Ulohan nga Pahina, Pasiuna, ug mga Pagpamatuod sa mga Saksi

Pasiuna

Hunahunaa nga ang usa ka higala nangutana kanimo ngano nga ang mga miyembro sa Ang Simbahan ni Jesukristo sa mga Santos sa Ulahing mga Adlaw nagkinahanglan sa Basahon ni Mormon kon naa na nato ang Biblia. (Tingali nakasinati na ka niini!) Unsay imong isulti sa imong higala?

Ang Basahon ni Mormon nagsugod og ulohan nga pahina ug usa ka pasiuna nga nagpasabut sa katuyoan niining sagrado nga basahon, lakip na ang epekto niini sa atong pagpamatuod ug relasyon ngadto sa Dios. Ang nahaunang mga pahina sa Basahon ni Mormon naglangkob usab sa mga pagpamatuod sa mga saksi nga nakakita sa bulawang mga palid diin ang basahon nahubad ug nagpamatuod sa balaang sinugdanan niini.

Sa imong pagkompleto niini nga leksyon, paghunahuna og unsaon nimo pag-angkon og labing daghan gikan sa imong pagtuon sa Basahon ni Mormon niining tuiga ug sa unsang paagi nga ang Basahon ni Mormon makatabang kanimo sa pagpalambo og mas dakong pagpamatuod bahin sa Manluluwas nga si Jesukristo ug sa Iyang gipahiuli nga ebanghelyo.

Ang Ulohan nga Pahina

Si Propeta Joseph Smith mipasabut nga ang karaang propeta nga si Moroni milakip sa ulohang pahina sa Basahon ni Mormon sa bulawang palid: “Ang ulohang pahina sa Basahon ni Mormon usa ka literal nga paghubad, nga gikuha gikan mismo sa katapusang palid, sa wala nga bahin sa koleksyon o libro sa mga palid, nga naglangkob sa rekord nga gihubad, … ug … kanang sama nga ulohang pahina dili usa ka moderno nga komposisyon, kanako o sa laing tawo kinsa nagpakabuhi o buhi pa niini nga henerasyon” (Mga Pagtulun-an sa mga Presidente sa Simbahan: Joseph Smith [2007], 72).

Samtang ikaw mobasa sa unang paragraph diha sa ulohan nga pahina, pangita og mga pulong nga gigamit ni Moroni sa pagsaksi sa pagkaapil sa Ginoo sa pag-abut sa Basahon ni Mormon.

Sa imong scripture study journal, ipasabut nganong importante nga imong masayran kon sa unsang paagi nga ang Ginoo nalambigit sa pagsulat ug paghubad sa Basahon ni Mormon.

Samtang ikaw mobasa sa ikaduhang paragraph diha sa ulohan nga pahina, pangita og unsa ang tulo ka nag-unang mga katuyoan nga gihatag ni Moroni alang sa Basahon ni Mormon nga nahisulat. (Mahimo nimong markahan kini diha sa imong mga kasulatan.) Ang “balay ni Israel” nagpasabut niadtong mga kaliwat ni Jacob ingon man usab niadtong mga miyembro sa pakigsaad sa simbahan sa Ginoo (tan-awa sa Giya ngadto sa mga Kasulatan, “Israel”). Agig dugang, ang mga pulong nga “Judeo ug Hentil” naglakip sa tanang mga anak sa Langitnong Amahan. Sa ikaduhang paragraph, i-personal ang mensahe sa ulohang pahina pinaagi sa pagpuli sa imong pangalan alang sa “ang salin sa Balay ni Israel” ug alang sa “ang Judeo ug Hentil.”

Sa imong scripture study journal, ipasabut kon sa unsang paagi nga ang pagkahibalo niining mga katuyoan sa Basahon ni Mormon makatabang kanimo sa pagsabut sa kaimportante niini.

Si Presidente Ezra Taft Bension miingon sa mosunod kabahin sa “dako kaayo nga misyon” o katuyoan sa Basahon ni Mormon:

“Ang dako kaayo nga misyon sa Basahon ni Mormon, ingon nga narekord diha sa ulohan nga pahina, mao ‘ang pagpamatuod ngadto sa Judeo ug sa Hentil nga si Jesus mao ang Kristo, ang Dios sa kahangturan, nagpaila sa iyang kaugalingon ngadto sa tanan nga mga nasud.’

“Ang matinuoron nga tigpangita sa kamatuoran makaangkon og pagpamatuod nga si Jesus mao ang Kristo samtang siya magmainampuon sa pagpamalandong sa dinasig nga mga pulong sa Basahon ni Mormon.

“Sobra sa katunga sa tanang bersikulo sa Basahon ni Mormon naghisgot sa atong Ginoo. Ang lain-lain nga pangalan ni Kristo mas kanunayng gihisgutan sa matag bersikulo sa Basahon ni Mormon kay sa Bag-ong Tugon” (“Come unto Christ,” Ensign, Nob. 1987, 83).

Ingon sa gipahayag sa ulohan nga pahina niini, ang Basahon ni Mormon mao ang saksi nga si Jesus mao ang Kristo. Samtang magtuon ka sa Basahon ni Mormon karong tuiga, pag-focus sa unsay imong nakat-unan bahin ni Jesukristo ug pangutana sa Langitnong Amahan diha sa pag-ampo aron sa pagkumpirma sa unsay imong nakat-unan pinaagi sa gahum sa Espiritu Santo.

Ang Pasiuna sa Basahon ni Mormon

Nahibulong ba ikaw kon sa unsang paagi nga ang arko sa usa ka tulay o sa usa ka building nakapahimo niini nga dili mahulog bisan nga walay suporta sa ilawom niini? Kon ang usa ka arko himoon, ang duha ka kilid buhaton nga adunay suporta nga mogunit niini. Ang luna sa ibabaw sa arko gisukod og maayo, ug dunay bato, nga gitawag og “sukaranang bato,” pikason aron haum kaayo. Kon ang sukaranang bato nabutang na sa lugar, ang arko makabarug nga walay suporta. Hunahunaa unsay mahitabo sa arko kon ang sukaranang bato tangtangon.

Pakli ngadto sa pasiuna sa Basahon ni Mormon ug basaha ang ikaunom nga paragraph, nga nagsugod sa “Mahitungod niini nga talaan …” Samtang mobasa ikaw niini nga paragraph, pangita sa tulo ka mahinungdanon nga mga baruganan nga gitudlo ni Propeta Joseph Smith bahin sa Basahon ni Mormon.

Si Presidente Ezra Taft Benson mipasabut og maayo kon sa unsang paagi nga ang Basahon ni Mormon nahimong sukaranang bato sa atong relihiyon. Sa imong pagbasa sa kinutlo, linyahi ang mga pulong o mga pamahayag nga makatabang kanimo sa paghulagway ngadto sa usa ka tawo sa mahinungdanong tahas sa Basahon ni Mormon sa atong relihiyon.

“Adunay tulo ka mga pamaagi diin ang Basahon ni Mormon nahimong sukaranang bato sa atong relihiyon. Kini mao ang sukaranang bato sa atong pagsaksi kang Kristo. Kini mao ang sukaranang bato sa atong doktrina. Kini mao ang sukaranang bato sa atong pagpamatuod.

“Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya Mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahum ug katin-awan. …

“Ang Ginoo Mismo mipahayag nga ang Basahon ni Mormon naglangkob sa ‘kahingpitan sa ebanghelyo ni Jesukristo’ (D&P 20:9). Kana wala magpasabut nga kini naglangkob sa tanang pagtulun-an, sa tanang doktrina nga gipadayag. Hinoon, kini nagpasabut nga diha sa Basahon ni Mormon kita makakaplag sa kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug simple nga paagi aron bisan ang mga bata makakat-on sa mga pamaagi sa kaluwasan ug kahimayaan. …

“Sa katapusan, ang Basahon ni Mormon mao ang sukaranang bato sa pagpamatuod. Sama nga ang arko malumpag kon tang-tangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. Ang mga kaaway sa Simbahan klarong nakasabut kaayo niini. Mao kini nganong sila naningkamot pag-ayo sa pagpanghimakak sa Basahon ni Mormon, kay kon kini mapamatud-an nga dili tinuod, malakip usab si Propetang Joseph Smith. Mao usab ang atong pag-angkon sa mga yawe sa priesthood, ug pagpadayag, ug ang gipahiuli nga Simbahan. Apan sa sama nga paagi, kon ang Basahon ni Mormon tinuod—ug minilyon karon ang nagpamatuod nga sila adunay pagsaksi sa Espiritu nga kini tinuod gayud—nan ang tawo kinahanglan nga modawat sa mga pangangkon sa Pagpahiuli ug sa tanan nga nag-uban niini”. (“The Book of Mormon—Keystone of Our Religion,” Ensign, Nob. 1986, 5–6).

Basaha ang ikawalo nga paragraph sa pasiuna sa Basahon ni Mormon, nga nagsugod sa “Kami nagdapit sa tanan nga mga tawo sa tanan nga dapit … ,” ug ilha unsaon nimo pagkahibalo nga ang Basahon ni Mormon tinuod. Human nimo mabasa ang paragraph, kompletuha ang mosunod nga han-ay sa mga pulong diha sa imong scripture study journal: Sa atong pagbasa, pagpamalandong, ug pag-ampo, ang Espiritu Santo mo …

Sama nga ang sukaranang bato nagsuporta sa laing mga bato sa arko, ang usa ka pagpamatuod sa Basahon ni Mormon naglig-on sa atong mga pagpamatuod sa ubang importante nga mga baruganan sa ebanghelyo. Basaha ang ikasiyam nga paragraph sa pasiuna, nga nagsugod sa “Kadto kinsa makabaton niini nga balaanon nga pagpamatuod … ,” ug linyahi ang tulo ka dugang nga mga kamatuoran nga makaangkon ka og usa ka pagsaksi samtang imong sundon ang tambag sa ikawalo nga paragraph. Samtang kita mobasa, mamalandong, ug mag-ampo bahin sa Basahon ni Mormon, ang Espiritu Santo mopamatuod nga kini tinuod, nga si Jesus mao ang Kristo, nga si Joseph Smith usa ka propeta sa Dios, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo dinhi sa yuta.

Sa imong scripture study journal, ipasabut ngano nga ang Basahon ni Mormon gitawag og ang sukaranang bato sa atong tinuohan.

Ang Pagpamatuod sa mga Saksi

Hunahunaa nga ikaw usa ka maghuhukom nga naninguha sa pagtino sa kamatuoran mahitungod sa unsay nahitabo sa panagbingkil tali sa duha ka grupo. Unsa kamahinungdanon kon naay usa ka saksi sa unsay nahitabo? Unsa pa kamahinungdanon kon naay daghang mga saksi?

Ang Ginoo mipakita sa daghang mga saksi sa bulawan nga mga palid diin gihubad ni Joseph Smith ang Basahon ni Mormon. Basaha “Ang Pagpamatuod sa Tulo ka mga Saksi,” ug markahi ang tulo o upat ka mga pulong nga ilang gigamit sa pagpamatuod bahin sa mga palid ug ang pag-abut sa Basahon ni Mormon. Dayon basaha “Ang Pagpamatuod sa Walo ka mga Saksi.” Tan-awa ang mga kalainan sa mga kasinatian sa duha ka grupo, ingon sa gipakita sa ubos.

Tulo ka mga Saksi	Walo ka mga Saksi
Usa ka anghel ang mipakita kanila sa mga palid, sa Urim ug Thummim, sa panagang sa dughan, sa Liahona, ug sa espada ni Laban.	Si Joseph Smith mipakita nila sa mga palid.
Ang tingog sa Dios mipahayag sa kabalaan sa rekord.	Ilang nakuptan (“naalsa”) ang bulawan nga mga palid.

Tubaga ang mosunod nga pangutana diha sa imong scripture study journal: Nganong importante nga adunay uban nga mga saksi sa bulawan nga mga palid agig dugang sa kang Joseph Smith?
Sa imong scripture study journal, isulat ang imong kaugalingon nga pagpamatuod kabahin sa Basahon ni Mormon, ni Joseph Smith, ug sa gipahiuli nga ebanghelyo ni Jesukristo. Kon gibati nimo nga ikaw wala pay imong kaugalingon nga pagpamatuod, isulat unsay imong buhaton aron sa pagpalambo og usa ka pagpamatuod sa Basahon ni Mormon karong tuiga. Aron sa pagpalig-on sa imong pagpamatuod, ipakigbahin ang imong mga pagbati bahin sa imong gisulat ngadto sa usa sa imong mga ginikanan o sa laing sakop sa pamilya o higala.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang “Pasiuna nga mga Materyal sa Basahon ni Mormon” ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: