Pasiuna sa Mormon
Nganong Kinahanglang Tun-an Kini nga Basahon?
Samtang magtuon ka sa basahon ni Mormon, makat-unan nimo ang bililhong mga leksyon gikan ni Mormon, kinsa nagpakabuhi nga matinud-anon isip disipulo ni Jesukristo bisan tuod nga gilibutan siya sa tibuok niyang kinabuhi og “nagpadayon nga talan-awon sa mga pagkadautan ug sa mga pagkasalawayon” (Mormon 2:18). Makabenepisyo usab ikaw sa pagtuon sa mga pulong ni Moroni, ang anak ni Mormon, kinsa mipamatuod sa mga magbabasa sa ulahing mga adlaw, “si Jesukristo mipakita kaninyo ngari kanako, ug ako nasayud sa inyong binuhatan” (Mormon 8:35). Pinaagi sa pagtuon niining mga sinulat makakat-on ka sa kaimportante sa pagpili nga magpuyo sumala sa mga sugo ug mga pakigsaad sa ebanghelyo ni Jesukristo.
Kinsa ang Nagsulat Niini nga Basahon?
Gisulat ni Mormon ang unang pito ka kapitulo niini nga basahon isip mubo nga istorya bahin sa pagkadautan ug mga gubat taliwala sa mga Nephite ug mga Lamanite sa iyang panahon. Naghimo usab siya og “hingpit nga asoy” sa mga panghitabo gikan sa iyang tibuok kinabuhi diha sa dagko nga mga palid ni Nephi. (Tan-awa sa Mormon 2:18; 5:9.) Sa dihang si Mormon “mga napulo ka mga tuig ang panuigon,” ang nagtipig sa rekord nga si Ammaron mipahibalo kaniya nga sa katapusan mabatunan niya ang responsibilidad sa pagrekord sa “tanan nga mga butang diin [siya] nakapaniid mahitungod niini nga mga katawhan” (Mormon 1:2, 4). Sa dihang mga 24 na ang pangidaron, anaa na niya ang responsibilidad sa mga palid ni Nephi ug mihimo og “usa ka talaan sumala sa mga pulong ni Ammaron” (Mormon 2:17). Sa kaulahian, gisugdan ni Mormon ang pagminubo sa dagko nga mga palid ni Nephi, nga naglakip sa mga sinulat gikan sa mga propeta ug mga nagtipig sa rekord gikan ni Lehi hangtud ni Ammaron. Dihang hapit na matapos ang iyang kinabuhi, “gitipigan [ni Mormon] sa bungtod sa Cumorah ang tanan nga mga talaan nga gitugyan [ngadto kaniya] pinaagi sa kamot sa Ginoo,” gawas sa pipila ka palid nga iyang gihatag ngadto sa iyang anak nga si Moroni (Mormon 6:6). Gipangulohan dayon niya ang mga Nephite sa ilang katapusang grabe nga gubat batok sa Lamanite. Sa wala pa mamatay si Mormon, iyang gimanduan si Moroni sa paghuman sa iyang rekord. Gidugang ni Moroni ang mga sinulat nga naglangkob sa mga kapitulo 8–9 niini nga basahon.
Kanus-a ug Diin Kini Gisulat?
Tingali gisulat ni Mormon ang Mormon 1–7 sa tunga-tunga sa A.D. 345 ug A.D. 401 (tan-awa sa Mormon 2:15–17; 8:5–6). Gihuman niya ang iyang mga sinulat human sa katapusang grabe nga gubat tali sa mga Nephite ug mga Lamanite didto sa Cumorah (tan-awa sa Mormon 6:10–11). Tingali gisulat ni Moroni ang Mormon 8–9 sa tunga-tunga sa mga tuig A.D. 401 ug A.D. 421 samtang nagtago-tago siya alang sa kasiguroan sa iyang kinabuhi (tan-awa sa Mormon 8:4–6; Moroni 1:1–3).