandungi ang imong nakat-unan niini nga leksyon mahitungod sa tahas ni Joseph Smith diha sa plano sa Langitnong Amahan alang sa Pagpahiuli sa ebanghelyo.

Pagsulat og tubag sa usa sa mosunod nga mga pangutana diha sa imong scripture study journal:
1. Unsay imong nakat-unan o gibati karon samtang nagtuon ka sa 2 Nephi 3 nga nakapalig-on sa imong pagpamatuod kabahin ni Propeta Joseph Smith?
2. Unsay gibuhat, gitudlo, o gipahiuli ni Joseph Smith nga imong gibati nga “labing bililhon” (2 Nephi 3:7) kanimo?

Magmainampuong mangita og mga paagi sa pagpakigbahin sa imong pagpamatuod kabahin ni Propeta Joseph Smith ngadto sa imong mga higala ug pamilya aron sa pagtabang kanila sa pag-ila sa daghang mga butang nga bililhon nga gipahiuli pinaagi kaniya.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 3 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: