Unit 22: Day 1
Helaman 1–2
Pasiuna
Human mamatay ang labaw nga maghuhukom nga si Pahoran, dihay seryoso nga panagbingkil sa mga Nephite mahitungod kon kinsa sa iyang mga anak nga lalaki—Pahoran, Paanchi, ug Pacumeni—ang mahimong bag-ong labaw nga maghuhukom. Si Pahoran ang napili sa mga tawo isip bag-ong labaw nga maghuhukom. Usa sa mga sumusunod ni Paanchi, usa ka tawo nga ginganlan og Kishkumen kinsa naghimo og tinago nga pundok, mibuno ni Pahoran, ug si Pacumeni natudlo dayon nga labaw nga maghuhukom. Mipahimulos niini nga panagbingkil ug panagbahin, nabuntog sa mga Lamanite ang ulohang siyudad sa mga Nephite ang Zarahemla ug gipatay si Pacumeni. Ang Nephite nga heneral nga si Moronihah mikuha pagbalik sa siyudad sa Zarahemla, ug si Helaman natudlo nga labaw nga maghuhukom. Si Kishkumen napatay samtang misulay sa pagpatay ni Helaman, ug si Gadianton nahimong lider sa tinago nga pundok.
Helaman 1
Ang panagbingkil kon kinsa ang mahimong labaw nga maghuhukom nakapahimo sa mga Lamanite sa pagbuntog sa Zarahemla, ang ulohang siyudad sa mga Nephite
Hunahunaa ang katapusang higayon nga ikaw adunay argumento sa usa ka tawo o nakasaksi sa uban nga dunay argumento. Unsa nga mga problema ang misangput sa maong panagbingkil? Samtang ikaw magtuon sa Helaman 1, pangitaa ang mga problema nga gikahatag sa panagbingkil diha sa mga Nephite ug pamalandunga unsay imong makat-unan gikan sa ilang kasinatian.
Basaha ang mosunod nga mga tudling sa kasulatan, ug isulat ang imong mga tubag sa mga pangutana diha sa luna nga gihatag:
-
Helaman 1:1–4. Unsay hinungdan sa panagbingkil ug panagbahin sa mga katawhan nga Nephite?
-
Helaman 1:5–8. Kinsa ang natudlo nga labaw nga maghuhukom? Unsay reaksyon sa duha ka mga igsoong lalaki sa bag-ong labaw nga maghuhukom?
-
Helaman 1:9–12. Unsay gibuhat ni Kishkumen, ug unsa nga pakigsaad ang gihimo ni Kishkumen ug sa iyang tinago nga pundok ngadto sa usag usa?
Panahon niini nga panagbingkil sa mga Nephite, usa ka tawo nga ginganlan og Coriantumr nangulo sa mga Lamanite batok sa siyudad sa Zarahemla sa gubat. Basaha ang Helaman 1:18–22, ug ilha unsay nahimo sa mga Lamanite isip resulta sa panagbingkil sa mga Nephite.
Usa sa mga kamatuoran nga atong makat-unan gikan niini nga istorya mao: Ang panagbingkil makabahin ug makapabantang nato ngadto sa impluwensya sa kaaway. Mahimo nimong isulat kining baruganan diha sa imong mga kasulatan tupad sa Helaman 1:18.
-
Aron matabangan ka nga mas makasabut niini nga baruganan, tubaga ang mosunod nga mga pangutana diha sa imong scripture study journal:
-
Usa ka batan-ong babaye nakiglalis sa iyang mga ginikanan mahitungod sa iyang mga higala. Sa unsa kaha nga paagi nga kining panagbingkil makaapekto sa iyang kinaiya sa pagpaminaw sa tambag sa iyang mga ginikanan mahitungod sa ubang mga aspeto sa iyang kinabuhi?
-
Usa ka batan-ong lalaki dunay kasuko ngadto sa usa ka tawo sa iyang korum sa priesthood. Sa unsa kaha nga paagi nga kining panagbingkil makaapekto sa paagi sa iyang paglihok diha sa simbahan?
-
Paghunahuna og usa ka bahin sa imong kinabuhi diin imong gibati nga dunay panagbingkil tali kanimo ug sa ubang mga tawo. Unsa ang usa ka piho nga butang ang imong mahimo nga mawala kining panagbingkil gikan sa imong kinabuhi? Unsaon man nimo kini sa pagbuhat?
-
Ang Helaman 1:22–30 nagrekord nga human nga ang mga Lamanite mibuntog sa Zarahemla, nagsugod dayon sila sa pagmartsa paingon sa siyudad sa Bountiful aron sa pagbihag usab niini. Ang mga kasundalohan sa Nephite milibut sa mga Lamanite ug milupig kanila. Daghang mga Lamanite ang nangamatay, ug kadtong kinsa mitahan gitugutan nga mobalik ngadto sa ilang kaugalingong mga yuta.
Helaman 2
Si Helaman nahimong labaw nga maghuhukom, ug ang iyang sulugoon nakapugong sa tinago nga pundok sa pagpatay kaniya
Sa dili pa nimo tun-an ang Helaman 2, hunahunaa sa unsa nga paagi nga ang usa ka matinud-anong batan-ong babaye o lalaki maningkamot sa pagsulbad sa usa ka sayop o sala. Siya ba maningkamot sa pagtabon niini o magtinguha og kapasayloan gikan sa Ginoo ug gikan niadtong kinsa nasakitan?
Human patya ni Kishkumen si Pahoran, siya ug ang mga sakop sa iyang tinago nga pundok misaad sa usag usa nga dili gayud nila isulti ni bisan kinsa kon kinsa ang nagpatay. Basaha ang Helaman 2:3–4, ug hatagi og pagtagad ang mga pulong “misulod ngadto sa usa ka pakigsaad nga walay usa nga masayud sa iyang pagkadautan.” Dayon basaha ang Doktrina ug mga Pakigsaad 58:43, ug pangitaa kon unsay gusto sa Ginoo nga atong buhaton kon kita nakahimo og sayop.
-
Si Helaman nahimong bag-ong labaw nga maghuhukom human sa kamatayon sa igsoong lalaki ni Pahoran nga si Pacumeni, ug dayon si Kishkumen ug ang iyang tinago nga pundok nakahukom usab sa pagpatay ni Helaman. Usa ka tawo nga ginganlan og Gadianton nahimong lider sa tinago nga pundok niining higayuna. Basaha ang Helaman 2:2–9, ug isulat sa luna sa ubos sa unsang paagi napatay si Kishkumen:
Basaha ang Helaman 2:10–14, ug pangitaa unsay nahitabo sa pundok sa mga tulisan ni Gadianton. Mipasidaan si Mormon nga ang tinago nga mga pundok sama sa mga tulisan ni Gadianton, nga gitawag nga “tinago nga mga kalihokan” (tan-awa, pananglitan, Helaman 3:23), maoy hinungdan sa kalaglagan sa mga katawhan nga Nephite. Ang nag-unang mga propeta sa Basahon ni Mormon mipasidaan usab batok sa pag-apil sa tinago nga mga kalihokan (tan-awa sa 2 Nephi 26:22; Alma 1:12). Ang Basahon ni Mormon nagtudlo niini nga baruganan: Ang tinago nga mga kalihokan maoy hinungdan sa kalaglagan sa mga katilingban.
Si Elder M. Russell Ballard sa Korum sa Napulog Duha ka mga Apostoles mipasidaan sa mga kakuyaw sa tinago nga mga kalihokan karon. Samtang basahon nimo ang iyang pasidaan, markahi unsay atong mahimo sa pagpakigbatok sa tinago nga mga kalihokan.
“Ang Basahon ni Mormon nagtudlo nga ang tinago nga mga kalihokan naghatag og usa ka seryuso nga hagit, dili lamang isip indibidwal ug mga pamilya apan sa tibuok sibilisasyon. Ang pipila sa tinago nga mga kalihokan karon mao ang mga gang, pagpayuhot og mga drugas, ug mga pamilya sa organisado nga krimen. Ang tinago nga mga kalihokan sa atong panahon naglihok sama gayud sa mga tulisan ni Gadianton sa panahon sa Basahon ni Mormon. … Usa sa ilang mga katuyoan mao nga ‘makabuno, ug makapanglungkab, ug makapangawat, ug makabuhat sa malaw-ay nga mga buhat ug sa tanan nga matang sa pagkadautan, supak sa mga balaod sa ilang nasud ug usab sa mga balaod sa ilang Dios’ [Helaman 6:23].
“Kon kita dili magbantay, ang tinago nga mga kalihokan karon makaangkon og gahum ug impluwensya sa ingon ka dali ug ingon ka hingpit sama sa nahitabo sa panahon sa Basahon ni Mormon. …
“Ang Basahon ni Mormon nagtudlo nga ang yawa mao ang ‘tinubdan sa tanan nga mga sala’ ug ang tigpasiugda sa tinago nga mga kalihokan [Helaman 6:30]. … Ang iyang katuyoan mao ang paglaglag sa mga indibidwal, mga pamilya, mga komunidad, ug mga nasud [tan-awa sa 2 Nephi 9:9]. Sa usa ka bahin, nagmalampuson siya panahon sa Basahon ni Mormon. Ug dako kaayo ang iyang kalampusan karon. Mao nga importante kaayo alang kanato … sa pagbarug nga lig-on alang sa kamatuoran ug matarung pinaagi sa paghimo sa unsay atong mabuhat sa pagtabang sa atong mga komunidad nga pabilin nga luwas.
“… [Kita] ‘makabarug isip mga saksi sa Dios’ pinaagi sa pagpakita og ehemplo, pagtuman sa mga sumbanan sa Simbahan, ug pagpakigbahin sa atong pagpamatuod niadtong anaa sa atong palibut [tan-awa sa Mosiah 18:9]” (”Standing for Truth and Right,” Ensign, Nob. 1997, 38).
Paghunahuna og usa o daghang mga paagi nga imong magamit ang pagtulun-an ni Elder Ballard sa pagbarug alang sa kamatuoran ug matarung diha sa imong komunidad ug sa imong nasud.
-
Akong natun-an ang Helaman 1–2 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: