Kinatibuk-ang Pagpasabut sa Basahon ni Mormon

Pasiuna

Si Propeta Joseph Smith mihulagway sa mga panghitabo nga nagpalibut sa pag-abut sa Basahon ni Mormon. Pinaagi sa pagtuon sa iyang istorya, malig-on ang imong pagpamatuod sa iyang calling isip propeta ug ang balaang tahas sa Basahon ni Mormon sa Pagpahiuli sa kahingpitan sa ebanghelyo ni Jesukristo. Kini nga leksyon makatabang usab kanimo nga mas mapamilyar kon sa unsang paagi ang Basahon ni Mormon gisulat sa karaang panahon. Ang mga propeta nga si Mormon ug Moroni mipamatuod sa direksyon sa Ginoo samtang ilang gisulat ug gihugpong ang mga sinulat sa daghang mga propeta diha sa bulawan nga mga palid. Sa imong pagtuon, pangita og ebidensya sa kamot sa Ginoo sa pagpagawas sa Basahon ni Mormon ug ang tahas sa Basahon ni Mormon sa paggiya sa imong kinabuhi.

“Ang Pagpamatuod ni Propeta Joseph Smith”

Unsaon nimo pagtubag sa pangutana nga “Giunsa sa imong Simbahan pag-angkon sa Basahon ni Mormon?”

“Ang Pagpamatuod ni Propeta Joseph Smith,” nga makita sa pasiuna nga mga materyal sa sinugdanan sa Basahon ni Mormon, naglangkob sa mga sinulat gikan sa Joseph Smith—Kasaysayan, nga makita diha sa Perlas nga Labing Bililhon. Naghulagway kini sa pag-abut sa Basahon ni Mormon sa kaugalingon nga mga pulong sa Propeta. Ikaw giawhag sa pagbasa sa tibuok niyang istorya gikan sa Joseph Smith—Kasaysayan atol sa imong inadlaw nga pagtuon sa kasulatan.

Tungod kay “Ang Pagpamatuod ni Propeta Joseph Smith” wala maglakip og mga numero nga bersikulo, kini nga leksyon maghatag og reference sa Joseph Smith—Kasaysayan aron mapasayon alang kanimo sa pagpangita sa mga assignment sa pagbasa. Sa imong pagtuon sa pagpamatuod ni Propeta Joseph, pangita og ebidensya nga ang Basahon ni Mormon miabut pinaagi sa gahum sa Dios.

Basaha ang Joseph Smith—Kasaysayan 1:29–35, 42–43, ug linyahi ang mga detalye sa pagbisita ni Moroni kang Joseph Smith nga imong ilakip kon magpatin-aw ka niining mga panghitabo ngadto sa laing tawo. Sa Joseph Smith—Kasaysayan 1:34, unsay gisulti ni Moroni nga naa sa bulawan nga mga palid?

Tubaga ang mosunod nga mga pangutana diha sa imong scripture study journal: Unsay usa ka butang diha sa Joseph Smith—Kasaysayan 1:29–35, 42–43 nga gusto nimong hatagan og gibug-aton kon mopakigbahin ka niini nga istorya sa laing tawo? Nganong importante man kini kanimo?
Basaha ang Joseph Smith—Kasaysayan 1:51–54, ug irekord ang imong mga hunahuna kabahin sa mosunod nga mga pangutana diha sa imong scripture study journal: Unsay nakat-unan ni Joseph Smith atol sa iyang tinuig nga mga pagbisita uban ni anghel Moroni? Ngano sa imong hunahuna nga importante alang ni Joseph kining upat ka tuig nga instruksyon sa dili pa maangkon ug mahubad ang mga palid?

Human sa usa ka panahon sa pagpangandam ug instruksyon, si Joseph Smith gihatagan sa mga palid niadtong 1827 ug sa responsibilidad sa paghubad niini pinaagi sa gasa ug gahum sa Dios. Basaha ang Joseph Smith—Kasaysayan 1:59—60, ug ilha ang sugo nga gihatag kaniya kabahin sa bulawan nga mga palid.

“Usa ka Mubo nga Pagpasabut mahitungod sa Basahon ni Mormon”

Aron sa pagsabut kon sa unsang paagi nga ang Basahon ni Mormon giorganisar, basaha “Ang Mubo nga Pagpasabut mahitungod sa Basahon ni Mormon,” nga naa sa “Ang Pagpamatuod ni Propeta Joseph Smith.” Ikompara unsa ang imong nabasa sa gihulagway nga naa sa katapusan niini nga leksyon, nga naghulagway kon giunsa paghiusa sa nagkalain-laing hugpong sa mga palid aron mahimong rekord sa Basahon ni Mormon.

Daghang indibidwal ang nag-alagad isip tighupot sa rekord atol sa kasaysayan sa mga Nephite ug mga Lamanite, sugod sa kang Lehi ug gitapos lapas pa sa 1,000 ka tuig human niadto uban kang propeta-tigsaysay nga si Mormon ug sa iyang anak nga lalaki nga si Moroni. Si Mormon gigiyahan sa Ginoo sa pagminubo sa mga sulat niining karaan nga mga propeta ug ang 1,000 ka tuig nga kasaysayan sa iyang katawhan. Ang iyang minubo nga asoy girekord diha sa mga palid ni Mormon, giila usab isip ang bulawan nga mga palid. Human sa kamatayon ni Mormon, ang iyang anak nga lalaki nga si Moroni mihuman sa rekord ug ang mga palid gitago hangtud nga kini gihatag ngadto kang Propeta Joseph Smith.

Ang Helaman 3:13–15 usa sa daghang mga tudling sa kasulatan diin gihulagway ni Mormon ang paghimo og minubo nga asoy sa mga rekord sa Nephite. Sa imong pagbasa niini, tan-awa nga naay mas daghan pang nasulat kay sa kang Mormon ug Moroni nga nalakip sa bulawan nga mga palid.

Basaha ang Mga Pulong ni Mormon 1:9 ug Mormon 8:34–35. I-highlight ang mga pulong nga naghulagway kon sa unsang paagi nga ang Ginoo mitabang ug migiya kang Mormon ug ni Moroni samtang ilang gihugpong ang rekord sa Basahon ni Mormon.

Tubaga ang mosunod nga pangutana diha sa imong scripture study journal: Kon ikaw si Mormon o Moroni ug adunay responsibilidad sa pagtingub sa daghang mga sinulat sa mga propeta ngadto sa usa ka rekord, unsaon man nimo paghukom unsay ilakip sa imong minubo nga asoy?

Gikan niini nga mga bersikulo atong makita nga ang mga tagsulat sa Basahon ni Mormon nakakita sa atong kapanahonan ug misulat sa unsay labing makatabang kanato. Mahimo nimong isulat kini diha sa imong mga kasulatan tupad sa Mormon 8:35.

Si Presidente Ezra Taft Benson mipamatuod nga ang Basahon ni Mormon “gisulat alang sa atong panahon” ug mipasabut kon sa unsang paagi nga ang pagkahibalo niini makatabang kanato samtang magtuon kita sa Basahon ni Mormon:

“Ang mga Nephite wala gyud niini nga basahon; ni ang mga Lamanite sa karaang panahon. Kini gitagana alang kanato. Si Mormon misulat sa hapit na sa pagtapos sa sibilisasyon sa Nephite. Ubos sa inspirasyon sa Dios, kinsa nakakita sa tanang mga butang gikan sa sinugdanan, iyang gipamubo ang mga rekord sa daghang mga siglo, nagpili sa mga istorya, pamulong, ug panghitabo nga makatabang kaayo kanato. …

“Kon sila nakakita sa atong panahon, ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, ‘Ngano man nga ang Ginoo nagdasig ni Mormon (o Moroni o Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpakabuhi niining panahona?’” (“The Book of Mormon—Keystone of Our Religion,” Ensign, Nob. 1986, 6).

Ang pagpangutana niini nga matang sa mga pangutana samtang ikaw magtuon makatabang kanimo sa pagdiskobre sa mga baruganan ug mga doktrina nga nasayud ang Ginoo nga labing makatabang kanimo sa imong kinabuhi.

Hunahunaa ang imong kinabuhi karon. Pamalandong sa mga pangutana nga anaa kanimo o sa mga sitwasyon nga imong giatubang nga ikaw gusto nga makadawat og direksyon gikan sa Dios. Pagsulat og usa o duha niini sa imong personal journal (dili sa imong scripture study journal nga imong ipakita sa imong magtutudlo). Atol sa imong pagtuon sa Basahon ni Mormon matag adlaw, pangita og mga baruganan nga maghatag og giya ug tambag nga may kalabutan niini nga mga sitwasyon.

Kabahin sa inadlaw nga pagtuon sa kasulatan, si Presidente Gordon B. Hinckley miingon: “Tingali maghunahuna ka nga busy kaayo ka. Napulo o kinse ka minutos sa usa ka adlaw uban sa mga kasulatan, ug partikular na sa Basahon ni Mormon, makahatag kanimo og kahibulongan nga pagsabut sa dakong mahangturon nga mga kamatuoran nga napatunhay pinaagi sa gahum sa Labing Makagagahum alang sa pagpanalangin sa Iyang mga anak. Samtang ikaw magbasa … , mas mapaduol ka ngadto Kaniya kinsa mao ang tigpasiugda sa atong kaluwasan” (“Rise to the Stature of the Divine within You,” Ensign, Nob. 1989, 97).

Pamalandungi unsa nga tumong ang imong buhaton nga makatabang kanimo nga mas makasabut gikan sa imong pagbasa sa Basahon ni Mormon karong tuiga. I-rekord ang imong tumong diha sa imong scripture study journal. Mahimo kang moestablisar og regular nga panahon sa pagtimbang-timbang sa imong kauswagan.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang“Kinatibuk-ang Pagpasabut sa Basahon ni Mormon” ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: