Pasiuna sa Jacob
Nganong Kinahanglang Tun-an Kini nga Basahon?
Pinaagi sa pagtuon sa basahon ni Jacob, makakat-on ka og importanting mga leksyon gikan sa usa ka tawo nga dunay dili matarug nga pagtuo diha ni Jesukristo. Si Jacob balik-balik nga mipamatuod kabahin sa Manluluwas ug midapit sa iyang katawhan ug kadtong mobasa sa iyang mga pulong sa paghinulsol. Iyang gitudlo ug gipakita ang kaimportante sa makugihon nga pagbuhat sa mga calling gikan sa Ginoo. Iyang gipasidan-an ang iyang mga katawhan batok sa kapeligro sa garbo, katigayunan, ug imoralidad. Si Jacob mikutlo ug mikomentaryo usab sa pasumbingay ni Zenos kabahin sa mga kahoy nga oliba, nga naghulagway sa walay puas nga mga paningkamot sa Manluluwas aron sa pagpahinabo sa kaluwasan sa tanang anak sa Dios. Sa iyang pakig-atubang kang Sherem, usa ka anti-Kristo, gipakita ni Jacob unsaon pagtubag sa matarung nga paagi niadtong makiglantugi o manaway sa atong tinuohan.
Kinsa ang Nagsulat Niini nga Basahon?
Si Jacob, ang ikalima nga anak ni Sariah ug Lehi, ang misulat niini nga basahon. Natawo siya sa kamingawan atol sa panaw sa iyang pamilya paingon sa gisaad nga yuta. Sa iyang pagkabatan-on, si Jacob “nag-antus sa mga kasakit ug hilabihan nga kasubo, tungod sa kapintas sa [iyang] igsoon nga mga lalaki” (2 Nephi 2:1). Hinoon, si Lehi misaad kaniya nga ang Dios “nagpahinungod sa [kang Jacob nga] mga kasakit alang sa [iyang] kaayohan” ug nga iyang igahin ang iyang mga adlaw “sa pag-alagad sa [iyang] Dios” (2 Nephi 2:2–3). Sa batan-on pa siya, si Jacob nakakita sa himaya sa Manluluwas (tan-awa sa 2 Nephi 2:3–4). Si Nephi mipahinungod ni Jacob nga mahimong usa ka pari ug magtutudlo sa mga Nephite (tan-awa 2 Nephi 5:26) ug sa wala madugay mitugyan kaniya sa gagmay nga mga palid ni Nephi (tan-awa sa Jacob 1:1–4). Isip usa ka matinud-anong lider sa priesthood ug magtutudlo, si Jacob makugihong naghago aron sa pagdasig sa iyang mga katawhan sa pagtuo kang Kristo (tan-awa sa Jacob 1:7). Nakadawat siya og mga pagpadayag kabahin sa Manluluwas, nakasinati sa pagpangalagad sa mga anghel ug nakadungog sa tingog sa Ginoo (tan-awa sa Jacob 7:5), ug nakakita sa iyang Manunubos (tan-awa sa 2 Nephi 11:2–3). Si Jacob mao ang amahan ni Enos, diin ngadto niya gitugyan ang mga palid sa wala pa siya mamatay.
Kanus-a ug Diin Kini Gisulat?
Ang basahon ni Jacob nagsugod sa gibana-bana nga 544 B.C., sa diha nga gitugyan ni Nephi kang Jacob ang gagmay nga mga palid. Natapos kini sa hapit na matapos ang kinabuhi ni Jacob, sa dihang gihatag niya ang mga palid ngadto sa iyang anak, si Enos. Gisulat ni Jacob kini nga rekord samtang nagpuyo sa yuta sa Nephi.