Pasiuna sa Helaman
Nganong Tun-an Kini nga Basahon?
Sa imong pagtuon sa basahon ni Helaman, makat-unan nimo gikan sa mga ehemplo ug mga pagtulun-an sa bantugang mga tawo sama nila ni Helaman, Nephi, Lehi, ug Samuel ang Lamanite kinsa maisugong misunod sa Ginoo ug mipamatuod ni Jesukristo. Ang mga pagpangalagad niini nga mga indibidwal nagpakita nga ang Dios mihatag og gahum sa pagtabang sa Iyang mga sulugoon sa pagtuman sa Iyang kabubut-on ug nga ang mga paningkamot sa matarung nga mga indibidwal makahatag og mga panalangin sa liboan. Mahibaloan usab nimo ang mga sangputanan nga mosunod sa garbo, pagkadautan, ug tinago nga mga kalihokan.
Kinsa ang Nagsulat Niini nga Basahon?
Si Mormon mitipig ug mipamubo sa mga rekord gikan sa dagko nga mga palid ni Nephi aron maghimo sa basahon ni Helaman. Ang basahon ginganlan alang ni Helaman, ang anak nga lalaki ni Helaman ug apo ni Alma nga Batan-on. Gidawat ni Helaman ang mga rekord gikan sa iyang uyoan, nga si Shiblon, ug nagserbisyo isip usa ka matarung nga labaw nga maghuhukom sa mga Nephite. Iyang gitudloan ang iyang mga anak nga lalaki nga sila si Nephi ug Lehi sa paghinumdom sa ilang Manunubos, nga si Jesukristo (tan-awa sa Helaman 5:9–14). Kini nga mga pagtulun-an sa wala madugay nakapadasig ni Nephi sa pagluwat sa iyang katungdanan isip labaw nga maghuhukom aron mosangyaw og paghinulsol ngadto sa mga Nephite ug mga Lamanite. Human makabig ang liboan ka mga Lamanite, usa ka propeta nga Lamanite nga ginganlan og Samuel nadasig sa pagsangyaw og paghinulsol ug nanagna taliwala sa mga Nephite sa samang higayon ni Nephi. Ang basahon ni Helaman gikuha gikan sa mga rekord nga gitipigan panahon sa pagdumala sa gobyerno ug pangalagad nila ni Helaman (Helaman 1–3) ug Nephi (Helaman 4–16). Ang mga rekord ni Nephi naglakip sa mga panagna ug mga pagtulun-an ni Samuel ang Lamanite.
Kanus-a ug Diin Kini Gisulat?
Ang orihinal nga mga rekord nga gigamit isip tinubdan sa basahon ni Helaman gisulat sa tunga-tunga sa mga 52 B.C. ug 1 B.C. Gipamubo ni Mormon kadto nga mga rekord sa tunga-tunga sa mga A.D. 345 ug A.D. 385. Wala girekord ni Mormon diin siya sa dihang iyang gihugpong kini nga basahon.