Pasiuna sa Mosiah
Nganong Kinahanglang Tun-an Kini nga Basahon?
Sa imong pagtuon sa basahon ni Mosiah, imong mabasa ang gamhanan nga mga pagpamatuod sa misyon ni Jesukristo. Makat-unan usab nimo ang mahitungod sa mga tawo nga giluwas sa Ginoo gikan sa pagkaulipon sa sala o sa pisikal nga pagdaug-daog. Dugang pa, imong makat-unan kon sa unsang paagi ang matarung nga mga paningkamot sa mga indibidwal nga sama ni Haring Benjamin, Abinadi, ug Alma nagdala og dagkong mga panalangin ngadto sa uban. Sa laing bahin, imong makita kon sa unsang paagi ang dili maayong mga pagpili sa mga indibidwal nga sama ni Zeniff ug sa iyang anak, si Haring Noah, nagdala og negatibong mga sangputanan diha sa ilang mga kaugalingon ug sa ilang katawhan.
Kinsa ang Nagsulat Niini nga Basahon?
Si Mormon ang nagtipon ug nagpamubo sa mga rekord sa pipila ka mga tigsulat aron mahimo ang basahon ni Mosiah. Ang basahon gipangalan kang Mosiah, kinsa anak ni Haring Benjamin. Si Mosiah usa ka propeta, manalagna, tigpadayag, ug hari nga maoy nagmando sa Zarahemla gikan sa gibana-bana nga 124 hangtud 91 B.C. Siya gipangalanan gikan sa iyang apohan nga si Mosiah, kinsa usa usab ka hari sa Zarahemla (tan-awa sa Omni 1:12–13, 19).
Si Mormon mikuha gikan sa daghang mga rekord aron mahan-ay ang basahon ni Mosiah. Siya mipamubo ug mikutlo gikan sa rekord nga gihimo ni Mosiah diha sa dagkong mga palid ni Nephi, nga midetalye sa kasaysayan sa mga Nephite diha sa yuta sa Zarahemla (tan-awa sa Mosiah 1–7; 25–29). Siya usab mikuha gikan sa rekord ni Zeniff, nga nag-asoy sa kasaysayan sa katawhan ni Zeniff gikan sa panahon nga mibiya sila sa Zarahemla hangtud nga sila mibalik (tan-awa sa Mosiah 7–22). Dugang pa, si Mormon mikutlo ug mipamubo og mga porsyon sa mga sinulat ni Alma, kinsa misulat sa mga pulong ni Abinadi (tan-awa sa Mosiah 17:4) ug mihimo og rekord sa iyang kaugalingong katawhan (tan-awa sa Mosiah 18; 23–24).
Kanus-a ug Diin Kini Gisulat?
Ang orihinal nga mga rekord nga gigamit isip mga tinubdan alang sa basahon ni Mosiah malagmit gisulat tali 200 B.C. ug 91 B.C. Si Mormon mipamubo niini nga mga rekord tali A.D. 345 ug 385. Wala irekord ni Mormon kon asa siya sa dihang iyang gitipon kini nga basahon.