Mosiah 15–17

Pasiuna

Ang rekord sa pagsangyaw ni propeta Abinadi ngadto ni Haring Noah ug sa iyang mga pari nagpadayon diha sa Mosiah 15–17. Siya mipamatuod sa tahas ni Jesukristo isip Manunubos. Usa sa mga pari ni Noah, si Alma, mituo ni Abinadi. Gisalikway ni Haring Noah si Alma gikan sa iyang hawanan ug gipapatay si Abinadi pinaagi sa pagsunog. Si Abinadi nagmatinuoron ngadto sa Dios sa tanang kahimtang.

Mosiah 15–16

Si Abinadi nagtudlo mahitungod sa tahas ni Jesukristo isip Manunubos

Paggahin og pipila ka minuto sa pagpangita ug sa paglingin sa mga pulong nga motubos, nakatubos, pagtubos, nagtubos, mitubos ug katubsanan sa Mosiah 15–16. Ang pagbalik-balik sa usa ka pulong diha sa usa ka hut-ong sa kasulatan kasagaran nagtimaan og importanting punto sa mensahe sa tigsulat. Samtang magtuon ka karon, tan-awa kon unsay gitudlo ni Abinadi mahitungod sa pagkatubos.

Aron sa pagtabang kanimo nga makasabut sa tahas ni Jesukristo isip Manunubos, ikonsiderar ang mosunod nga diagram:

Hunahunaa nga nakalapas ka sa balaod ug gihukman sa pinakagrabe nga silot nga gitugot sa balaod. Tingali ang silot naglakip sa dakong multa, panahon sulod sa bilanggoan, o gani kamatayon. Unsa kaha ang imong bation nga nag-atubang sa ingon nga mga silot? Makahunahuna ka ba og legal ug matinuoron nga paagi nga makalingkawas niini nga mga silot?

Isulat ang Ako ubos sa pulong nga Nakasala ug Kaangayan [Hustisya] ubos sa pulong nga Silot diha sa diagram. Kitang tanan adunay mga higayon nga nakalapas sa mga balaod sa Dios ug kinahanglang moatubang sa mga gipangayo sa kaangayan. Ang mga gipangayo sa kaangayan nanginahanglan nga ang matag makasasala modawat sa silot nga konektado sa sala.

Basaha ang mosunod nga pamahayag ni Elder Richard G. Scott sa Korum sa Napulog Duha ka mga Apostoles, ug linyahi ang duha ka sangputanan sa paglapas sa mga balaod sa Dios: “Ang hustisya … nagkinahanglan nga ang tanang nasupak nga balaod pagabayran. Kon kamo mosunod sa mga balaod sa Dios, kamo panalanginan, pero walay dugang kabuotan nga naangkon nga mahimong tigumon aron pagbayad sa balaod nga inyong nasupak. Kon dili mahinulsolan, ang gisupak nga mga balaod makapauyamot sa inyong kinabuhi ug makapugong kaninyo sa pagbalik ngadto sa Dios” (“Ang Pag-ula Makasiguro sa Inyong Kalinaw ug Kalipay,” Ensign o Liahona, Nob. 2006, 41–42).

Ang mga sangputanan sa paglapas sa mga balaod sa Dios naglakip sa kasakit ug pagkadili makahimo sa pagpuyo uban sa Dios. Basaha ang Mosiah 15:1, 7–9, ug markahi ang mga pulong nga nagpakita kon sa unsang paagi ang Pag-ula sa Manluluwas nagtagbaw sa mga gipangayo sa kaangayan.

Gamit og diksyonaryo sa pagpangita sa mga kahulugan sa mosunod nga mga pulong:

Motubos (Mosiah 15:1)

Pangamuyo (Mosiah 15:8)

Taliwala (Mosiah 15:9)

Mahimo nimong isulat ang parte niini nga mga kahulugan tupad sa mga bersikulo.

Usahay ang mga tawo maglibug sa paghulagway ni Abinadi kang Jesukristo diha sa Mosiah 15:2–5 isip (1) ang Anak sa Dios nga Amahan ug (2) isip ang Amahan. Ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles nagpasabut sa diosnong kinaiya ni Jesukristo niining paagiha: “Sama sa gitudlo ni Abinadi, si Kristo ‘gipanamkon pinaagi sa gahum sa Dios’ (Mosiah 15:3) ug busa adunay mga gahum sa Amahan diha kaniya. Agi og dugang nianang balaan nga direktang relasyon, si Kristo naglihok usab isip ang Amahan diha nga siya ang Tiglalang sa langit ug yuta [tan-awa sa Mosiah 15:4], ang amahan sa atong espirituhanong pagkatawo pag-usab ug kaluwasan, ug matinud-anon diha sa pagtahud—ug busa nag-angkon sa gahum—sa kabubut-on sa iyang Amahan labaw pa kay sa iyang kaugalingong kabubut-on” (Christ and the New Covenant [1997], 183–84).

Tun-i ang Mosiah 15:5–7, nga maghunahuna mahitungod sa gibayad ni Jesukristo aron sa pagtubos kanimo, o sa pagbarug taliwala kanimo ug sa mga gipangayo sa kaangayan. Diha sa diagram sa ibabaw, isulat ang Jesukristo taliwala sa Nakasala ug Silot.

Importante nga masabtan nga ang Manluluwas dili makapawala sa mga gipangayo sa kaangayan apan nagbarug taliwala kanato ug sa kaangayan. Kon kita maghinulsol, Iyang tagbawon ang mga gipangayo sa kaangayan pinaagi sa pag-angkon sa silot alang kanato.

Kompletuha ang mosunod nga mga kalihokan diha sa imong scripture study journal:
1. Isulat ang Kadtong Mipili nga Matubos (Mosiah 15:11–12; 16:13). Dayon siksika ang Mosiah 15:11–12; 16:13, nga mangita kon kinsa ang mahimong matubos. Ihulagway ang imong nakit-an.
2. Isulat ang Kadtong Nagdumili nga Matubos (Mosiah 15:26–27; 16:2–5, 12). Dayon siksika ang Mosiah 15:26–27; 16:2–5, 12, nga mangita kon nganong ang ubang mga tawo dili matubos. Ihulagway ang imong nakit-an.
Gamit ang unsay imong nakat-unan sa miaging assignment, tubaga ang mosunod nga mga pangutana diha sa imong scripture study journal:
1. Unsa ang motino kon kinsa ang matubos gikan sa ilang mga sala?
2. Unsay imong nakat-unan gikan sa kalainan sa “kabubut-on” ni Jesukristo diha sa Mosiah 15:7 ug sa “kabubut-on” niadtong nanagbuhat og dautan diha sa Mosiah 16:12?

Si Jesukristo nagtagbaw sa mga gipangayo sa kaangayan alang sa tanan nga maghinulsol. Ang bayad sa Manluluwas alang kanato personal kaayo nga gasa alang ni bisan kinsa nga mopili sa paghinulsol ug pagbuhat sa kabubut-on sa Amahan. Basaha ang Mosiah 15:10, ug linyahi ang mga pulong nga “siya makakita sa iyang binhi.”

Basaha ang Mosiah 15:10–12 ug ang mosunod nga pamahayag ni Elder Merrill J. Bateman, usa ka emeritus nga sakop sa Seventy:

“Si propeta Abinadi … [na]mahayag nga ‘sa diha nga ang iyang kalag nahimo nga usa ka halad alang sa sala siya makakita sa iyang binhi’ (Mosiah 15:10). Miila dayon si Abinadi sa binhi sa Manluluwas nga mao ang mga propeta ug kadtong misunod kanila. Sulod sa daghang mga katuigan naghunahuna ko kabahin sa kasinatian sa Manluluwas didto sa tanaman ug didto sa krus ingon nga mga dapit diin ang dakong gibag-on sa sala nagtipun-og diha Kaniya. Hinoon pinaagi sa mga pulong nila ni Alma, Abinadi, Isaias, ug uban pang mga propeta, ang akong panglantaw nausab. Imbis sa dili personal nga gibag-on sa sala, adunay taas nga linya sa mga tawo, samtang gibati ni Jesus ang ‘atong mga kaluyahon’ (Mga Hebreohanon 4:15), ‘[mipas-an] sa atong mga kagul-anan, … mipas-an sa atong mga kasakit … [ug] ginasamaran tungod sa atong mga kalapasan’ (Isaias 53:4–5).

“Ang Pag-ula usa ka halawum, personal nga kasinatian diin si Jesus nasayud kon unsaon pagtabang sa kada usa kanato” (“Usa ka Sumbanan alang sa Tanan,” Ensign o Liahona, Nob. 2005, 75–76).

Tubaga ang mosunod nga mga pangutana diha sa imong scripture study journal:
1. Unsa kaha ang gipasabut nga mahimong binhi ni Jesukristo? (tan-awa sa Mosiah 15:12).
2. Unsay imong gibuhat aron sa pagsiguro nga maihap ka diha sa binhi ni Jesukristo?

Mahimo nimong ma-personalize ang Mosiah 15:10 pinaagi sa pagsulat sa imong ngalan puli sa “iyang binhi” diha sa bahin sa bersikulo nga imong gilinyahan. Pamalandungi sa makadiyot kon unsay gipasabut nga adunay usa ka Manunubos kinsa nakakita ug personal nga nakaila kanimo.

Unsa ang mga sangputanan sa tawo nga magdumili nga matubos? Tan-awa pag-usab ang Mosiah 16:5. Unsa ang mahitabo diha sa diagram nga gipakita sa sayo nga bahin niini nga leksyon kon ang nakasala magpadayon sa sala ug magdumili sa paghinulsol? Basaha ang Doktrina ug mga Pakigsaad 19:16–17 sa pagdiskubre kon unsay mahitabo niadtong magdumili sa pagdawat sa matubsanong buhat sa Manluluwas pinaagi sa paghinulsol.

Si Abinadi mitudlo nga ang katubsanan ni Jesukristo naglakip dili lamang sa usa ka pagluwas gikan sa sala apan usab gikan sa kamatayon. Ang tanan mabanhaw; hinoon, ang uban una nga pagabanhawon kay sa uban. Si Abinadi migamit sa termino nga “unang pagkabanhaw” aron sa pagpasabut nga ang mga matarung ug inosente una nga mabanhaw kay sa mga masukulon (tan-awa sa Mosiah 15:21–22). Ang matarung matubos gikan sa kamatayon diha sa unang pagkabanhaw ug ang dautan kinahanglan nga maghulat nga mabanhaw sa pagkahuman na sa Milenyum (tan-awa sa D&P 76:85, 106).

Pamalandungi ang mga bersikulo nga imong gitun-an diha sa Mosiah 15. Hunahunaa nga duna kay oportunidad alang sa usa ka mensahero nga mohatud og mensahe gikan kanimo ngadto sa Manluluwas. I-rekord kon unsay imong isulat niana nga mensahe, base sa unsay Iyang nabuhat alang kanimo.

Ang Manluluwas gusto nga madala kita og balik ngadto sa presensya sa atong Langitnong Amahan. Siya nagpatunga, nagpataliwala, ug nangamuyo alang kanato. Ang Manluluwas mibayad sa mga gipangayo sa kaangayan alang kanato kon maghinulsol kita.

Mosiah 17

Si Alma mituo ni Abinadi ug gisalikway; si Abinadi gipatay

Nakasaksi ka ba og usa ka tawo nga nanalipud sa matarung bisan kon lisud kining buhaton para niya? Unsay resulta?

Sa dihang gitapos ni Abinadi ang iyang mensahe, usa sa mga pari, ginganlan og Alma, misulay sa pagkombinser sa hari nga si Abinadi namulong sa kamatuoran ug kinahanglang buhian. Ang hari misalikway kang Alma ug mipadala og mga sulugoon sa pagpatay kaniya. Si Alma mitago ug misulat sa mga pulong ni Abinadi.

Importante ang pagkakabig ni Alma. Tungod kay iyang girekord ang mga pulong ni Abinadi, daghang mga henerasyon ug mga katawhan ang napanalanginan. Ang mga bunga sa pagkakabig ni Alma mas maklaro samtang magtuon ka sa umaabut nga mga kapitulo. Ang hari ug ang iyang mga pari nagtinambagay sa usag usa sulod sa tulo ka adlaw una gisentensyahan og kamatayon si Abinadi (tan-awa sa Mosiah 17:1–6, 13).

Ang Mosiah 17:7–10 ug Mosiah 17:11–12 nagtandi sa mga pagpili nga gihimo ni Abinadi ug Haring Noah. Human matun-an kini nga mga bersikulo, paghimo og mugbo nga mga tubag sa mosunod nga mga pangutana diha sa imong scripture study journal:
1. Unsa nga katapusang mga pulong ni Abinadi ang labing nakaapekto nimo?
2. Ngano kaha nga ang mga pulong ni Abinadi nakaapekto ni Haring Noah sa paagi nga nahimo niini?
3. Unsa nga matang sa impluwensya aduna ang mga pari diha kang Haring Noah?
4. Sa unsang paagi ang ehemplo ni Abinadi nakatabang sa pagdasig kanimo nga magmatinuoron sa Dios sa tanan nga mga kahimtang?

Si Presidente Gordon B. Hinckley mipahayag: “Pagmalig-on—sa pagpanalipud sa matarung. Nagpuyo kita sa panahon sa pagpauyon-uyon ug sa pagnunut. Sa mga sitwasyon nga gisagubang nato sa matag adlaw, nahibalo kita unsay husto, apan tungod sa pagpamugos sa atong mga higala ug sa malimbungon nga mga tingog niadtong buot modani kanato, kita miuyon ra. Kita nagpauyon-uyon. Kita minunot. Kita mitugyan, ug kita naulaw sa atong mga kaugalingon. … Kinahanglang mopalambo kita sa kalig-on sa pagsunod sa atong mga pagtuo” (“Building Your Tabernacle,” Ensign, Nob. 1992, 52).

Isulat ang Makahimo ako nga magmatinuoron sa Dios sa tanang kahimtang diha sa imong mga kasulatan tupad sa Mosiah 17:9–12.

Aron ma-personalize ang moral nga kaisug ug personal nga kombiksyon ni Abinadi, basaha ang Mosiah 17:20 ug kompletuha ang mosunod nga sentence diha sa imong scripture study journal: Kinahanglan nga magmatinuoron ko sa Dios kon …

Sa imong pagtapos sa leksyon karon, paghunahuna og usa ka sakop sa pamilya o higala nga mahimong makabenepisyo sa pagpaminaw sa unsay imong nakat-unan ug gibati karon. Kon mahimo, ipakigbahin kaniya kon unsay imong nakat-unan ug sa imong tinguha nga magmatinud-anon sa Ginoo atol sa lisud nga mga panahon.

Isulat ang mosunod diha ubos sa mga assignment karong adlawa diha sa imong scripture study journal:

Akong natun-an ang Mosiah 15–17 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: