2 Nephi 17–20

Pasiuna

Sa 2 Nephi 17–20, si Nephi mirekord nga si Isaias misulay sa pag-awhag sa hari sa Juda ug sa iyang mga katawhan sa pagsalig sa Ginoo imbis nga sa kalibutanon nga mga panag-abin. Naggamit og mga sumbanan ug mga pagkasama—mga simbolo o representasyon nga nagtudlo ug nagpamatuod sa mahinungdanong mga kamatuoran—si Isaias nanagna kabahin sa mga panghitabo sa iyang kaugalingong panahon, sa pagkatawo ni Jesukristo, ug sa kalaglagan sa mga dautan sa Ikaduhang Pag-anhi sa Ginoo.

2 Nephi 17–18

Ang gingharian ni Juda mapanalanginan kon ilang ibutang ang ilang pagsalig kang Jesukristo

Aron sa pagtabang nga maandam ka alang sa leksyon karong adlawa, paghunahuna og higayon nga nag-atubang ka og makahahadlok nga sitwasyon. Nahinumduman ba nimo ang imong unang reaksyon? Samtang imong tun-an ang 2 Nephi 17–18, paningkamot nga mahibaloan ang tambag ni Isaias niadtong maanaa sa lisud o makahahadlok nga sitwasyon.

Alang sa imong pagtuon sa 2 Nephi 17–18, kinahanglang masayud ka mahitungod sa tulo ka gagmay nga mga nasud sa Siria, Israel, ug Juda, ingon man ang mas dako nga Kagamhanan sa Asiria, nga nagtinguha sa pagbuntog niining gagmay nga mga nasud. Ribyuha ang mosunod nga mapa ug ang kauban nga tsart.

Nasud	Siria	Israel (Ephraim)	Juda
Hari	Resin	Peka	Achaz
Capital	Damasco	Samaria	Jerusalem

Basaha ang 2 Nephi 17:1–2, ug tan-awa ang mapa. “Ang Siria nagkaabin uban sa Ephraim” nagpasabut nga kining duha ka mga nasud miporma og panag-abin o panagsabut. Paningkamuti sa pagtino kon kinsa ang nangataki ug giataki. Matnguni nga ang mga pulong nga “balay ni David” diha sa bersikulo 2 nagpasabut kang Achaz ug sa mga tawo sa Juda.

Ang mga gingharian sa Israel ug Siria gustong mobuntog sa gingharian sa Juda ug mopugos sa Juda sa pagpakig-abin uban kanila batok sa gamhanan nga Kamandoan sa Asiria. Ang Asiria naghulga sa pagbuntog sa usa ka tibuok rehiyon sa kalibutan nianang panahona. Ang Israel ug Siria nagtuo nga pinaagi sa pagbuntog sa Juda, makaangkon sila og dugang nga mga katawhan ug dugang nga mga kapanguhaan sa pagpakig-away sa nagsingabut nga mga taga-Asiria (tan-awa sa 2 Nephi 17:5–6). Si Haring Achaz naghunahuna sa paghimo niini nga pakig-abin uban sa Israel ug sa Siria.

Hunahunaa unsay imong buhaton kon ikaw si Haring Achaz. Sa usa ka bahin, ang Asiria nanghulga sa pag-ataki sa imong mga katawhan. Sa laing bahin, ang Siria ug Israel nanghulga sa pag-ataki kaninyo kon dili kamo makig-abin kanila sa pagpakig-away batok sa Asiria. Si Isaias nagpuyo sa gingharian sa Juda, ug ang Ginoo mipadala kaniya ngadto kang Achaz uban sa usa ka mensahe. Unsa kaha ang imong bation mahitungod sa usa ka mensahe gikan sa propeta kon ikaw si Haring Achaz?

Basaha ang 2 Nephi 17:3–8, ug badlisi ang mensahe sa Ginoo ngadto kang Achaz ug sa iyang mga katawhan, nga gihatag pinaagi ni propeta Isaias. (Ang termino nga “nag-aso nga pabilo” diha sa bersikulo 4 nagpasabut sa usa ka sulo nga napalong ang kalayo, nagsimbolo niining duha ka mga gingharian nga nagun-ob ug nabuntog.) Hunahunaa nga nadunggan nimo si Isaias nga misulti niini kang Achaz. Sa wala madugay, usa ka higala nangutana kanimo kon unsay gisulti ni Isaias. Pagsulat og duha o tulo ka mga sentence diha sa imong scripture study journal nga naghulagway unsaon nimo pagtubag ang imong higala.

Si Isaias misulay sa pagtabang sa hari ug sa iyang mga katawhan nga mosalig sa Ginoo alang sa panabang, imbis nga mosalig sa dili kasaligan nga politikanhong panag-abin.

Tubaga ang mosunod nga mga pangutana diha sa imong scripture study journal:
1. Nganong importante man kanato nga modangup ngadto sa Ginoo kon magkinahanglan kita og tabang kay sa magsalig lamang sa ubang mga tawo sa pagtabang kanato?
2. Unsa ang pipila ka mga paagi nga ang mga batan-on mahimong matintal nga unahon ang ilang pakigrelasyon sa ubang tawo kay sa ilang pakigrelasyon sa Langitnong Amahan ug ni Jesukristo?

Miingon ang Ginoo nga mohatag siya kang Achaz ug sa gingharian sa Juda og usa ka timailhan nga Siya mopanalipod kanila ug nga dili sila kinahanglang mosalig sa kalibutanong mga panag-abin. Basaha ang 2 Nephi 17:14 aron masayran ang timailhan. Lingini ang pulong nga Emmanuel niini nga bersikulo. Tupad niini nga bersikulo isulat ang “Mateo 1:22–23.” Basaha ang Mateo 1:22–23 aron madiskubrihan ang kahulugan sa ngalan nga Emmanuel.

Sa unsang paagi ang usa ka timailhan nga nagpasabut nga “ang Dios uban kanato” makatabang ni Achaz niining panahona? Sa unsang paagi ang ingon nga panagna ni Isaias nagpasabut usab sa pagkatawo ni Jesukristo paglabay sa gatusan ka mga tuig?

Alang sa dugang panabut kabahin sa timailhan sa usa ka bata nga natawo, hunahunaa ang mosunod nga pagpasabut ni Elder Jeffrey R. Holland sa Korum sa Napulog Duha ka mga Apostoles: “Adunay daghan o managsama nga mga elemento niini nga panagna, sama sa kadaghanan sa mga sinulat ni Isaias. Ang labing duol nga kahulugan nakatutok tingali sa asawa ni Isaias, usa ka putli ug buotan nga babaye kinsa nakabaton og anak nga lalaki niining panahona [tan-awa sa 2 Nephi 18:3], ang bata nahimong usa ka matang ug simbolo sa mas mahinungdanon, mas ulahi nga katumanan sa panagna nga matuman diha sa pagkatawo ni Jesukristo” (Christ and the New Covenant [1997], 79).

Si Isaias nanagna nga sa dili pa modako ang bata, ang Asiria mobuntog sa mga kasundalohan sa Israel (Ephraim) ug Siria (tan-awa sa 2 Nephi 17:15–25). Ang timailhan nga nagpasabut “ang Dios uban kanato” gituyo aron sa pagsiguro kang Haring Achaz nga ang Dios magauban kanato kon kita mosalig kaniya, bisan sa mga panahon sa kalisud ug kahadlok. Ikonsiderar ang pagsulat niini nga baruganan diha sa imong mga kasulatan.

Basaha ang 2 Nephi 18:6–8, ug badlisi ang mga pulong nga “tubig sa Siloa.” Ang mga tubig sa Siloa nagsimbolo alang kang Isaias sa makapakalma, makanunayon, makapatunhay nga impluwensya ug gahum sa Dios nga kinahanglang mahimong kabahin sa politikanhong kinabuhi sa nasud (tan-awa sa 2 Nephi 18:6). Gihisgutan ni Isaias ang mga tubig sa Siloa isip usa ka pagkumpara tungod kay ang katawhan sa Israel ug ang katawhan sa Juda misalikway sa Mesiyas—“[ang] mga tubig sa Siloa”, o ang malinawon, malumo, makanunayon, makapalahutay nga gahum sa Dios. Busa, sama sa gipanagna ni Isaias, ang hari sa Asiria ug ang makalilisang nga impluwensya ug bangis nga gahum sa iyang nanulong nga mga kasundalohan—girepresentaran sa “mga tubig sa suba, kusog ug daghan”—mibuntog sa Siria ug Israel.

Si Isaias, isip usa ka magbabalak, migamit sa duha ka nagdagayday apan lahi kaayo nga mga agos sa tubig aron sa pagpasabut unsa ang mahitabo sa Juda. Dayon miabut ang mga kasundalohan sa Asiria ngadto sa Juda—girepresentaran sa pulong nga yuta. Apan ang mga kasundalohan wala makabuntog sa Jerusalem—girepresentaran sa pamahayag nga “siya moawas ug mobaha, siya mosanap gani hangtud sa liog.”

Basaha ang 2 Nephi 18:9–12, ug tan-awa pila ka higayon nga mitambag ang Ginoo sa Juda nga dili moapil sa Siria ug Israel. Sumala sa narekord sa 2 Nephi 18:13, sa gitambag sa Ginoo pinaagi kang Isaias, asa man papangayuon og tabang ang Juda?

Sa dihang ang mga taga-Asiria mibuntog sa Juda ug naghulga sa Jerusalem, ang gingharian sa Juda duna nay usa ka bag-ong hari. Ang iyang ngalan mao si Ezechias. Misalig siya sa Ginoo ug ni propeta Isaias. Sa katapusan 185,000 ka mga sundalo sa Asiria gipamatay sa usa ka anghel sa Ginoo diha sa ilang kampo (tan-awa sa 2 Mga Hari 19:35; Isaias 37:36).

Tubaga ang usa o sobra pa sa mosunod nga mga pangutana diha sa imong scripture study journal:
1. Unsa ang mga kakuyaw sa pagsalig sa kalibutanong mga butang ug impluwensya imbis nga sa Ginoo? (Mahimo kang maghunahuna og mga sitwasyon nga tingali motintal kanimo sa paghimo og mga desisyon nga gibase sa kahadlok.)
2. Kanus-a ka midangup sa Ginoo alang sa kalig-on sa dihang sa sinugdanan gitintal ka nga modangup ngadto sa ubang mga tinubdan? Unsay imong nakat-unan gikan sa kasinatian?
3. Ubos ni Haring Ezechias, ang katawhan sa Juda naluwas gikan sa kalaglagan tungod kay misunod sila sa tambag ni Isaias nga gikan sa Ginoo. Sa unsang paagi ang pagsunod sa mga modernong propeta magbantay kanimo batok sa espirituhanong kadaut?

2 Nephi 19:1–7

Si Isaias namulong sama sa usa ka Mesiyas

Nakasulay ka ba sukad nga dugay nga wala kakita sa adlaw o wala mobati sa kainit niini? Kon wala, hunahunaa nga kanunay nga adunay naglandong nganha kanimo, nga ikaw walay kahigayunan sa kahayag ug kainit sa adlaw (sama sa pagkaanaa pirme sa ngitngit nga kwarto). Si Isaias migamit og susama nga imahe sa paghulagway sa espirituhanong kahimtang sa mga tawo nga nagpuyo nga walay kahayag ni Jesukristo.

Dunay duha ka mga yuta nga gihisgutan diha sa 2 Nephi 19:1–2. Basaha kini nga mga bersikulo, ug markahi ang mga ngalan sa duha ka mga yuta.

Sa milabayng mga siglo sa wala pa isulat ni Isaias kini nga mga bersikulo, daghang mga gubat ang gipakig-awayan sa paningkamot nga makontrolar ang dapit nga nailhan karon isip Balaang Yuta. Ang pipila mitawag niini nga dapit isip “ang yuta sa anino sa kamatayon” tungod kay daghan kaayo ang nawad-an sa ilang kinabuhi dinhi tungod sa pakig-away. Sa panahon sa Bag-ong Tugon, ang Nazaret, Capernaum, Nain ug Cana nahimutang diha sa mga rehiyon nga pormal nga nailhan isip mga yuta sa Zabulun ug Neptali. Kini ang mga dakbayan diin migahin si Jesukristo sa kadaghanan sa Iyang panahon, nga nangalagad sa katawhan paglabay sa sobra 500 ka tuig. Karon nailhan kini isip dapit sa Galilea.

Markahi diha sa 2 Nephi 19:2 kon unsay gisulti ni Isaias nga makita sa mga tawo niini nga rehiyon sa kaulahian.

Ang pamahayag ni Isaias nga kadtong “naglakaw sa kangitngit” ug nagpuyo sa “yuta sa anino sa kamatayon” “nakakita og dako nga kahayag” maoy usa ka panagna mahitungod sa mortal nga misyon ni Jesukristo niini nga bahin sa kalibutan. Ang katawhan nga nagpuyo sa dapit sa Galilea naglakaw sa espirituhanong kangitngit, apan sa diha nga si Jesukristo mipuyo ug nangalagad taliwala kanila, sila nakakita og “dako nga kahayag.”

Basaha ang 2 Nephi 19:6–7, ug hunahunaa asa sa mga tawag sa Manluluwas sa bersikulo 6 ang tingali makahuluganon kaayo alang sa mga tawo sa Juda, base sa ilang mga kahimtang. Sa imong scripture study journal, isulat kon sa unsang paagi ang usa o sobra pa niini nga mga tawag naghulagway sa unsay imong gibati mahitungod sa Manluluwas.

2 Nephi 19–20

Si Isaias naghulagway sa kalaglagan sa mga dautan sa Ikaduhang Pag-anhi

Ang panagna ni Isaias kabahin sa kalaglagan sa Asiria, nga narekord sa 2 Nephi 20, usa usab ka panagna sa kalaglagan sa mga dautan sa Ikaduhang Pag-anhi. Samtang basahon nimo kini nga kapitulo, hinumdumi nga sama nga si Ezechias misalig sa tambag ni Isaias gikan sa Ginoo ug napanalanginan, kon mobutang ka sa imong pagsalig sa Ginoo, dili kinahanglang mahadlok ka sa mga paghukom nga moabut sa mga lumulupyo sa yuta sa panahon nga magkaduol na ang Ikaduhang Pag-anhi.

Unsa nga sentence ang gibalik-balik diha sa 2 Nephi 19:12, 17, 21 ug 2 Nephi 20:4? Mahimo nimong markahan kini sa imong mga kasulatan. Isulat ang sentence diha sa imong study journal, ug badlisi ang pulong nga kasuko ug ang pulong nga kamot. Ubos sa pulong nga kasuko, isulat ang paghukom, ug ubos sa pulong nga kamot, isulat ang kalooy. Basaha og kusog ang sentence, nga ipuli ang mga pulong nga paghukom ug kalooy. (“Tungod niining tanan ang iyang [paghukom] wala mahupay, apan ang iyang [kalooy] gilugway sa gihapon.”)

Tubaga ang mosunod nga mga pangutana diha sa imong scripture study journal:
1. Sa unsang paagi ang sentence sa kalihokan sa pagtuon diha sa ibabaw naghulagway kon sa unsang paagi ang Ginoo motubag sa mga kanasuran, mga pamilya, o mga indibidwal nga misalikway Kaniya?
2. Unsaon nimo paggamit ang mosunod nga mga kamatuoran sa imong kinabuhi? Si Jesukristo usa ka Dios sa paghukom ug kalooy. Ang Iyang kalooy ihatag niadtong maghinulsol ug mosunod sa iyang mga sugo.
Sa imong scripture study journal, pagsulat mahitungod sa usa ka panahon nga nagmasulundon ka sa piho nga sugo ug mibati sa kalooy sa Dios.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 17–20 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: