Pasiuna sa Omni
Nganong Kinahanglang Tun-an Kini nga Basahon?
Pinaagi sa imong pagtuon sa basahon ni Omni, imong makat-unan nga ang Ginoo mipanalipod sa matarung nga mga Nephite ug migiya kanila ngadto sa yuta sa Zarahemla (tan-awa sa Omni 1:7, 12–13). Ang basahon ni Omni naghisgot usab sa ubang mga grupo—ang mga Mulekite (o mga tawo sa Zarahemla) ug ang mga Jaredite, kinsa gigiyahan sa Ginoo ngadto sa gisaad nga yuta.
Kinsa ang Nagsulat Niini nga Basahon?
Ang basahon ni Omni gisulat sa lima ka lain-laing mga tawo: si Omni, Amaron, Chemish, Abinadom, ug Amaleki. Si Omni mao ang anak ni Jarom ug apo sa apo ni Lehi ug Sariah. Gihulagway ni Omni ang iyang kaugalingon nga “usa ka dautan nga tawo” kinsa “wala makahupot … sa mga sugo sa Ginoo” (Omni 1:2). Si Amaron (anak ni Omni), Chemish (igsoon ni Amaron), ug Abinadom (anak ni Chemish) midugang og mugbo nga mga sulat. Ang anak ni Abinadom nga si Amaleki misulat sa kadaghanan sa basahon ni Omni ug maoy katapusang tawo nga misulat diha sa gagmay nga mga palid ni Nephi. Iyang gisalig ang mga palid ngadto ni Haring Benjamin.
Kanus-a ug Diin Kini Gisulat?
Ang lain-laing mga tigsulat sa basahon ni Omni misulat sa mga panahon tali 361 B.C. ug 130 B.C. Ang unang upat ka mga tigsulat misulat diha sa yuta sa Nephi. Si Amaleki mihimo sa iyang rekord diha sa yuta sa Zarahemla.