Unit 8: Day 3
2 Nephi 29–30
Pasiuna
Ang mensahe ni Nephi mahitungod sa kahibulongan nga buhat sa Pagpahiuli sa ebanghelyo nagpadayon sa 2 Nephi 29–30. Siya mipamatuod nga sa katapusang mga adlaw ang tanan nga mga kasulatan magtinabangay aron sa pagpakita sa tanang kanasuran, kaliwatan, pinulongan, ug katawhan nga ang Ginoo nahinumdom sa Iyang mga anak. Kini nga mga rekord maoy usa ka saksi ug pagpamatuod nga si Jesukristo ang atong Manluluwas. Si Nephi nanagna nga daghan ang mosalikway sa Basahon ni Mormon apan ang motuo pagapundukon diha sa Simbahan. Dugang pa, si Nephi mitudlo nga ang mga katawhan sa pakigsaad sa Dios mao kadtong maghinulsol ug motuo sa Anak sa Dios.
2 Nephi 29:1–14
Ang Ginoo nagsulti kang Nephi nga sa katapusang mga adlaw daghan ang mosalikway sa Basahon ni Mormon
Si Nephi nakakita nga daghang mga tawo sa ulahing mga adlaw motuo sa Biblia nga maoy bugtong nga basahon sa kasulatan nga gipadayag gikan sa Dios ug mosalikway sa Basahon ni Mormon. Unsaon nimo pagtubag kon aduna kay higala nga mangutana, “Nganong duna may laing Biblia ang mga Mormon?”
Si Nephi mihatag og pipila ka mga tubag niini nga pangutana pinaagi sa pagrekord sa mga pulong sa Ginoo mahitungod sa tahas sa Basahon ni Mormon sa Pagpahiuli sa ebanghelyo sa ulahing mga adlaw, nga gitawag sa Ginoo og “usa ka kahibulongan nga buhat” (2 Nephi 29:1). Basaha ang 2 Nephi 29:1–2, ug hibaloi kon unsay buhaton sa mga pulong sa Ginoo sa katapusang mga adlaw. (Kini “mogula” ngadto sa binhi ni Nephi, o mga kaliwat, ug kini usab “motuhop [motayhup] ngadto sa mga lumulupyo sa yuta.”) Ang “motayhup” nagpasabut nga “motaghoy,” nga nagsugyot sa usa ka timaan sa pagpundok (tan-awa sa Isaias 5:26, footnote b sa LDS English version sa Biblia).
Ang pulong nga sumbanan diha sa 2 Nephi 29:2 nagpasabut sa usa ka butang nga gigamit sa pagpundok ug paghiusa sa katawhan. Ang mga bandila kasagarang gitawag nga mga sumbanan. Sumala sa 2 Nephi 29: 2, unsa man ang sumbanan nga moadto “ngadto sa mga lumulupyo sa yuta” sa pagpundok sa katawhan sa Ginoo? (Mahimo kang mosulat og usa ka butang sama sa Ang Basahon ni Mormon—ang mga pulong sa binhi, o kaliwat, ni Nephi tapad sa 2 Nephi 29:2.)
-
Isulat sa imong scripture study journal kon unsa, sumala sa 2 Nephi 29:1–2, ang katuyoan sa Ginoo sa paghatag og dugang nga kasulatan sama sa Basahon ni Mormon.
Si Elder Jeffrey R. Holland sa Korum sa Napulog Duha ka mga Apostoles mipakigbahin sa mosunod nga ideya kabahin sa Basahon ni Mormon: “Ang Basahon ni Mormon mao ang labing dako nga pamahayag sa pakigsaad ug gugma sa Dios alang sa iyang mga anak dinhi sa yuta” (Christ and the New Covenant: The Messianic Message of the Book of Mormon [1997], 4).
Sa 2 Nephi 29 ang mga pulong nga mga Hentil nagpasabut sa mga tawo nga dili sakop sa balay ni Israel. Ang pulong nga Judeo nagpasabut sa katawhan kinsa anaa sa balay ni Israel, lakip ang pamilya ug mga kaliwatan ni Lehi. Basaha ang 2 Nephi 29:3–6, nga mangita sa mahimong reaksyon sa pipila ka mga Hentil ngadto sa dugang nga kasulatan. Isulat ang imong mga tubag sa mosunod nga mga pangutana diha sa luna nga giandam.
Unsay reaksyon sa pipila ngadto sa dugang nga kasulatan?
Unsay gisulti sa Ginoo mahitungod sa mga tawo nga ingon niini og reaksyon?
Propetikanhon ang paghulagway ni Nephi sa reaksyon sa mga tawo ngadto sa Basahon ni Mormon. Ang mga tawo karon kanunay mopahayag og pagduha-duha mahitungod sa Basahon ni Mormon tungod kay aduna na silay Biblia. I-highlight ang mga pulong sa 2 Nephi 29:7–11 nga naghulagway sa mga katuyoan sa Ginoo sa paghatag og dugang nga kasulatan. Hunahunaa kon unsaon nimo sa pagpasabut niini nga mga katuyoan ngadto sa usa ka tawo nga wala makasabut sa panginahanglan o bili sa pagkadawat og dugang nga pagpadayag gikan sa Dios.
-
Gamit ang unsay imong gimarkahan sa 2 Nephi 29:7–11, pagsulat og tubag sa imong scripture study journal sa pangutana nga gipresentar sa sinugdanan niini nga leksyon: “Nganong duna may laing Biblia ang mga Mormon?”
Ang Ginoo naghatag og mga kasulatan isip ikaduha nga saksi ug sa pagpundok sa katawhan ngadto sa Iyang pakigsaad. Basaha ang 2 Nephi 29:13–14, ug pangitaa ang panalangin nga moresulta sa diha nga ang mga kasulatan—“[ang] mga pulong sa mga Nephite” (ang Basahon ni Mormon), “[ang] mga pulong sa mga Judeo” (ang Biblia), ug “[ang] mga pulong sa nawala nga mga tribo sa Israel”—anaa na taliwala sa mga katawhan.
2 Nephi 30:1–8
Si Nephi nanagna sa tahas sa Basahon ni Mormon sa katapusang mga adlaw
Human motudlo nga ang Dios mohinumdom sa balay ni Israel, si Nephi mipasidaan sa iyang katawhan nga dili maghunahuna nga sila mas matarung pa kay sa mga Hentil unya. Mipahinumdom usab siya kanila nga ang tanang katawhan mamahimong mga katawhan sa pakigsaad sa Dios. Basaha ang 2 Nephi 30:2, ug diha sa luna nga giandam pagsulat og duha ka mga butang nga kinahanglang buhaton sa mga tawo sa dili pa ang Ginoo mosulod og mga pakigsaad uban kanila.
Hunong sa makadiyot ug pamalandungi ang epekto sa Basahon ni Mormon diha kanimo o sa usa ka tawo nga suod nimo. Dayon basaha ang 2 Nephi 30:3–8, ug kompletuha ang mosunod nga kalihokan uban sa mga pulong nga naghulagway sa epekto sa Basahon ni Mormon niadtong modawat niini.
|
Mga Grupo sa mga Tawo |
Ang Epekto sa Basahon ni Mormon |
|---|---|
|
Mga Kaliwat ni Lehi (2 Nephi 30:3–6) | |
|
Mga Judeo (2 Nephi 30:7) | |
|
Mga Hentil, o ang tanang kanasuran (2 Nephi 30:8) |
Basaha ang mosunod nga pamahayag gikan ni Presidente Henry B. Eyring sa Unang Kapangulohan ug i-highlight ang mga rason nganong ang Basahon ni Mormon usa ka gamhanan nga himan sa misyonaryo:
“Ang Basahon ni Mormon maoy sentro sa misyonaryo nga buhat sukad nga ang ebanghelyo gipahiuli pinaagi ni Propeta Joseph. Gigamit nato kini matag adlaw sa misyonaryong buhat. Usa ka kamatuoran mahitungod sa Basahon ni Mormon nga maoy yawe sa gahum sa matag bahin sa misyonaryo nga buhat mao kini: ang Basahon ni Mormon usa ka tugon ni Jesukristo. Ang ulohan nga pahina nagsulti kanato niana. Nag-ingon kini nga ang katuyoan sa basahon mao ang pagpakita kon unsa ka dagko nga mga butang ang nabuhat sa Ginoo alang sa Iyang mga katawhan, sa pagtabang kanila nga mahibalo nga ang mga pakigsaad nga gihimo sa Ginoo ngadto sa Iyang mga katawhan nagpabilin gihapon, ug sa pagkombinser sa tanan nga mga katawhan nga si Jesus mao ang Kristo” (“Why the Book of Mormon?” New Era, Mayo 2008, 6, 8).
Ang pagtuon sa 2 Nephi 30:1–8 nagpakita kanato nga ang Basahon ni Mormon makatabang sa tanang tawo nga makaila ni Jesukristo ug mosunod sa Iyang ebanghelyo.
-
Pagpili og usa sa mosunod nga mga pangutana nga tubagon diha sa imong scripture study journal:
-
Sa unsang paagi nga ang Basahon ni Mormon nakatabang kanimo nga makaila sa Manluluwas?
-
Unsaon man nimo paggamit ang Basahon ni Mormon sa pagtabang sa uban nga mahibalo sa Manluluwas?
-
2 Nephi 30:9–18
Si Nephi nanagna sa mga kondisyon sa yuta panahon sa Milenyum
Basaha ang 2 Nephi 30:9–10, ug pangitaa kon unsay mahitabo taliwala sa mga katawhan sa wala pa ang Milenyum—ang 1,000 ka tuig sa pagkamatarung ug kalinaw nga magsunod sa Ikaduhang Pag-anhi sa Manluluwas, kon si Jesukristo “mohari dinhi sa yuta” (Mga Artikulo sa Hugot nga Pagtuo 1:10). Sa unsang paagi nga nakakita ka og usa ka “dako nga pagkabahin” (2 Nephi 30:10) nga nagbulag sa mga matarung gikan sa dautan? Unsa ang mahitabo sa mga dautan sa katapusan?
Basaha ang 2 Nephi 30:12–18, nga mangita kon unsa kaha ang kinabuhi panahon sa Milenyum.
-
Sa imong scripture study journal, pagsulat og ulohan sa newspaper (usa ka paghatag og gibug-aton o summary sa pipila ka mga pulong) nga naghulagway sa kahimtang sa milenyum nga imo gayud nga gipaabut. Human ka nakasulat og ulohan sa balita, ipasabut kon sa unsang paagi kana nga ulohan usa ka timailhan sa kalinaw nga mopatigbabaw sa yuta panahon sa Milenyum.
Hunahunaa kon unsa kaha kon si Satanas walay gahum batok sa mga kasingkasing sa katawhan panahon sa Milenyum, ug ang pagkamatarung ug kalinaw mopatigbabaw. Hunahunaa kon sa unsang paagi nga ang imong eskwelahan o komunidad malahi kon kadto nga mga kondisyon nagpatigbabaw karon.
-
Isulat sa imong scripture study kon unsay imong mabuhat sa pagtabang sa imong kaugalingon, sa imong pamilya, ug sa uban sa pagpangandam alang niini nga panahon sa kalinaw ug pagkamatarung.
Komentaryo ug Background nga Impormasyon
Sa Unsang Paagi ang Dugang nga mga Rekord sa Kasulatan Moabut?
Si Elder Bruce R. McConkie sa Korum sa Napulog Duha ka mga Apostoles misugyot nga ang mga rekord nga gihisgutan sa 2 Nephi 29:12–14 “motunga sa kahibulongan nga paagi, sa direksyon sa presidente sa Simbahan ni Jesukristo sa mga Santos sa Ulahing mga Adlaw, kinsa usa ka tigpadayag ug usa ka maghuhubad ug kinsa naghupot sa mga yawe sa gingharian sa Dios” (The Millennial Messiah [1982], 217). Nasayud kita nga ang Manluluwas mibisita sa nawala nga mga tribo sa Israel human sa Iyang Pagkabanhaw ug pagbisita sa mga Nephite ug nga sila usab mosulat sa mga istorya sa Iyang pagpangalagad taliwala kanila human sa Iyang pagkabanhaw (tan-awa sa 3 Nephi 16:1–3; 17:4).
Kanus-a Man ang “mga Judeo … Mosugod sa Pagtuo kang Kristo”?
Si Elder Bruce R. McConkie mihisgut usab sa gipanagna nga pagkakabig sa mga Judeo:
“‘Ug mahinabo nga ang mga Judeo nga nagkatibulaag usab mosugod sa pagtuo diha kang Kristo; ug sila mosugod sa pagpundok diha sa ibabaw sa yuta.’ (2 Ne. 30:7.) Ang kasagaran sa karaang kayugot sa mga Judeo batok kang Kristo nahunong na; kadaghanan karon midawat kaniya isip usa ka mahinungdanon nga Rabbi, hinoon dili ang Anak sa Dios. Dunay pipila nga midawat kaniya sa hingpit nga pagsabut, mipasakop sa tinuod nga Simbahan uban sa napundok nga mga salin ni Ephraim ug sa iyang isigkatawo.
“Apan ang dakong pagkakabig sa mga Judeo, ang ilang pagbalik ngadto sa kamatuoran isip usa ka nasud, mosunod gayud sa Ikaduhang Pag-anhi sa ilang Mesiyas. Kadtong makahimo sa pag-agwanta nianang adlawa, sa ilang tumang kalisud ug pagbangutan, mangutana: ‘Unsa kini nga mga samad sa imong mga kamot ug sa imong mga tiil? Unya sila masayud nga Ako ang Ginoo; kay Ako moingon ngadto kanila: Kini nga mga samad mao ang mga samad diin Ako gisamaran diha sa balay sa akong mga higala. Ako mao siya kinsa gibayaw. Ako si Jesus nga gilansang sa krus. Ako ang Anak sa Dios.’ (D. & P. 45:51–52; Zac. 12:8–14; 13:6.)” (Mormon Doctrine, 2nd ed. [1966], 722–23).
-
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 2 Nephi 29–30 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: