Unit 17: Day 4

Alma 23–24

Pasiuna

Human sa iyang pagkakabig, ang hari sa mga Lamanite mipahayag og relihiyusong kagawasan tali sa mga katawhan. Kini nga pamahayag nagtugot kang Aaron ug sa iyang mga kaigsoonan nga magsangyaw sa ebanghelyo ug magtukod og mga simbahan sa daghang siyudad sa Lamanite. Liboan ka mga Lamanite ang nakabig ug wala gayud mawala. Kadtong mga Lamanite nga nakabig ngadto sa Ginoo mihimo og pakigsaad nga mohunong sa paggamit sa ilang mga hinagiban sa gubat. Gidala nila sa ilang kaugalingon ang ngalan nga mga Anti-Nephi-Lehi. Dihang ang wala makabig nga mga Lamanite misulong kanila, daghan sa mga Anti-Nephi-Lehi misakripisyo sa ilang kinabuhi kay sa supakon ang ilang pakigsaad.

Alma 23

Liboan ka mga Lamanite ang nakabig ngadto sa Ginoo ug giusab ang ilang ngalan og Anti-Nephi-Lehi

1. Diha sa imong scripture study journal, pagdrowing og litrato sa usa ka nawong nga malipayon ug usa ka nawong nga masulub-on. Butangi ang malipayon nga nawong og label nga Matinud-anon ug ang masulub-on nga nawong Dili makanunayon. Samtang imong basahon ang mosunod nga pamahayag gikan ni Elder Richard G. Scott sa Korum sa Napulog Duha ka mga Apostoles, pangitaa ang mga pulong ug hugpong sa mga pulong nga naghulagway niining duha ka managlahi nga matang sa katawhan. Isulat kini nga mga pulong o hugpong sa mga pulong ubos sa motukma nga litrato.

Elder Richard G. Scott

“Ang matag usa kanato nakabantay sa unsang paagi ang mga indibidwal nagpadayon sa kinabuhi nga makanunayong naghimo og tarung nga mga butang. Ingon og malipayon sila, gani mahinamon sa kinabuhi. Kon ang lisud nga mga pagpili ang pagahimoon, ingon mapili nila kanunay ang husto, bisan og dunay daghang makaagni nga ubang kapilian. Nasayud kita nga ubos sila sa pagpanintal, apan ingon og wala lamang kini kanila. Sa samang paagi, atong nabantayan sa unsang paagi ang uban wala kaayoy kaisug sa desisyon nga ilang gihimo. Sa puno kaayo sa espirituhanong impluwensya nga palibut, nahukman nila ang pahimo og mas maayo, sa pag-usab sa ilang dalan sa kinabuhi, sa makapahuyang nga mga kinaiya. Sinsero kaayo sila sa ilang determinasyon nga mag-usab, apan sa gihapon sa kadugayan mobalik ra sila sa paghimo sa samang mga butang nga gihukman nilang talikdan.

“Unsa man ang naghimo og kalainan sa kinabuhi niining duha ka pundok? Sa unsang paagi ikaw padayon nga makahimo og tarung nga mga pagpili?” (“Full Conversion Brings Happiness,” Ensign, Mayo 2002, 24).

Pamalandunga kon unsaon nimo sa pagtubag ang duha ka pangutana ni Elder Scott. Samtang magtuon ka sa Alma 23–24, hunahunaa nganong dunay daghang miyembro sa Simbahan ang nagpabiling matinud-anon sa ebanghelyo ni Jesukristo sa tibuok nilang kinabuhi.

Human ang hari sa mga Lamanite nakabig sa ebanghelyo ni Jesukristo, mipadala siya og pamahayag ngadto sa tanan niyang mga tawo, ug usa ka milagro ang nahitabo. Liboan ka mga Lamanite ang nakabig usab. Basaha ang Alma 23:1–5 aron makita kon unsa kadto nga pamahayag ug sa unsang paagi nahitabo ang milagro.

Basaha ang Alma 23:6–7. Pila ka libo sa mga “nakabig ngadto sa Ginoo” ang nagpabiling kinabig sa tibuok nilang kinabuhi?

Human nakabig kini nga mga Lamanite, gusto sila nga tawagon sa bag-ong ngalan aron dili na sila mailhan nga mga Lamanite. Basaha ang Alma 23:16–18, ug ilha ang pangalan nga ilang gipili ug ang mga panalangin nga miabut kanila tungod sa ilang kamatinud-anon.

2. Sa imong scripture study journal, ubos sa hulagway nga gisulatan og “Matinud-anon,” isulat kon unsay imong nakat-unan gikan sa mga Anti-Nephi-Lehi mahitungod sa pagkamatinud-anon ngadto sa Ginoo sa tibuok nilang kinabuhi.

Isulat ang mosunod nga kamatuoran diha sa imong mga kasulatan o scripture study journal: Ang pagkakabig nagpasabut og espiritwal nga pagkausab ug pagkahimong bag-o nga tawo pinaagi sa gahum sa Dios. Sama sa mga Anti-Nephi-Lehi nga nausab, kon kamo andam nga modawat sa gahum sa Pag-ula sa imong kinabuhi pinaagi sa imong hugot nga pagtuo ug paghinulsol, mamahimo ikaw nga bag-ong tawo pinaagi sa gahum sa Dios ug magpabiling makabig sa tibuok nimong kinabuhi.

Tan-awa og usab ang duha ka pangutana ni Elder Scott, ug dayon basaha ang iyang tubag: “Ang tinuod nga pagkakabig maoy bunga sa hugot nga pagtuo, paghinulsol, ug padayong pagkamasulundon. … Ang tinuod nga pagkakabig mopalig-on sa imong kapasidad sa pagbuhat sa unsay imong nahibaloan nga kinahanglan nimong buhaton, kanus-a nimo kini kinahanglang buhaton, sa bisan unsa pay mga kahimtang” (“Full Conversion Brings Happiness,” 25).

3. Tubaga ang mosunod nga pangutana diha sa imong scripture study journal: Sumala sa Alma 23:18, ang kinabig nga mga Lamanite nagsugod sa pagkakugihan ug mahigalaon sa mga Nephite. Kon ang mga tawo maningkamot sa paghinulsol ug pag-usab sa ilang kinabuhi, nganong importante man para nila nga makig-uban sa uban kinsa naningkamot usab sa pagpakabuhing matarung?

4. Susiha ang mga termino nga imong gilista diha ubos sa hulagway nga “Matinud-anon” diha sa imong scripture study journal. Hunahunaa ang kamaayo nga pagkahatag og kahulugan niini nga termino sa lebel sa pagkakabig. Isulat sa imong scripture study journal unsay imong buhaton aron mamahimong hingpit nga makabig sa Ginoo.

Alma 24

Ang mga Anti-Nephi-Lehi misaad nga dili na mogamit pag-usab og mga hinagiban

Sumala sa narekord sa Alma 24:3, ang hari sa mga Lamanite mitugyan sa gingharian ngadto sa iyang anak sa hapit na siya mamatay, ug iyang ginganlan ang iyang anak og Anti-Nephi-Lehi. Basaha ang Alma 24:1–5 aron makita unsa ang problema nga mitumaw sa wala madugay hinungdan nga si Ammon ug iyang mga kaigsoonan mihimo og konseho kauban sa hari. Dihang nahibaloan nga ang wala makabig nga mga Lamanite makiggubat batok sa mga Anti-Nephi-Lehi, kining matarung nga mga tawo mihukom nga dili sila mangandam sa pagpanalipud sa ilang kaugalingon (tan-awa sa Alma 24:6 ). Basaha ang Alma 24:7–14, ug ilha kon ngano nga ang mga Anti-Nephi-Lehi mihimo man niini nga desisyon.

5. Sa imong scripture study journal, isulat kon unsay imong nakat-unan gikan sa mga Anti-Nephi-Lehi kon unsay ipasabut sa pagbiya sa mga sala kon kita maghinulsol.

The Anti-Nephi-Lehies Burying Their Swords

Basaha ang Alma 24:15–18, nga mangita kon unsay gihimo sa mga Anti-Nephi-Lehi sa pagpakita sa Ginoo nga sila tinuoray nga naghinulsol. Nganong ang mga tawo milubong man sa ilang mga espada ug ubang mga hinagiban sa ilalum sa yuta? (Tan-awa sa Alma 24:17–18.)

President Spencer W. Kimball

Sa kaugalingon natong kinabuhi kon maghinulsol kita sa atong mga sala, kinahanglan kitang maningkamot nga dili na gayud mohimo niana nga mga sala pag-usab. Basaha ang gitudlo ni Presidente Spencer W. Kimball mahitungod sa pagbiya sa sala nga usa ka importanting aspeto sa paghinulsol: “Sa pagbiya sa sala dili kay basta na lang makapanghinaot ang tawo alang sa mas maayong kahimtang. Kinahanglan gayud niyang himoon kini. … Siya kinahanglan nga sigurado nga siya wala lamang mibiya sa sala apan nga siya nag-usab sa mga sitwasyon nga naglibut sa sala. Siya kinahanglan gayud nga molikay sa mga dapit ug mga kahimtang ug mga higayon diin ang sala nahitabo, kay kini labing dali nga makapausab niini. Kinahanglan gayud nga iyang biyaan ang mga tawo kinsa kauban sa paghimo sa sala. Dili niya kasilagan ang mga tawo nga naapil apan kinahanglan gayud nga likayan kini ug ang tanan nga may kalabutan sa sala. Kinahanglan gayud siya … nga magtukod og bag-ong kinabuhi. Kinahanglan gayud nga iyang wad-on ang bisan unsa nga makapahinumdom sa karaang mga panumduman” (The Miracle of Forgiveness [1969], 171–72).

Sa Alma 24:10–12, markahi ang mga pulong o hugpong sa mga pulong nga nagpakita sa paghinulsol sa mga Anti-Nephi-Lehi ug ang pagpasaylo sa Dios sa ilang mga sala. Isulat ang mosunod nga baruganan diha sa margin tupad niini nga mga bersikulo: Kon buhaton nato ang tanan aron makahinulsol, wagtangon sa Dios ang atong pagbati nga sad-an ug tabangan kita nga magpabiling limpyo. I-refer ngadto sa istorya sa mga Anti-Nephi-Lehi nga milubong sa ilang mga hinagiban sa yuta. Sa atong panahon, gusto gihapon kitang “molubong” sa atong mga sala aron ipakita sa Ginoo nga gibuhat nato ang tanan aron makahinulsol ug dili na buhaton ang mao gihapon nga mga sala.

6. Hunahunaa kon sa unsang paagi kaha ang mosunod nga mga sitwasyon makapaniguro nga dili na nila buhaton pag-usab ang mao gihapon nga mga sala. Isulat ang imong mga sugyot alang sa matag sitwasyon diha sa imong scripture study journal:

   1. Usa ka tawo mitan-aw og pornograpiya nga mga eksena sa salida tungod kay giawhag sa mga higala ang maong tawo sa pagtan-aw sa salida uban nila.

   2. Usa ka tawo sa tago misupak sa Pulong sa Kaalam kauban sa mga higala dihang ang usa ka grupo nanggawas sa pagkagabii.

   3. Usa ka tawo mihatag og tubag gikan sa nakompleto na nga eksamin ngadto sa higala kinsa nag-andam sa pagkuha sa sama nga eksamin sa dili madugay nianang adlawa.

Pamalandunga ang mosunod nga pangutana: Unsay kinahanglan nimong “ilubong” sa imong kinabuhi aron dili ka na matintal sa paghimo sa sala nga imo nang nahinulsulan?

Basaha ang Alma 24:19-22 aron makita kon unsay gihimo sa mga Anti-Nephi-Lehi dihang ang mga Lamanite nakig-away kanila. Kining mga tawhana mipakita sa ilang debosyon sa Ginoo pinaagi sa pagkaandam nga mamatay kay sa supakon ang saad nga ilang gihimo ngadto sa Ginoo. Gitugyan nila sa hingpit ang ilang kinabuhi ngadto sa Ginoo, ug padayon nilang gipabilin ang hingpit nga kamatinud-anon ngadto Kaniya sa tibuok nilang kinabuhi.

Basaha ang gitudlo ni Presidente Ezra Taft Benson mahitungod sa pagtugyan sa atong kinabuhi ngadto sa Ginoo:

President Ezra Taft Benson

“Ang mga tawo nga nag-usab para kang Kristo pagapangulohan ni Kristo. Sama ni Pablo magpangutana sila, ‘Ginoo, unsa ang gusto nimo nga akong buhaton?’ (Mga Buhat 9:6.) …

“Ang ilang kabubut-on nahisubay sa Iyang kabubut-on. (Tan-awa sa Juan 5:30.)

“Gihimo nila kanunay ang mga butang nga nagpahimuot sa Ginoo. (Tan-awa sa Juan 8:29.)

“Dili lang sila magpakamatay alang sa Ginoo, apan mas importante gusto nilang magpakabuhi alang Kaniya.

“Sudla ang ilang mga panimalay, ug ang mga litrato sa ilang mga bongbong, ang mga basahon sa ilang butanganan, ang musika sa kahanginan, ilang mga pulong ug mga buhat nagtug-an nga sila mga Kristiyano.

“Nagbarug sila isip mga saksi sa Dios sa tanang panahon, ug sa tanang butang, ug sa tanang dapit. (Tan-awa sa Mosiah 18:9.)

“Anaa sa ilang mga hunahuna si Kristo, samtang sila nagtan-aw Kaniya sa matag hunahuna. (Tan-awa sa D&P 6:36.)

“Anaa sa ilang mga kasingkasing si Kristo kay ang ilang mga pagbati napahimutang diha Kaniya hangtud sa hangtud. (Tan-awa sa Alma 37:36.)” (“Born of God,” Ensign, Nob. 1985, 6–7).

7. Tubaga ang mosunod nga pangutana diha sa imong scripture study journal: Niining semanaha, unsa ang ubang mga paagi nga imong ikapakita nga imong gitugyan sa hingpit ang imong kinabuhi ngadto sa Ginoo?

Basaha ang Alma 24:23–27, nga naghulagway sa reaksyon sa mga Lamanite dihang nakita nila nga ang mga Anti-Nephi-Lehi dili makig-away. Samtang imong basahon, pangitaa ang mga pulong o hugpong sa mga pulong nga nagtudlo niini nga baruganan: Pinaagi sa pagkamatinud-anon ngadto sa Ginoo, matabangan nato ang uban ngadto sa pagkakabig. Hunahunaa sa unsang paagi ang piho nga mga sakop sa imong pamilya o piho nga mga higala maimpluwensya sa imong desisyon nga magmatinud-anon sa Ginoo.

8. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 23–24 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: