Enos

Pasiuna

Human mamalandong sa mga pulong sa iyang amahan, si Enos nag-ampo ug nakadawat og kapasayloan sa iyang mga sala. Dayon siya nag-ampo alang sa espirituhanong kaayohan sa mga Nephite ug sa mga Lamanite ug migahin sa iyang kinabuhi sa paghago alang sa ilang kaluwasan.

Enos 1:1–8

Human mamalandong sa mga pulong sa iyang amahan, si Enos nag-ampo ug nakadawat og kapasayloan sa iyang mga sala

Basaha ang Enos 1:1, 3, ug tan-awa ang impluwensya ni Jacob ngadto ni Enos. Bisan tuod si Enos anak ug apo sa mga propeta, kinahanglan gihapon niyang masinati ang gahum sa Pag-ula ni Jesukristo alang sa iyang kaugalingon.

Paghunahuna og higayon nga mibati ka og grabeng kagutom. Lingini ang pipila ka mga pulong sa ubos nga naghulagway sa unsay imong bation kon gutumon ka:

haw-ang
luya
wala matagbaw
gigutom
sakit
mabalak-on
kahidlaw

I-highlight ang mga pulong nga “ang akong kalag gigutom” sa Enos 1:4. Unsa kaha ang gipasabut niini nga mga pulong?

Ang mga pulong nga “ang akong kalag gigutom” mahimong maglakip sa mga pagbati nga sama sa espirituhanon nga kahaw-ang o kasakit o tinguha nga mapuno sa espirituhanong paagi. Si Enos misulat mahitungod sa usa ka higayon sa dihang siya nakasinati niining espirituhanon nga kagutom. Misulat siya nga ang mga pulong sa iyang amahan “mituhop gayud pag-ayo sa [iyang] kasingkasing” (Enos 1:3). Samtang namalandong siya niadto nga mga pulong, nakasinati siya og mga tinguha nga naggiya kaniya sa paglihok uban ang hugot nga pagtuo. Ang iyang matinud-anon nga mga buhat nagdala og mga kausaban sa iyang kinabuhi ug mga panalangin gikan sa Ginoo.

Sugdi ang sunod-sunod nga mga kalihokan sa pagtabang kanimo nga makasabut sa kasinatian ni Enos ug makonektar kini ngadto sa imong kinabuhi pinaagi sa pagbahin sa usa ka tibuok pahina sa imong scripture study journal ngadto sa unom ka seksyon ug labelan ang matag seksyon sa mosunod:

Unsa ang gitinguha ni Enos:	Unsay akong gitinguha:
Unsay gibuhat ni Enos:	Unsay gikinahanglan nakong buhaton:
Unsay nasinati ni Enos:	Akong kasinatian:

Basaha ang Enos 1:2–3, ug pangita og mga pulong sa matag bersikulo nga nagpakita kon unsay gitinguha ni Enos nga maangkon sa iyang kinabuhi. Isulat kini nga mga pulong diha sa seksyon nga gimarkahan og “Unsay gitinguha ni Enos” diha sa imong scripture study journal nga tsart.

Ang tinguha ni Enos nga kapasayloan sa iyang mga sala nagtabang kanato nga makasabut kon unsa ang iyang gipasabut sa Enos 1:4 dihang siya misulat, “Ang akong kalag gigutom.” Agig dugang sa pagkagutom alang sa kapasayloan, si Enos nagtinguha usab og “kinabuhi nga dayon, ug [sa] hingpit nga kalipay sa mga santos” (Enos 1:3). Gusto niya nga mobati sa kalipay nga naggikan sa pagkahimong takus nga makig-uban sa Ginoo ug sa uban nga mga matarung.

Ikonsiderar kon duna ka bay pipila sa samang pagbati sa espirituhanong kagutom nga gihulagway ni Enos. Sa imong scripture study journal nga tsart, diha sa seksyon nga gimarkahan og “Unsay akong gitinguha”, pagsulat mahitungod sa pipila sa espirituhanong mga tinguha nga gigutom ka diha sa imong kinabuhi.

Ang mga tinguha ni Enos migiya kaniya sa pagpakita sa iyang hugot nga pagtuo ug sa paglihok. Sa Enos 1:2, hibaloi ug markahi ang pulong nga gigamit ni Enos sa paghulagway sa paningkamot nga iyang gihimo. Bantayi nga si Enos wala makigbisog uban sa Dios apan atubangan sa Dios diha sa pag-ampo. Ang ingon nga pakigbisog naglakip og mental ug espirituhanon nga panlimbasug aron sa pagpakita sa Langitnong Amahan sa pagkasinsero sa atong mga tinguha ug sa atong kaandam sa paghinulsol ug paghimo sa gikinahanglan nga mga kausaban sa atong kinabuhi. Sa Enos 1:4, si Enos mirekord og pipila ka mga detalye nga naghulagway sa iyang pagpakigbisog.

Basaha ang Enos 1:4, ug markahi ang mga butang nga gibuhat ni Enos aron sa pagpakita nga siya sinsero samtang nagtinguha siya og kapasayloan sa iyang mga sala. Ilista ang unsay imong nahibaloan ubos sa “Unsay gibuhat ni Enos” diha sa imong scripture study journal nga tsart.

Ang pulong nga nangaliya sa Enos 1:4 nagpasabut nga mapainubsanong mohangyo ug uban sa dakong tinguha. Ang atong mga pag-ampo tingali dili sama kataas sa kang Enos, apan kinahanglan kini nga kinasingkasing.

Sa imong scripture study journal nga tsart, ubos sa “Unsay kinahanglan nakong buhaton,” isulat ang imong mga hunahuna kon unsaon nimo pagpakita sa Ginoo sa imong sinseridad samtang mag-ampo ka ug magtinguha sa Iyang espirituhanon nga mga panalangin.
Ang matinud-anong ug sinsero nga mga paningkamot ni Enos miresulta ngadto sa talagsaong mga panalangin sa iyang kinabuhi. Basaha ang Enos 1:5–8, ug markahi kon unsay nasinati ni Enos. Ilista kini sa seksyon nga “Unsay nasinati ni Enos” diha sa imong scripture study journal nga tsart. Samtang imong basahon ang mga bersikulo 5 ug 6, tan-awa kon sa unsang paagi si Enos nasayud nga siya napasaylo. Ang tingog nga gihisgutan diha sa bersikulo 5 mao ang usa ka tingog nga misulod sa hunahuna ni Enos (tan-awa sa Enos 1:10).

Ang Enos 1:7–8 nagtudlo nga samtang magpakita kita og hugot nga pagtuo diha ni Jesukristo, ang atong mga sala mapasaylo ug kita mamahimo nga hinlo. Ang atong mga tinguha nga molambo, ang atong sinsero nga mga pag-ampo, ug ang atong mga paningkamot sa paghinulsol maoy mga paagi nga makapakita kita og hugot nga pagtuo diha ni Jesukristo.

Si Presidente Dieter F. Uchtdorf sa Unang Kapangulohan mipasabut kon sa unsang paagi ang atong mga kasaypanan makuha sa hingpit samtang mopakita kita og hugot nga pagtuo kang Jesukristo ug maghinulsol sa atong mga sala:

“Sa higayon nga nakahinulsol na kita sa tinuoray nga paagi, si Kristo mokuha sa kabug-at sa kahasol tungod sa atong mga sala. Masayud kita sa atong mga kaugalingon nga napasaylo na kita ug nahimo na nga limpyo. Ang Espiritu Santo mopanghimatuod niini ngari kanato; Siya mao ang Tigbalaan. Walay pagpamatuod sa pagpasaylo nga mas labaw pa. …

“[Ang Ginoo] namahayag, ‘Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom [niini]’ (D&P 58:42).

“Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumduman. Si Satanas bakakon; mosulay siya sa pagpahanap sa atong panan-aw ug modala kanato palayo sa dalan sa paghinulsol ug kapasayloan. Ang Dios wala mosaad nga dili kita mahinumdom sa atong mga sala. Ang paghinumdom motabang kanato nga malikayan ang pagbuhat pag-usab sa samang mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon. Mahimo kining kabahin sa gikinahanglan nga proseso sa pag-ayo ug paglimpyo” Ensign o Liahona, Mayo 2007, 101).

Aron sa pagtabang kanimo nga magamit ang mga pulong ni Presidente Uchtdorf, pamalandungi ang mosunod nga mga pangutana: Kanus-a ka mibati nga ang Ginoo mipasaylo kanimo sa imong mga sala? Giunsa nimo pagkahibalo nga gipasaylo ka? Imo bang nabati ang pagpasaylo sa Ginoo bag-ohay lang?

Human mamalandong sa mga pangutana sa ibabaw, irekord diha sa “Ang akong kasinatian” nga seksyon sa imong scripture study journal nga tsart ang imong kasinatian uban sa mga pagbati nga napasaylo. O mahimo nimong isulat ang unsay gilauman nimong masinati samtang magpakita ka og hugot nga pagtuo diha ni Jesukristo.

Enos 1:9–27

Si Enos nag-ampo alang sa mga Nephite ug mga Lamanite ug naghago kauban ang uban alang sa ilang kaluwasan

Kini nga diagram naghulagway sa pag-ampo ni Enos. Una siyang nag-ampo alang sa iyang kaugalingon ug dayon gipalapdan ang iyang mga pag-ampo aron maapil ang uban. Basaha ang Enos 1:9–10, ug markahi diha sa imong mga kasulatan kon kinsa ang ikaduha nga giapil ni Enos sa iyang pag-ampo. Basaha ang Enos 1:11–14, ug markahi kon kinsa ang ikatulo nga giapil ni Enos sa iyang pag-ampo.

Tubaga ang mosunod nga pangutana diha sa imong scripture study journal: Base sa paghulagway ni Enos sa mga intensyon sa mga Lamanite diha sa Enos 1:14, unsay nadayegan nimo sa iyang pag-ampo alang kanila?

Atong nakat-unan gikan sa ehemplo ni Enos nga samtang masinati nato ang mga panalangin sa Pag-ula ni Jesukristo, magtinguha kita sa pagtabang sa uban nga makadawat og kaluwasan. Aron sa pagtabang kanimo nga mahinumdom niini nga kamatuoran, mahimo nimong isulat ang tanan o parte sa mosunod nga pamahayag gikan ni Presidente Howard W. Hunter diha sa margin sa imong mga kasulatan:

“Bisan kanus-a nga atong masinati ang mga panalangin sa Pag-ula sa atong kinabuhi, dili kapugngan nga maghunahuna kita sa kaayohan sa atong mga kaigsoonan. …

“Ang usa ka mahinungdanon nga timailhan sa personal nga pagkakabig sa usa ka tawo mao ang tinguha nga mopakigbahin sa ebanghelyo ngadto sa uban” (The Teachings of Howard W. Hunter, ed. Clyde J. Williams [1997], 248–49).

Basaha ang Enos 1:19–20, 26, ug markahi ang mga pulong nga nagpakita sa sinseridad sa mga tinguha ni Enos alang sa mga Nephite ug sa mga Lamanite human siya nag-ampo alang kanila.

Basaha ang Enos 1:27, ug pangita og ebidensya sa kalipay nga nasinati ni Enos tungod sa iyang mga paningkamot ug sa kasiguroan sa kinabuhing dayon nga iyang nadawat.

Aron sa pagtabang kanimo sa paggamit sa unsay imong nakat-unan niini nga leksyon, pagmainampoon sa pagtino og usa o daghan pang mga paagi nga makasunod ka sa ehemplo ni Enos. Pagpili og usa ka pamahayag sa ubos, ug kompletuha kini diha sa imong scripture study journal:
1. Sama ni Enos, nagtinguha ko nga makadawat og kapasayloan sa akong mga sala. Akong ipakita sa Ginoo nga sinsero ko niini nga tinguha pinaagi sa …
2. Sama ni Enos, nagtinguha ko sa pagtabang sa akong pamilya ug mga higala nga moduol kang Jesukristo. Usa ka tawo nga paningkamutan nakong tabangan mao si (pangalan sa tawo). Maningkamot ko sa pagtabang niini nga tawo pinaagi sa …
3. Si Enos nag-ampo alang sa mga Lamanite, kinsa makonsiderar nga iyang mga kaaway. Sama ni Enos, gusto nakong ipakita ang gugma sa Ginoo ngadto niadtong dili mabination ngari kanako. Usa ka paagi nga ako kining mabuhat mao ang …

Tinguhaa ang pagtuman sa unsay imong gisulat diha sa imong scripture study journal. Samtang mopakita ka og hugot nga pagtuo diha sa Pag-ula ni Jesukristo ug maghinulsol, makasinati ka og pagpasaylo, hingpit nga kalipay, ug dugang nga tinguha nga motabang sa uban.

Isulat ang mosunod diha ubos sa mga assignment karong adlawa diha sa imong scripture study journal:

Akong natun-an ang Enos 1 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: