3 Nephi 15–16

Pasiuna

Samtang nagpadayon ang Manluluwas sa pagtudlo sa katawhan didto sa templo sa yuta sa Bountiful, mipahayag Siya nga ang balaod ni Moises natuman diha Kaniya ug nga Siya mao ang kahayag ug balaod nga kinahanglang tan-awon sa katawhan. Ang Manluluwas dayon mipasabut ngadto sa napulog duha ka Nephite nga mga disipulo nga ang katawhan sa Amerika mao ang “ubang mga karnero” nga Iyang gihisgutan ngadto sa katawhan sa Jerusalem (tan-awa sa Juan 10:14–16). Misaad usab Siya nga kadtong kinsa maghinulsol ug mobalik ngadto Kaniya pagaiphon uban sa Iyang mga katawhan sa pakigsaad.

3 Nephi 15:1–10

Ang Manluluwas mipahayag nga Siya nakatuman sa balaod ni Moises

Natingala ka ba ngano nga ang Ginoo misugo nato sa pagsunod og piho nga mga balaod ug mga sugo, sama sa pagbayad sa ikapulo, pagbalaan sa adlaw nga Igpapahulay, o pagtahud sa atong mga ginikanan? Samtang si Jesukristo nagpadayon sa pagtudlo sa mga Nephite, mitudlo siya kanila sa pinakaimportante nga katuyoan luyo sa Iyang mga balaod ug mga sugo. Bantayi kini nga katuyoan samtang magtuon ka sa 3 Nephi 15.

Sa dihang nahuman na ang Manluluwas sa pagpakigsulti sa pundok sa katawhan, nakasabut Siya nga pipila kanila adunay pangutana. Basaha ang 3 Nephi 15:1–2, ug isulat kon unsay gikahibudngan ug gikatingad-an sa katawhan:

Sa pagsabut ngano nga ang mga Nephite nahibulong ug natingala sa pamahayag sa Manluluwas nga ang “daan nga mga butang” sa balaod ni Moises milabay na ug ang “tanan nga mga butang nahimo nga bag-o,” kini makatabang sa pagsabut nga sulod sa daghang mga katuigan sa mga Nephite nakahibalo ug nagsunod sa balaod ni Moises. Ang ilang mga balaod, mga tulumanon, ug organisasyon sa simbahan gibase sa balaod ni Moises, nga ang maong balaod gihatag sa karaan pinaagi sa premortal nga si Jesukristo sa pag-andam sa katawhan alang sa Iyang pag-anhi ug motudlo nila ngadto sa Iyang maulaong sakripisyo. Karon ang Balaan nga Magbabalaod nagtindog sa ilang atubangan nga namahayag nga ang Pag-ula natuman an (tan-awa sa 3 Nephi 11:10–14) ug nga diha Kaniya ang balaod ni Moises natuman na (tan-awa sa 3 Nephi 9:16–20; 12:46–47). Ang Iyang pamahayag nga ang daan nga mga butang sa balaod ni Moises “milabay na” ug ang bag-o nga mga butang mopuli sa balaod nga mousab dayon sa unsa nga paagi sila mosimba sa Dios.

Ang Manluluwas mitubag sa ilang mga pangutana pinaagi sa paghatag og gibug-aton sa importante kaayo nga doktrina. Basaha ang 3 Nephi 15:3–5, 9, ug i-highlight ang mga pulong sa tubag sa Manluluwas nga nakahatag og kasiguroan sa mga Nephite nga ang tinubdan sa balaod wala mausab.

Tubaga ang mosunod nga pangutana diha sa imong scripture study journal: Unsa sa imong hunahuna ang gitudlo ni Jesus sa mga Nephite sa dihang miingon Siya, “Ako mao ang balaod”?3 (Nephi 15:9).

Gikan sa mga pagtulun-an sa Manluluwas niini nga mga bersikulo, makat-unan nato nga si Jesukristo mao ang tumong sa tanang mga balaod ug mga sugo sa ebanghelyo. Pamalandunga ngano nga kini nga kamatuoran importante unta ngadto sa mga Nephite samtang sila nakahibalo nga ang daan nga balaod ni Moises gipulihan sa mas labaw nga balaod ug nakasinati og mga kausaban sa ilang paagi sa pagsimba.

Basaha ang 3 Nephi 15:9–10, ug markahi unsay gusto sa Ginoo nga atong buhaton isip resulta niini nga doktrina. Gamita unsay imong nakat-unan niini nga mga bersikulo sa pagkompleto sa mosunod nga baruganan: Kon kita ngadto ni Jesukristo pinaagi sa pagsunod , Iyang ihatag kanato .

Hunahunaa ang mga sugo sama sa pagbayad sa ikapulo, pagbalaan sa adlaw nga Igpapahulay, ug pagtahud sa atong mga ginikanan, ug tubaga ang mosunod nga mga pangutana diha sa imong scripture study journal:
1. Sa unsa nga paagi nga ang tawo nagsunod sa mga sugo ug sa gihapon wala magtan-aw ngadto kang Kristo?
2. Sa unsa nga mga paagi nga ang atong pagkamasulundon sa mga sugo mausab kon ang atong focus mao ang pagtan-aw ni Jesukristo ug dili lamang sa pagsunod sa mga lagda?

Usa ka paagi nga ang atong pagkamasulundon sa mga sugo mahimong mausab kon kita motan-aw ngadto ni Kristo mao nga ang atong kadasig sa pagsunod mausab gikan sa katungdanan, o bisan gugma sa lagda, ngadto sa gugma alang sa Ginoo.

Basaha ang mosunod nga pamahayag ni Elder Marvin J. Ashton sa Korum sa Napulog Duha ka mga Apostoles: “Pagkanindot nga espirituhanong kahupayan ug panalangin nga makahibalo nga, kon kita motan-aw sa atong Manluluwas nga si Jesukristo ug molahutay hangtud sa katapusan, ang kinabuhing dayon ug kahimayaan atong maangkon. … Mas makaduol kita sa Dios kon kita motan-aw kaniya. Ang pagtan-aw ngadto sa Dios nagtudlo nato sa pagserbisyo ug pagpuyo nga walay pinugsanay [walay pagpamugos o gipugos sa pagbuhat og usa ka butang]” (“There Are Many Gifts,” Ensign, Nob. 1987, 21).

Pagpili og usa sugo nga imong gikahibudngan nganong kinahanglan nimong sundon, ug ikonsiderar kon sa unsa nga paagi nga ang sugo makagiya nimo ngadto ni Jesukristo. Mahimo kang maghimo og tumong nga mahimong mas masulundon sa sugo nga imong gipili ug pagsulat og pipila ka mga ideya kon unsaon kini pagtuman. Irekord ang imong mga hunahuna diha sa imong scripture study journal.

3 Nephi 15:11–16:5

Si Jesukristo namulong ngadto sa Iyang mga disipulo mahitungod sa Iyang ubang mga karnero

Mibati ka ba nga nakalimtan o nag-inusara ug naghunahuna kon ang Langitnong Amahan nakaila ba kon kinsa ka? Bisan og kita mobati nga nag-inusara o usahay mobati nga dili kaayo importante kay sa uban, nagpakabana ang Dios sa Iyang katawhan ug nagpakita sa Iyang kaugalingon ngadto kanila. Bantayi ang ebidensya niini nga kamatuoran samtang magtuon ka sa 3 Nephi 15 ug sa sinugdanan sa 3 Nephi 16.

Sumala sa narekord sa Bag-ong Tugon ug sa Basahon ni Mormon, nangalagad si Jesukristo sa katawhan sa Daang Kalibutan ug sa Amerika. Basaha ang 3 Nephi 15:11–17 mangita kon gisulti sa Ginoo nga Iyang giingon niadtong atua sa Jerusalem mahitungod sa Iyang katawhan sa Amerika.

Ang “ubang mga karnero” nagpasabut sa ubang mga sumusunod sa Magbalantay, nga si Jesukristo. Ang usa ka panon mao ang pundok sa mga karnero, apan ang pulong panon nga gigamit niining higayuna nagpasabut sa pundok sa katawhan nga dunay komon nga pagtuo kang Jesukristo. Sumala sa 3 Nephi 15:17, giunsa pagsulti sa Ginoo nga Siya magpakita sa Iyang kaugalingon ngadto sa Iyang ubang mga karnero?

Gipasabut ni Jesus ngano nga ang Langitnong Amahan misugo Kaniya nga dili mohatag og dugang kahibalo bahin sa Iyang ubang mga karnero niadtong atua sa Jerusalem. Siksika sa 3 Nephi 15:18–20, ug markahi ang pagpasabut sa Manluluwas. Pinaagi sa pagkahibalo nga ang Amahan mitipig og mas dako nga kahibalo bahin sa mga Nephite gikan sa mga Judeo tungod sa kadautan sa mga Judeo, makakat-on kita og importante nga baruganan kabahin kon sa unsa nga paagi kita makadawat og kahibalo ug kamatuoran gikan sa Ginoo. Base niini nga mga bersikulo, unsaon nimo sa pagkompleto ang mosunod nga baruganan? Ang Dios mohatag nato og kahibalo ug kamatuoran sumala sa atong .

Ang Ginoo misulti sa mga Nephite nga sila kabahin sa ubang mga karnero nga Iyang gihisgutan didto sa Jerusalem. Ang mga Judeo nagtuo nga Siya naghisgot sa mga Hentil (dili mga Israelite). Wala sila makasabut nga ang mga Hentil dili “maminaw” sa tingog sa Manluluwas (tan-awa sa 3 Nephi 15:21–23).

Basaha ang 3 Nephi 15:24, ug pangitaa kon giunsa sa Ginoo pagpasalig ang mga Nephite sa Iyang pagpakabana kanila.

Basaha ang 3 Nephi 16:1–3, ug pangitaa kinsa pa ang maminaw sa tingog sa Manluluwas. Wala kitay rekord sa kasulatan kon kinsa pa ang gibisitahan sa Manluluwas, apan klaro nga mibisita Siya sa ubang mga grupo ug midala kanila ngadto sa Iyang “panon.”

Giunsa pagpakita ni Jesukristo nga Siya nagpakabana niadtong katawhan kinsa dilli makapaminaw sa Iyang tingog? Basaha ang 3 Nephi 15:22–23 ug 3 Nephi 16:4, ug pangitaa kon giunsa sa pagsulti sa Ginoo nga Siya mopakita sa Iyang kaugalingon ngadto sa mga Hentil.

Gikan sa unsay imong natun-an na sa 3 Nephi 15 ug 16, unsa nga ebidensya ang imong nakita nga ang Dios nagpakabana sa Iyang katawhan ug mopakita sa Iyang kaugalingon ngadto kanila?

Basaha ang 3 Nephi 16:5, ug pangitaa unsay mahitabo sa katapusang mga adlaw human makahibalo ang mga Hentil bahin ni Jesukristo ug sa Iyang ebanghelyo.

Misaad si Jesus sa pagpanalangin sa Iyang tanang mga anak—ang balay ni Israel ug ang mga Hentil—pinaagi sa paghatag kanila sa Iyang mga pulong nga gisulat sa mga Nephite. Ang mga sinulat sa mga Nephite makatabang sa pagkabig sa mga Hentil, kinsa motabang sa pagpundok sa balay ni Israel sa katapusang mga adlaw (tan-awa sa 3 Nephi 16:4–5).

Sa imong scripture study journal, tubaga ang mosunod nga pangutana: Unsa nga ebidensya gikan sa imong kaugalingong kinabuhi ang imong nakita nga nagpakita nga nagpakabana si Jesukristo kanatong tanan?

3 Nephi 16:6–20

Mihatag si Jesukristo og mga panalangin ug mihatag og mga pasidaan ngadto sa mga Hentil kinsa natawo sa ulahing mga adlaw

Gusto ba gayud ikaw sukad nga mahimong kabahin sa usa ka grupo, club, o team? Paghunahuna og piho nga ehemplo. Unsa ang gikinahanglan aron mahimong miyembro sa maong grupo? Ang labing dakong grupo nga ikaw mahimong miyembro mao Ang Simbahan ni Jesukristo sa mga Santos sa Ulahing mga Adlaw, ang katawhan sa pakigsaad sa Ginoo.

Basaha ang 3 Nephi 16:6–7, ug pangitaa kon unsay mahitabo tungod sa pagtuo sa mga Hentil ug sa kawalay pagtuo sa balay ni Israel sa katapusang mga adlaw. Tingali makatabang nga makasabut nga adunay dili matuohon nga mga Hentil sa katapusang mga adlaw kinsa mokatag ug dili maayong motagad sa mga sakop sa balay ni Israel (tan-awa sa 3 Nephi 16:8–9). Ang Ginoo mokuha sa Iyang ebanghelyo gikan sa dautan ug ipadayag kini ngadto sa matarung, sa mga Israelite ug mga Hentil, sa katapusan nga mga adlaw (tan-awa sa 3 Nephi 16:10–12).

Basaha ang 3 Nephi 16:13, ug pangitaa unsay gikinahanglan aron mahimong usa sa katawhan sa pakigsaad sa Ginoo. Ginamit ang unsay imong nakat-unan sa 3 Nephi 16:13, kompletuha ang mosunod nga baruganan: Kon kita , nan kita pagaiphon uban sa Iyang katawhan.

Tubaga ang mosunod nga mga pangutana diha sa imong scripture study journal:
1. Unsaon nimo pagkahibalo nga ikaw kabahin sa katawhan sa pakigsaad sa Ginoo?
2. Sa unsa nga paagi kini nakapanalangin sa imong kinabuhi nga maihap uban sa Iyang katawhan?
Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang 3 Nephi 15–16 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: