Unit 32: Day 2

Moroni 8–9

Pasiuna

Ang Moroni 8 usa ka epistola (sulat) nga gihimo ni Mormon ngadto sa iyang anak nga si Moroni kon nganong ang gagmayng mga bata wala magkinahanglan og bunyag. Diha sa epistola, gitudlo usab ni Mormon kon unsaon nato sa pagpangandam aron makapuyo uban sa Dios. Gitapos niya pinaagi sa pagpahayag og kabalaka tungod sa pagkadautan ug sa nagsingabut nga kalaglagan sa mga Nephite. Ang Moroni 9 naglangkob sa katapusang narekord nga epistola ngadto sa iyang anak. Gipahayag niya ang kasubo tungod sa kahimtang sa pagkadautan sa mga Nephite ug miawhag kang Moroni nga magkugi sa pagtrabaho aron matabangan ang mga Nephite nga maghinulsol. Bisan pa man sa dautang kahimtang sa iyang katawhan, giawhag niya ang iyang anak nga magmatinud-anon kang Kristo ug himoon nga ang saad sa kinabuhing dayon magpabilin sa iyang hunahuna sa kahangturan.

Moroni 8:1–24

Nagsulat si Mormon ngadto sa iyang anak nga si Moroni bahin niadtong nagkinahanglan og bunyag

Nahibulong ka ba nganong ang mga bata diha sa Ang Simbahan ni Jesukristo sa mga Santos sa Ulahing mga Adlaw dili bunyagan hangtud mag-otso anyos sila? Sa usa ka sulat ngadto sa iyang anak nga si Moroni, nagtudlo si Mormon og pipila ka importante nga mga kamatuoran bahin sa kaluwasan sa gagmayng mga bata ug sa bunyag, lakip na nganong ang mga bata dili bunyagan hangtud mag-otso anyos sila. Gisugdan ni Mormon ang iyang sulat ngadto kang Moroni pinaagi sa paghisgot bahin sa usa ka panaglalis (panagsumpaki) diha sa mga Nephite. Basaha ang Moroni 8:4–6, ug pangitaa ang doktrina nga gilalisan sa mga Nephite. (Samtang magbasa ka, mahimong makatabang nga masayud nga ang dako dinhi niini nga konteksto nagpasabut og grabe kaayo.)

Basaha ang Moroni 8:7, ug hibaloi kon unsay gihimo ni Mormon sa dihang nakadungog siya bahin niini nga problema. Gitubag sa Manluluwas ang pag-ampo ni Mormon pinaagi sa pagpasabut nganong ang gagmayng mga bata wala magkinahanglan og bunyag sa wala pa ang edad sa pagkamay-tulubagon. Basaha ang Moroni 8:8–9, ug mangita sa unsay giingon sa Manluluwas kon nganong ang mga masuso ug gagmayng mga bata dili bunyagan.

Diha sa Moroni 8:8, ang “tunglo ni Adan” nagpasabut sa pagkahibulag ni Adan gikan sa presensya sa Dios isip resulta sa Pagkapukan. Klaro lang, ang mga Nephite wala makasabut sa doktrina sa bunyag. Sa ingon, sayop nilang gituohan nga ang gagmayng mga bata dili takus nga maanaa sa presensya sa Dios kon wala ang ordinansa sa bunyag, ug gusto nilang bunyagan ang mga bata sa dihang mga bata pa kaayo sila. Sa pagsabut niini nga bersikulo, mahimong makatabang usab nga mahinumduman nga ang sala “tinuyo nga pagsupak sa mga sugo sa Dios” (Giya ngadto sa mga Kasulatan, “Sala,” scriptures.lds.org). Aron mas hingpit nga masabtan ang doktrina niini nga bersikulo, mahimo nimong i-cross-reference ang Moroni 8:8 sa ikaduhang artikulo sa hugot nga pagtuo.

Basaha ang Moroni 8:10, ug pangitaa ang mga pulong nga mokompleto sa mosunod nga kamatuoran: Ang paghinulsol ug bunyag gikinahanglan sa tanan kinsa .

Tungod kay ang paghinulsol ug bunyag gikinahanglan lamang alang niadtong dunay tulubagon ug dunay kapasidad sa paghimo og sala, nagtudlo si Mormon nga sayop ang pagbunyag sa gagmayng mga bata kon wala pa silay tulubagon. Basaha ang Moroni 8:11–13, 18–22, ug pangitaa ang pagpasabut ni Mormon nganong ang bunyag sa gagmayng mga bata sayop. Kining mga bersikulo nagtudlo niini nga doktrina: Ang gagmayng mga bata naluwas pinaagi sa Pag-ula ni Jesukristo.

Gitakda sa Ginoo ang edad kanus-a magsugod ng pagkamay-tulubagon—otso anyos (tan-awa sa D&P 68:25–27; Hubad ni Joseph Smith, Genesis 17:11 [sa apendiks sa Biblia]). Sa dili pa sila mag-otso anyos, dili sila makasala kay si Satanas wala hatagi og gahum sa pagtintal sa gagmayng mga bata (tan-awa sa D&P 29:46–47). Ang bisan unsa nga sayop nga mahimo sa mga bata sa wala pay otso anyos dili makonsiderar nga mga sala.

girl being baptized

Elder Dallin H. Oaks

Si Elder Dallin H. Oaks sa Korum sa Napulog Duha ka mga Apostoles mipasabut nganong ang gagmayng mga bata dili makahimo og sala: “Atong nasabtan gikan sa atong doktrina nga sa wala pa ang edad sa pagkamay-tulubagon ang bata ‘dili makahimo sa pagpakasala’ (Moro. 8:8). Atol nianang panahona, ang mga bata makahimo og mga sayop, bisan gani sa bug--at kaayo ug makadaut nga mga butang nga kinahanglan gayud nga korihian, apan ang ilang mga buhat dili matawag isip mga sala” (“Sins and Mistakes,” Ensign, Okt. 1996, 65).

Isip kabahin niini nga epistola, nagpamatuod usab si Mormon nga ang gagmayng mga bata “buhi diha kang Kristo” ug kon mamatay sila sa wala pay otso anyos, natubos sila pinaagi sa Pag-ula ni Jesukristo (tan-awa sa Moroni 8:12–15, 22).

Samtang nagpasabut nganong ang mga masuso ug gagmayng mga bata wala magkinahanglan og bunyag, nagpamatuod si Mormon bahin niini nga baruganan: Ang Dios hingpit nga makiangayon sa Iyang pagtagad sa Iyang mga anak. Nagpasabut kini nga siguraduhon sa Dios nga ang tanan dunay makiangayon ug patas nga kahigayunan aron makadawat og kaluwasan.

1. Ang mosunod nga kalihokan makatabang nimo aron makahibalo sa pagpasabut sa mga doktrina nga gitudlo sa unang bahin sa Moroni 8. Pagpili og usa (o duha) sa mga sitwasyon sa ubos ug, diha sa imong scripture study journal, hibaloi ang usa o duha ka mga bersikulo gikan sa Moroni 8:8–24 nga nakatabang sa pagtubag sa kabalaka sa tawo diha sa sitwasyon. Dayon pagsulat og usa o duha ka paragraph nga magtubag sa sitwasyon. Gamita ang mga bersikulo sa kasulatan diha sa imong tubag.

   1. Isip usa ka misyonaryo, nakahimamat ka og tawo nga sinserong nangita sa kamatuoran. Gipasabut niya nga sa tibuok niyang kinabuhi gitudloan siya nga ang gagmayng mga bata makasasala sa dihang natawo sila tungod sa kalapasan ni Adan. Sigurado siya nga kon ang mga masuso mamatay nga wala mabunyagi, sila makasasala ug dili mahimong maluwas.

   2. Usa ka bag-ohay nga nakabig ang miuyon nga ang bunyag alang sa otso anyos nga mga bata maayo nga ideya apan nangutana, “Dili man importante kon ang mga tawo nabunyagan sa dihang walo pa sila ka bulan, o otso anyos, di ba?”

Moroni 8:25–30

Nagtudlo si Mormon kon unsay kinahanglan gayud natong buhaton aron makapuyo uban sa Dios

Human magtudlo nganong ang gagmayng mga bata wala magkinahanglan og bunyag, nagtudlo si Mormon nga ang mga tawo nga moabut sa edad sa pagkamay-tulubagon kinahanglan gayud nga mabunyagan. Gipasabut usab niya kon unsay kinahanglan gayud natong buhaton human sa atong bunyag aron makapuyo uban sa Dios.

Basaha ang Moroni 8:25–26, ug pangitaa kon unsay kinahanglan gayud natong buhaton ug ang mga kinaiya nga kinahanglan gayud natong palambuon aron makapuyo uban sa Dios. Mahimo nimong markahan kini nga mga butang diha sa imong mga kasulatan. Mahimong makatabang nga masabtan nga ang “kaaghup” nagpasabut og pagkamanunuton sa kabubut-on sa Dios, ug ang “mapainubsanon nga kasingkasing” nagpasabut og tinud-anay nga pagpaubos.

Mahimo nimong isulat ang mosunod nga baruganan diha sa imong mga kasulatan tupad sa Moroni 8:25–26: Pinaagi sa matinud-anong pagkamasulundon sa mga sugo, makadawat kita sa Espiritu Santo, nga moandam kanato aron makapuyo uban sa Dios.

2. Ang mosunod nga mga pangutana makatabang nga mas masabtan nimo ang Moroni 8:25–26. Ikonsiderar ang tanang mga pangutana, ug dayon pagpili og duha o sobra pa niini aron tubagan diha sa imong scripture study journal:

   1. Sa imong hunahuna nganong ang pagdawat og kapasayloan sa imong mga sala modala ngadto sa kaaghup ug mapainubsanon nga kasingkasing?

   2. Sa unsang paagi nga ang maaghup ug mapainubsanon nga kasingkasing modapit sa Espiritu Santo diha sa imong kinabuhi?

   3. Sa unsang paagi nga ang pagbaton sa Espiritu Santo makatabang kanimo aron makapuyo uban sa Dios?

   4. Nagtudlo si Mormon nga kon ganahan kita nga mapuno sa gugma nga molungtad, kinahanglan gayud kitang mag-ampo sa makugihong paagi. Sa imong hunahuna ngano nga ang makugihong pag-ampo gikinahanglan man kon ganahan kitang mapuno sa gugma?

Sama sa narekord sa Moroni 8:27, gipanghimaraut ni Mormon ang sala sa garbo taliwala sa mga Nephite. Basaha ang Moroni 8:27, ug pangitaa ang resulta sa garbo sa mga Nephite. Dayon itandi kini nga resulta ngadto sa mga resulta sa kaaghup ug mapainubsanon nga kasingkasing, nga makita diha sa Moroni 8:26.

Giawhag ni Mormon si Moroni nga mag-ampo alang sa mga Nephite aron tingali maghinulsol sila ug makadawat sa mga panalangin nga iyang gihulagway diha sa iyang sulat (tan-awa sa Moroni 8:28–30). Gamit ang tambag ni Mormon ngadto sa iyang anak, ikonsiderar ang pag-ampo alang sa piho nga mga indibidwal nga imong nahibaloan nga nagkinahanglan nga makadawat sa mga panalangin sa ebanghelyo, ug mangita og mga paagi sa pagtabang niadtong mga indibidwal.

Moroni 9:1–20

Gihulagway ni Mormon ang pagkadautan sa mga Nephite ug mga Lamanite

Hinumdumi ang usa ka higayon sa dihang misulay ka sa pagtabang og tawo ug kanang tawhana misalikway sa imong mga paningkamot. Unsa kaha ang reaksyon sa ubang tawo kon ang ilang maayo nga mga intensyon balik-balik nga isalikway niadtong gisulayan nila sa pagtabang? Samtang magtuon ka sa ikaduhang epistola ni Mormon ngadto sa iyang anak nga si Moroni, nga makita sa Moroni 9, pangitaa kon unsay gisulati ni Mormon aron sa pag-awhag sa iyang anak nga dili moundang sa pag-unong sa mga Nephite.

Basaha ang Moroni 9:1, ug pangitaa ang pulong nga gigamit ni Mormon sa paghulagway sa sitwasyon nga iyang hisgutan diha sa iyang sulat. Hinumdumi nga ang makapasubo dinhi niini nga konteksto nagpasabut og hilabihan nga makapabalaka. Sama sa narekord diha sa Moroni 9:2–19, gihulagway ni Mormon ang pipila sa makapabalaka nga mga butang nga nahitabo taliwala sa katawhan, nga nagpakita kon unsa na kadautan ang katawhan. Sama ni Ether, nga usa ka propeta sa mga Jaredite, nasaksihan ni Mormon ang kasuko ug pagkadautan nga milukop sa iyang katawhan. Nahadlok siya nga ang Espiritu sa Ginoo mohunong sa pagdasig kanila (tan-awa sa Moroni 9:4).

Pamalandunga nganong nagpadayon si Mormon sa pagtrabaho taliwala sa mga Nephite bisan kon gipatig-a nila ang ilang mga kasingkasing ngadto sa pulong sa Dios ug misalikway sa mga paningkamot sa mga propeta sa pagtabang kanila.

Gihatagan ni Mormon si Moroni og pipila ka gamhanang tambag kon unsaon niya sa pagpangalagad sa katawhan kansang mga kasingkasing dili bukas. Basaha ang Moroni 9:3–6, ug markahi ang mga pulong nga nagtudlo niining baruganan: Kinahanglan kitang magtrabaho sa makugihong paagi diha sa pagserbisyo sa Dios bisan kon kadtong atong giserbisyuhan dili positibo og reaksyon. Ang bersikulo 6 maktabang gayud sa pagtudlo niining baruganan.

Moroni 9:21–26

Giawhag ni Mormon si Moroni nga magmatinud-anon

Paghunahuna og bag-ohay nga mga panghitabo sa inyong komunidad, nasud, o kalibutan nga mahimong makapawala og kadasig sa mga tawo. Basaha ang Moroni 9:25–26 aron madiskubrihan ang tambag nga gihatag ni Mormon kang Moroni kon unsay buhaton sa makapawala sa kadasig nga mga kahimtang.

3. Tubaga ang mosunod nga mga pangutana diha sa imong scripture study journal: Unsay gisulti ni Mormon kang Moroni nga angayang “moabut sa imong salabutan sa kahangturan”? (Moroni 9:25). Sa unsang paagi nga ang paghinumdom sa Manluluwas ug sa Iyang Pag-ula makatabang kanimo kon anaa ka sa kalisud o malibutan sa pagkadautan?

Gikan sa tambag ni Mormon ngadto ni Moroni, atong makat-unan kini nga baruganan: Kon matinud-anon kita kang Jesukristo, makabayaw Siya kanato bisan kon ang mga kalisud ug pagkadautan maglibut kanato. Ang “pagmatinud-anon diha kang Kristo” mahimong magpasabut sa pagpaninguha sa tanang panahon nga molihok sama sa usa ka tinuod nga disipulo sa Manluluwas, maghinumdom sa Manlluluwas ug sa Iyang Pag-ula, ug matinud-anong magtuman sa Iyang mga sugo.

4. Sa imong scripture study journal, pagsulat bahin sa usa ka kasinatian sa imong kinabuhi o sa kinabuhi sa tawo nga suod nimo nga nagpakita nga ang miaging baruganan tinuod.

Hunahunaa ang usa ka paagi nga mahimo kang mas matinud-anon kang Kristo kon malibutan ka sa pagkadautan o lisud nga mga kahimtang.

5. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Moroni 8–9 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: