Unit 16: Day 1

Alma 11

Pasiuna

Si Amulek nakiglalis kang Zeezrom, kinsa misulay sa pag-agni kaniya nga ilimud ang tinuod ug buhi nga Dios. Dihang napanalipdan niya ang iyang gituohan batok sa mga paningkamot ni Zeezrom sa pag-ilad kaniya, mipamatuod si Amulek nga ang kaluwasan gikan sa sala moabut lamang pinaagi kang Jesukristo. Mihatag si Amulek og lig-ong pagpamatuod nga ang tanang tawo mabanhaw ug pagahukman sa Dios. Tungod sa Pag-ula sa Manluluwas, ikaw mabanhaw ug ugma damlag mobarug atubangan sa Dios ug manubag sa imong pagpakabuhi dinhi sa yuta.

Alma 11:1–25

Gisalikway ni Amulek ang mga panintal ni Zeezrom nga ilimud ang pagkaadunay Dios

Paghunahuna og butang nga imong naangkon nga bililhon kaayo kanimo nga dili gayud nimo ibaligya bisan kanus-a. Hunahunaa kon nganong bililhon man kaayo kini kanimo. Sa Alma 11, samtang si Alma ug Amulek padayong nanudlo sa mga tawo sa Ammonihah, usa ka dautan nga magbabalaod ginganlan og Zeezrom nakig-atubang ni Amulek ug gitanyagan siya og kwarta agig bugti sa butang nga bililhon kaayo ni Amulek. Ang mga kasulatan naghulagway kang Zeezrom nga usa ka “hanas sa mga paagi sa yawa” (Alma 11:21), nagpasabut nga kahibalo siya unsaon sa paggamit ang susamang mga estratehiya, mga plano, mga pangilad, ug mga lipat-lipat nga gigamit ni Satanas sa pag-agni gikan sa pagkamatarung ug kamatuoran.

Siksika ang Alma 11:21–22, ug hibaloi kon pila ang kantidad sa gitanyag ni Zeezrom nga kwarta kang Amulek ug unsay gusto niyang ipabuhat ni Amulek niini. Ang “onti” usa sa pinakabililhon nga sinsilyong pilak o silver sa mga Nephite (tan-awa sa Alma 11:6, 11–13). Ang usa ka onti katugbang sa gibanabana nga usa ka semana nga sweldo sa usa ka huwes (tan-awa sa Alma 11:3).

Tubaga ang mosunod nga mga pangutana:

• Kanus-a ka nakakita og tawo nga misalikway sa pulong nga pagpanglingla, sama sa gitanyag ngadto kang Amulek?

• Sa unsang paagi ang pagkakita niini nagdasig kanimo sa pagkamatinud-anon?

Basaha ang Alma 11:23–25 aron makita giunsa pagsanong ni Amulek ang tanyag ni Zeezrom. Dayon tubaga ang mosunod nga mga pangutana diha sa imong manwal:

• Ngano kaha nga dili man interesado si Amulek sa tanyag ni Zeezrom?

• Sumala sa Alma 11:25, unsa diay ang plano ni Zeezrom sa iyang pagtanyag og unom ka onti kang Amulek?

• Sa unsang paagi kini susama sa gihimo ni Satanas kon mosanong ang mga tawo sa iyang mga pagpanintal?

1. Kompletuha ang mosunod nga mga buluhaton diha sa imong scripture study journal:

   1. Aron mas maila kon sa unsang paagi nakabatok si Amulek sa tanyag ni Zeezrom, basaha ang Alma 11:22 ug kompletuha ang mosunod nga pamahayag: “Ako dili og butang nga supak sa Espiritu sa Ginoo.” Dayon isulat ang tulo o upat ka mga pulong nga imong ikabutang sa blangko nga maghimong tinuod sa pamahayag (ikonsiderar ang, pananglitan, mobuhat, mobasa, mosul-ob, motan-aw, ug mosulat).

   2. Pagsulat og usa ka pamahayag nga gibase sa Alma 11:22 nga makatabang nimo sa pagbuntog sa tintasyon uban sa tabang sa Espiritu Santo. Ang imong isulat kinahanglang maghatag sa imong kaugalingon og mga pulong sa kamatuoran nga kon kita mosalig sa Espiritu Santo, mabuntog nato ang tintasyon.

Hununga sa makadiyot ang imong pagtuon, ug pamalandungi ang mosunod nga pangutana: Sa unsang paagi ang pagpakabuhi aron sensitibo ko sa Espiritu Santo ug makasunod sa Iyang mga pag-aghat makatabang nako sa pagbuntog sa tintasyon?

Basaha ang mosunod nga tambag gikan ni Presidente Boyd K. Packer, Presidente sa Korum sa Napulog Duha ka mga Apostoles, sa pagsusi kon sa unsang paagi ang pagsalig sa Espiritu Santo makatabang nimo nga mabuntog ang tintasyon:

“Kon nakahimo mo og mga butang nga dili unta angay, o kon nakigkauban mo sa mga tawo nga nagganoy ninyo sa sayop nga padulngan, mao kana ang panahon sa pagpakita sa inyong pagka-gawasnon, sa inyong kabubut-on. Paminawa ang tingog sa Espiritu, ug dili kamo mahisalaag. …

“… Isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghug mo sa mga aghat nga gikan sa Balaang Espiritu” (“Tambag ngadto sa mga Kabatan-onan,” Ensign o Liahona, Nob. 2011, 18).

2. Sa pagkonsiderar sa posibling mga paggamit sa imong nakat-unan, tubaga ang mosunod nga mga pangutana diha sa imong scripture study journal:

   1. Unsa ang pipila ka mga sitwasyon diin ang mga kabatan-onan matintal nga ikompromiso ang ilang mga pagpamatuod o ibaliwala kini alang sa mga butang sa kalibutan?

   2. Unsa nga mga sugyot ang imong ikatanyag ngadto sa kauban nimong estudyante nga makatabang niya sa pagsalig sa Espiritu Santo kon mag-atubang og mga tintasyon sa ingon niini nga matang?

Gamita unsay imong nakat-unan pinaagi sa paghinumdom sa ehemplo ni Amulek sa sunod higayon nga ikaw tintalon nga ikompromiso ang imong mga gituohan o mga hiyas. Hinumdumi nga makasinati ikaw og dugang nga kamasaligon ug kasiguroan kon magpakabuhi kang takus ug mosunod sa mga pag-aghat sa Espiritu Santo.

Paggamit

Kon ang kahibalo sa baruganan sa ebanghelyo nakat-unan apan dili lihukon o gamiton, ang pagkat-on dili kompleto ug ang Espiritu mahimong mohunong sa pakigtrabaho sa indibidwal. Ang paggamit mahitabo kon dawaton nimo sa imong kasingkasing ug hunahuna ang imong nakat-unan ug dayon lihukon ug magpuyo sumala niana nga kamatuoran.

Alma 11:26–40

Mipamatuod si Amulek mahitungod sa Anak sa Dios ug gibuntog ang mga pagsulay ni Zeezrom nga dili hatagan og bili ang iyang pulong

Giatake ni Zeezrom ang pagtuo ni Amulek kang Jesukristo. Aron personal nga masabtan unsay nahitabo human si Zeezrom napakyas sa pagpalimud ni Amulek nga adunay Dios, paghunahuna og panahon nga tingali dunay tawo nga mosupak sa imong mga gituohan. Basaha ang panag-istorya nila ni Amulek ug Zeezrom diha sa Alma 11:26–34, ug dayon tan-awa kon sa unsang paagi gituis ni Zeezrom ang pulong ni Amulek diha sa Alma 11:35.

Basaha kon giunsa sa pagkorihir kini nga pagkasayop diha sa Alma 11:36–37. Mahimo nimong markahan ang footnote 34a diha sa imong mga kasulatan, ug basaha ang Helaman 5:10–11. Dayon ipasabut sa kaugalingon nimong mga pulong ang kalainan tali sa pagkaluwas “sa atong mga sala” ug pagkaluwas “gikan sa atong mga sala” (mga italic gidugang):

Basaha ang Alma 11:40, ug hibaloi ang unang lakang nga giingon ni Amulek nga kinahanglang buhaton sa mga tawo aron maluwas gikan sa ilang mga sala. Dunay daghang tawo kinsa nangangkon nga mituo kang Jesukristo apan dili gustong mag-usab sa ilang kinaiya. Ang pagtuo sa pangalan ni Jesukristo nagpasabut sa pagbaton og hugot nga pagtuo Kaniya.

Aron mas masabtan sa unsang paagi ang “pagtuo sa iyang ngalan” (pagbaton og hugot nga pagtuo kang Jesukristo) modala ngadto sa paghinulsol, basaha ang mosunod nga kinutlo gikan ni Presidente Dieter F. Uchtdorf sa Unang Kapangulohan: “Nagkinahanglan kita og lig-on nga pagtuo ni Kristo aron makahimo sa paghinulsol. Ang atong pagtuo kinahanglan nga maglakip og usa ka ‘husto nga ideya sa kinaiya, mga kahingpitan, ug mga hiyas’ sa [Dios] (Lectures on Faith [1985], 38). Kon motuo kita nga ang Dios nasayud sa tanang mga butang, mahigugmaon, ug maloloy-on, makahimo kita sa pagbutang sa atong pagsalig diha Kaniya alang sa atong kaluwasan nga dili mapaling-paling. Ang pagtuo diha kang Kristo mousab sa atong mga hunahuna, mga gituohan, ug mga kinaiya nga wala mahiuyon sa kabubut-on sa Dios” (“Punto sa Luwas nga Pagbalik,” Ensign o Liahona, Mayo 2007, 100).

Sa unsang paagi nga ang imong pagtuo kang Jesukristo nakapadasig kanimo sa pag-usab sa imong mga hunahuna, mga gituohan, ug mga kinaiya?

3. Ngano kaha nga ang tawo nagkinahanglan man og pagtuo kang Jesukristo aron makahinulsol? Gamit ang imong nakat-unan gikan ni Amulek ug ni Presidente Uchtdorf, isulat sa imong scripture study journal kon unsaon nimo sa pagpasabut ang mosunod nga baruganan: Ang tinuod nga pagtuo kang Jesukristo maoy sinugdanan sa proseso sa pagkatubos gikan sa atong mga sala.

Alma 11:41–46

Gitudlo ni Amulek ang mahitungod sa pagkabanhaw sa tanang katawhan

Sa dili pa nimo basahon ang konklusyon sa pagpamatuod ni Amulek ngadto kang Zeezrom, pamalandungi ang mosunod nga pangutana: Sa unsang paagi kaha ang mga binuhatan sa usa ka tawo maapektuhan gumikan sa dili pagtuo sa kinabuhi human sa kamatayon?

4. Isulat ang mga pulong nga Pagkabanhaw ug Paghukom sa duha ka managlahi nga ulohan nga kolum diha sa imong scripture study journal. Dayon pangitaa ang Alma 11:41–45, nga mangita kutob sa naa nga impormasyon nga imong makit-an mahitungod sa pagkabanhaw ug paghukom, ug isulat unsay imong nakat-unan ubos sa matag ulohan. Mahimo nimong isulat diha sa ibabaw sa pahina sa imong mga kasulatan o sa imong scripture study journal: Pinaagi sa Pag-ula ni Jesukristo, ang tanan mabanhaw ug hukman sigun sa ilang mga binuhatan. Kini nga mga bersikulo nagtudlo nga ang pagkabanhaw nagpasabut sa pagkahiusa og balik sa atong lawas ngadto sa atong espritu sa ilang “hingpit nga kahimtang” and “tukma nga bayanan,” dili na gayud mabulag pa (tan-awa sa Alma 11:43, 45).

5. Tubaga ang usa o duha ka mga pangutana diha sa imong scripture study journal:

   1. Unsa ang imong mahunahuna ug mga pagbati kon maghunahuna ka mahitungod sa pagkabanhaw ug mahukman?

   2. Sa unsang paagi ang imong gituohan nga ikaw mabanhaw ug hukman makaapekto sa imong matag adlaw nga pagpili?

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 11 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: