Pasiuna sa Alma
Nganong Kinahanglang Tun-an Kini nga Basahon?
Pinaagi sa pagtuon sa basahon ni Alma, imong makat-unan ang mahitungod ni Jesukristo ug ang panginahanglan sa Iyang Pag-ula ug Pagkabanhaw diha sa plano sa Langitnong Amahan alang sa kalipay. Makat-unan usab nimo ang mahitungod sa gahum sa pulong sa Dios sa pagbuntog sa pagpanapi sa mga pari, sayop nga doktrina, sala, kapungot, ug apostasiya samtang naggiya sa mga indibidwal aron makadawat og dakong kausaban sa kasingkasing ug matawo pag-usab. Maablihan ang imong salabutan samtang magbasa ka sa misyonaryong mga paningkamot sa anak nga mga lalaki ni Mosiah ug sa pagkakabig ug sa gipakitang kamatinud-anon sa mga katawhan ni Ammon, o mga Anti-Nephi-Lehi. Dugang pa, samtang magtuon ka sa mga kapitulo nga naghisgot sa gubat tali sa mga Nephite ug sa mga Lamanite, makakat-on ka og mga baruganan nga mogiya kanimo atol sa samok nga mga panahon nga imong gipuy-an ug matabangan ka nga magmadaugon sa personal nimong pakigbatok sa kaaway.
Kinsa ang Nagsulat Niini nga Basahon?
Gitigum ug gipamubo ni Mormon kini nga mga rekord gikan sa dagko nga mga palid ni Nephi sa paghimo sa basahon ni Alma. Ang basahon ginganlan uyon sa ngalan ni Alma, kinsa anak ni Alma ug sagad gitawag og Alma nga Batan-on. Sa panahon nga gipahiluna ni Haring Mosiah ang pagmando sa mga maghuhukom tali sa mga Nephite, si Alma ang nahimong una nga labaw nga maghuhukom ug siya ang misunod sa iyang amahan isip halangdon nga pari o high priest sa Simbahan (tan-awa sa Mosiah 29:42). Sa katapusan miundang siya sa iyang katungdanan isip labaw nga maghuhukom aron ipahinungod ang iyang kaugalingon sa “kinatibuk-an ngadto sa halangdon nga pagkapari” ug “sa paghatag sa pulong sa Dios ngadto sa mga katawhan” sa tibuok yuta sa mga Nephite (Alma 4:20; 5:1). Gigamit ni Mormon ang mga rekord sa pagpangalagad ni Alma (Alma 1–44) ug ang mga sinulat sa iyang mga anak nga sila si Helaman (Alma 45–62) ug Shiblon (Alma 63) aron sa paghimo sa basahon ni Alma.
Kanus-a ug Diin Kini Gisulat?
Ang orihinal nga mga rekord nga gigamit isip tinubdan sa basahon ni Alma ingon og gisulat sa mga tuig 91 B.C. ug 52 B.C. Si Mormon mipamubo niadtong mga rekord tali sa A.D. 45 ug A.D. 385. Wala irekord ni Mormon kon diin siya niadtong gihimo niya ang pagpamubo niini.