Mosiah 9–10

Pasiuna

Panahon sa paghari ni Haring Benjamin, si Zeniff nangulo og grupo sa mga Nephite gikan sa Zarahemla aron manimuyo taliwala sa mga Lamanite sa yuta sa Nephi. Tungod kay ang hari sa mga Lamanite nagplano nga himoong ulipon ang mga tawo ni Zeniff, mitugot siya kanila nga magpabilin. Ang sayop nga mga tradisyon sa mga Lamanite ug ilang pagdumot sa mga Nephite sa katapusan miresulta ngadto sa pakiggubat. Sa dihang ang mga Lamanite nagtinguha sa paghimo nilang mga ulipon, ang katawhan ni Zeniff midangup sa Ginoo, kinsa milig-on kanila ug mitabang kanila sa pag-abug sa mga Lamanite gikan sa ilang yuta.

Mosiah 9:1–13

Si Zeniff nangulo og grupo sa mga Nephite sa pagbalik ngadto sa yuta sa Nephi

Nakasulay ka ba sukad nga adunay gusto gayud kaayong maangkon? Karon imong makat-unan ang mahitungod sa usa ka tawo nga adunay gusto gayud kaayong maangkon ug ang mga sangputanan sa iyang pagsunod sa iyang mga tinguha.

Tan-awa ang mapa sa mga panaw gikan sa katapusang leksyon. Nakahinumdom ka ba sa panaw ni Ammon sa dihang iyang nakit-an si Limhi ug ang iyang katawhan? Ablihi ang imong mga kasulatan ngadto sa Mosiah 7–8, ug tan-awa ang petsa kon kanus-a nahitabo kini nga mga panghitabo niini nga mga kapitulo (makita diha ubos sa pahina o sa ulohan sa kapitulo). Itandi kini diha sa petsa kalabut sa Mosiah 9:1. Pila ka tuig ang gintang sa panahon tali sa Mosiah 8 ug Mosiah 9?

Basaha ang pasiuna ni Mormon sa rekord ni Zeniff nga naa dapit sa wala pa ang Mosiah 9.

Si Zeniff, ang apohan ni Limhi, nangulo og usa ka grupo sa mga Nephite nga mobalik ngadto sa yuta sa Nephi. Gusto gayud kaayo niya og usa ka butang nga tingali napakyas na hinoon siya sa pagkonsiderar kon asa mopadulong ang iyang mga tinguha. Basaha diha sa Mosiah 9:1–4 kon unsay gibuhat ni Zeniff aron maangkon ang iyang gusto. (Ang mahimong “hilabihan ka madasigon” nagpasabut nga gusto kaayo o interesado kaayo sa usa ka butang.)

Ang pagkahilabihan ka madasigon ni Zeniff miresulta nga malingla siya sa hari sa mga Lamanite. Basaha ang Mosiah 9:5–7, 10 aron makita ang resulta sa pagkahilabihan ka madasigon ni Zeniff.

Pagsulat og mga tubag sa mosunod nga mga pangutana diha sa imong scripture study journal:
1. Unsa man angwala mabantayi ni Zeniff tungod sa iyang hilabihan ka madasigong mga tinguha nga maangkon ang yuta sa Nephi?
2. Unsa man ang pipila ka modernong mga ehemplo nga hilabihan ka madasigong gitinguha sa pipila ka mga batan-on?
3. Unsa kaha ang mga peligro kon dugay mahinumdom sa Ginoo samtang maghimo ka og mga pagpili sa imong kinabuhi?

Human sa 12 ka tuig, ang katawhan ni Zeniff nahimong mauswagon kaayo. Ang hari nga Lamanite nahadlok nga dili na unya siya makahimo sa pag-ulipon kanila sumala sa iyang orihinal nga plano, mao nga giandam sa hari ang iyang katawhan nga makiggubat batok kanila (tan-awa sa Mosiah 9:11–13).

Mosiah 9:14–10:22

Ang mga Lamanite misulay sa pag-ulipon sa katawhan ni Zeniff

Lingini ang bisan asa sa mosunod nga mga aspeto sa imong kinabuhi nga gusto nimo og dugang suporta o kalig-on: buhat sa eskwelahan, pakigbatok sa tintasyon, mga pakigrelasyon uban sa mga higala, pagpangulo, trabaho, mga pakigrelasyon uban sa mga sakop sa pamilya, pagpalambo og mga kahanas, mga talento, ug mga abilidad.

Samtang magtuon ka sa Mosiah 9–10, pagtan-aw og usa ka baruganan nga makatabang kanimo nga makasabut kon unsay angayang buhaton aron makadawat og dugang kalig-on niini nga mga aspeto sa imong kinabuhi. Ang Mosiah 9–10 naglangkob og rekord sa duha ka lain-laing higayon dihang ang mga Lamanite misulong aron sa pakig-away batok ni Zeniff ug sa iyang katawhan.

Kopyaha ang mosunod nga tsart diha sa imong scripture study journal, nga magbilin og igong luna sa ubos sa matag reference sa kasulatan aron sa pagsulat og tubag. Tun-i ang mga bersikulo nga nahisulat, ug pangitaa kon unsay gibuhat sa katawhan ni Zeniff ug sa mga Lamanite aron makakuha og kalig-on. Sulati ang tsart sa impormasyon nga imong makit-an.

	Unsay gibuhat sa mga tawo aron sa pagpangandam?	Unsay ilang gibuhat aron ibutang ang ilang pagsalig diha sa Ginoo?	Unsa ang resulta?
Si Zeniff ug ang iyang katawhan	Mosiah 9:14–16	Mosiah 9:17	Mosiah 9:18
Ang mga Lamanite	Mosiah 10:6–8	Mosiah 10:11	Mosiah 10:19–20

Unsa nga mga pagkapareha ang imong nakita tali sa paagi sa pagpakiggubat sa katawhan ni Zeniff ug sa mga Lamanite?
Unsa nga kalainan ang imong nakita tali sa paagi sa pagpakiggubat sa katawhan ni Zeniff ug sa mga Lamanite?

Usa ka leksyon nga atong makat-unan gikan sa Mosiah 9:17–18 mao nga ang Ginoo molig-on kanato samtang atong buhaton ang tanan natong mahimo ug mosalig Kaniya.

Tubaga ang mosunod nga pangutana diha sa imong scripture study journal: sa unsang mga aspeto sa akong kinabuhi nga mas hingpit akong makasalig sa Ginoo ug makahangyo Kaniya sa paglig-on kanako?
Markahi ang unang tulo ka mga linya sa Mosiah 9:18. Dayon hangyoa ang usa ka kasaligan nga hamtong (ginikanan, lider sa Simbahan, o magtutudlo) sa pagpakigbahin og kasinatian kanimo mahitungod sa panahon sa diha nga nangayo siya og tabang sa Ginoo ug mibati nga Iyang gilig-on. Paminawa kon unsay gibuhat sa tawo aron makadawat sa kalig-on sa Ginoo. Pagsulat mahitungod sa unsay imong nakat-unan diha sa imong scripture study journal.

Nakasulay ka ba nga masuko sa usa ka tawo ug nagdumot—mibati nga dili ka makahimo sa pagpasaylo o makalimot sa gibuhat sa tawo? Duna ka bay nailhang tawo nga daw naglagot kanimo? Sa wala pa makiggubat sa ikaduhang higayon si Zeniff ug ang iyang katawhan, gitudloan ni Zeniff ang iyang katawhan nganong ang mga Lamanite napuno sa kasilag ngadto sa mga Nephite. Samtang magtuon ka sa mga pulong ni Zeniff diha sa Mosiah 10:11–18, mahimong makatabang nga masayud nga ang “wala hatagi og kaangayan” mao ang mobati nga nasilo o gitratar sa dili makiangayon nga paagi o sa dili patas nga paagi ug ang “nasuko” mao ang grabing pagkayugot. Tun-i ang Mosiah 10:11–18, ug tan-awa kon nganong ang mga kaliwat ni Laman ug Lemuel nagpadayon sa paglagot sa mga kaliwat ni Nephi. Markahi ang mga pulong nga wala hatagi og kaangayan ug nasuko samtang magbasa ka.

Pamalandungi ang mosunod nga mga pangutana:

Nganong hilabihan man ang kalagot sa mga Lamanite ngadto sa mga Nephite?
Kinsa man ang masakitan kon masuko ka o magdumili sa pagpasaylo?
Sa unsang paagi ang kasuko ug ang pagdumot makaapekto sa imong pamilya o sa imong umaabut nga mga anak?

Basaha ang mosunod nga mga kasinatian gikan ni Elder Donald L. Hallstrom sa Kapangulohan sa Seventy, ug pangitaa kon unsay iyang girekomendar nga atong buhaton kon mobati kita nga nasilo o nasuko sa usa ka tawo:

“Mga katuigan na ang milabay, naka-obserbar ako og kasubo sa kasingkasing—nga nahimong usa ka trahedya. Usa ka batan-ong magtiayon hapit na manganak sa una nilang anak. Ang ilang kinabuhi puno sa pagdahum ug kahinam niining halandumon nga kasinatian. Atol sa pagpanganak, mitumaw ang komplikasyon ug ang bata namatay. Ang kasubo sa kasingkasing nahimong kagul-anan, ang kagul-anan nahimong kasuko, ang kasuko nahimong pasangil, ug ang pasangil nahimong panimalus ngadto sa doktor kinsa maoy ilang gibasol nga responsable sa tanan. Ang mga ginikanan ug ubang sakop sa pamilya grabe nga nalambigit, naghiusa sa pagguba sa reputasyon ug sa trabaho sa doktor. Sulod sa mga semana ug dayon mga bulan sa kayugot [mga hait, pait nga pinulongan] nga gigahin sa pamilya, ang ilang kasuko miabut ngadto sa Ginoo. ‘Nganong nakatugot Siya niining mapintas nga butang nga mahitabo?’ Sila misalikway sa balik-balik nga mga paningkamot sa mga lider ug mga miyembro sa Simbahan sa paghupay kanila sa espiritwal ug emosyunal ug, sa maong higayon, mipalayo sila sa Simbahan. Upat na ka henerasyon sa pamilya ang naapektuhan karon. Diin makausa didto ang hugot nga pagtuo ug debosyon ngadto sa Ginoo ug sa Iyang Simbahan, wala nay kalihokan nga espiritwal ni bisan kinsa nga sakop sa pamilya sulod na sa pipila ka dekada. …

“Ang akong mga apohan sa amahan adunay duha ka anak, anak nga lalaki (ang akong amahan) ug anak nga babaye. … [Ang ilang anak nga babaye] naminyo pagka-1946 ug upat ka tuig ang milabay nagpaabut na nga manganak. … Walay nasayud nga nagsabak siya og kaluha. Sa dakong kasubo, siya ug ang kaluha tanan namatay sa iyang pagpanganak.

“Ang akong mga apohan nasubo kaayo. Ang ilang kagul-anan, bisan pa man, diha-diha mipabalik kanila ngadto sa Ginoo ug sa Iyang Pag-ula. Sa walay paghunahuna nganong mahitabo kini ug kinsa ang mabasol, sila mipokus sa pagpuyo og matarung nga kinabuhi. …

“Ang kamatinud-anon [niini nga mga apohan], ilabi na kon mag-atubang og kalisdanan, naka-impluwensya na karon sa upat ka mga henerasyon nga nagsunod. Sa direkta ug sa katulukibon, kini nakaapektar sa ilang anak nga lalaki (akong amahan) ug sa akong inahan dihang ang kaugalingong anak nga babaye sa akong mga ginikanan, nga ilang kinamanghuran nga anak, namatay tungod sa mga komplikasyon gumikan sa pagpanganak. … Uban sa ehemplo nga ilang nakita sa milabay nga henerasyon, ang akong mga ginikanan—sa walay pagduha-duha—midangup sa Ginoo alang sa kahupayan. …

“Kon gibati ninyo nga nabuhatan og sayop—sa usa ka tawo (sa sakop sa pamilya, sa usa ka higala, sa laing miyembro sa Simbahan, sa usa ka lider sa Simbahan, sa kauban sa negosyo) o sa bisan unsa (sa kamatayon sa usa ka pinalangga, mga problema sa panglawas, pinansyal nga kabalit-aran, abuso, mga adiksyon)—atubanga sa direkta kining mga butanga ug inubanan sa tibuok ninyo nga kusog. … Ug, sa walay paglangay, dangup sa Ginoo. Gamita ang hugot ninyong pagtuo Kaniya. Tuguti Siyang makigbahin sa inyong palas-anon. Tuguti ang Iyang grasya nga mopagaan sa inyong gipas-an. … Ayaw itugot nga ang usa ka kalibutanong kahimtang mopahunong sa inyong pagka-espirituhanon” (“Dangup sa Ginoo,” Ensign o Liahona, Mayo 2010, 78–80).

Timan-i nga sa duha ka ehemplo sa mga Lamanite ug sa pamilya sa batan-ong magtiayon nga nawad-an sa ilang unang anak, ang kasuko ug pagkasilo miapekto og mga henerasyon sa mga tawo.

Paghunahuna og higayon diin ikaw adunay mga pagbati nga nasilo o nasuko ngadto sa usa ka tawo? Aduna ka bay pipila niadto nga mga pagbati karon? Tubaga ang mosunod nga mga pangutana diha sa imong scripture study journal:
1. Sa unsang paagi ako makadawat og tabang sa akong mga paningkamot sa pagpasaylo?
2. Unsaon nako pagsunod sa ehemplo sa apohan ni Elder Hallstrom ug paggamit sa iyang tambag diha sa katapusang paragraph sa kinutlo nga istorya diha sa akong kinabuhi karon?
Isulat ang mosunod diha ubos sa mga assignment karong adlawa diha sa imong scripture study journal:

Akong natun-an ang Mosiah 9–10 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: