Alma 5:37–62

Pasiuna

Samtang padayon nga nagsangyaw si Alma sa Zarahemla, gipasidan-an niya ang mga tawo nga ang ilang desisyon sa pagpatalinghug o pagsalikway sa iyang mga pulong adunay tukmang mga panalangin o sangputanan. Iya silang gidasig sa pagsanong sa tingog sa Maayong Magbalantay, sa Ginoo nga si Jesukristo, kinsa nagatawag kanila ug nagtinguha nga dad-on sila og balik sa Iyang panon. Samtang magtuon ka niini nga leksyon, hunahunaa kon sa unsang paagi ang pagsunod sa tingog sa Maayong Magbalantay makatabang nimo sa paglikay sa mahugawng mga butang sa kalibutan ug makabalik nga ikauban ang Dios.

Alma 5:37–42, 53–62

Gidapit ni Alma ang tanan sa pagsunod sa Maayong Magbalantay, kinsa mao ang Manluluwas

Sa mga kasulatan, si Jesukristo usahay mao ang gipasabut nga “Maayong Magbalantay” (tan-awa sa Juan 10:11–15). Ngano kaha nga ang magbalantay usa man ka maayong simbolo sa Manluluwas? Si Presidente Ezra Taft Benson mihatag sa mosunod nga deskripsyon sa karaang mga magbalantay:

“Sa kapanahunan ni Jesus, ang mga taga Palestina nga magbalantay sa karnero nailhan sa iyang pagpanalipud sa iyang karnero. Lahi sa modernong mga magbalantay sa karnero, ang magbalantay kanunay nga mag-una sa iyang panon. Siya ang naggiya kanila. Ang magbalantay nakaila sa iyang karnero ug sa kasagaran mohatag og ngalan sa kada usa. Ang karnero nakaila sa iyang tingog ug mosalig kaniya ug dili mosunod sa usa ka estranghero. Sa ingon, kon motawag siya, ang mga karnero moduol kaniya. (Tan-awa sa Juan 10:14, 16.)

“Inig kagabii ang mga magbalantay sa karnero mopundok sa ilang mga karnero ngadto sa kinoral nga dapit nga gitawag og toril. Tag-as nga koral ang naglibut sa toril, ug ang mga tunok gibutang ibabaw niining mga koral aron ang ihalas nga mga hayop ug mga kawatan dila makalayat.

“Usahay, hinoon, ang ihalas nga hayop tungod sa kagutom molayat tabok sa mga koral ngadto sa mga karnero, mohadlok kanila. Ang ingon niini nga sitwasyon mopalahi sa tinuod nga magbalantay—tawo nga nahigugma sa iyang karnero—ngadto sa sinuholan—tawo nga nagtrabaho lang tungod kay giswelduhan ug tungod sa katungdanan.

“Ang tinuod nga magbalantay andam nga motugyan sa iyang kinabuhi alang sa karnero. Moadto siya sa mga karnero ug makig-away alang sa ilang kaayuhan. Ang sinuholan, sa laing bahin, mopalabi sa kaugalingon niyang kasiguroan kay sa karnero ug sa kasagaran mopalayo gikan sa peligro.

“Gigamit ni Jesus kining komon nga paghulagway atol sa iyang panahon sa pagpamahayag nga Siya ang Maayong Magbalantay, ang Tinuod nga Magbalantay. Tungod sa Iyang gugma sa Iyang mga kaigsoonan, andam Siya ug boluntaryo nga itugyan ang Iyang kinabuhi alang kanila. (Tan-awa sa Juan 10:17–18.)” (“A Call to the Priesthood: ‘Feed My Sheep,’” Ensign, Mayo 1983, 43).

Pagsulat og mubo nga mga tubag sa mosunod nga mga pangutana niini nga manwal:

Unsa ang mahitabo sa karnero kon dili sila maminaw sa magbalantay?
Sa unsang paagi kita susama sa karnero, ug sa unsang paagi ang Manluluwas susama sa atong magbalantay?
Unsay buot ipasabut sa pagadad-on ngadto sa Iyang panon? (tan-awa sa Alma 5:60).

Sa Alma 5:37, gihulagway ni Alma ang mga tawo sa Zarahemla isip karnero nga “nahisalaag.” Basaha ang Alma 5:37–42, ug pangitaa kon unsay gitudlo ni Alma mahitungod sa pagpaminaw sa tingog sa Manluluwas.

Isulat ang tubag sa mosunod nga mga pangutana diha sa imong scripture study journal:
1. Tun-i ang Alma 5:37–38, ug ipasabut sa kaugalingon nimong mga pulong ang gitudlo ni Alma mahitungod sa mga paningkamot sa Manluluwas sa pagtawag kanato sa pagsunod Kaniya.
2. Sa Alma 5:41, unsa ang gitudlo ni Alma mahitungod sa paagi nga kita makasulti nga nagpatalinghug kita sa tingog sa Maayong Magbalantay? Unsa ang pipila ka “maayong mga buhat” nga tingali nagpasabut nga ang mga kabatan-unang mga Santos sa Ulahing mga Adlaw nagsunod sa Maayong Magbalantay?

Ang pag-ila ug pagsunod sa tingog sa Manluluwas dili kanunay sayon. Pamalandunga ang mosunod nga kinutlo ni Elder Dallin H. Oaks sa Korum sa Napulog Duha ka mga Apostoles: “Gikan sa atong nadungog nga mga tingog dinhi sa mortalidad, kinahanglan nga makaila kita sa tingog sa Maayong Magbalantay, kinsa nagtawag kanato sa pagsunod kaniya padulong sa langitnon natong panimalay” (“Alternate Voices,” Ensign, Mayo 1989, 27).

Basaha ang Alma 5:53–56, ug markahi ang mga kinaiya ug mga buhat nga tingali nagpalisud sa usa ka tawo sa pagpatalinghug sa tingog sa Manluluwas.

Paghunahuna og ubang mga kinaiya o mga buhat sa kalibutan karon nga nagpalisud sa mga tawo sa pagpatalinghug sa tingog sa Manluluwas. Ipasabut sa lakbit ngano kaha nga kining mga kinaiyaha ug mga buhat nagpalisud man sa usa ka tawo sa pagkadungog sa tingog sa Manluluwas:

Sa Alma 5:57, markahi ang mga pulong “tanan kamo nga mga matinguhaon sa pagsunod sa tingog sa maayo nga magbalantay.” Dayon markahi ang tulo ka laing mga pulong diha sa bersikulo 57 nga nagsulti unsay imong mahimo sa pagsunod sa tingog sa Manluluwas.

Sa imong scripture study journal, pagsulat og ehemplo alang sa matag mosunod nga tulo ka mga pamahayag, nga nagpakita kon unsay mahimo sa usa ka batan-on nga Santos a Ulahing mga Adlaw sa inyong eskwelahan o komunidad aron: (a) makalingkawas gikan sa dautan, (b) mabulag, ug (c) dili mohikap og hugaw nga mga butang. Dayon paghunahuna og duha ka matarung nga mga kalihokan o mga nabatasan diin makatabang sa mga batan-on nga makapatalinghug og dugang sa tingog sa Maayong Magbalantay. Kon usa niini nga mga kalihokan o mga kinaiya nakatabang nimo sa pagkadungog sa tingog sa Manluluwas, ikonsiderar ang pagsulat mahitungod niini diha sa imong scripture study journal aron ikapaambit nimo sa imong magtutudlo o unya sa klase.

Sumala sa narekord sa Alma 5:58–60, gitudlo ni Alma kini nga kamatuoran: kon sundon nato ang tingog sa Ginoo (ang Maayong Magbalantay), kita pagapundukon sa Iyang gingharian. Markahi ang mga saad o mga panalangin diha sa Alma 5:58–60 nga madawat niadtong makapanunod sa tuo nga kamot sa Dios.

Hunahunaa kon unsay ipasabut sa nimo niining matag usa ka mga saad o mga panalangin nga imong gimarkahan. Isulat sa imong scripture study journal kon ngano kaha sa imong hunahuna nga ang pagpalayo sa imong kaugalingon gikan sa dautang mga butang igo man alang niini nga mga panalangin.

Kon sundon nimo ang tingog sa Manluluwas, imong madawat kini nga mga panalangin ug sa katapusan madawat ang panalangin sa kahimayaan.

Alma 5:43–52

Gisulti ni Alma kon sa unsang paagi niya nadawat ang usa ka pagpamatuod ug pagtudlo mahitungod sa paghinulsol

Paghunahuna og butang nga imong nakat-unan pinaagi sa matag usa sa imong lima ka pamalatian: sa panan-aw, pandungog, pagkahikap, pagpanimaho, ug pagtilaw. Duna kaha’y paagi nga imong mahibaloan ang butang nga dili mogamit bisan usa niini nga pisikal nga pamalatian? Basaha ang Alma 5:45–48, ug pangitaa kon unsay gisulti ni Alma nga iyang nahibaloan ug giunsa niya pagkahibalo niini.

Markahi ang Alma 5:48 kon unsay gitudlo ni Alma mahitungod kang Jesukristo. Ang mensahe diha sa Alma 5:45–48 ma-summarize sa ingon niini nga paagi: Mahibaloan nato sa atong kaugalingon, pinaagi sa Espiritu Santo, nga si Jesukristo mao ang Manunubos sa katawhan.

Ang tanan nag-atubang og mga hagit sa ilang pagtuo ug pagpamatuod. Ang pagbaton og kaugalingon nimong pagpamatuod sa kamatuoran sa ebanghleyo pinaagi sa gahum sa Espiritu Santo makalig-on kanimo atol niana nga mahagitong mga panahon. Ang paghinumdom sa kaugalingon nimong pagsaksi sa Espiritu Santo, sama sa gihimo ni Alma, makatabang nimo sa pagbarug nga lig-on taliwala sa hagit. Gikan sa ehemplo ni Alma, makat-unan sab nato nga ang pagpuasa ug pag-ampo makatabang nga kita mobati sa Espiritu nga mopamatuod sa mga kamatuoran ug makasuporta sa atong mga pagpamatuod kon nagkinahanglan kini nga lig-unon.

Pamalandunga ang kaugalingon nimong pagpamatuod samtang magbasa ka sa kinutlo gikan ni Elder M. Russell Ballard sa Korum sa Napulog Duha ka mga Apostoles nga nag-awhag kanato sa pagtinguha og kaugalingon natong pagpamatuod kang Jesukristo: “Ang indibidwal, personal nga pagpamatuod sa kamatuoran sa ebanghelyo, ilabi na ang balaan nga kinabuhi ug misyon ni Ginoong Jesukristo, mahinungdanon sa atong kinabuhing dayon. ‘Ug ang kinabuhing dayon mao kini,’ ingon ang Manluluwas, ‘ang ilang pagpakaila kanimo nga mao ang bugtong tinuod nga Dios, ug kang Jesukristo nga imong gipadala’ [Juan 17:3]. Sa laing pagkasulti, ang kinabuhing dayon maoy resulta sa atong indibidwal, personal nga kahibalo sa atong Amahan sa Langit ug sa Iyang Balaan nga Anak. Ang basta lang makaila kanila dili igo. Kinahanglan nga duna kitay personal, espirituhanong mga kasinatian nga maglig-on kanato” (“Feasting at the Lord’s Table,” Ensign, Mayo 1996, 80).

Kompletuha ang usa o duha ka mosunod nga mga kalihokan diha sa imong scripture study journal:
1. Isulat ang mahitungod sa panahon dihang nakadungog ka og tawo nga mihatag og impluwensyal nga pagpamatuod, pinaagi sa gahum sa Espiritu Santo, nga si Jesukristo ang Manunubos sa katawhan. Isulat kon unsay imong gibati sa pagpaminaw niini nga pagpamatuod.
2. Basaha ang Alma 5:46, ug dayon isulat sa kaugalingon nimong mga pulong kon sa unsang paagi nakadawat si Alma sa iyang pagpamatuod kang Jesukristo. Hunahunaa kon sa unsang paagi nimo masunod ang ehemplo ni Alma sa pagtabang nga malig-on ang imong pagpamatuod sa Manluluwas, ug isulat ang imong mga hunahuna.
3. Isulat ang panahon dihang gibati nimo nga ang Espiritu Santo misaksi kanimo nga si Jesukristo ang Manunubos sa katawhan. Pagsulat og piho nga tumong nga makatabang nimo sa pag-angkon o paglig-on sa imong pagpamatuod sa Manluluwas, sama sa tinuoray nga pagpuasa o pag-ampo o pagtuon sa mga kasulatan sa dugang nga katuyoan. Himoa ang pagtuman niini nga tumong, bisan kon kini mokabat og “daghan nga mga adlaw” (Alma 5:46). (Ang pagkompleto niini nga kalihokan makatabang sab nga matuman nimo ang mga rekisito sa Personal nga Kauswagan o sa Katungdanan ngadto sa Dios.)

Basaha ang Alma 5:49–52, ug pangitaa kon unsay gitudlo ni Alma mahitungod sa paghinulsol. Diha sa mga linya nga gibutang, ipasabut kon ngano kaha nga ang mga tawo kinahanglan man gayud nga maghinulsol aron makapuyo sa kahangturan kauban sa Langitnong Amahan ug ni Jesukristo:

Si Elder Dallin H. Oaks midapit kanato sa pagkonsiderar sa pipila ka mga pangutana nga makatabang nato nga magamit ang gitudlo ni Alma mahitungod sa paghinulsol ug pagpangandam sa pagsulod sa gingharian sa Dios:

“Unsa kaha kon moabut Siya ugma? Kon kita nahibalo nga inig ka ugma makigkita kita sa Ginoo—pinaagi sa atong kamatayon nga wala sa oras o pinaagi sa Iyang kalit nga pag-abut—unsa may atong buhaton karon? Unsa nga mga pagkumpisal ang atong buhaton? Unsa nga mga binuhatan ang atong undangon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipaambit?

“Kon kita mobuhat niini nga mga butanga, nganong dili man karon? Nganong dili man mangita og kalinaw samtang maangkon pa ang kalinaw?” (“Pagpangandam alang sa Ikaduhang Pag-anhi,” Ensign o Liahona, Mayo 2004, 9).

Hunahunaa ang usa sa mga pangutana ni Elder Oaks. Sa imong scripture study journal, isulat kon ngano kaha nga importante ang pagpakabuhi sa matag adlaw sama nga nag-andam ka sa pakighimamat sa Ginoo.

Sa mainampuon nga paagi hunahunaa kon unsaon nimo nga makalihok sa imong nakat-unan karon aron maandam ka sa pakighimamat sa Manluluwas ug makasulod sa Iyang gingharian.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 5:37–62 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: