3 Nephi 27

Pasiuna

Sayo sa ilang pangalagad, human sa ikaduhang adlaw sa pagpakita sa nabanhaw nga Manluluwas diha kanila, ang napulog duha ka Nephite nga mga disipulo nagpundok sa mainiton nga pag-ampo ug pagpuasa. Nagpakita si Jesukristo pag-usab ngadto kanila ug mitubag sa ilang pangutana kon unsay angay nga pangalan sa Simbahan. Mitudlo ang Manluluwas kanila nga ang Pag-ula importante sa Iyang ebanghelyo ug nga pinaagi sa Pag-ula mahimo kitang magbarug nga walay lama sa Iyang atubangan kon kita maghinulsol, magpabunyag, ug molahutay hangtud sa katapusan. Agig dugang, gisugo Niya ang Iyang mga disipulo nga mahimong sama Kaniya.

3 Nephi 27:1–12

Mitudlo ang Ginoo sa napulog duha nga mga disipulo nga ang Iyang Simbahan kinahanglan nga magdala sa Iyang pangalan

Hunahunaa nga ikaw gusto nga magsugod og bag-ong club o sports team. Hukmi unsa nga matang sa club o team ang imong himoon, ug dayon mopili og pangalan alang sa imong organisasyon. Isulat ang pangalan ug matang sa organisasyon nga imong gipili:

Hunahunaa ang pipila ka organisasyon nga imong nailhan ug unsay gipasabut sa ilang mga pangalan mahitungod sa ilang katuyoan ug sa mga tawo nga nahisakop niini.

Ang napulog duha ka mga disipulo nga Nephite nagpadayon sa pagtudlo ug pagbunyag sa katawhan. Sa usa ka okasyon nagkahiusa sila sa pagpuasa ug pag-ampo sa dihang ang Manluluwas mibisita nila pag-usab (tan-awa sa 3 Nephi 27:1–2). Basaha ang 3 Nephi 27:3–7, nga mangita sa pangutana nga gipangutana sa mga disipulo ug sa tubag sa Manluluwas. Mahimo nimong markahan ang mga rason nga gihatag ni Jesukristo sa pagtawag sa Simbahan sa Iyang pangalan.

Siksika ang 3 Nephi 27:8–10, ug markahi unsay gitudlo sa Manluluwas nga mga timailhan sa Iyang tinuod nga Simbahan. Humana ang mosunod nga mga pulong sa imong manwal sa pagpakita sa pipila ka importante nga mga bahin sa tinuod nga Simbahan:

Ang tinuod nga Simbahan ni Jesukristo mao .

Hunahunaa nganong importante nga ang tinuod nga Simbahan ni Jesukristo dili lamang magdala sa Iyang panglan apan gitukod usab kini sa Iyang ebanghelyo (tan-awa sa 3 Nephi 27:8–10). Ang Manluluwas misaad sa mga Nephite nga kon ang Simbahan gitukod pinaagi sa Iyang ebanghelyo, nan ang Langitnong Amahan mopakita sa Iyang mga buhat niini (tan-awa sa 3 Nephi 27:10). Pamalandunga kon sa unsa nga paagi nga ikaw personal nga nakakita nga gipakita sa Langitnong Amahan ang Iyang mga buhat diha sa Simbahan.

Diha sa imong scripture study journal, isulat Ang pagkamiyembro sa tinuod nga Simbahan ni Jesukristo importante ngari nako tungod kay … Dayon pagsulat og mubo nga paragraph nga naghulagway sa imong mga hunahuna sa maong mga pulong. Sulayi sa pag-apil og daghang mga rason kutob sa imong mahimo gikan sa unsay imong nakat-unan samtang nagtuon ka sa 3 Nephi 27:1–12.

3 Nephi 27:13–22

Gihulagway ni Jesukristo ang Iyang ebanghelyo ug nagtudlo unsay kinahanglan natong buhaton aron magbarug nga walay sala sa Iyang atubangan

Paghunahuna og panahon sa dihang ikaw nasakpan nga nagbuhat og butang nga nakahibalo ka nga sayop. Hinumdumi unsay imong gibati sa dihang ang kamatuoran sa unsay imong gibuhat nahibaloan. Pamalandunga ang mosunod nga pangutana: Unsay imong bation nga magbarug sa atubangan sa Ginoo aron hukman kon duna pay sayop nga mga binuhatan nga wala nimo mahinulsuli? Unsay imong bation nga magbarug sa atubangan sa Ginoo aron hukman kon wala nay paagi pa nga makahinulsol sa bisan unsa nga mga sala nga imong nahimo panahon sa imong kinabuhi?

Human matudloi ang mga Nephite nga ang Iyang Simbahan kinahanglang matukod pinaagi sa Iyang ebanghelyo, ang Manluluwas mipadayon sa pagtudlo nila sa Iyang ebanghelyo. Ang pulong nga ebanghelyo literal nga nagpasabut nga “maayo nga mga balita.” Pinaagi sa ebanghelyo aduna gihapoy maayo nga mga balita alang kanatong tanan kon makasala kita.

Basaha ang 3 Nephi 27:13–16, 19, ug pangitaa ang mga elemento sa ebanghelyo nga maayo nga mga balita alang natong tanan. Ang pundasyon sa ebanghelyo ni Jesukristo mao nga Siya mibuhat sa kabubut-on sa Iyang Amahan sa pagtuman sa Pag-ula. Tubaga ang mosunod nga mga pangutana diha sa imong scripture study journal:
1. Ang Manluluwas mipamatuod ngadto sa Iyang mga disipulo nga Siya mianhi sa kalibutan sa pagbuhat sa kabubut-on sa Iyang Amahan. Sumala sa 3 Nephi 27:14, unsa ang kabubut-on sa Langitnong Amahan alang sa Iyang Balaan nga Anak?
2. Tungod kay gituman sa Manluluwas ang kabubut-on sa Iyang Amahan, unsay magamit sa tanang katawhan? (tan-awa ilabi na sa 3 Nephi 27:19).
Aron matabangan ka nga makapasalamat sa kaanindot niining maayo nga mga balita, basaha ang usa o daghan pa sa mosunod nga mga tudling sa kasulatan ug isulat ang mubo nga pagpasabut diha sa imong scripture study journal kon ngano nga ang Pag-ula ni Jesukristo usa ka maayo nga balita: 2 Nephi 9:8–10; Alma 34:14–16; Helaman 14:15–18.

Si Elder Jeffrey R. Holland sa Korum sa Napulog Duha ka mga Apostoles mipamatuod ngano nga ang ebanghelyo maayo nga balita alang sa tanang katawhan: “Ang ‘maayo nga balita’ mao nga ang kamatayon ug impyerno malikayan, nga ang mga sayop ug mga sala mahimong mabuntog, nga dunay paglaum, nga dunay tabang, nga ang dili masulbad dunay sulbad, nga ang kaaway nabuntog. Ang maayo nga balita mao nga ang lubnganan sa tanan sa umaabut wala nay sulod, nga ang kalag sa tanan mahimong putli pag-usab, nga ang matag anak sa Dios makabalik pag-usab ngadto sa Amahan kinsa naghatag nila og kinabuhi,” (“Missionary Work and the Atonement,” Ensign, Mar. 2001, 8, 10).

Nakadungog ba ikaw nga dunay misulti nga kinahanglan kita nga “mosunod sa ebanghelyo”? Kon dunay modapit nato sa “pagsunod sa ebanghelyo,” sa kasagaran sila nagdapit nato sa pagsunod sa mga baruganan ug pagdawat sa mga ordinansa nga nagdapit sa gahum sa Pag-ula ni Jesukristo nganha sa atong kinabuhi aron kita maluwas. Siksika ang 3 Nephi 27:20–21 nga mangita unsay kinahanglan natong buhaton sa pagdawat sa tanang mga panalangin sa Pag-ula ug pag-andam sa paghukom.

Isulat ang Kon kita , nan kita magbarug nga walay lama sa atubangan ni Jesukristo diha sa imong scripture study journal. Kompletuha kini nga mga pulong pinaagi sa pagsulat sa baruganan sa ebanghelyo gikan sa 3 Nephi 27:20–21 nga kinahanglan nga atong sundon aron makabarug nga walay lama sa atubangan sa Ginoo. (Mahimo nimong pangitaon ang pipila ka mga baruganan alang sa “kon” nga bahin niini nga pamahayag sa baruganan.) Tubaga ang mosunod nga pangutana diha sa imong scripture study journal: Unsay akong mabuhat sa akong kinabuhi karon sa “pagsunod sa ebanghelyo” nga mas hingpit aron nga ako makasinati sa gahum sa Pag-ula ug makabarug nga walay lama sa atubangan sa Dios sa katapusang adlaw?

Pamalandunga unsa kaha kon moabut ang adlaw nga mobarug atubangan ni Jesukristo nga nakahibalo nga ikaw nalimpyuhan pinaagi sa Iyang Pag-ula tungod sa pagkamasulundon ngadto sa mga baruganan, mga sugo, ug mga ordinansa sa Iyang ebanghelyo.

3 Nephi 27:23–33

Si Jesukristo misugo sa Iyang mga disipulo nga mahisama Kaniya

Sumala sa narekord sa katapusan sa 3 Nephi 27, si Jesukristo mihatag og mga instruksyon sa Iyang napulog duha ka mga disipulo ug mitudlo kanila mahitungod sa ilang tahas isip mga lider ug mga maghuhukom sa ilang katawhan. Basaha ang 3 Nephi 27:27, ug pangitaa ang sugo nga Iyang gihatag sa mga disipulo aron pagtabang nila nga matuman ang ilang mga tahas sa matarung nga paagi. Paggahin og pipila ka gutlo ug hunahunaa ang mosunod nga mga pangutana:

Nganong importante man alang niadtong mohukom sa uban nga mahisama sa Manluluwas?
Balik ngadto sa 3 Nephi 27:21, unsay gisugo sa Manluluwas nga buhaton sa mga disipulo?
Unsa ang relasyon tali sa paghimo sa mga buhat sa Manluluwas ug mahisama Kaniya?

Basaha pag-usab ang 3 Nephi 27:21, 27, ug markahi diha sa imong kasulatan ang mga pulong nga nagpakita nga ang Ginoo nagpaabut sa Iyang mga disipulo nga mosunod sa Iyang mga buhat ug mahimong sama Kaniya.

Tubaga ang mosunod nga mga pangutana diha sa imong scripture study journal aron sa pagtabang nimo sa paggamit sa mga pagtulun-an sa Manluluwas nga mahimong mas sama Kaniya:
1. Unsa ang akong mga oportunidad kagahapon aron mahisama sa Manluluwas?
2. Unsaon nako aron mas mahisama sa Manluluwas karon?
3. Unsa nga mga buhat sa Manluluwas nga akong mahimo ugma sa eskwelahan o sa balay?

Si Presidente Ezra Taft Benson mitudlo nga kadtong maningkamot nga mahisama ni Jesukristo makakab-ot og tinuod nga kahalangdon: “Kana nga tawo pinakahalangdon ug labing bulahan ug malipayon kansang kinabuhi hapit na mapareha ni Kristo. Wala kini kalabutan sa yutan-ong katigayunan, gahum, o dungog. Ang bugtong tinud-anay nga sukdanan sa kahalangdon, kabulahan, ug kamalipayon mao kon unsa ka duol nga mahisama ang kinabuhi ngadto sa Agalon, nga si Jesukristo. Siya ang husto nga agianan, ang hingpit sa kamatuoran, ug ang buhong nga kinabuhi” (“Jesus Christ—Gifts and Expectations,” Ensign, Dis. 1988, 2).

Isulat ang mosunod nga pahinumdom diha sa ubos sa mga buluhaton karong adlawa sa imong scripture study journal:

Akong natun-an ang 3 Nephi 27 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: