Unit 23: Day 3

Helaman 13–14

Pasiuna

Pipila ka tuig sa wala pa matawo ang Manluluwas, ang Ginoo mipadala og propeta nga Lamanite nga ginganlan og Samuel sa pagsangyaw og paghinulsol ngadto sa mga Nephite sa Zarahemla. Si propeta Samuel mao ang ikaduhang saksi ni Jesukristo, uban ni propeta Nephi. Iyang gipasidan-an ang mga Nephite sa ilang kalaglagan kon dili sila maghinulsol. Gisultihan sila ni Samuel nga sila dunay kalagmitan nga mosalikway sa mga propeta ug sa ilang disposisyon sa pagpangita og kalipay sa pagbuhat og kadautan. Gipahibalo niya ang mga timailhan nga motimaan sa pagkatawo ug pagkamatay ni Jesukristo. Gitudlo usab niya nga ang tanang mga tawo, pinaagi sa katubsanan ni Jesukristo, pagadad-on og balik ngadto sa presensya sa Dios aron pagahukman.

Helaman 13

Gipasidan-an ni Samuel ang mga Nephite sa ilang kalaglagan kon dili sila maghinulsol

Samuel the Lamanite on the Wall

Kon nakahimo ikaw og sayop ug kinahanglan nga korihian sa ginikanan o sa ubang lider, unsay imong reaksyon?

Ang asoy sa usa ka propeta nga nanawagan sa mga tawo sa paghinulsol nga narekord sa Helaman 13–16 talagsaon tungod kay mao kini ang unang higayon sa Basahon ni Mormon nga usa ka Lamanite nga propeta ang nanawagan sa mga Nephite sa paghinulsol.

Basaha ang Helaman 13:1–8, 11 aron masabtan ngano nga si Samuel misangyaw ngadto sa mga Nephite ug unsay gisugo sa Ginoo kaniya nga isulti. Kini nga mga bersikulo naghulagway sa baruganan nga: Ang mga propeta nakadawat ug nagsulti sa mga mensahe nga gibutang sa Dios sa ilang mga kasingkasing. Unsa nga mensahe nga gibutang sa Dios sa kasingkasing ni Samuel? Sumala sa Helaman 13:7, unsa nga epekto ang gilauman ni Samuel sa iyang mensahe diha sa mga Nephite?

1. Diha sa imong scripture study journal, pagsulat mahitungod sa usa ka panahon sa dihang ikaw mibati nga ang ginikanan o lider sa Simbahan nadasig sa paghatag sa usa ka mensahe. Sa unsa nga paagi nga nakaapekto kanimo ang mensahe?

Sa mga luna nga gihatag, isulat ang mga tubag sa mga pangutana sa mosunod nga mga tsart samtang ikaw magtuon sa Helaman 13:17–23 ug Helaman 13:24–30.

Helaman 13:17–23 Baruganan: Kon dili kita mahinumdom sa Ginoo, mas dali kitang madala sa garbo ug kadautan.

Hain sa mga bersikulo nga imong gibati ang nagtudlo sa baruganan sa ibabaw?

Unsa nga tunglo ang gisulti ni Samuel nga moabut sa mga Nephite?

Sumala ni Samuel, unsa ang wala buhata sa mga Nephite sa dihang ilang gibutang ang ilang mga kasingkasing diha sa ilang katigayunan?

Unsa ang mga paagi nga ang kabatan-onan karon mahimong mobutang sa ilang mga kasingkasing diha sa mga katigayunan— mga kabtangan, mga buluhaton, ug mga tinguha—nga mosangput ngadto sa garbo ug kadautan?

Ngano sa imong hunahuna nga importante ang “paghinumdom sa Ginoo nga inyong Dios diha sa mga butang nga gipanalangin kaninyo”? (bersikulo 22).

Helaman 13:24–30 Baruganan: Kon isalikway nato ang mga pulong sa mga propeta sa Ginoo, makasinati kita og pagbasol ug kasubo.

Hain sa mga bersikulo nga imong gibati ang nagtudlo sa baruganan sa ibabaw?

Unsa nga mga pamalibad ang gisulti ni Samuel nga gigamit sa mga Nephite sa pagsalikway sa mga propeta sa Ginoo?

Ngano sa imong hunahuna nga ang mga tawo sa kasagaran modawat sa mini nga mga propeta sa paagi nga gihulagway ni Samuel?

Tubaga ang sunod nga duha ka pangutana pinaagi sa pagtuon sa mga pakigpulong sa labing bag-o nga kinatibuk-ang komperensya sa Ensign o Liahona:

Unsa ang pipila ka piho nga mga pagtulun-an sa atong buhi nga mga propeta ug mga apostoles?

Unsa ang pipila ka piho nga mga problema nga gipasidaan sa mga propeta ug mga apostoles nga atong likayan?

Ribyuha ang Helaman 13:26–28, nga mangita kon unsay reaksyon sa mga Nephite sa mini nga mga propeta. Si Presidente Ezra Taft Benson namahayag: “Unsaon nato pagtubag ang mga pulong sa buhing propeta kon siya mosulti kanato unsay kinahanglan natong mahibaloan, apan dili hinoon mamati, usa ka pagsulay sa atong pagkamatinud-anon” (The Teachings of Ezra Taft Benson [1988], 140).

2. Tubaga ang mosunod nga mga pangutana diha sa imong scripture study journal:

   1. Unsa nga ehemplo sa mapanagnaong tambag ang imong napilian nga sundon?

   2. Sa unsa nga paagi ikaw napanalanginan tungod sa pagsunod niini nga tambag?

   3. Unsaon nimo nga mamaayo pa ang pagsunod sa tambag sa buhi nga mga propeta?

Si Samuel nanagna nga ang mga Nephite malaglag inig 400 ka tuig kon dili sila maghinulsol (tan-awa sa Helaman 13:9–10), ug mitudlo siya nga ang bugtong rason nga wala pa sila malaglag kay tungod sa matarung nga mga tawo nga nagpuyo uban kanila (tan-awa sa Helaman 13:12–14).

Basaha ang Helaman 13:38 aron madiskubrihan kon unsa ka daghang mga Nephite sa panahon si Samuel ang nahimong dautan kaayo.

Mipahayag si Samuel nga dili kita makaangkon og kalipay sa pagbuhat og kadautan, nga nakatabang nato nga makasabut nga ang tinuod nga kalipay moabut lamang kon kita motuman sa mga sugo sa Dios. Unsa nga tudling sa scripture mastery ang nagtudlo usab niini nga kamatuoran? (Tan-awa sa footnote c alang sa Helaman 13:38.)

President Ezra Taft Benson

Si Presidente Ezra Taft Benson mitabang nato nga makasabut niini nga baruganan sa dihang miingon siya: “Dunay karaan nga panultihon nga nag-ingon: Mas maayo ang pagpangandam ug pagpugong kay sa pag-ayo ug paghinulsol. Pagkatinuod gyud niana. … Ang unang linya sa depensa sa paghimo sa atong kaugalingon nga limpyo sa moral nga paagi mao ang pag-andam sa atong kaugalingon sa pagbatok sa tintasyon ug pagpugong sa atong kaugalingon nga makasala” (“The Law of Chastity,” sa Brigham Young University 1987–88 Devotional and Fireside Speeches [1988], 51; speeches.byu.edu).

Mitudlo si Samuel nga ang desisyon sa mga Nephite sa paglangan sa paghinulsol moresulta sa ilang kaalaot ug kalaglagan. Ang ubang mga asoy sa Basahon ni Mormon nagtudlo nga ang mga indibidwal makapadayon sa pagrebelde ug pagkadautan hangtud ang diwa sa paghinulsol mobiya kanila. Pananglitan, sila si Laman ug Lemuel dili mopatalinghug sa Dios ug nahimong “ingon og walay pagbati” (1 Nephi 17:45). Ang mao nga pananglitan nagpakita ngano nga importante kaayo nato nga dili maglangay-langay sa atong paghinulsol. Pinaagi sa paghinulsol mahimo ninyo ang mga butang nga husto ug mapugngan ang sala ug tintasyon sa pagbuntog sa inyong tinguha sa pagsunod sa Dios.

Basaha ang mosunod nga pamahayag ni Presidente Dieter F. Uchtdorf sa Unang Kapangulohan aron mas makasabut nga kamo makasubay pag-usab sa sakto nga dalan sa kinabuhi kon mosimang mo sa sayop nga dalan:

President Dieter F. Uchtdorf

“Atol sa akong pagbansay aron mahimong usa ka kapitan sa eroplano, kinahanglan akong makakat-on kon unsaon sa pagmaniobra og usa ka eroplano sa layo nga mga distansya. Ang mga flight sa dagkong mga kadagatan, paglatas sa halapad nga mga disyerto, ug pag-adto sa usa ka kontinente ngadto na sa laing kontinente nagkinahanglan og mabinantayong pagplano aron sa pagsiguro og usa ka luwas nga pag-abut sa giplanohan nga destinasyon. Ang uban niining walay hunong nga mga flight molungtad og 14 ka oras ug mokabat og hapit 14,000 ka mga kilometro.

Adunay usa ka importante nga punto sa pagdesisyon sa maong dugay nga mga flight nga komon nga nailhan isip punto sa luwas nga pagbalik. Hangtud niini nga punto ang eroplano adunay igo nga gasolina sa pagliko ug sa pagbalik nga luwas ngadto sa tugpahanan nga gigikanan. Tungod kay nakaagi na sa punto sa luwas nga pagbalik, nawala na sa kapitan kini nga opsyon ug kinahanglan nga magpadayon. Mao kini rason nganong kini nga punto sa kasagaran gipasabut nga mao ang punto nga wala nay pagbalik.

“… Si Satanas gusto nga kita maghunahuna nga kon kita makasala nakalabang na kita sa usa ka ‘punto nga wala nay pagbalik’—nga ulahi na kaayo aron sa pag-usab sa atong padulngan. …

“… Aron sa paghimo kanato nga mawad-an og paglaum, mobati nga miserable sama sa iyang kaugalingon, ug motuo nga dili na kita mapasaylo, si Satanas mahimo ganing motuis paggamit og mga pulong sa mga kasulatan nga maghatag og gibug-aton sa kaangayan sa Dios, aron sa pagpasabut nga walay kalooy. …

“Si Kristo miabut aron sa pagluwas kanato. Kon sayop nga dalan ang atong gitaak, ang Pag-ula ni Jesukristo makahatag kanato sa kasiguroan nga ang sala dili usa ka punto nga wala nay pagbalik. Ang luwas nga pagbalik posible kon atong sundon ang plano sa Dios alang sa atong kaluwasan” (“Punto sa Luwas nga Pagbalik,” Ensign o Liahona, Mayo 2007, 99).

Sa unsa kaha nga paagi nga ang pamahayag ni Presidente Uchtdorf makahatag og paglaum niadtong mobati nga nakasala og dako nga miabut na sila sa punto nga wala nay pagbalik”?

Helaman 14

Si Samuel nanagna sa mga timailhan sa pagkatawo ug pagkamatay sa Manluluwas

Paghunahuna og hitabo nga karon bag-ong nahitabo sa gawas sa imong nasud ug nakakuha sa atensyon sa tibuok kalibutan. Sa unsang paagi nga ang tawo makahibalo sa mga hitabo nga nahitabo sa ubang mga bahin sa kalibutan, sama sa natural nga mga katalagman ug mga gubat? Ngano nga ang mga tawo ganahang makahibalo sa mga hitabo nga nahitabo sa ubang mga bahin sa kalibutan?

Si Samuel nanagna mahitungod sa pagkatawo ug pagkamatay sa Manluluwas, mga hitabo nga mahitabo nga layo sa Zarahemla. Tun-i ang Helaman 14:3–6, ug markahi diha sa imong mga kasulatan ang mga timailhan nga ikadungan sa pagkatawo ni Jesukristo. Tun-i ang Helaman 14:20–27, ug markahi ang mga timailhan nga ikadungan sa Iyang kamatayon.

3. Diha sa imong scripture study journal, isulat kon unsa sa imong hunahuna ang imong reaksyon kon ikaw didto ug nakadungog pa ni Samuel nga mihimo niini nga mga panagna. Sa tanang mga timailhan nga gihatag, unsa sa imong hunahuna ang labing nakadani nimo sa panginahanglan sa paghinulsol?

Kini nga mga timailhan naghatag og instruksyon ug dunay simbolo. Sa dihang miabut si Jesukristo sa kalibutan, ang kahayag mihayag pa. Sa dihang namatay Siya, ang kangitngit nagkangiub. Mao usab kana ang mahitabo sa atong kinabuhi kon kita motugot Kaniya sa pagsulod sa atong mga kasingkasing o mopugong Kaniya sa pagsulod.

Basaha ang Helaman 14:11–13, ug pangitaa ang tuyo o katuyoan ni Samuel sa pagsangyaw ngadto sa mga Nephite. Mahimo nimong numerohan sa imong kasulatan unsay gusto ni Samuel nga mahibaloan ug buhaton sa mga Nephite. (Ang mga pulong nga “pinaagi sa iyang kalooy” sa bersikulo 13 nagpasabut nga pinaagi sa Pag-ula ni Jesukristo.) Gikan niini nga mga bersikulo atong makat-unan nga ang pagtuo kang Jesukristo mosangput sa paghinulsol ug kapasayloan sa atong mga sala.

Basaha ang Helaman 14:28–29, ug pangitaa kon ngano nga ang Ginoo mihatag og mga timailhan ug mga kahibulongan. Usa ka kamatuoran nga atong makat-unan mao nga: Ang Ginoo mihatag og mga timailhan ug mga kahibulongan aron sa pagtabang sa mga two nga motuo Kaniya. Pamalandunga ang mga timailhan (mga ebidensya) nga inyong gibati nga nakatabang ninyo sa pagtuo ni Jesukristo.

Samtang magkat-on kamo sa mga timailhan nga gipanagna ni Samuel, importante nga hinumduman nga ang Ginoo mihatag og mga timailhan aron sa pagtabang sa matarung nga mga tawo nga motuo ug maghinulsol, samtang ang dautan nangita o nagkinahanglan og mga timailhan alang sa ilang hinakog nga mga rason (tan-awa sa D&P 46:9). Samtang ang mga timailhan sa kamatayon sa Ginoo o mga timailhan sa Iyang Ikaduhang Pag-anhi importante nga mahibaloan, ang mga pagtulun-an ni Samuel kabahin sa kamahinungdanon sa kamatayon ug Pagkabanhaw ni Jesukristo importante usab nga mahibaloan.

Basaha pag-ayo ang Helaman 14:15–19, ug dayon tun-i ang diagram sa ubos.

earth and God’s presence

Human mabasa ang Helaman 14:15–19 ug matun-i ang diagram, ikonsiderar ang mosunod nga mga punto:

• Ang pagkatawo sa pagkamortal mahimong ingnon nga espirituhanon nga kamatayon tungod kay nabuwag kita gikan sa presensya sa atong Langitnong Amahan.

• Pinaagi sa Iyang kamatayon ug Pagkabanhaw, gitubos ni Jesukristo ang tanang tawo gikan sa Pagkapukan aron kita makabalik ngadto sa presensya sa Dios.

• Pinaagi sa Pag-ula ni Jesukristo, ang tanang tawo madala pagbalik ngadto sa presensya sa Dios aron pagahukman.

• Sa Katapusan nga Paghukom, ang mga tawo nga nagpadayon sa pagdumili sa paghinulsol makasinati og laing espirituhanong kamatayon—ipahimulag gikan sa presensya sa Dios sa kahangturan.

• Gitubos kita ni Jesukristo gikan sa espirituhanong kamatayon sa kondisyon sa paghinulsol.

Markahi ang mga pulong sa Helaman 14:15–19 nga nagkatukma sa gipabaga nga mga doktrina nga bag-o lang nimong gibasa. Tapusa pinaagi sa pagbasa sa Helaman 14:30–31.

4. Diha sa imong scripture study journal, isulat unsaon nimo sa paggamit ang Helaman 14:30–31 aron sa pagpasabut ngadto sa usa ka higala ngano nga ang atong mga pagpili niining kinabuhia importante.

5. Isulat ang mosunod nga pahinumom sa ubos sa mga buluhaton karong adlawa diha sa imong scripture study journal:

   Akong natun-an ang Helaman 13–14 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: