Jacob 7

Pasiuna

Si Jacob misalig sa iyang pagpamatuod ug sa Ginoo aron sa pagbuntog sa sayop nga mga ideya ug mga argumento ni Sherem, usa ka anti-Kristo. Ang usa ka anti-Kristo usa ka tawo kinsa kusganon o hugtanon nga nagsupak ni Kristo ug naningkamot sa paglaglag sa pagtuo sa ubang mga tawo diha Kaniya, sa Iyang tinuod nga Simbahan, sa Iyang ebanghelyo, o sa plano sa kaluwasan.

Aron sa pagsanta sa mga paningkamot ni Sherem, mikuha og kalig-on si Jacob gikan sa nangaging mga kasinatian nga nakadugang sa iyang pagtuo diha ni Jesukristo. Siya usab misalig diha sa giya sa Balaang Espiritu, sa iyang kahibalo sa mga kasulatan ug mga pulong sa mga propeta, ug sa iyang pagpamatuod kabahin ni Jesukristo. Sa dihang si Sherem nangayo og timailhan nga mopamatuod nga ang mga pulong ni Jacob tinuod, siya gihampak sa Dios. Si Jacob mitapos sa iyang rekord pinaagi sa paghulagway kon sa unsang paagi ang mga Nephite misalig sa Ginoo samtang ilang gilig-on ang ilang mga kaugalingon batok sa mga Lamanite. Sa wala pa mamatay si Jacob, iyang gihatag ang gagmay nga mga palid ngadto sa iyang anak nga lalaki nga si Enos.

Jacob 7:1–14

Si Jacob misalig sa Ginoo samtang iyang giatubang si Sherem, usa ka anti-Kristo

Si Elder Robert D. Hales sa Korum sa Napulog Duha ka mga Apostoles mitudlo: “Ang usa sa dakong mga pagsulay sa mortalidad moabut kon ang atong mga gituohan gikwestyon o gisaway. Niana nga mga higayon, gusto natong motubag sa agresibong paagi. … Apan importante kini nga mga kahigayunan sa pag-atras, pag-ampo, ug pagsunod sa ehemplo sa Manluluwas. Hinumdumi nga si Jesus Mismo gitamay ug wala dawata sa kalibutan. … Apan kon kita motubag sa mga tig-akusar kanato sama sa gihimo sa Manluluwas, dili lamang kita mahimong mas sama ni Kristo, maingon man nagdapit kita sa uban nga bation ang Iyang gugma ug mosunod usab Kaniya” (“Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 72).

Paghunahuna og higayon dihang ang imong mga gituohan gilantugi o gisaway. Samtang magtuon ka sa Jacob 7 makat-unan nimo sa unsang paagi nakasinati si Jacob og pagpanaway sa iyang pagtuo gikan sa tawo nga ginganlan og Sherem ug sa unsang paagi siya nagmalampuson sa pagtubag niini nga hagit.

Basaha ang Jacob 7:1–5, ug pangita og mga pulong nga nagpasabut kon (1) unsay gipaningkamutang buhaton ni Sherem ug (2) sa unsang paagi nagtinguha siya sa pagkab-ot sa iyang mga tumong. Mahimo nimo kining markahan diha sa imong mga kasulatan.

Sumala sa Jacob 7:3, unsay epekto ni Sherem ngadto sa katawhan?

Timan-i sa Jacob 7:4 nga si Sherem “makinaadmanon” ug dunay “daghan nga gahum sa pinulongan.” Isulat sa imong scripture study journal nganong lisud usahay ang pagpanalipod sa imong pagtuo batok sa tawo nga sama ni Sherem.

Hinumdumi nga dili tanang mga tawo nga makiglantugi o manaway sa atong pagtuo susama og mga motibo ni Sherem. Samtang ang ubang mga tawo, sama ni Sherem, tuyo nga nagtinguha sa pagdaut sa pagtuo, ang uban tingali motuki sa atong pagtuo tungod kay kuryuso sila, o kaha sayop ang ilang nahibaloan kabahin sa atong mga gituohan.

Samtang magbasa ka sa Jacob 7:5–14, pamalandungi kon unsaon nimo pagtubag og tawo nga sama kang Sherem. Samtang imong tun-an ang tubag ni Jacob, imong makita nga samtang mosalig kita sa Ginoo makabuntog kita sa mga hagit sa atong pagtuo. Mahimo nimong isulat kini nga baruganan diha sa margin sa imong mga kasulatan duol niini nga mga bersikulo. Pangita og mga paagi nga si Jacob mipakita niini nga baruganan sa iyang pakig-atubang kang Sherem.

Diha sa tsart sa ubos, basaha ang bersikulo o mga bersikulo gikan sa Jacob 7:5–14 diha sa unang kolum ug ipares kana nga reference ngadto sa pamahayag sa ikaduhang kolum nga labing naghulagway kon sa unsang paagi si Jacob misalig sa Ginoo niana nga reference. Isulat ang letra sa pamahayag sa linya tupad sa scripture reference.

Unsay Gibuhat ni Jacob aron Mosalig sa Ginoo
Jacob 7:5 Jacob 7:8 Jacob 7:10–11 Jacob 7:12 Jacob 7:13–14	Nagpamatuod siya kabahin sa mga kasulatan ug sa mga pulong sa mga propeta. Gisalig niya ang resulta diha sa mga kamot sa Dios. Misalig siya sa giya ug kalig-on gikan sa Espiritu Santo. Nahinumdom siya sa nangaging mga kasinatian nga nakapalig-on sa iyang pagtuo. Iyang gipakigbahin ang pagpamatuod nga iyang nadawat pinaagi sa Espiritu Santo.

Mahimo nimong susihon ang imong mga tubag niini nga pares-pares nga kalihokan pinaagi sa pagtan-aw sa husto nga mga tubag nga makita diha sa katapusan niini nga leksyon.

Sa unsang paagi nimo mapalig-on ang imong pagpamatuod aron dili kini matarug kon ang imong gituohan lantugion o sawayon? Bantayi sa Jacob 7:5 nga si Jacob mipakita sa mosunod nga kamatuoran: Dili kita matarug sa atong pagtuo kon ang atong mga pagpamatuod gibase sa pagpadayag ug tinuod nga espirituhanong mga kasinatian. Pamalandungi ang kalig-on sa imong pagpamatuod kabahin ni Jesukristo ug unsay imong mahimo sa paglig-on niini.

Ang tubag ni Jacob ngadto ni Sherem naghatag og ehemplo nga atong sundon samtang motubag kita sa mga indibidwal kinsa makiglantugi o mosaway sa atong pagtuo.

Tubaga ang tulo sa mga pangutana sa ubos diha sa imong scripture study journal aron sa pagtabang kanimo sa paghunahuna sa mga butang nga gihimo ni Jacob sa pagsalig sa Ginoo ug sa unsang paagi ang sama nga mga lihok nakatabang o makatabang kanimo kon ang uban mohagit sa imong pagtuo:
1. Bantayi diha sa Jacob 7:5 nga tungod sa miaging espirituhanon nga mga kasinatian ni Jacob ang iyang pagtuo dili matarug. Unsa ang pipila ka mga kasinatian nga nakapalig-on sa imong pagtuo? Sa unsang paagi ang paghinumdom o pagrekord niini nga mga kasinatian makatabang kanimo kon dunay makiglantugi o mosaway sa imong pagtuo?
2. Sa Jacob 7:8, si Jacob miingon nga “ang Ginoong Dios mibu-bu sa iyang Espiritu ngari sa akong kalag.” Unsay kinahanglan nimong buhaton aron ang Espiritu ibu-bu sa imong kalag? Sa unsang paagi ang Espiritu Santo mitabang kanimo samtang imong giatubang ang mga pagtuki ug pagpanaway sa imong pagtuo?
3. Sa unsang paagi ang nabatasan nga kada adlaw nga pagtuon sa mga kasulatan ug sa mga pulong sa mga propeta sa ulahing mga adlaw makatabang kanimo sa mga sitwasyon nga ang uban makiglantugi o mosaway sa imong pagtuo? (tan-awa sa Jacob 7:10–11).
4. Kanus-a ka nakapaambit sa imong pagpamatuod sa tawo nga nakiglantugi o misaway sa imong pagtuo? (tan-awa sa Jacob 7:12). Unsa ang resulta?
5. Imbis nga magtinguha sa pagprubar sa kamatuoran sa iyang pagpamatuod sa dihang si Sherem nangita og timailhan, gisalig ni Jacob ang resulta sa mga kamot sa Ginoo (tan-awa sa Jacob 7:14). Sa unsang paagi makatabang nimo nga masayud nga dili kinahanglan nga iprubar nimo ang katinuod sa imong pagpamatuod niadtong mohagit sa imong pagtuo?

Jacob 7:15–23

Si Sherem gihampak, namahayag, ug namatay, hinungdan nga ang pundok sa mga Nephite mibalik ngadto sa Ginoo

Si Elder Robert D. Hales mitudlo:

“Kon dili kita mobalus—kon atong itunol ang pikas natong aping ug mopalayo sa mga pagbati sa kasuko—kita usab nagbarug uban sa Manluluwas. Atong gipakita ang Iyang gugma, nga mao lamang ang bugtong gahum nga makabuntog sa kaaway ug makatubag sa mga tig-akusar kanato sa walay pagbalus og akusar kanila. Dili kana kahuyang. Kana mao ang Kristohanong kaisug.

“Sa tibuok katuigan atong nakat-unan nga ang mga pagsulay sa atong pagtuo dili mga bag-o, ug dili sila ingon nga mahanaw sa umaabut. Apan ang tinuod nga mga disipulo ni Kristo makakita sa kahigayunan taliwala sa oposisyon. …

“… Maayo na lang, ang Ginoo nasayud sa mga kasingkasing sa mga tig-akusar kanato ug unsaon nato sila sa pagtubag sa maayong paagi. Samtang ang tinuod nga mga disipulo mangayo og giya sa Espiritu, makadawat sila og inspirasyon gikan sa matag panag-abut. Ug sa matag panag-abut, ang tinuod nga mga disipulo motubag sa mga paagi nga modapit sa Espiritu sa Ginoo” (“Kristohanong Kaisug: Ang Bugti sa Pagkadisipulo,” 72–73).

Unsa kaha ang gipasabut nga “makakita sa kahigayunan taliwala sa oposisyon”?

Maayo ang moresulta kon motubag kita niadtong mohagit sa atong pagtuo sa mga paagi nga modapit sa Espiritu sa Ginoo. Basaha ang Jacob 7:15–23, ug pangitaa ang maayo nga miresulta sa pakig-atubang ni Jacob kang Sherem.

Unsa nga ebidensya ang imong nakita sa Jacob 7:21–22 nga si Jacob nagtinguha sa iyang kasinatian uban ni Sherem nga makatabang sa uban?

Sumala sa Jacob 7:23, sa unsang paagi ang pakig-atubang ni Jacob kang Sherem nakaapekto sa pundok sa katawhan sa katapusan?

Usa ka baruganan nga atong makat-unan gikan sa pakig-atubang ni Jacob kang Sherem mao nga samtang kita motubag sa mga pangutana o mga pagpanaway sa atong pagtuo sa mga paagi nga nagdapit sa Espiritu, makatabang kita sa uban nga moduol sa Ginoo. Pagsulat og mga tubag sa mosunod nga mga pangutana mahitungod niini nga baruganan diha sa imong scripture study journal:
1. Sa unsang paagi ang pagkasayud niini nga baruganan nagtugot kanimo sa pagtabang sa uban nga moduol sa Ginoo?
2. Unsaon nimo pagtinguha sa paggamit niini nga baruganan?

Jacob 7:24–27

Si Jacob naghulagway sa mga kahimoan sa mga Nephite ngadto sa mga Lamanite ug mitapos sa iyang rekord

Basaha ang Jacob 7:24–27. Pag-highlight og usa ka hugpong sa mga pulong diha sa Jacob 7:25 nga nagpatataw sa mensahe ni Jacob sa kaimportante sa pagsalig sa Ginoo samtang mag-atubang kita og mga hagit.

Tubaga ang mosunod nga pangutana diha sa imong scripture study journal: Unsang butanga ang imong buhaton aron sa pagpangandam sa higayon nga dunay tawo nga mohagit sa imong pagtuo?

Kon ikaw adunay mga kabalaka kon unsaon pagtubag ang piho nga mga pangutana o pagpanaway sa imong pagtuo, tun-i ang manwal nga Matinud-anon sa Tinuhoan: Usa ka Pakisayran sa Ebanghelyo, ang pakigpulong ni Elder Robert D. Hales sa kinatibuk-ang komperensya nga “Kristohanong Kaisug: Ang Bugti sa Pagkadisipulo” (Ensign o Liahona, Nob. 2008, 72–75), ug uban pang mga kapanguhaan nga anaa sa LDS.org ug sa youth.lds.org.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Jacob 7 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo:

Mga tubag sa pagpares-pares nga kalihokan sa sinugdanan niini nga leksyon: 1) d, 2) c, 3) a, 4) e, 5) b.