Unit 3: Day 1

1 Nephi 7

Pasiuna

Ang hingpit nga pagpahinungod ni Nephi ngadto sa Ginoo makita sa 1 Nephi 7. Uban sa iyang igsoon nga mga lalaki, siya mituman sa sugo sa Ginoo sa pagbalik ngadto sa Jerusalem ug dad-on si Ishmael ug iyang pamilya uban kanila ngadto sa kamingawan. Sa biyahe balik sa kamingawan, si Laman, Lemuel, ug uban nga pamilya ni Ishmael mirebelde kang Nephi ug buot mobalik sa Jerusalem. Sa dihang ilang gigapos ug buot patyon si Nephi, siya nag-ampo uban sa hugot nga pagtuo, giluwas sa Ginoo, ug sinsero nga mipasaylo sa midaug-daug kaniya. Samtang ikaw magtuon niini nga leksyon, pamalandungi unsaon kaha nimo sa pagtubag sa matinud-anong paagi ang mga sugo ug mga kalisdanan sama sa gibuhat ni Nephi.

1 Nephi 7:1–5

Ang Ginoo misugo sa anak nga mga lalaki ni Lehi sa pagbalik sa Jerusalem alang kang Ishmael ug sa iyang pamilya

Hunahunaa ang imong pamilya, ug pamalandungi nganong importante ang mga pamilya sa plano sa Dios.

Basaha ang 1 Nephi 7:1–2, ug hibaloi unsa ang gisugo sa Ginoo kang Lehi nga buhaton sa iyang anak nga mga lalaki ug nganong ipabuhat kini Niya ngadto kanila. (Makatabang nga makahibalo nga ang pulong nga binhi sa 1 Nephi 7:1 nag-refer sa mga anak ug kaliwat.)

Usa sa mga kamatuoran nga atong makat-unan gikan niini nga mga bersikulo mao nga ang Ginoo nagsugo kanato nga maminyo ug magpadako og mga anak nganha Kaniya. Sa imong pagpadayon sa imong pagtuon sa 1 Nephi 7, pangutan-a ang imong kaugalingon nganong importante gayud ang kaminyoon ug pamilya nga ang Ginoo misugo ni Nephi ug sa iyang igsoon nga mga lalaki sa paglahutay sa daghang malisud nga mga adlaw sa pagpanaw ngadto sa kamingawan balik sa Jerusalem.

Basaha ang mosunod nga pamahayag gikan sa “Ang Pamilya: Usa ka Pamahayag Ngadto sa Kalibutan,” ug ilha unsa ang gipamahayag sa moderno nga mga propeta kabahin sa kaimportante sa kaminyoon: “Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak” (Ensign o Liahona, Nob. 2010, 129).

Mahimo nimong linginan ang mga pulong nga “ngadto sa Ginoo” sa 1 Nephi 7:1. Hunahunaa unsa ang gipasabut niana nga mga pulong sa atong panahon.

Pangita og dugang nga mga panabut sa pagpadako og mga anak ngadto sa Ginoo samtang imong basahon ang mosunod nga pagtulun-an gikan sa “Ang Pamilya: Usa ka Pamahayag ngadto sa Kalibutan”:

“Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman. …

“… Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung, sa pagsangkap alang sa ilang pisikal ug espirituhanon nga mga panginahanglan, ug sa pagtudlo kanila sa paghigugma ug pag-alagad sa usag usa, pagsunod sa mga sugo sa Dios, ug kinsa mosunod sa mga balaod sa ilang nasud bisan asa sila magpuyo. Mga bana ug mga asawa—mga inahan ug mga amahan—adunay tulubagon sa atubangan sa Dios sa pagtuman niini nga mga kapangakohan” (Ensign o Liahona, Nob. 2010, 129).

Ishmael’s family

Si Nephi ug ang iyang igsoon nga mga lalaki nakigsulti sa pamilya ni Ishmael

Basaha ang 1 Nephi 7:3–5 ug tan-awa giunsa sa Ginoo pagtabang sa anak nga mga lalaki ni Lehi sa pagtuman sa Iyang mga sugo. Sa unsang paagi mitabang ang Ginoo kang Ishmael ug sa iyang pamilya sa pagdawat sa imbitasyon sa pag-apil sa pamilya ni Lehi ngadto sa kamingawan?

1. Pangutan-a ang imong mga ginikanan, usa ka lider sa Simbahan, o usa ka magtutudlo sa pagsugyot og tulo ka mga paagi nga ang mga batan-on karon makapangandam alang sa kaminyoon ug pagpadako og mga anak “ngadto sa Ginoo.” I-rekord ang ilang tambag diha sa imong scripture study journal.

1 Nephi 7:6–15

Si Nephi naninguha sa pagdani sa iyang igsoon nga mga lalaki sa pagpadayon sa ilang pagpanaw ngadto sa kamingawan

I-visualize ang mga Kasulatan

Ang pagtuon sa kasulatan mahimong mas makahuluganon kon imong ihulagway diha sa imong hunahuna ang mga panghitabo. Hunahunaa kon unsa kaha ang imong bation ug buhaton kon anaa ka niadto nga mga panghitabo nga gihulagway diha sa mga kasulatan. Makatabang usab kini kanimo nga makaamgo sa pagkasusama tali sa mga istorya sa kasulatan ug sa mga sitwasyon sa imong kinabuhi ug makaandam kanimo sa paggamit sa mga kamatuoran nga gitudlo sa mga kasulatan.

Basaha ang 1 Nephi 7:6–7, ug hibaloi nganong si Laman, Lemuel, ug ubang pamilya ni Ishmael mirebelde atol sa ilang pagpanaw ngadto sa kamingawan. Hunahunaa kon unsa kaha ang pagbati kon ikaw pa si Nephi nga anaa sa ingon niini nga sitwasyon. Hunahunaa unsa ang imong isulti ngadto ni Laman ug Lemuel ug sa pamilya ni Ishmael sa pagpaningkamot sa pagdani kanila sa pagpadayon sa ilang pagpanaw paingon sa gisaad nga yuta.

Basaha ang 1 Nephi 7:8–12, ug ilha ang mga pangutana nga gipangutana ni Nephi sa iyang igsoon nga mga lalaki sa pagsulay ug pagdani kanila sa dili pagbalik sa Jerusalem. Unsa ang tulo ka mga kamatuoran ang gisulti ni Nephi nga nalimtan sa iyang igsoon nga mga lalaki?

Tubaga ang mosunod diha sa imong scripture study journal:

2. Sa unsang paagi nga ang paghinumdum niadtong tulo ka mga kamatuoran makatabang ni Laman ug Lemuel nga magmatinud-anon sa Ginoo?

3. Paglista og 4–5 ka mga panalangin nga imong nadawat gikan sa Ginoo. Sa unsang paagi nga ang paghinumdom sa unsay nahimo sa Ginoo alang kanimo makatabang nimo nga magmatinud-anon sa pagpili sa pagsunod Kaniya?

Basaha ang 1 Nephi 7:13–15, ug ilha unsa ang mahitabo sa gisulti ni Nephi ngadto ni Laman, Lemuel, ug sa nagrebelde nga mga miyembro sa pamilya ni Ishmael kon sila mibalik sa Jerusalem.

4. Pagsulat og paragraph sa imong scripture study journal kabahin sa kon nganong importante ang paghinumdom unsa ang nahimo sa Ginoo kanimo ug mosunod sa Iyang paggiya.

1 Nephi 7:16–22

Ang Ginoo miluwas ni Nephi

Padayon sa paghunahuna kon unsa kaha kon naa sa sitwasyon ni Nephi samtang magbasa ka sa 1 Nephi 7:16. Unsa ang imong buhaton?

Si Nephi miampo. Basaha ang iyang pag-ampo sa 1 Nephi 7:17–18, ug ilha unsa ang giampo ni Nephi.

Hibaloi nga si Nephi mihangyo nga luwason “sumala sa [iyang] hugot nga pagtuo.” Usa sa mga leksyon nga atong makat-unan gikan niini nga mga bersikulo mao nga ang Dios motubag sa mga pag-ampo sumala sa atong hugot nga pagtuo. Ang pag-ampo nga may hugot nga pagtuo nagpasabut sa pag-ampo nga may pagsalig sa Ginoo ug kanunay maglakip og kamauyonon sa pagbuhat.

Tun-i ang mosunod nga pamahayag ni Elder David A. Bednar sa Korum sa Napulog Duha ka mga Apostoles kabahin sa pag-ampo ni Nephi sa 1 Nephi 7:17 ug ang gahum sa Pag-ula aron pag-usab sa atong mga kasingkasing. Linyahi ang bisan unsa nga mga pulong nga makatabang nimo nga masabtan ang kaimportante sa kamauyunon sa pagbuhat samtang kita mag-ampo sa hugot nga pagtuo.

Elder David A. Bednar

“Nahibalo ba kamo kon unsay gusto nakong iampo kon ako gapuson sa akong mga igsoon? Ang akong pag-ampo maglakip og paghangyo nga dunay dautang mahitabo sa akong igsoon nga mga lalaki ug motapos uban sa mga pulong nga ‘imo ba akong luwason gikan sa mga kamot sa akong mga igsoon’ o, sa laing mga pulong, ‘Palihug luwasa ako niini nga sitwasyon karon!’ Makaikag kaayo ngari kanako nga si Nephi wala mag-ampo nga mausab ang iyang kahimtang. Hinoon, iyang giampo ang kalig-on aron mausab ang iyang kahimtang. Ug mahimo ba akong mosugyot nga siya nag-ampo niini nga paagi tungod kay siya gayud nahibalo ug nakasabut ug nakasinati sa makaabag nga gahum sa Pag-ula sa Manluluwas. …

“Mga kaigsoonan, ang implikasyon niini nga hitabo alang sa matag usa kanato klaro kaayo. Samtang ikaw ug ako makasabut ug mogamit sa makaabag nga gahum sa Pag-ula sa personal natong kinabuhi, mag-ampo kita ug magtinguha sa kalig-on sa pag-usab sa atong mga kahimtang kay sa mag-ampo nga mausab ang atong mga kahimtang. Mamahimo kita nga mga instrumento kinsa ‘molihok’ kay sa mga butang nga ‘aghaton sa pagpalihok’ (2 Nephi 2:14)” (“‘Diha sa Kusog sa Ginoo’ (Mga Pulong ni Mormon 1:14; Mosiah 9:17; Mosiah 10:10; Alma 20:4),” sa Brigham Young University 2001–2002 Speeches [2002], 124).

5. Tubaga ang usa sa mosunod nga mga pangutana diha sa imong scripture study journal:

   1. Kanus-a sa imong kinabuhi nga nakaampo ka uban sa hugot nga pagtuo ug miila sa tubag sa Ginoo sa imong pag-ampo?

   2. Sa unsang paagi makasunod ka sa ehemplo ni Nephi nga mag-ampo ug magtinguha sa kalig-on sa pag-usab sa atong mga kahimtang kay sa mag-ampo nga ang atong mga kahimtang mausab?

Human si Nephi naluwas gikan sa pagkagapos, ang iyang igsoon nga mga lalaki buot na usab moatake kaniya. Basaha ang 1 Nephi 7:19–21, ug ilha unsa ang imong nagustohan sa kinaiya ni Nephi. Paghunahuna og sitwasyon sa imong kaugalingon nga pamilya nga nagkinahanglan og pagpasaylo. Ikonsiderar ngano nga importante gayud nga ang mga miyembro sa pamilya andam mopasaylo sa usag usa.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Nephi 7 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: