Alma 13

Pasiuna

Gitudloan ni Alma ang masinupakon nga mga tawo sa Ammonihah mahitungod sa halangdong mga pari sa Melchizedek Priesthood kinsa giorden aron motabang sa mga tawo sa paghinulsol ug makasulod sa kapahulayan sa Ginoo. Gihatag niya ang ehemplo ni Melchizedek, kinsa mitabang sa iyang mga tawo nga maghinulsol ug magpakabuhi nga malinawon. Gipaningkamutan ni Alma sa pagtudlo ang mga tawo sa Ammonihah aron makabaton og pagtuo ug paglaum ug sa pag-awhag kanila sa pag-usab aron maandam sila sa pagsulod ngadto sa kapahulayan sa Ginoo.

Alma 13:1–12

Gitudloan ni Alma ang mga tawo sa Ammonihah mahitungod sa calling o tawag sa halangdong mga pari o mga high priest

Basaha ang mosunod nga kinutlo, ug dayon tubaga ang mga pangutana:

“Sa kalibutan sa wala pa dinhi sa yuta, ang Dios mitudlo og pihong mga espiritu sa pagtuman sa tino nga mga misyon sa panahon sa ilang mortal nga kinabuhi. Gitawag kini og pagka-inordinahan nang daan.

“Ang pagka-inordinahan nang daan wala mogarantiya nga ang mga indibidwal makadawat sa pihong mga calling o mga responsibilidad. Ang maong mga oportunidad moabut niining kinabuhia isip resulta sa matarung nga paggamit sa kabubut-on, sama nga ang pagka-inordinahan nang daan miabut isip resulta sa pagkamatarung didto sa kinabuhi sa wala pa dinhi sa yuta” (Matinud-anon sa Tinuohan: Usa ka Pakisayran sa Ebanghelyo [2004], 137).
1. Unsa ang koneksyon tali sa mga pagpili atol sa premortal nga kinabuhi ug sa pagka-inordinahan nang daan?
2. Sa unsang paagiha ang mga pagpili nga gihimo atol sa mortal nga kinabuhi makaapekto sa pagka-inordinahan nang daan?

Bisan og ang mga naghupot sa priesthood gihisgutan sa Alma 13, gipahinumduman kita ni Presidente Spencer W. Kimball nga ang mga sister gihatagan usab og dungganong mga calling didto sa premortal nga kinabuhi: “Hinumdumi, didto sa kalibutan sa wala pa kita moanhi, ang matinud-anong mga babaye gihatagan og piho nga mga buluhaton samtang ang matinud-anong mga lalaki giorden nang daan ngadto sa piho nga mga buluhaton sa priesthood” (“The Role of Righteous Women,” Ensign, Nob. 1979, 102).

Si Elder Neal A. Maxwell sa Korum sa Napulog Duha ka mga Apostoles mitudlo: “Ang premortal nga kinabuhi dili doktrina nga may hinungdan sa pag-relaks. Para sa matag usa kanato, dunay daghang pagpili nga pagabuhaton, walay hunong ug lisud nga mga buluhaton ang buhatunon, mga lahi sa kinabuhi ug kalisdanan ang masinati, panahon nga kinahanglang tarungon sa paggamit, mga talento ug mga gasa nga ayuhon sa paggamit. Wala kana magpasabut nga tungod kay kita gipili ‘diha ug dayon,’ magpasagad na lamang kita ‘dinhi ug karon.’ Bisan giorden man daan ang mga lalaki, o may buluhaton man daan ang mga babaye, kinahanglan usab nga pamatud-an niadtong mga gitawag ug giandam ang ilang ‘pagkapinili ug ang kamatinud-anon.’ (Tan-awa sa Pin. 17:14; D&P 121:34–36.)” (“Premortality, a Glorious Reality,” Ensign, Nob. 1985, 17).

Gitudloan ni Alma ang mga kaigsoonan sa Ammonihah nga daghang mga lalaki ang giorden nang daan sa premortal nga kinabuhi nga makadawat sa priesthood. Basaha ang Alma 13:1, 8–9, ug ilha kon asa nga priesthood ang gihisgutan ni Alma. Tingali makatabang ang pagkahibalo nga dinhi niini nga kapitulo ang mga pulong nga “balaan nga kapunongan” nagpasabut sa Melchizedek Priesthood, o “ang Balaan nga Pagkapari, sunod sa Kapunongan sa Anak sa Dios” (D&P 107:3). Ikonsiderar ang pagmarka sa mga pulong nga “balaan nga kapunongan” samtang magtuon ka sa uban pa niini nga kapitulo (tan-awa sa Alma 13:2, 6–7, 10–11, 16, 18). Si Elder Bruce R. McConkie sa Korum sa Napulog Duha ka mga Apostoles miingon: “Ang mga Nephite, nga nagmatinud-anon ug nagmatinuoron sa pagtuman sa balaod ni Moises, adunay Melchizedek Priesthood, nga nagpasabut nga aduna sila sa kahingpitan sa ebanghelyo” (The Promised Messiah: The First Coming of Christ [1978], 421). Nagpasabut kini nga ang mga propeta sa Basahon ni Mormon adunay Melchizedek Priesthood ug nahibalo unsa ang gamit niini.

Siksika ang Alma 13:2–6, 10 alang sa mga tubag sa mosunod nga mga pangutana, ug isulat ang mga tubag diha sa imong manwal:

Unsa nga mga kinaiya ang anaa niadtong gipang-orden sa Melchizedek Priesthood? (Tan-awa sa Alma 13:3–5, 10.)
Unsa ang giorden nga buhaton niini nga mga naghupot sa Melchizedek Priesthood? (Tan-awa sa Alma 13:6.)
Nakita ba nimo kini nga gibuhat sa mga naghupot sa Melchizedek Priesthood nga imong nailhan sa imong ward o branch, ug sa unsang paagi kini nakapanalangin sa kinabuhi sa uban?

Ang Alma 13 naglangkob og usa ka lawom nga diskusyon mahitungod sa Melchizedek Priesthood. Nagtudlo kini nga ang mga tawo nga nakadawat niini nga priesthood giorden nang daan nga makadawat niini (tan-awa sa bersikulo 3). Kadto nga naghupot niini nga priesthood kinahanglan nga motudlo sa mga sugo sa Dios ngadto sa uban “nga usab sila unta makasulod ngadto sa iyang kapahulayan” (bersikulo 6). Ang priesthood mahangturon (tan-awa sa bersikulo 9), ug gitugyan kini diha sa mga lalaki “tungod sa ilang naghingapin nga hugot nga pagtuo ug paghinulsol, ug sa ilang pagkamatarung sa atubangan sa Dios,” (bersikulo 10). Ang mga naghupot sa priesthood mamahimong balaan pinaagi sa Espiritu Santo kon makakat-on sila sa pagkasilag [kalagot] sa sala, ug sa ingon sila “nahimo nga putli ug nakasulod ngadto sa kapahulayan sa Ginoo nga ilang Dios” (bersikulo 12).

Basaha ang Alma 13:11–12, ug ilha ang makabalaan nga epekto sa Pag-ula ni Jesukristo nga nadawat niadtong mga naghupot sa priesthood tungod sa ilang pagtuo, paghinulsol, ug pagkamatarung.

Tubaga ang mosunod nga pangutana diha sa imong scripture study journal: Unsa ang imong makat-unan gikan sa ehemplo niini nga mga naghupot sa Melchizedek Priesthood mahitungod sa unsay imong mahimo aron makadawat sa makabalaan nga epekto sa Pag-ula diha sa imong kinabuhi?
Isulat ang mosunod nga kamatuoran diha sa imong mga kasulatan sa Alma 13:1–12 o sa imong scripture study journal: Ang mga lalaki nga mga miyembro sa Simbahan ni Jesukristo sa mga Santos sa Ulahing mga Adlaw ug migamit og dakong pagtuo ug mipili sa pagkamatarung tawagon sa nga mahimong Melchizedek Priesthood sa pagdala sa uban ngadto sa Dios. Isulat diha sa imong scripture study journal kon sa unsang paagi kini nga baruganan makaapekto sa paagi sa imong pagsanong sa mga lider sa priesthood sa tibuok nimong kinabuhi.

Alma 13:13–20

Nagtudlo si Alma mahitungod kang Melchizedek, usa ka bantugan nga halangdon nga pari kinsa miestablisar og kalinaw taliwala sa iyang mga katawhan

Basaha ang Alma 13:13–18, ug pangita og mga pulong nga gigamit ni Alma sa paghulagway kang Melchizedek ug kon unsay gihimo ni Melchizedek sa iyang mga katawhan. Hunahunaa kon sa unsang paagi kini nga mga pulong naghulagway sa Kristohanong kinabuhi ni Melchizedek. Gitudlo ni Alma nga ang nanaghupot sa Melchizedek Priesthood “sunod sa kapunongan sa Anak, ang Bugtong Anak sa Amahan” (Alma 13:9; tan-awa usab sa D&P 107:2–4), nga mao si Jesukristo, ug sila nagtumong ngadto Kaniya pinaagi sa ilang ehemplo ug sa ilang mga pagtulun-an. Miingon si Elder Bruce R. McConkie: “Walay duda dunay daghang panghitabo sa kinabuhi sa daghang mga propeta nga nagpalahi niadtong matarung nga mga tawo isip pagkasama sa ilang Mesiyas. Makaayo ug tukma ang pagpangita og simbolo alang kang Kristo bisan asa ug gamiton kini sa kanunay sa pagbutang kaniya ug sa iyang mga balaod sa kinaibabwan sa atong mga hunahuna” (The Promised Messiah, 453).

Basaha ang Alma 13:19, ug pangitaa kon unsay gisulti niini nga mga bersikulo kanato mahitungod ni Melchizedek. Tan-awa og balik ang Alma 13:17 aron makita kon giunsa ni Alma sa paghulagway ang mga tawo sa Salem dihang nahimo nilang Hari si Melchizedek. Bantayi kon sa unsang paagi kini nga mga pulong makahulagway usab sa mga tawo sa Ammonihah (tan-awa sa Alma 8:9; 9:28). Unsa ang gipanghimo sa mga tawo sa Salem isip resulta sa mga paningkamot ni Melchizedek? (Tan-awa sa Alma 13:18.)

Susiha kon unsay gihimo, nadawat, ug gisangyaw ni Melchizedek, diha sa Alma 13:18. Hunahunaa unsay imong nakat-unan kon unsa ang angay sa usa ka lider sa priesthood gikan sa ehemplo ni Melchizedek.

Tubaga ang mosunod nga pangutana sa imong scripture study journal: Kanus-a nga ikaw o laing tawo nga imong nailhan nakasinati og kalinaw human nga nisunod sa tambag sa usa ka matarung nga lider sa priesthood?

Alma 13:21–31

Gidapit ni Alma ang mga tawo sa pagpaminaw sa tingog sa Ginoo ug pagsulod ngadto sa Iyang kapahulayan

Pangita og markahi ang gibalik-balik nga mga pulong nga “kapahulayan sa Ginoo” (o ang susamang mga pulong) diha sa Alma 13:12, 13, 16, ug 29. Gitudloan ni Alma ang mga tawo sa Ammonihah nga ang Ginoo mitawag og mga tawo ngadto sa priesthood aron matabangan ang mga tawo nga makasulod sa kapahulayan sa Ginoo. Gigamit niya ang ehemplo ni Melchizedek sa pagpakita kanila nga ang mga tawo nga puno sa kadautan makahinulsol ug makasulod ngadto sa kapahulayan sa Ginoo (tan-awa sa Alma 13:17–18; tan-awa usab sa D&P 84:24).

Si Presidente Joseph F. Smith miingon nga ang pagsulod sa kapahulayan “nagpasabut kini sa pagsulod ngadto sa kahibalo ug gugma sa Dios, ang pagbaton og hugot nga pagtuo diha sa iyang katuyoan ug sa iyang plano, sa ingon nga matang nga kita nasayud nga kita husto, ug nga kita wala mangita og lain pa, wala kita mahasol sa matag hangin sa tuluhoan, o pinaagi sa lipatlipat sa mga tawo nga batid sa pagmugnag kasaypanan. Nasayud kita sa doktrina nga kini iya sa Dios” (Mga Pagtulun-an sa mga Presidente sa Simbahan: Joseph F. Smith [1998], 66–67).

Unsa man kaha ang angay nga kinaiya sa usa ka tawo aron siya makasulod o kon siya nakasulod sa kapahulayan sa Ginoo niining kinabuhia sama sa gihulagway ni Presidente Joseph F. Smith?

Gitudlo ni Elder Bruce R. McConkie: “Ang tinuod nga mga santos makasulod sa kapahulayan sa Ginoo samtang ania niini nga kinabuhi, ug pinaagi sa pagsunod sa kamatuoran, nagpadayon sila nianang bulahan nga kahimtang hangtud nga mopahulay sila uban sa Ginoo didto sa langit. … Ang kapahulayan sa Ginoo, sa kahangturan, mao ang pagkaangkon og kahingpitan sa himaya sa Ginoo” (Mormon Doctrine, 2nd ed. [1966], 633).

Human nga gipahimangnoan ni Alma ang mga tawo sa Ammonihah aron maandam sa pag-anhi ni Kristo (tan-awa sa Alma 13:21–26), mihatag siya og dugang nga instruksyon kon unsaon sa pagsulod ngadto sa kapahulayan sa Ginoo. Basaha ang Alma 13:27–29 sa pagsusi kon unsa kadto nga mga instruksyon.

Ang mga pagtulun-an ni Alma mahimong i-summarize pinaagi sa mosunod nga baruganan: Kon kita mosanong uban sa kamapainubsanon sa imbitasyon nga maghinulsol, ang Espiritu sa katapusan mogiya kanato ngadto sa kapahulayan sa Ginoo.

Ilha ang usa sa mga panalangin nga gihisgutan sa Alma 13:27–29 nga gusto nimong madawat. Human nimo maila ang panalangin, pangitaa ang tambag nga gihatag ni Alma nga makatabang nimo nga maandam sa pagdawat niana nga panalangin. Dayon pagsulat og usa ka tumong diha sa imong scripture study journal kon unsaon nimo sa paggamit ang tambag ni Alma aron makasulod ka sa kapahulayan niining kinabuhia ug sa sunod.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 13 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: