1 Nephi 16

Pasiuna

Mibati sa gahum sa mga pulong ni Nephi, aangigsoon nga mga lalaki ni Nephi mipaubos sa ilang mga kaugalingon sa atubangan sa Ginoo. Sa pagpanaw sa pamilya ngadto sa kamingawan, gihatagan sila sa Ginoo sa Liahona aron paggiya kanila sa ilang pagpanaw. Nasinati sa pamilya ang daghan nga kalisud sa ilang pagpanaw, lakip na ang pagkaguba sa ilang mga pana ug ang pagkabali sa pana ni Nephi, nga nakapalisud sa pagpangita og pagkaon. Samtang kasagaran sa pamilya mibagulbol tungod sa pagkawala niini, mihimo og bag-ong pana si Nephi ug nangayo sa tambag sa Ginoo kon asa mangita og pagkaon. Ang pagtuon sa 1 Nephi 16 naghatag og oportunidad alang kanimo sa pagkonsiderar sa unsang paagi ka motubag sa pagkorihir ug kasakit. Sama nga ang Ginoo migiya sa pamilya ni Lehi sa ilang mga kalisud, mogiya Siya kanimo sa mga hagit sa imong kinabuhi kon mapaubsanon kang mangita ug mosunod sa Iyang tambag.

1 Nephi 16:1–6

Gitubag ni Nephi ang mga pagbagulbol sa iyang igsoon nga mga lalaki

Nakakita na ba ka og usa ka tawo nga gikorihian o gibadlong sa dili mao nga pamatasan? Giunsa man pagtubag niana nga tawo?

Si Laman ug si Lemuel mibati nga gibadlong ni Nephi sa dihang gitudloan sila nga ang dautan isalikway ug dili paambiton sa kahoy sa kinabuhi (tan-awa sa 1 Nephi 15:36–16:1). Basaha ang 1 Nephi 16:1–2, ug linyahi kon giunsa pagsulti ni Nephi ang tubag sa uban nga mga tawo sa pagkadungog sa kamatuoran kay wala sila magsunod niini.

Ang mga pulong nga “mopasakit kanila ngadto sa ilang kasingkasing” nagpasabut nga kini nagpakita nga sad-an sila. Unsa sa imong hunahuna ang gipasabut sa “ang nakasala naghunahuna nga ang kamatuoran malisud”?

Sa imong scripture study journal, ilista ang pipila ka mga butang nga imong mahimo aron magmasulundon bisan og ang kamatuoran malisud paminawon ug “mopasakit [kanimo] sa kasingkasing” (1 Nephi 16:2). Ngano kaha nga ang uban nga mga kabatan-onan maglisud man sa pagsunod sa uban nga mga kamatuoran? Ikompara ang imong lista sa unsay gisulti ni Nephi ngadto ni Laman ug ni Lemuel sa 1 Nephi 16:3–4.

Sumala sa 1 Nephi 16:5, giunsa pagpili ni Laman ug ni Lemuel ang pagtubag sa instruksyon ni Nephi? Unsa nga pulong o hugpong sa mga pulong niini nga bersikulo ang naghulagway kon unsa ang kinahanglan nato nga buhaton kon ang usa ka kamatuoran mopasakit kanato sa atong kasingkasing? Markahi ang mga tubag niini nga mga pangutana diha sa imong mga kasulatan.

1 Nephi 16:7–33

Ang pamilya ni Lehi gigiyahan sa Liahona

Tubaga ang mosunod nga mga pamahayag og tinuod (T) o sayop (S) niini nga eksamin pinaagi sa paglingin sa imong mga tubag:

Si Nephi naminyo sa kinamagulangan nga anak nga babaye ni Ishmael.
Si Lehi gihatagan og murag kompas nga bola nga gitawag og Liahona.
Ang lingin nga bola adunay upat ka lamboran nga naghatag og direksyon ni Lehi ug sa iyang pamilya.
Human nadawat sa pamilya ni Lehi ang bola, ang ilang pagpanaw sa kamingawan nasayon.

Sa imong pagtuon sa 1 Nephi 16:7–10 ug sa minubo nga kapitulo, ribyuha ang imong mga tubag sa unang tulo ka mga pangutana (tan-awa usab sa Alma 37:38). Basaha ang 1 Nephi 16:17–19 aron sa pagtino kon imong gitubag ang ikaupat nga pangutana sa eksaktong paagi. (Ang eksaktong mga tubag anaa sa katapusan sa leksyon.)

Bisan og kita nagmasulundon, makasinati gihapon kita og mga pagsulay. Kadaghanan sa mga pagsulay nga atong giatubang dili mga sangputanan sa paghimo og sayop nga mga pagpili. Hinoon kini moabut diri kanato nga natural lang nga resulta sa mortal nga kinabuhi, apan naghatag kini kanato og kahigayunan sa pagkat-on ug pagtubo atol sa atong mortal nga pagpanaw, sama sa gibuhat sa Manluluwas (tan-awa sa D&P 122:7–8). Usa sa atong mga pagsulay sa kinabuhi mao kon unsaon nato pagtubag niini mga pagsulay.

Base sa gihulagway ni Nephi sa bola diha sa 1 Nephi 16:10, sa unsang paagi kini nga gasa makatabang ni Lehi ug sa iyang pamilya sa ilang pagpanaw ngadto sa gisaad nga yuta? Pangitaa ug markahi giunsa pagkapuslan ang Liahona sa pamilya ni Lehi sa 1 Nephi 16:16.

Pangitaa sa 1 Nephi 16:20–22, ug hibaloi kon unsay reaksyon sa ubang pamilya ni Lehi sa dihang naguba ang pana ni Nephi. Tun-i ang 1 Nephi 16:23–25, 30–32, mangita sa reaksyon ni Nephi niini nga pagsulay. Sa unsang paagi ang iyang reaksyon nakaapekto sa iyang pamilya?

Tubaga ang mosunod nga pangutana diha sa imong scripture study journal: Unsa ang uban pang butang nga imong nakat-unan pinaagi sa pagtandi sa nagkalain-laing reaksyon ni Nephi ug sa iyang pamilya sa samang pagsulay?

Kay sa mobagulbol, si Nephi mihimo og bag-ong pana ug dayon nangita og giya aron masayran asa mangita og pagkaon. Ang ehemplo ni Nephi nagpakita nga kon buhaton nato ang tanan natong mahimo ug usab mangita sa direksyon sa Ginoo, nan Siya motabang kanato sa atong mga kalisdanan.

Atol niini nga mga hitabo, mipasabut ang Ginoo ngadto kang Lehi kon sa unsang paagi molihok ang Liahona. Sa 1 Nephi 16:26–29, pangitaa kon unsay gikinahanglan sa Ginoo aron magiyahan ang pamilya ni Lehi pinaagi sa Liahona.

Hunahunaa nga ikaw nagtudlo og usa ka batan-on nga bata kabahin sa Liahona. Sa imong scripture study journal, ipasabut sa yano nga mga termino sa unsang paagi ang Liahona migiya sa pamilya ni Lehi ug unsa ang ilang gibuhat aron padayon kining mogiya kanila.
Tubaga ang mosunod nga pangutana diha sa imong scripture study journal: Sa unsang paagi ang Liahona makapakita kanato nga “pinaagi sa gagmay nga mga paagi ang Ginoo makapahinabo sa mahinungdanon nga mga butang”? (1 Nephi 16:29).

Sama sa katawhan ni Lehi, ang Ginoo mihatag kanimo og daghang gasa aron pagtabang kanimo sa pagdawat og personal nga giya. Basaha ang mosunod nga tulo ka mga pamahayag bahin sa pipila niini nga mga gasa, ug pamalandungi kon sa unsang paagi ang matag usa niini nga mga gasa nga gikan sa Ginoo susama sa Liahona.

Patriyarkal nga Panalangin

Si Presidente Thomas S. Monson mi-refer sa patriyarkal nga mga panalangin isip usa ka personal nga Liahona:

“Ang sama nga Ginoo kinsa mihatag og Liahona ni Lehi naghatag kaninyo ug kanako karon og talagsaon ug bililhon nga gasa aron sa paghatag og direksyon sa atong kinabuhi, pagmarka sa mga peligro sa atong kaluwasan, ug pagplano sa paagi, gani luwas nga agianan—dili ngadto sa usa ka gisaad nga yuta, apan ngadto sa atong langitnong panimalay. Ang gasa nga akong gi-refer mao ang imong patriyarkal nga panalangin. Ang matag takus nga miyembro sa Simbahan adunay katungod sa pagdawat niining talagsaon ug bililhon nga bahandi. …

“… Ang inyong panalangin dili ayuhon sa pagpilo ug dayon tagoan. Kini dili ikwadro o imantala. Hinoon, kini angay nga basahon. Kini angay nga higugmaon. Kini angay nga sundon. Ang inyong patriyarkal nga panalangin makatabang kaninyo sa inyong labing lisud nga pagsulay. Kini makagiya kaninyo sa mga kakuyaw sa kinabuhi. … Ang inyong patriyarkal nga panalangin para kaninyo usa ka personal nga Liahona aron momapa sa agianan ug mogiya sa inyong padulngan” (“Your Patriarchal Blessing: A Liahona of Light,” Ensign, Nob. 1986, 65–66).

Ang mga Kasulatan ug ang mga Pulong sa mga Propeta

Si Elder W. Rolfe Kerr, nga nangalagad isip miyembro sa Seventy, mipanghimatuod nga ang mga pulong ni Kristo ug sa Iyang mga sulugoon mao ang espirituhanon nga Liahona: “Ang mga pulong ni Kristo mahimong usa ka personal nga Liahona alang sa matag usa kanato, nagpakita nato sa agianan. Dili kita magtinapulan tungod sa kasayon sa agianan. Himoon nato diha sa hugot nga pagtuo ang mga pulong ni Kristo sa sulod sa atong mga hunahuna ug sa atong mga kasingkasing sama sa girekord sa sagradong kasulatan ug ingon nga gipamulong sa buhi nga mga propeta, mga manalagna, ug mga tigpadayag. Atong batunan ang hugot nga pagtuo ug kakugi sa pagbusog sa mga pulong ni Kristo, kay ang mga pulong ni Kristo ang mahimo natong espirituhanon nga Liahona nga nagsulti kanato sa tanang mga butang nga kinahanglang atong buhaton” (“Ang mga Pulong ni Kristo—Atong Espirituhanong Liahona,” Ensign o Liahona, Mayo 2004, 37).

Ang Espiritu Santo

Si Elder David A. Bednar sa Korum sa Napulog Duha ka mga Apostoles mikumpara sa Espiritu Santo ug sa Liahona: “Samtang kita maningkamot sa pagpahiangay sa atong mga kinaiya ug mga lihok diha sa pagkamatarung, nan ang Espiritu Santo mamahimong para kanato karon sa unsa ang Liahona kaniadto alang kang Lehi ug sa iyang pamilya sa ilang panahon. Ang mismong mga hinungdan nga nakapalihok sa Liahona para kang Lehi moimbitar usab sa Espiritu Santo sa atong kinabuhi. Ug ang mismong mga hinungdan nga nakapahunong sa paglihok sa Liahona kaniadto makapahilayo usab kanato sa Espiritu Santo karon” (“Nga Kita Unta sa Kanunay Makabaton sa Iyang Espiritu uban Kanato,” Ensign o Liahona, Mayo 2006, 30).

Isulat sa imong scripture study journal ang duha o tulo ka mga paagi nga ang patriyarkal nga panalangin, ang mga kasulatan ug ang mga pulong sa mga propeta, o ang Espiritu Santo sama sa Liahona.
Sa imong scripture study journal, ihulagway ang usa ka panahon sa dihang ang pagsunod sa direksyon gikan sa usa sa mga tinubdan nga nalista sa ibabaw nakapahimo kanimo sa pagdawat sa giya gikan sa Ginoo?

1 Nephi 16:34–39

Ang anak nga mga babaye ni Ishmael nagbangutan sa iyang pagkamatay, ug si Laman nagplano sa pagpatay ni Lehi ug ni Nephi

Sa 1 Nephi 16:34–38 atong nakat-unan nga si Ishmael namatay human mipanaw sa kamingawan sulod sa daghang mga adlaw. Ang iyang anak nga mga babaye nagbangutan sa hilabihan sa pagkawala sa ilang amahan, ug ang uban sa iyang pamilya nagbagulbol batok kang Lehi ug Nephi ug gusto nga mobalik sa Jerusalem. Gani si Laman nakigkunsabo sa pagpatay kang Nephi ug ni Lehi. Sa makausa pa ang igsoon nga mga lalaki ni Nephi mipakita sa ilang kahuyang ug ka walay pagtuo tungod kay wala sila mangita sa kabubut-on sa Ginoo. Ilang gisalikway ang Espiritu Santo ug ang tabang nga Iya unta nga ihatag kanila.

Basaha ang 1 Nephi 16:39, ug tan-awa unsa ang gibuhat sa Ginoo niini nga sitwasyon. Base sa unsay imong nakat-unan niini nga bersikulo, ngano man nga ang Ginoo mopanton kanato?

Ang Ginoo mogiya ug mopanton kanato alang sa atong kaayohan. Kon kita molihok sa paggiya o pagpanton nga atong nadawat gikan sa Ginoo, Siya mopanalangin kanato.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Nephi 16 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: