Sa 2 Nephi 2, si Lehi mitudlo sa iyang anak nga si Jacob nganong gibutang sa Langitnong Amahan ang Iyang mga anak sa usa ka kalibutan diin anaa ang mga kasakit, kaguol, sala, ug kamatayon. Aron matabangan si Jacob nga makasabut sa katuyoan sa mortalidad, iyang gipasabut ang sukaranang mga doktrina sa plano sa katubsanan—lakip ang kabubut-on, ang Pagkapukan ni Adan, ug ang Pag-ula ni Jesukristo. Ang pagtuon sa mga kamatuoran nga gitudlo sa 2 Nephi 2 makatabang kanimo nga hingpit nga makasabut kon sa unsang paagi ang Pag-ula ni Jesukristo mibuntog sa mga epekto sa Pagkapukan ug naghimong posible alang sa matag usa kanato sa paghimo og mga pagpili nga mopadulong ngadto sa kinabuhing dayon.
Si Lehi nagtudlo mahitungod sa Pagkapukan ni Adan ug sa Pag-ula ni Jesukristo
Hunahunaa ang pipila sa mga hagit nga bag-ohay lang nimong giatubang. Naghunahuna ba ka nganong ang kinabuhi adunay ingon nga mga hagit? Samtang imong basahon ang 2 Nephi 2:1, mahimo nimong markahan ang mga pulong nga gigamit ni Lehi aron sa paghulagway sa sayong mga katuigan ni Jacob. Dayon basaha ang 2 Nephi 2:2, ug markahi ang gisaad ni Lehi ngadto ni Jacob nga moresulta sa iyang mga kasakit. Usa ka kahulugan sa pulong nga pagpahinungod mao ang paghalad o paghimong balaan. Si Lehi daw nagsaad ni Jacob nga ang Ginoo mopahinungod sa mga pagsulay ni Jacob alang sa iyang labing maayong benepisyo.
Si Lehi mitudlo ni Jacob mahitungod sa pagkakinahanglan sa Pagkapukan ni Adan ug sa atong panginahanglan sa Pag-ula ni Jesukristo diha sa plano sa Langitnong Amahan. Gusto niya nga masayran ni Jacob nga ang Pagkapukan ug Pag-ula nakahimong posible alang kanato nga magamit ang atong kabubut-on aron makalambo ug makauswag kita padulong sa kinabuhing dayon. Basaha ang 2 Nephi 2:15–18, ug pagsulat og mugbo nga mga tubag sa mosunod nga mga pangutana:
Unsay giandam sa Dios alang ni Adan ug Eva sa Tanaman sa Eden nga nagtugot kanila sa paggamit sa ilang kabubut-on? (Tan-awa sa 2 Nephi 2:15–16.)
Unsay gitinguha ni Satanas sa Tanaman sa Eden? (Tan-awa sa 2 Nephi 2:17–18.) Sa unsang paagi nga imong makita si Satanas nga nagtinguha sa samang katuyoan karon?
Drowinga ang tsart sa ubos diha sa imong scripture study journal. Siksika ang 2 Nephi 2:19–25, ug hibaloi kon unsa kaha ang sangputanan kon wala pa mokaon si Adan ug Eva sa gidili nga bunga ug napukan, ingon man ang mga sangputanan nga nahitabo tungod sa Pagkapukan.
Human makompleto ang tsart, ikonsiderar kon ngano nga ang Pagkapukan ni Adan ug Eva usa ka mahinungdanong parte sa plano sa Langitnong Amahan alang sa kalipay.
Hunahunaa nga ang usa ka higala nagsulti kanimo nga si Adan ug si Eva nasayop tungod sa pag-ambit sa gidili nga bunga. Gamit ang unsay imong nakat-unan diha sa 2 Nephi 2:19–25, pagsulat og usa ka paragraph diha sa imong scripture study journal nga nagpasabut nganong ang Pagkapukan mahinungdanon sa plano sa Langitnong Amahan alang sa atong kaluwasan.
Samtang ang Pagkapukan ni Adan ug Eva naghatag og paagi aron kita molambo, nagpresentar usab kini og uban nga mga sangputanan. Sa wala pa ang Pagkapukan, si Adan ug Eva anaa sa presensya sa Dios sa Tanaman sa Eden; human makaambit sa gidili nga bunga, kinahanglan silang mobiya sa Iyang presensya.
Basaha ang 2 Nephi 2:5, ug pangitaa ang mga pulong nga nagpakita sa pagkahimulag ni Adan ug ni Eva gikan sa Dios human sa Pagkapukan. Ang “temporal nga balaod” nagpasabut sa pisikal nga mga balaod nga miepekto isip resulta sa Pagkapukan. Sa ingon, ang “ipahimulag” sumala sa “temporal nga balaod” nagpasabut sa mortal nga kahimtang sa kalibutan nga atong napanunod isip mga kaliwat ni Adan ug Eva. Tungod niini nga mga balaod kita pisikal nga nahimulag gikan sa presensya sa Dios ug gipaubos sa mga kasub-anan, mga sakit, kasakit, ug pisikal nga kamatayon. Ang “ipahimulag” sumala sa “espirituhanon nga balaod” nagpasabut nga nahimulag gikan sa presensya sa Dios tungod sa atong mga sala.
Pamalandungi kon sa unsang paagi nimo personal nga nasinati kini nga mga sangputanan sa Pagkapukan pinaagi sa paghunahuna sa mosunod nga mga pangutana:
Unsa nga mga kasakit, sakit, ug kasub-anan ang imong nasinati niining kinabuhia?
Kinsay imong nailhan nga namatay? Sa unsang paagi ang kamatayon niining tawhana nakaapekto kanimo?
Kanus-a ka mibati nga nahimulag sa espirituhanong paagi gikan sa Dios?
Samtang imong basahon ang 2 Nephi 2:6–10, mahimo nimong markahan ang importante nga mga pulong o hugpong sa mga pulong nga nagpakita nga pinaagi sa Pag-ula, si Jesukristo motubos kanato gikan sa mga epekto sa Pagkapukan ug mitanyag og katubsanan gikan sa atong mga sala. Sa 2 Nephi 2:9–10, ang pulong nga pangamuyo nagpasabut sa paglihok alang sa kaayohan sa laing tawo.
Samtang si Lehi nagtudlo ni Jacob mahitungod sa Pagkapukan ni Adan ug sa oposisyon nga atong nasinati sa mortalidad, iyang gipasabut og maayo ang positibo nga resulta sa Pagkapukan alang sa tanang katawhan.
Tubaga ang mosunod nga mga pangutana diha sa imong scripture study journal:
Gikan sa unsay imong nakat-unan mahitungod sa Pagkapukan, sa unsang paagi kini nagdala og kalipay sa katawhan?
Kanus-a ka nakasinati og kalipay tungod sa positibong mga sangputanan sa Pagkapukan?
Si Lehi nagtudlo mahitungod sa kabubut-on ug sa mga sangputanan sa atong mga pagpili
Paghunahuna mahitungod sa usa ka importanting pagpili nga kinahanglan nimong buhaton bag-ohay lang ug unsa kaha ang malungtarong mga sangputanan niana nga pagpili. Gitudloan ni Lehi ang iyang katawhan sa sukaranang importansya sa kabubut-on diha sa plano sa Langitnong Amahan alang sa kaluwasan. Aron sa pagtabang kanimo nga makasabut nga kita gawasnon sa pagpili sa kalingkawasan ug kinabuhing dayon o pagkabihag ug kamatayon (tan-awa sa 2 Nephi 2:27), kompletuha ang kalihokan sa ubos.
Isulat ang matag usa sa mosunod nga mga pahayag nga gikuha gikan sa Alang sa Kalig-on sa mga Kabatan-onan ([booklet, 2011], 2–3) diha sa imong scripture study journal. Dayon, samtang basahon nimo ang matag bersikulo sa 2 Nephi 2:11–18, 26–29, hunong kadali ug isulat kana nga numero sa bersikulo human sa pamahayag o mga pamahayag nga sa imong hunahuna gisuportahan niini. Ang matag usa sa mga numero sa bersikulo kinahanglang nasulat human sa usa sa mga pamahayag. Ang usa ka pamahayag mahimong magamit ngadto sa sobra sa usa ka bersikulo, ug ang usa ka bersikulo mahimong may kalabutan sa sobra sa usa ka pamahayag. Isip ehemplo, usa ka bersikulo gisulat na alang sa nag-unang pamahayag—usa ka kamatuoran nga gitudlo ni Lehi sa 2 Nephi 2:16 mao nga kita gihatagan og abilidad sa paglihok alang sa atong kaugalingon.
“Ang Langitnong Amahan mihatag kaninyo og kabubut-on, ang abilidad sa pagpili sa matarung kay sa sayop ug sa paglihok alang sa inyong kaugalingon.” 2 Nephi 2:16
“Samtang ania sa yuta, kamo pagasulayan aron makita kon kamo mogamit ba sa inyong kabubut-on sa pagpakita sa inyong gugma alang sa Dios pinaagi sa pagsunod sa Iyang mga sugo.”
“Samtang kamo gawasnon sa pagpili sa inyong pagabuhaton, kamo dili gawasnon sa pagpili sa mga sangputanan.”
“[Ang masalaypon] … nga mga pagpili makalangay sa inyong pag-uswag ug mosangput ngadto sa kasakit ug kaalaut.”
“Ang matarung nga mga pagpili mosangput sa malungtarong kalipay ug kinabuhing dayon.”
Basaha ang 2 Nephi 2:26–27. Unsa ang kapilian nga gawasnon ka sa paghimo? Basaha ang 2 Nephi 2:28, ug markahi kon unsa pa ang gihatag sa Dios kanimo aron matabangan ka sa “pagpili sa kinabuhi nga dayon.” Pamalandungi ang mga pagpili nga imong gihimo sa imong kaugalingong kinabuhi nga nagpakita nga mipili ka sa kinabuhing dayon.
Paningkamuti ang pagmemorya sa 2 Nephi 2:27, usa ka scripture mastery nga bersikulo. Basaha kini sa makadaghan, ug dayon tak-upa ang imong mga kasulatan ug gamita ang unang letra sa matag pulong niini nga bersikulo nga gilista sa ubos aron sulayan ang pag-recite niini sa imong kaugalingon o ngadto sa usa ka sakop sa pamilya. Balika kini nga kalihokan hangtud nga mobati ka nga maayo ka nang mohimo niini.
B, a m t g s s u; u a t n m b g k d a n s t. U s g s p s k u s k n d, p s h n T s t n m t, o p s p u s k, s s p u s g s y; k s n n a t n m t u m n m s n k.
Gamit lamang ang unang litra sa matag pulong sa 2 Nephi 2:27 sa ibabaw, isulat kini nga scripture mastery passage sa diha sa imong scripture study journall. Dili moli-li!
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 2 Nephi 2 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: