1 Nephi 18–19

Pasiuna

Nagsunod sa mga direksyon sa Ginoo, nahuman ni Nephi ug sa iyang pamilya ang paghimo og barko ug giandam ang pagbiyahe paingon sa gisaad nga yuta. Atol sa ilang paglawig, kadaghanan nga naa sa barko, nga gipangulohan ni Laman ug Lemuel, misupak. Isip sangputanan, ang Liahona wala na molihok ug usa ka kusog nga unos mihulga sa kinabuhi sa tanan nga sakay sa barko. Human ang mga masupakon naghinulsol ug inubanan sa hugot nga pagtuo nga pag-ampo ni Nephi, ang Liahona misugod paglihok og balik ug ang Ginoo mipakalma sa unos ug migiya na usab sa ilang pagpanaw. Pag-abut nila sa gisaad nga yuta, si Nephi miawhag sa iyang pamilya sa paghinumdom sa Manluluwas ug pagpahisama sa mga kasulatan ngadto sa ilang kaugalingon. Samtang magtuon ka sa 1 Nephi 18–19, ipahisama ang kasinatian ni Nephi sa pag-atubang og mga pagsulay ngadto sa mga hagit sa pag-atubang sa imong kaugalingong mga pagsulay. Tinguhaa ang pagsunod sa ehemplo ni Nephi.

1 Nephi 18:1–8

Nangandam ang pamilya ni Lehi sa paglawig paingon sa gisaad nga yuta

Ngano nga importante man nga magmakugihon sa pagtrabaho ug pagpangita sa giya gikan sa Ginoo? Sa unsang paagi gipakita ni Nephi kini nga mga hiyas sa paghimo sa barko? Basaha ang 1 Nephi 18:1–8.

Sa imong scripture study journal, ilista ang tanan nga mga pulong sa 1 Nephi 18:1–8 nga naghulagway sa paningkamot nga gihimo ni Nephi ug sa iyang pamilya. Dayon ilha ang tanan nga mga pulong nga nagpakita sa unsang paagi ang Ginoo migiya ug mitabang kanila. Unsa nga relasyon ang imong makita tali sa paningkamot ni Nephi ug sa tabang nga iyang nadawat gikan sa Ginoo?

Ang kasinatian ni Nephi nagpakita kanato nga aron mapatuman unsa ang gisugo sa Ginoo, kinahanglan nga atong pangitaon ang Iyang tabang ug himoon ang kaugalingon natong paningkamot.

Paghunahuna og sitwasyon nga anaa ka karon diin nagkinahanglan ka sa tabang sa Dios. Isulat sa imong scripture study journal unsa ang imong buhaton aron pagpangita sa giya sa Ginoo ug unsa nga paningkamot ang kinahanglan nimong buhaton.

1 Nephi 18:8–25

Si Laman ug si Lemuel mipasiugda sa pagsukol diha sa barko nga nakapapugong sa paglawig paingon sa gisaad nga yuta

Kon makasinati kita og mga pagsulay o mga kalisud sa kinabuhi, sagad lang nga mahibulong kita nganong nag-atubang kita sa mao nga mga kalisud. Tingali ikaw o lain nga tawo nga imong nailhan nakapangutana og “Ngano?” atol sa kalisud nga panahon.

Si Elder L. Whitney Clayton sa Kapangulohan sa Seventy miila og tulo ka tinubdan sa mga kalisud nga atong nasinati. Samtang nagbasa ka, linyahi ang mga tinubdan nga iyang gihulagway.

“Sa kinatibuk-ang paglantaw, ang atong mga alantuson nagagikan sa tulo ka mga tinubdan. Ang ubang alantuson resulta sa natural nga mga kondisyon sa kalibutan nga atong gipuy-an. Sakit, pisikal nga kakulang ug mga unos, ug mga linog moabut matag karon ug unya nga dili nato sayop. …

“Ang ubang mga alantuson gipahamtang diri kanato tungod sa pagpabadlong sa uban. Ang pag-abuso ug pagka-adik makahimo sa atong mga panimalay sa bisan unsa gawas lamang sa usa ka langit dinhi sa yuta alang sa mga inosente nga mga sakop sa pamilya. Ang sala, sayop nga mga tradisyon, pagdaug-daog, ug krimen nagpakatap og alantuson sa mga biktima diha sa dalan sa kinabuhi. Bisan sa dili kaayo seryoso nga mga sayop sama sa paglibak ug dili pagkamabination makapahimo og tinud-anay nga pag-antus ngadto sa uban.

“Ang atong kaugalingong mga sayop ug kakulangan makaingon sa atong mga problema ug makahatag og bug-at nga mga alantuson sa atong kaugalingong mga abaga. Ang pinakalisud nga alantuson nga atong gipahamtang sa atong kaugalingon mao ang palas-anon sa sala. Nasayud kitang tanan sa pagbasol ug kasakit nga dili malikayan nga mosunod sa atong kapakyas sa pagsunod sa mga sugo” (“Nga ang Inyong mga Alantuson Mahimo nga Magaan,” Ensign o Liahona, Nob. 2009, 13).

Human si Nephi ug ang iyang pamilya milawig paingon sa gisaad nga yuta, nakasinati sila og daghan nga kalisud. Samtang magtuon ka sa 1 Nephi 18, pangitaa ang usa sa mga klase sa pag-antus nga gihisgutan ni Elder Clayton. Basaha ang 1 Nephi 18:9–11, ug ilha ang mga ehemplo sa sayop nga mga pagpili nga gihimo sa uban nga mga tawo sa barko.

Samtang dili sayop ang pagsayaw, pagpaminaw sa musika, o maglingaw, ang 1 Nephi 18:9 nagpasabut nga sila mibuhat niini nga mga butang “sa daghan nga malaw-ay.” Ang pulong nga law-ay nagpasabut nga bastos, bulgar, o walay tahud. Si Satanas mahimong mogamit sa pagsayaw, musika, o sa atong sinultian aron sa pagdaot sa atong mga kasingkasing ug mga hunahuna, aron mawala ang pakig-uban sa Espiritu Santo.

Sumala sa 1 Nephi 18:10, unsa man ang gikahadlukan ni Nephi nga mahitabo kon kadtong mga misukol dili maghinulsol? .

Unsa man ang gibuhat ni Nephi mahitungod niini? Unsaon nimo pagtubag kon ang usa ka ginikanan o lider sa Simbahan mihangyo kanimo nga ilisan ang musika nga imong gipaminaw, ang imong sinayawan, o sa paghunong og gamit og ngil-ad nga sinultian? Andam ka bang mopatalinghug ug moilis?

Basaha ang 1 Nephi 18:12–14, 17–19, ug pangita sa mga sangputanan sa ilang pagsukol. Sa unsang paagi si Nephi ug ubang sakop sa pamilya nag-antus isip sangputanan sa mga gibuhat sa uban? Tan-awa giunsa ang uban nga mga binuhatan sa masinupakon nakaapekto sa abilidad sa tibuok grupo sa pagdawat og giya gikan sa Dios.

Ang mga buhat niadtong misupak nagpakita kanato nga ang sala mosangput og pag-antus sa atong kaugalingon ug usahay ngadto usab sa uban.

Ang ubang komon nga mga tintasyon nga giatubang karon sa mga teenager naglakip sa kawalay respeto sa mga ginikanan ug mga lider, pagpanikas sa eskwelahan, panglibak, dili maayo og sininaan, dili pagsunod sa balaod sa kaputli, dili pagsunod sa Pulong sa Kaalam (tabako, alkohol, ug druga), ug pagtan-aw og pornograpiya. Pagpili og duha o sobra niana nga mga tintasyon, ug isulat sa imong scripture study journal sa unsang paagi ang matag usa makaapekto sa pamilya ug mga higala sa usa ka tawo nga magpatintal.

Ang uban sa 1 Nephi 18 nagtudlo kanato unsaon pagtubag kon moabut ang mga kalisud, bisan kon kini moabut tungod sa pagbuhat og dili maayo nga mga pagpili o pinaagi sa dili imohang kaugalingon nga sayop. Basaha ang 1 Nephi 18:15–16, 20–23, ug markahi ang mga pulong nga nagtudlo unsa ang buhaton sa maong sitwasyon.

Adunay daghang mga doktrina ug baruganan nga gitudlo niini nga mga bersikulo. Human sa matag mosunod nga mga pamahayag, isulat ang numero sa bersikulo o mga bersikulo gikan sa 1 Nephi 18:15–16, 20–23 nga paminaw nimo nagpakita og ehemplo niana nga kamatuoran:

Makahangad kita ngadto sa Dios ug magpabilin nga matinud-anon panahon sa atong mga pagsulay.
Ang pag-ampo makatabang kanato sa pagpangita og kalinaw panahon sa atong mga pagsulay.

Pagpili og usa niini nga mga bersikulo nga imong gigamit sa nag-una nga pagbansay nga makahuluganon nganha kanimo, ug ipasabut diha sa imong scripture study journal nganong ganahan ka niini. Ilakip unsa ang imong nakat-unan gikan sa bersikulo ug unsa ang natudlo niini kabahin sa pagtubag sa mga kasakit. Kon nakakita ka og ehemplo sa unsay gitudlo niini nga bersikulo sa imong kaugalingon nga kinabuhi o sa laing tawo, isulat usab kana.

Bisan sa mga kalisud nga ilang nasinati, si Nephi ug ang iyang pamilya naabut ra gayud sa gisaad nga yuta. Samtang mangita ka sa giya sa Ginoo ug makugihon nga mobuhat sa pagsunod niini, ikaw usab molampus sa pagtiwas sa panaw nga gipabuhat kanimo sa Ginoo dinhi sa kalibutan.

Si Elder L. Whitney Clayton mihatag niini nga pagpamatuod:

“Bisan unsa nga mga alantuson nga atong gisagubang sa kinabuhi agi og sangputanan sa natural nga mga kondisyon, ang pagpabadlong sa uban, o sa atong kaugalingong mga sayop ug pagkulang, kitang tanan mga anak sa usa ka mahigugmaon nga Langitnong Amahan, kinsa mipadala kanato sa yuta isip kabahin sa Iyang mahangturon nga plano alang sa atong pagtubo ug pag-uswag. Ang atong talagsaon nga indibidwal nga mga kasinatian makatabang kanato sa pagpangandam balik ngadto Kaniya. Ang kalisdanan ug mga kasakit nga atong nasinati, bisan unsa ka lisud sa pag-agwanta, sa pagsulbad, gikan sa langitnong panglantaw, ‘kini sulod lamang sa mubo nga higayon; ug unya, kon [kita] molahutay pag-ayo, ang Dios mobayaw [kanato] sa kahitas-an’ [D&P 121:7–8]. Kinahanglan nga atong buhaton ang tanan natong mahimo sa pag-lahutay sa atong mga alantuson nga ‘maayo’ kay bisan unsa kadugay sa atong ‘mubo nga higayon’ sa paglahutay kini molungtad ra. …

“… Ako nasayud nga kon kita mosunod sa mga sugo sa Dios ug sa atong mga pakigsaad, Siya mopagaan sa atong mga alantuson. Siya mopalig-on kanato. Kon kita maghinulsol, Siya mopasaylo kanato ug mopanalangin kanato uban sa kalinaw sa tanlag ug hingpit nga kalipay” (“Nga ang Inyong mga Alantuson Mahimo nga Magaan,” 13–14).

1 Nephi 19

Si Nephi mirekord sa mga pagpanagna kabahin ni Jesukristo sa pag-awhag kanato sa paghinumdom Kaniya

Pag-abut sa gisaad nga yuta, si Nephi nanagna kabahin sa pag-abut sa Manluluwas ug sa unsang paagi Siya pagadawaton sa Iyang katawhan. Basaha ang 1 Nephi 19:8–10, ug ilha ang mga pulong nga nagtudlo kabahin sa kinaiya ni Jesukristo.

Isulat sa imong scripture study journal sa unsang paagi ang imong nakat-unan sa 1 Nephi 19:8–10 nakapalambo sa imong gugma alang sa Manluluwas.

Tapusa ang karon nga leksyon pinaagi sa pagbasa sa 1 Nephi 19:18–19, 23 ug paglinya unsa ang gitinguha ni Nephi nga buhaton sa iyang katawhan ug sa tanan niadtong kinsa mobasa sa Basahon ni Mormon. Pangita og oportunidad karon sa pagpaambit sa imong pagpamatuod sa Manluluwas uban sa usa ka higala o sakop sa pamilya, o ipakigbahin ang imong pagpamatuod diha sa Simbahan. Sa pagbuhat niini, mahimo nga tabangan nimo sila sa paghinumdom ug pagtuo sa ilang Manunubos.

Isulat sa imong scripture study journal ang mga paagi diin imong masunod ang ehemplo ni Nephi sa imong kaugalingong kinabuhi.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Nephi 18–19 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: