Si Nephi nanagna kabahin sa pipila ka mahagiton nga mga kahimtang sa ulahing mga adlaw, lakip ang sayop nga mga pagtulun-an ug garbo sa mini nga mga simbahan nga pagatukuron. Nagtudlo siya unsaon sa pag-ila sa sayop nga mga doktrina ug kalibutanong mga kinaiya ug miila sa mga paagi nga maningkamot si Satanas nga mapatipas ang mga lalaki ug babaye gikan sa kinabuhi nga matarung.
Si Nephi naghulagway sa mini nga mga simbahan ug sa sayop nga mga ideya sa atong panahon
Sa kadaghanan nga mga kultura adunay mga timaan sa trapiko nga magpasidaan sa mga biyahidor kon adunay peligro unahan sa dalan o agianan. Diha sa nasud ug sa lungsod nga imong gipuy-an, unsay mga porma ug kolor sa mga timaan sa trapiko nga moalerto sa mga drayber sa peligro nga anaa sa unahan? Sa samang paagi, ang mga hilo ug ubang makadaut nga mga materyal sa kasagaran gimarkahan og mga simbolo ug mga pasidaan diha sa mga putos ug mga sudlanan. Sa unsang paagi kini nga mga item gimarkahan sa dapit nga imong gipuy-an?
Sama niining pisikal nga mga timaan sa pasidaan, ang Basahon ni Mormon naglangkob og mga pasidaan aron motabang kanimo sa paglikay sa mga impluwensya nga makadaut sa imong espiritu. Si Presidente Ezra Taft Benson mihulagway kon sa unsang paagi ang Basahon ni Mormon mopasidaan ug molig-on kanimo batok sa dautan nga mga plano ni Satanas: “Ang Basahon ni Mormon nagbutyag sa mga kaaway ni Kristo. Kini nagsupak sa sayop nga mga doktrina ug nagtapos sa panagbingkil. (Tan-awa sa 2 Ne. 3:12.) Naglig-on kini sa mapainubsanong mga sumusunod ni Kristo batok sa dautang mga desinyo, mga stratehiya, ug mga doktrina sa yawa sa atong panahon. Ang matang sa mga miapostasiya diha sa Basahon ni Mormon susama sa matang nga anaa kanato karon. Ang Dios, uban sa Iyang walay kinutuban nga kahibalo sa umaabut, mihulma sa Basahon ni Mormon nga unta atong makita ang sayop ug makahibalo unsaon sa pagpakigbatok sa sayop nga mga konsepto sa edukasyon, politika, relihiyon, ug pilosopiya sa atong panahon.” (“The Book of Mormon Is the Word of God,” Ensign, Ene. 1988, 3).
Ang Basahon ni Mormon nagbutyag sa sayop nga mga ideya sa yawa ug naglig-on kanato batok sa iyang dautan nga mga laraw. Sumala sa narekord sa 2 Nephi 28, gipasabut ni Nephi ang pipila sa sayop nga mga pagtulun-an sa yawa nga komon sa tanang henerasyon. Siksika ang 2 Nephi 28: 3–9, ug markahi ang sayop nga mga pagtulun-an ug pagpanglingla ni Satanas nga imong nakat-unan niini. (Timan-i nga ang 2 Nephi 28:7–9 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)
Sa imong scripture study journal, pagrekord gikan sa 2 Nephi 28:3–9 og usa sa mga sayop nga pagtulun-an nga sa imong hunahuna maoy labing makadaot sa kabatan-onan karon, ug ipasabut ang imong mga rason. Paglakip usab og usa ka ehemplo kon sa unsang paagi ang mga batan-on mahimong madani niana nga sayop nga pagtulun-an.
Basaha ang 2 Nephi 28:12–14, ug pangitaa kon unsay gipasidaan ni Nephi nga mahitabo sa daghang mga simbahan ug katawhan, gani sa pipila sa “mapainubsanon nga mga sumusunod ni Kristo” (bersikulo 14). Kini nga mga butang maoy resulta sa garbo ug sa sayop nga doktrina nga imong nabasa sa 2 Nephi 28:3–9. Basaha ang 2 Nephi 28:15–16, 19, ug hibaloi ang pipila ka mga sangputanan niining sayop nga mga pagtulun-an. Mahimo nimong markahan ang mga pulong sa 2 Nephi 28:19 nga nagpasabut kon unsay buhaton sa yawa niadtong dili maghinulsol.
Basaha og kusog ang 2 Nephi 28:7–9. Paggahin og panahon sa pagsag-ulo sa 2 Nephi 28:8. Mahimo nimo kining isulat diha sa imong scripture study journal gikan sa panumduman o i-recite kini ngadto sa usa ka sakop sa pamilya o higala. Sa katapusang mga adlaw daghang mga tawo ang magtudlo og sayop, walay pulos, ug binuang nga mga doktrina. Sa imong scripture study journal, paglista og pipila ka mga paagi nga gipasiugdahan kining binuang nga mga doktrina ug daklit nga ipasabut kon unsaon nimo sa pag-ila sa binuang nga mga doktrina sa kalibutan ug paglikay niini.
Si Nephi nagpasidaan sa mga pagpanglingla ni Satanas
Isip pagpangandam sa imong pagtuon sa nahibilin sa 2 Nephi 28, basaha ang mosunod nga kasinatian ni Presidente Boyd K. Packer, Presidente sa Korum sa Napulog Duha ka mga Apostoles, sa dihang mibisita siya og usa ka wildlife reserve samtang adunay buluhaton sa Africa:
“Mihunong kami sa usa ka lim-aw aron tan-awon ang mga hayop nga mangadto aron sa pag-inom. Uga kaayo kadto nga panahon ug wala kaayoy tubig, mga lapukon lang nga mga dapit. …
Imahe
President Boyd K. Packer
Ang antelope [usa], klaro, nga ginerbyus kaayo. Moduol sila sa lapukon nga lungag, apan mobalik sila ug managan palayo sa dakong kahadlok. Wala akoy nakitang mga leon sa palibut ug nangutana sa tiggiya nganong wala sila manginom. Ang iyang tubag, ug mao kini ang leksyon, mao ang “Mga buaya.”
“Nagtuo ko nga nangomedya ra siya ug seryuso nako siyang gipangutana, “Unsa man diay problema?” Mao gihapon ang tubag: “Mga buaya.”
“Iyang nakita nga wala ko motuo niya ug determinado, sa akong pagtuo, nga matudloan ko og leksyon. Nangadto mi sa laing lokasyon diin ang sakyanan anaa sa bundo ibabaw sa lapukong lim-aw diin makatan-aw kami sa ubos. “Diha,” miingon siya. “Tan-awa og klaro.”
“Wala koy laing makita gawas sa lapok, gamayng tubig, ug ginerbyus nga mga hayop sa layo. Dayon sa kalit nakita ko kini!—dako kaayong buaya, nagpundo sa lapok, naghulat og inosenteng hayop nga uhawon pag-ayo aron moinom.
“Sa kalit lang mituo na ko! Sa dihang iyang nakita nga andam na kong maminaw, iyang gipadayon ang leksyon. ‘Adunay mga buaya sa tibuok parke,’ miingon siya, ‘dili lang sa mga suba. Walay tubig bisan asa nga walay buaya duol niini, ug makasalig ka niana.’ …
“Sa laing pagbisita sa Africa gihisgutan ko kini nga kasinatian ngadto sa usa ka game ranger sa laing parke. …
“Iya dayon kong gipakita sa usa ka dapit diin ang usa ka trahedya nahitabo. Usa ka batan-ong lalaki gikan sa England nagtrabaho sa hotel alang sa mubo nga panahon. Bisan pa sa kanunay ug pabalik-balik nga mga pasidaan, milusot siya sa koral sa compound aron sa pagsusi og usa ka butang tabok sa usa ka mabaw nga tubig nga wala gani kalapas sa ibabaw sa iyang sapatos.
“‘Wala pa siya ka tikang og kaduha,’ ang ranger miingon, ‘sa dihang gitukob siya sa buaya, ug wala kami nahimo aron sa pagluwas kaniya’” (“Spiritual Crocodiles,” Ensign, Mayo 1976, 30–31).
Unsay peligro sa pagduha-duha nga anaay mga buaya kon dili kamo makakita kanila? Sa unsang paagi ang kasinatian ni Presidente Packer ug sa batan-ong lalaki susama sa gihulagway ni Nephi sa 2 Nephi 28:22?
Si Presidente Packer mipasabut:
“Kadtong nag-una kaninyo niini nga kinabuhi nakabantay na sa kakuyaw ug mipahimangno kabahin sa mga peligro nga mahimo ninyong masugatan. Dili lang ang dagko, abuhon nga mga buaya nga makakunis-kunis kaninyo, apan ang espirituhanong mga buaya, nga labihan pa ka peligro, ug labaw ka malinglahon ug dili kaayo makita, gani, labaw pa kay sa maayong motakuban nga mga buaya sa Africa.
“Kining espirituhanong mga buaya makapatay o makalaglag sa inyong mga kalag. Makawagtang kini sa kalinaw sa inyong hunahuna ug sa kalinaw sa hunahuna sa mga nahigugma kaninyo. Mao kini ang angayan nga ipasidaan, ug walay bisan asa nga dapit sa kalibutan karon nga wala puy-i niini” (“Spiritual Crocodiles,” 31).
Sa mosunod nga mga linya, tubaga ang mosunod nga pangutana: Sa unsang paagi ang mga buaya sa Africa susama sa mga tintasyon ug mga pamaagi ni Satanas?
Basaha ang 2 Nephi 28:20–21, 24–26, ug pangitaa ang mga paagi nga si Satanas nagtinguha sa paglaglag kanato. (Tingali makatabang nga masayran nga ang pulong nga mohupay sa 2 Nephi 28:21 nagpasabut nga mopakalma, mopalukmay, o mopakatulog sa espirituhanong paagi.) Sumala niini nga mga bersikulo, unsa nga mga pamaagi ang gamiton ni Satanas aron sa pagsulay sa paghupay kanato ug paggiya kanato ngadto sa iyang gahum? .
Ang usa ka mahinungdanong baruganan nga gitudlo niini nga mga bersikulo mao ang: Si Satanas naggamit og daghang mga pamaagi sa pagpaningkamot sa pagbuntog kanato, sama sa paghulhog kanato aron kita masuko, paghupay kanato ug pagpakalma kanato, ug pag-ulog-ulog kanato.
Tubaga ang usa o sobra pa sa mosunod nga mga pangutana diha sa imong scripture study journal:
Sa unsang paagi nga mogamit si Satanas sa kasuko sa pag-ilad ug paglaglag sa mga indibidwal, mga pamilya, ug mga komunidad?
Unsa ang pipila ka maayong mga butang nga si Satanas mihaylo sa mga indibidwal nga kasuk-an?
Ihulagway ang dili mominos duha ka mga ehemplo kon sa unsang paagi ang pipila ka mga tawo nahupay ug nabutahan sa mga kakuyaw ni Satanas.
Imahe
Bishop Richard C. Edgley
Basaha ang mosunod nga pagpasabut gikan ni Bishop Richard C. Edgley, usa ka magtatambag sa Presiding Bishopric, kabahin sa inanay nga proseso nga gigamit ni Satanas sa paglit-ag kanato: “Dili kita makaingon nga makahimo kita og pipila ka mga sala samtang batan-on pa o nga mosulay kita og ginagmay sa mga utlanan sa sala. Walay mga utlanan sa sala. Ang matag buhat, maayo man o dautan, adunay usa ka sangputanan. Ang matag maayo nga buhat makapalambo sa atong abilidad sa pagbuhat og maayo ug mas lig-ong mobarug batok sa sala o kapakyasan. Kada kalapasan, bisan unsa pa ka gamay, naghimo kanato nga mas daling mapaubos sa impluwensya ni Satanas sa sunod higayon nga siya motintal kanato. Si Satanas modala kanato sa hinay-hinay, moilad kanato kabahin sa mga sangputanan sa mga sala nga gikonsiderar sa uban nga gagmay ra hangtud nga siya makadakop kanato sa dagkong mga kalapasan. Si Nephi mihulagway niini nga paagi isip usa ka paghupay, pagpakatulog, ug pag-ulog-ulog kanato hangtud si Satanas ‘mogunit [kanato] uban sa iyang makalilisang nga mga kadena, gikan diin walay kalingkawasan’ (2 Ne. 28:22; tan-awa usab sa b. 21)” (”That Thy Confidence Wax Strong,” Ensign, Nob. 1994, 40).
Si Satanas mogamit niining maliputon nga mga pamaagi aron sa pagdani kanato sa paghunahuna, pagsulti, ug paghimo og sayop nga mga butang. Basaha ang 2 Nephi 28:27–29, ug pangita og dugang nga mga pasidaan.
Ang Ginoo mihatag og laing pasidaan ug panalangin, nga gilakip duol sa katapusan niini nga kapitulo. Basaha ang 2 Nephi 28:30–32, ug pamalandungi ang mosunod nga mga pangutana: Nganong gitawag man sa Dios ang pipila ka mga tawo nga bulahan? Sa unsang paagi ang pagpatalinghug sa tambag sa Dios makatabang nato sa pagbuntog sa mga pamaagi sa yawa?
Sa imong scripture study journal, pagsulat mahitungod sa unsay imong nakat-unan gikan niini nga leksyon nga makatabang kanimo sa pagbuntog sa mga pamaagi ni Satanas. Unsa ang pipila ka mga dapit, mga kalihokan, o mga kinaiya nga gusto nimong likayan aron dili ka mabantang sa impluwensya ni Satanas?
Hunahunaa ang diskusyon mahitungod sa mga timailhan sa pasidaan dapit sa sinugdanan niini nga leksyon. Sa imong scripture study journal, pag-drowing og usa ka timaan sa pasidaan nga naghulagway og usa ka espirituhanong kakuyaw nga sa imong hunahuna kinahanglang mapasidan-an ang mga kabatan-onan karon. Pangandam sa pagpakigbahin niini ngadto sa imong magtutudlo ug mga sakop sa klase.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 2 Nephi 28 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: