Unit 29: Day 4

Ether 3

Pasiuna

Ang Ginoo nangutana sa igsoon nga lalaki ni Jared: “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?” (Ether 2:23). Agig tubag, ang igsoon nga lalaki ni Jared mainampingon nga miandam og 16 ka mga bato ug mapainubsanong nag-ampo nga ang Ginoo mohikap niini “nga sila mahimo nga mohayag diha sa ngitngit” (Ether 3:4). Tungod sa dakong pagtuo sa igsoon nga lalaki ni Jared, nakita niya ang tudlo sa Manluluwas samtang gihikap sa Manluluwas ang mga bato. Ang Ginoo mipakita dayon sa Iyang kaugalingon ngadto sa igsoon nga lalaki ni Jared ug mimando kaniya sa pagsulat sa unsay iyang nakita ug nadungog.

Ether 3:1–20

Gihikap sa Ginoo ang mga bato aron makahatag og kahayag sa mga kasko sa mga Jaredite, ug Siya mipakita sa Iyang kaugalingon ngadto sa igsoon nga lalaki ni Jared

Unsa ang pipila ka ehemplo sa unsay sinsero nimong giampo o sa ubang mga batan-on? Pagpili og usa niining mga butanga, ug isulat kini dinhi:

Samtang magtuon ka sa ehemplo sa igsoon nga lalaki ni Jared diha sa Ether 3, pangitaa ang mga panabut nga makatabang nimo o sa usa ka higala nga makadawat og tabang gikan sa Ginoo.

Paghunahuna bahin sa pag-ampo sa igsoon nga lalaki ni Jared ngadto sa Ginoo bahin sa paghatag og kahayag alang sa mga kasko ug ang Ginoo mitubag kaniya. Ribyuha ang Ether 2:22–3:1. Dayon sulati og caption ang sa matag usa sa mosunod nga mga litrato nga naghulagway kon unsay gibuhat sa igsoon nga lalaki ni Jared isip iyang bahin sa pagsulbad sa problema sa pagkawalay kahayag.

1. Isulat diha sa imong scripture study journal ang bahin sa unsay nakapadayeg nimo sa mga paningkamot sa igsoon nga lalaki ni Jared sa pagsulbad sa problema sa pagkawalay kahayag diha sa mga kasko. Bisan kon ang igsoon nga lalaki ni Jared mihimo og dakong paningkamot, ikonsiderar kon unsa kaepektibo ang iyang gitunaw nga mga bato sa paghatag og kahayag nga wala ang tabang sa Ginoo.

Basaha ang Ether 3:2–5, ug buhata ang mosunod:

• Hibaloi o markahi ang mga pulong nga nagpakita nga ang igsoon nga lalaki ni Jared mapainubsanon ug miila sa iyang pagsalig sa Dios. Mahimong makatabang kini nga mahibalo nga ang mga pulong nga “ang among mga kinaiyahan nahimo nga mangil-ad sa kanunay” nagpasabut sa atong makasasala nga kahimtang dinhi sa yuta. Tungod sa Pagkapukan ni Adan, nahibulag kita sa Dios sa pisikal nga paagi. Duna usab kitay kalagmitan nga makasala. Kon wala ang balaanong tabang, dili gayud kita makabalik sa presensya sa Dios.

• Hibaloi kon unsa ang gihangyo sa igsoon nga lalaki ni Jared nga buhaton sa Ginoo.

• Hibaloi o markahi kon unsa ang gipamatuod sa igsoon nga lalaki ni Jared nga iyang nahibaloan bahin sa Dios.

2. Tubaga ang mosunod nga mga pangutana diha sa imong scripture study journal:

   1. Unsa nga ebidensya ang imong makita diha sa Ether 3:1–5 nga ang igsoon nga lalaki ni Jared dunay hugot nga pagtuo nga ang Ginoo makatabang Kaniya aron masulbad ang Iyang problema?

   2. Sa unsang paagi nga ang iyang ehemplo makatabang kanimo aron moila sa imong pagsalig diha sa Ginoo samtang mangayo ka sa Iyang tabang?

Basaha ang mosunod nga pamahayag gikan ni Elder Jeffrey R. Holland sa Korum sa Napulog Duha ka mga Apostoles, nga naghatag og gibug-aton sa hugot nga pagtuo sa igsoon nga lalaki ni Jared: “Sigurado nga ang Dios, ingon man usab ang mga magbabasa, mobati og butang nga talagsaon gayud sama sa bata nga kainosente ug kamainiton sa hugot nga pagtuo niining tawhana. ‘Tan-awa, O Ginoo, ikaw makahimo niini’ [Ether 3:5]. Tingali wala nay mas gamhanan, nag-inusarang linya bahin sa hugot nga pagtuo nga gipamulong sa tawo diha sa kasulatan. … Bisan unsa pa man ka dili sigurado ang propeta bahin sa iyang kaugalingong abilidad, siya walay pagduha-duha bahin sa gahum sa Dios” (“Rending the Veil of Unbelief,” sa Nurturing Faith through the Book of Mormon: The 24th Annual Sidney B. Sperry Symposium [1995], 12).

Basaha ang Ether 3:6, ug hunahunaa kon unsa kaha kon maanaa sa sitwasyon nga gihulagway niini nga bersikulo.

Basaha ang Ether 3:9, nga mangita kon nganong andam ang Ginoo sa paghikap sa mga bato ug nganong ang igsoon nga lalaki ni Jared nakakita sa tudlo sa Ginoo.

Humana ang mosunod nga pamahayag sa baruganan sumala sa unsay imong nakat-unan sa Ether 3: Samtang mapainubsanon kitang motawag sa Ginoo, Iya kitang tubagon sumala sa atong ug sa Iyang kabubut-on.

3. Tubaga ang usa o duha ka mga pangutana diha sa imong scripture study journal:

   1. I-refer ngadto sa unsay imong gisulat sa sinugdanan niining leksyon bahin sa unsay imong giampo o sa ubang mga batan-on. Sa unsa kaha nga paagi nga mapakita sa usa ka tawo ang hugot nga pagtuo diha sa Ginoo samtang nagtinguha siya alang sa tabang ug giya sa Ginoo niana nga sitwasyon?

   2. Unsay imong nasinati sa imong kinabuhi nga nakapahimo nimo nga masayud sa katinuod sa baruganan nga samtang mapainubsanon kitang motawag sa Ginoo, Iya kitang tubagon sumala sa atong hugot nga pagtuo ug sa Iyang kabubut-on?

Paggahin og panahon ug hilum nga mo-evaluate kon unsa kadako ang imong pagsalig sa Ginoo. Basaha ang Ether 3:9–12, ug pangitaa ug markahi ang ebidensya sa hugot nga pagtuo sa igsoon nga lalaki ni Jared ngadto sa Ginoo.

Ribyuha ang Ether 3:11, ug hunahunaa kon ikaw ba dunay igong pagtuo sa Ginoo nga mopasalig nga motuo ug mosunod kon unsay Iyang ipadayag nganha kanimo bisan sa wala pa Niya kini ipadayag.

Basaha ang mosunod nga pamahayag gikan ni Elder Jeffrey R. Holland, ug badlisi ang unsay kinahanglan gayud natong buhaton aron makapakita og hugot nga pagtuo sama sa igsoon nga lalaki ni Jared: “Ang igpangandam nga hugot nga pagtuo maporma pinaagi sa mga kasinatian sa nangagi—pinaagi sa nahibaloan, nga naghatag og basihanan sa pagtuo Apan ang makatubos nga hugot nga pagtuo kinahanglan gayud nga kanunayng ipakita ngadto sa mga kasinatian sa umaabut—sa wala mahibaloi, nga naghatag og oportunidad alang sa unsay milagruso. … Ang hugot nga pagtuo sama nianang sa igsoon nga lalaki ni Jared, nag-una sa milagro ug sa kahibalo. Kinahanglan siyang motuo sa wala pa mamulong ang Dios. Kinahanglan siyang molihok sa wala pa maklaro ang abilidad sa pagkompleto niana nga buhat. Kinahanglan siyang mopasalig daan sa kompleto nga kasinatian bisan pa gani sa unang hugna sa katumanan niini. Ang hugot nga pagtuo mao ang pag-uyon nga walay kondisyon—ug ang pag-uyon daan—sa bisan unsang kondisyon nga pangayuon sa Dios sa maduol ug malayo nga panahon sa umaabut” (Christ and the New Covenant: The Messianic Message of the Book of Mormon [1997], 18–19).

Hunahuna ang bahin sa mga kasinatian sa igsoon nga lalaki ni Jared, nga magsugod sa Tore sa Babel. Unsa nga mga kasinatian ang mahimong nakatabang sa paglambo sa iyang pagtuo diha sa Ginoo? Sa imong hunahuna sa unsang paagi nga kining mga kasinatian nakaandam kaniya nga mopakita “sa hilabihan nga ka hugot nga pagtuo” (Ether 3:9) nianang higayuna?

4. Tubaga ang mosunod nga mga pangutana diha sa imong scripture study journal:

   1. Unsa nga kasinatian sa imong kinabuhi nga nakapalambo sa imong pagtuo diha sa Ginoo?

   2. Sa unsang paagi nga kana nga kasinatian nakaandam kanimo sa pagpakita og mas dako nga pagtuo sa umaabut?

Basaha ang Ether 3:13–20, ug pangitaa ang panalangin nga nadawat sa igsoon nga lalaki ni Jared tungod sa iyang hugot nga pagtuo. Unsa man ang nakat-unan sa igsoon nga lalaki ni Jared bahin sa Manluluwas gikan niining talagsaong kasinatian? Usa ka laing importante nga baruganan nga imong makat-unan gikan sa Ether 3 mao kini: Samtang magpakita kita og hugot nga pagtuo diha sa Ginoo, magkaduol kita ngadto Kaniya. Mahimo nimong isulat kining baruganan diha sa imong mga kasulatan tupad sa Ether 3:11–20.

Si Elder Jeffrey R. Holland mikomentaryo bahin sa Ether 3:15–16 ug sa posible nga kalibug nga mahimong mahitabo gikan niana nga kasinatian:

“[Usa] ka isyu nga nagkinahanglan og mubong komentaryo nagagikan sa pagtuaw sa Ginoo ‘Wala pay tawo nga miduol sa atubangan kanako uban sa hilabihan nga ka hugot nga pagtuo ingon nga ikaw aduna; kay kon dili pa sa ingon ikaw dili makakita sa akong tudlo.’ Ug wala madugay, ‘Wala pa gayud Ako makapakita sa akong kaugalingon ngadto sa tawo kinsa Ako milalang, kay wala gayuy tawo nga mituo kanako ingon kanimo.’ [Ether 3:9, 15.]

“Ang kalagmitan nga malibug dinhi nagagikan sa pagkaamgo nga daghan (ug tingali tanan) sa nag-unang mga propeta nga nagpuyo sa wala pa ang igsoon nga lalaki ni Jared nakakita sa Dios. Nan, unsaon man nato sa pagpasabut sa pamahayag sa Ginoo? …

“Kini nga isyu nahisgutan na pag-ayo sa mga manunulat nga mga Santos sa Ulahing mga Adlaw, ug dunay pila ka posible nga mga pagpasabut, bisan kinsa—o ang tanan—niini mahimong makatabang og pagpasabut sa mas dakong kamatuoran niini nga tudling. Bisan pa niana, kon walay dugang nga pagpadayag o komentaryo bahin niining butanga, bisan unsa nga pangagpas mao lamang kana ug sa ingon kulang ug dili kompleto. …

“Ang uban nagtuo nga ang Ginoo nagpasabut nga wala pa gayud siya mopadayag sa iyang kaugalingon ngadto sa tawo sa ingon niana nga matang o niana nga kahimtang. Kini nga teyorya nagsugyot nga ang balaanong mga pagpakita sa mas nag-una nga mga propeta dili pareho sa ‘kahingpit,’ nga wala pa gayud sukad nga ang tabil gitangtang aron sa paghatag sa ingon kakompleto nga pagpadayag sa kinaiyahan ug pagkatawo ni Kristo. …

“Ang katapusang pagpasabut—ug kalabut sa hugot nga pagtuo sa igsoon nga lalaki ni Jared nga labing makaagni—mao nga si Kristo misulti ngadto sa igsoon nga lalaki ni Jared, ‘Wala pa gayud Ako makapakita sa akong kaugalingon ngadto sa tawo niini nga paagi, nga wala nako tinguhaa, nga nahitabo lamang tungod sa hugot nga pagtuo sa nakakita.’ Isip usa ka lagda, ang mga propeta gidapit ngadto sa presensya sa Ginoo, gitanyagan niya nga mosulod sa iyang presensya ug pinaagi lamang sa iyang pagtugot. Ang igsoon nga lalaki ni Jared, sa laing bahin, daw mipasulod sa iyang kaugalingon agi sa tabil, dili ingon nga wala abi-abiha nga bisita apan eksakto nga dili gayud isip dinapit nga bisita. Miingon si Jehova, ‘Wala pay tawo nga miduol sa atubangan kanako uban sa hilabihan nga ka hugot nga pagtuo ingon nga ikaw aduna; kay kon dili pa sa ingon ikaw dili makakita sa akong tudlo. … Wala gayuy tawo nga mituo kanako ingon kanimo.’ Klaro nga ang Ginoo mismo mihatag og koneksyon sa wala damha nga hugot nga pagtuo niining wala damha nga panan-awon. Kon ang panan-awon mismo dili talagsaon, nan tungod kadto sa hugot nga pagtuo ug sa unsang paagi ang panan-awon nadawat nga dili gayud hitupngan. Ang bugtong butang nga nakapahimo sa hugot nga pagtuo nga ingon ka talagsaon mao ang abilidad niini sa pagdala sa propeta, nga dili dinapit, diin ang uban nakaadto lamang pinaagi sa pagdapit sa Dios” (Christ and the New Covenant, 20–23).

Ether 3:21–28

Gimanduan sa Ginoo ang igsoon nga lalaki ni Jared sa pagsulat sa mga butang nga iyang nakita ug nadungog ug sa pagsilyo sa iyang rekord

Basaha ang Ether 3:25–26, ug hibaloi kon unsa pa ang gipakita sa Ginoo ngadto sa igsoon nga lalaki ni Jared. Sama sa narekord diha sa Ether 3:21–24, 27–28, gimanduan sa Ginoo ang igsoon nga lalaki ni Jared sa pagsulat sa mga butang nga gipakita ngadto kaniya sa panan-awon ug sa pagsilyo niini. Gipasabut usab sa Ginoo nga moandam Siya og paagi aron ang mga sinulat sa igsoon nga lalaki ni Jared mahubad sa umaabut. Usa sa mga paagi nga kining panagna natuman mao ang sa dihang si Propeta Joseph Smith mihubad sa basahon ni Ether gikan sa bulawang mga palid isip kabahin sa Basahon ni Mormon ug mihimo sa rekord sa mga Jaredite nga available nga mabasa sa tanang katawhan.

Pamalandunga kon sa unsang paagi nga imong magamit ang imong nakat-unan karon ug unsay imong mabuhat aron mapakita ang imong hugot nga pagtuo sa Ginoo. Sa pagpakita nimo og hugot nga pagtuo diha ni Jesukristo, ang Dios mobu-bu og mga panalangin kanimo, sama sa Iyang gihimo sa igsoon nga lalaki ni Jared.

5. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Ether 3 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: