Ether 13–15

Pasiuna

Nanagna si propeta Ether bahin sa Bag-ong Jerusalem. Gipasidan-an usab niya si Coriantumr, usa ka hari nga Jaredite, nga ang iyang katawhan pagalaglagon tungod sa pagkadautan, ug gitambagan niya si Coriantumr ug ang iyang pamilya nga maghinulsol. Sa dihang si Coriantumr ug ang mga tawo mibalibad nga maghinulsol, migrabe ang gubat ug pagkadautan sulod sa daghang katuigan hangtud nga ang tibuok nasud sa mga Jaredite nalaglag. Sila si Ether ug Coriantumr lamang ang naluwas aron masaksihan ang katumanan sa panagna ni Ether.

Imahe

jaredite battle

Ether 13:1–12

Girekord ni Moroni ang mga panagna ni Ether bahin sa Bag-ong Jerusalem ug ang Jerusalem sa karaan

Ikonsiderar ang pipila ka siyudad karon nga dunay laing mga ngalan nga nagpasabut og talagsaong butang bahin sa siyudad. Pananglitan, ang Paris, France, nailhan usab isip Siyudad sa Kahayag. Sa pagsugod, tan-awa kon mapares ba ang mga siyudad sa ubos ngadto sa ilang laing husto nga mga ngalan (mga tubag gihatag sa katapusan sa leksyon).

Cairo, Egypt	Ang Mahangin nga Siyudad
Manila, Philippines	Ang Siyudad sa Liboan ka mga Minaret
Chicago, USA	Ang Mahangturong Siyudad
Mexico City, Mexico	Ang Perlas sa Silangan
Rome, Italy	Ang Siyudad sa mga Palasyo

Ang leksyon karon naghatag og pagtagad sa duha ka talagsaong mga siyudad sa katapusang mga adlaw: (1) Jerusalem ug (2) ang Bag-ong Jerusalem. Sa ulahing mga adlaw kining duha ka mga siyudad mailhan sa pagkamatarung niini. Gitudloan ni Ether ang mga Jaredite nga ang dapit nga ilang gipuy-an mao ang luna alang sa umaabut nga siyudad nga tawagon og Bag-ong Jerusalem.

Basaha ang Ether 13:2–8. Gipadayag sa Ginoo ngadto ni Propeta Joseph Smith nga ang Bag-ong Jerusalem nga natino diha sa Ether 13:6 pagatukuron sa Jackson County, Missouri, USA (tan-awa sa D&P 57:1–4; 84:1–4). Unsay gisulti ni Ether bahin niining mga siyudad diha sa Ether 13:3, 5? Pamalandunga kon unsa kaha ang magpuyo sa usa ka siyudad nga sama niana. Tun-i ang Ether 13:10–11 aron mahibalo kon unsay kinahanglan gayud nga masinati sa usa ka tawo aron makapuyo sa balaang mga siyudad sa Bag-ong Jerusalem ug sa Jerusalem sa karaan (nga mahimong balaan kon kini pagatukuron pag-usab ngadto sa Ginoo; tan-awa sa Ether 13:5).

Laing ngalan sa Bag-ong Jerusalem mao ang Zion (tan-awa sa Moises 7:62; Mga Artikulo sa Hugot nga Pagtuo 1:10). Samtang mahimong dili kita makapuyo sa Jerusalem o sa Bag-ong Jerusalem, ang tanang miyembro sa Simbahan makahimo sa pagtinguha sa pag-establisar og Zion. Makaandam kita sa pagpuyo sa balaang mga dapit, lakip na sa celestial nga gingharian sa Dios, samtang mahimo kita nga limpyo pinaagi sa Pag-ula ni Jesukristo.

Ether 13:13–15:34

Gisalikway sa mga Jaredite si Ether ug nagpadayon sa pagkadautan ug gubat hangtud nga nalaglag sila

Basaha ang Ether 13:13–19, ug pangitaa ang mga kahimtang sa katilingban sa mga Jaredite sa panahon ni Ether. Tun-i ang Ether 13:20–22 aron madiskubrihan ang mensahe ni Ether ngadto ni Coriantumr ug unsay reaksyon ni Coriantumr ug sa iyang katawhan.

Tubaga ang mosunod nga mga pangutana diha sa imong scripture study journal:
1. Sa unsang mga paagi nga imong nakita nga ang mga tawo sa atong panahon nagmatig-a sa ilang mga kasingkasing ug misalikway sa mga sulugoon sa Ginoo?
2. Unsay imong buhaton aron mapabiling lig-on ang kaugalingon diha sa pagtuo ug magpatalinghug sa mga pulong sa mga propeta?

Sama sa narekord diha sa Ether 13:23–14:20, nakiggubat si Coriantumr sa pipila ka tawo nga misulay sa pagkuha sa gingharian gikan kaniya, lakip na nila ni Shared, Gilead, ug Lib. Sa katapusan, ang tibuok nasud sa mga Jaredite nalambigit sa gubat. Ang katapusang kaaway ni Coriantumr mao ang usa ka tawo nga ginganlan og Shiz. Ang hilabihan nga pagkalaglag sa mga Jaredite tungod niining mga gubat gidetalye diha sa Ether 14:21–25 ug Ether 15:1–2.

Basaha ang Ether 15:3–6 aron madiskubrihan kon unsay gisulayan pagbuhat ni Coriantumr aron maluwas ang nahabiling katawhan gikan sa pagkalaglag. Hunahunaa kon nganong gisalikway ni Shiz ang sugyot ni Coriantumr ug nganong ang mga tawo sa parehong mga kasundalohan mibalibad sa pagtahan (tan-awa usab sa Ether 14:24).

Basaha ang Ether 15:12–17, ug pangitaa ang mga detalye bahin sa sitwasyon sa mga Jaredite. Unsay imong nakita nga labihan ka makalilisang o makapaguol bahin sa ilang kahimtang? Hinumdumi nga migahin si Ether og daghang katuigan sa pagpasidaan sa katawhan nga maghinulsol (tan-awa sa Ether 12:2–3; 13:20). Basaha ang Ether 15:18–19, ug hibaloi ang mga sangputanan nga moabut tungod sa pagsalikway sa mga pasidaan sa Ginoo nga maghinulsol. Base sa imong nabasahan, kompletuha kini nga pamahayag: Kon atong isalikway ang mga pasidaan sa Ginoo nga maghinulsol, nan .

Sa luna sa ibabaw, mahimong misulat ka og usa ka baruganan sama sa mosunod: Kon atong isalikway ang mga pasidaan sa Ginoo nga maghinulsol, ang Iyang Espiritu mobiya ug si Satanas makabaton og gahum sa atong mga kasingkasing.

Gamit ang Ether 15:19 ug ang baruganan nga atong makat-unan gikan niini, ipasabut nganong sayop ang usa o dugang pa sa mosunod nga mga pangatarungan nga mahimong ihatag sa usa ka tawo karon sa pagdumili sa paghinulsol:
1. Nahibalo ko nga ang mga salida nga akong gitan-aw wala mahisubay sa mga sumbanan sa Simbahan, apan morag wala ra man kini epekto ngari nako.
2. Ang pag-inum og ilimnong makahubog uban sa akong mga higala dili ingon niana ka dautan. Naglingaw-lingaw ra man mi.
3. Gamay ra man na nga pornograpiya. Wala man gud na magpasabut nga magbuhat ko sa ingon ug mahimo na kong imoral. Gawas pa, mahimo man kong mohunong bisan kanus-a nako gusto.
4. Dili ko kinahanglang maghinulsol karon. Makapaabut ra na hangtud nga hapit na ko moadto sa misyon o magminyo sa templo.

Ang Ether 15:20–32 nagsaysay kon sa unsang paagi nga ang duha ka mga kasundalohan sa mga Jaredite nakigbatok sa usag usa hangtud nga ang ila na lang mga lider, sila si Coriantumr ug Shiz, ang nahabilin. Dayon gipatay ni Coriantumr si Shiz.

Ang kasaysayan sa mga Jaredite naghatag og klaro nga ehemplo sa unsay mahitabo sa katawhan kon maghugpong silang mosalikway sa binalik-balik nga mga paningkamot sa Dios sa pagkumbinser kanila nga maghinulsol. Samtang mahimo nga dili kita magsagubang og diha-diha dayon nga pisikal nga kalaglagan pinaagi sa pagdumili nga maghinulsol, makasinati kita og mga pagbati nga sad-an kon isalikway nato ang mga pasidaan sa Ginoo nga maghinulsol.

Imahe

dead men on battlefield

Imahe

Elder Neil L. Andersen

Pamalandunga ang mosunod nga pamahayag gikan ni Elder Neil L. Andersen sa Korum sa Napulog Duha ka mga Apostoles: “Ako mopamatuod nga ang Manluluwas makahimo ug andam nga mopasaylo sa atong mga sala. Gawas sa mga sala niadtong pipila kinsa mipili sa kapildihan human makahibalo sa kahingpitan, walay sala nga dili mapasaylo. Unsa ka talagsaon nga kahigayunan alang sa matag usa kanato nga mopalayo gikan sa atong mga sala ug moduol ngadto ni Kristo. Ang balaan nga pagpasaylo maoy usa sa pinakatam-is nga bunga sa ebanghelyo, pagkuha sa sala ug kasakit gikan sa atong mga kasingkasing ug pagpuli niini sa hingpit nga kalipay ug kalinaw sa tanlag” (“Paghinulsol … Aron Ako Moayo Kaninyo,” Ensign o Liahona, Nob. 2009, 40–41).

Susiha ang bisan unsa nga butang nga tingali imong gibuhat nga nakabalda sa impluwensya sa Espiritu Santo sa imong kinabuhi. Ikonsiderar kon sa unsa kaha nga paagi nimo magamit ang gahum sa Pag-ula ni Jesukristo aron mahimo ang gikinahanglang mga kausaban nga makatabang nimo sa pagdawat sa Espiritu ug sa pagbatok sa gahum ni Satanas.

Gikan sa Ether 13–15 atong makat-unan nga ang kasuko ug panimalos moresulta nga makahimo kita og mga pagpili nga makadaut sa atong kaugalingon ug sa uban. Basaha o basaha pag-usab ang mosunod nga mga tudling, ug markahi ang mga pulong nga nagtudlo niini nga kamatuoran: Ether 13:27; 14:24; 15:6, 22, 28.

Pamalandunga kon unsa nga mga sangputanan ang mahimo sa wala kapugngi nga kasuko diha sa usa ka pamilya o sa ubang mga relasyon. Hunahunaa ang usa ka sitwasyon sa imong kinabuhi nga kinahanglan tingali nimong isalikway ang mga pagbati sa kasuko o panimalos.

Samtang magbasa ka sa mosunod nga pamahayag ni Elder David E. Sorensen, usa ka emeritus nga sakop sa Seventy, pangitaa kon unsaon nimo pagbuntog ang mga pagbati sa kasuko o tinguha nga manimalos: “Kon ang usa ka tawo nakapasakit kanato o niadtong atong gimahal, kana nga kasakit mahimong hilabihan. Kini mobati nga daw kana nga kasakit o kadili makiangayon mao ang pinakamahinungdanon nga butang sa kalibutan, ug nga kita walay kapilian apan sa pagpanimalos. Apan si Kristo, ang Hari sa Kalinaw, nagtudlo kanato og mas maayo nga paagi. Kini mahimong lisud kaayo ang pagpasaylo sa usa ka tawo sa kadaot nga ilang nabuhat kanato, apan kon kini atong buhaton, kita naghatag sa atong mga kaugalingon ngadto sa mas maayo nga umaabot. Dili na nga ang sayop nga binuhatan sa usa ka tawo mikontrol sa atong dalan. Kon kita mopasaylo sa uban, kini mopalingkawas kanato sa pagpili unsaon nato pagpuyo ang atong kaugalingong mga kinabuhi. Ang pagpasaylo nagpasabut nga kana nga mga problema sa kanhi wala na magdikta sa atong kaugalingong padulngan, ug kita makapokus sa umaabot uban sa gugma sa Dios diha sa atong mga kasingkasing” (“Ang Pagpasaylo Makapausab sa Kaligutgot ngadto sa Gugma,” Ensign o Liahona, Mayo 2003, 12).

Tubaga ang mosunod nga pangutana diha sa imong scripture study journal: Kanus-a nga ikaw o ang usa ka tawo nga imong nailhan nakasinati og pagkaayo ug kagawasan human sa pagpili nga mopasaylo?

Mabuntog nimo ang bisan unsa nga mga pagbati sa kasuko ug panimalos kon modangup ka kang Jesukristo ug modawat sa gahum sa pagpasaylo ug kahupayan pinaagi sa Iyang Pag-ula. Hinumdumi ang pagdangup ngadto sa Ginoo diha sa pag-ampo alang sa tabang nga mahimong gikinahanglan nimo niadtong mga sitwasyon.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Ether 13–15 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: