1 Nephi 15

Pasiuna

Sa 1 Nephi 15 makita nimo ang kalainan tali sa makugihon nga paningkamot ni Nephi aron makadawat og personal nga pagpadayag ug ang kawalay pagtuo nga mga paningkamot sa iyang igsoon nga mga lalaki. Samtang magtuon ka niini nga kapitulo, pamalandungi ang paningkamot nga imong gihimo aron makadawat og mga tubag ug giya gikan sa Ginoo.

1 Nephi 15:1–11

Nagbagulbol ang igsoon nga mga lalaki ni Nephi nga dili sila makasabut sa panan-awon ni Lehi

Daghang mga kalihokan nagkinahanglan og paningkamot sa atong bahin sa dili pa kita makatagamtam sa mga sangputanan. Paghunahuna og usa ka kalihokan nga imong apilan—sama sa buluhaton sa eskwelahan, pagduyog og usa ka instrumento sa musika, o paugnat sa kusog—ug pamalandungi ang relasyon tali sa paningkamot nga imong gihatag sa kalihokan ug ang mga sangputanan nga misunod. Pangita og susama nga sundanan samtang magtuon ka sa 1 Nephi 15. Tan-awa kon sa unsang paagi nga ang paghatag og paningkamot may kalabutan sa espirituhanon nga mga kamatuoran ug pagdawat og pagpadayag gikan sa Ginoo.

Human sa makugihon nga pagpangita aron makasabut sa panan-awon ug mga pagtulun-an sa iyang amahan ug dayon pagdawat sa iyang kaugalingon nga pagpadayag, si Nephi mibalik sa tolda sa iyang amahan. Didto iyang nakita ang iyang igsoon nga mga lalaki nga naglalis. Siksika ang 1 Nephi 15:1–3, ug ilha unsa ang ilang gihisgutan.

Sa 1 Nephi 15:6–7, linyahi unsa ang hinungdan sa kagubot ug panaglalis sa mga igsoon ni Nephi. Sumala sa 1 Nephi 15:3, ngano nga lisud man alang kanila ang pagsabut sa mga pagtulun-an ni Lehi?

Basaha ang 1 Nephi 15:8, ug linyahi ang pangutana ni Nephi sa iyang igsoon nga mga lalaki. Ngano nga makatarunganon man kini nga pangutana ni Nephi human sa unsay iyang nasinati?

Linyahi ang tubag sa igsoon nga mga lalaki diha sa 1 Nephi 15:9. Ang pulong nga kay niini nga bersikulo nagpasabut og tungod kay. Sa laing mga pulong, ang igsoon nga mga lalaki ni Nephi mipasabut, “Wala kami mangutana sa Ginoo tungod kay dili Siya makigsulti kanamo.”

Hunahunaa nga aduna kay higala nga wala mangayo sa Ginoo og giya tungod kay siya wala magtuo nga Siya motubag. Tun-i ang 1 Nephi 15:11, ug pamalandungi ang tambag nga gihatag ni Nephi sa iyang igsoon nga mga lalaki kabahin sa pag-angkon og mga tubag gikan sa Ginoo. Dayon, sa imong scripture study journal, paghimo og sulat nga nag-awhag sa imong higala sa pagpangutana sa Dios pinaagi sa hugot nga pagtuo. Ipakigbahin ang tambag ni Nephi ug ang imong kaugalingon nga mga pagbati kabahin sa pag-ampo diha sa sulat.

Usa ka baruganan sa ebanghelyo nga atong makat-unan gikan sa mga lihok ni Nephi ug sa iyang igsoon nga mga lalaki mao nga kon mangutana kita sa Ginoo sa hugot nga pagtuo ug mosunod sa Iyang mga kasugoan, nan andam kita sa pagdawat og mas dako nga pagpadayag ug paggiya gikan Kaniya.

Pagpili og usa sa mga pangutana nga anaa sa ubos, ug tubaga kini diha sa imong scripture study journal:
1. Unsa ang imong isulti aron pagtabang og usa ka bag-o nga miyembro sa Simbahan nga makasabut unsa ang gikinahanglan kanato aron matudloan ug magiyahan sa Ginoo?
2. Sa unsang paagi ang imong mga paningkamot sa pagkat-on sa espirituhanon nga mga kamatuoran ug sa pagpangita sa giya sa Ginoo nakaapekto sa imong kahanas sa pagbati sa Espiritu ug pagsabut sa ebanghelyo?

Inig ka sunod adlaw, ipakigbahin ang imong tubag sa assignment nga naa sa ibabaw uban sa usa ka ginikanan, sa ubang miyembro sa pamilya, lider sa Simbahan, o magtutudlo. Sa imong pagbuhat niini, dapita ang tawo sa pagpakigbahin og mga kasinatian uban kanimo kabahin sa higayon dihang siya mihimo og paningkamot ug hugot nga pagtuo sa pagpangita sa tabang ug giya sa Langitnong Amahan.

1 Nephi 15:12–20

Si Nephi mipasabut sa pagkatibulaag ug pagkapundok sa Israel

Ang igsoon nga mga lalaki ni Nephi nalibug kabahin sa panagna ni Lehi ug sa mga pagtulun-an sa kahoy nga oliba ug sa mga Hentil (tan-awa sa 1 Nephi 15:7; tan-awa usab sa 1 Nephi 10:12–15). Mipasabut si Nephi nga ang pagkatibulaag sa natural nga mga sanga sa kahoy nga oliba nagsimbolo sa pisikal ug espiritwal nga pagkatibulaag sa balay ni Israel (mga katawhan sa pakigsaad sa Dios) tungod sa ilang kamasinupakon. Sa ilang nagkatibulaag nga kahimtang nawala kanila ang kasayuran sa ebanghelyo, ingon man usab ang ilang pagkamiyembro sa balay ni Israel. Isip kabahin sa pagkapundok sa balay ni Israel sa katapusan nga mga adlaw, ang mga katawhan sa tibuok yuta modawat sa napahiuli nga ebanghelyo ug makaamgo nga sila mga katawhan sa pakigsaad sa Ginoo (tan-awa sa 1 Nephi 15:14–15).

Basaha ang 1 Nephi 15:14, ug markahi unsa ang masabtan sa nagkatibulaag nga Israel sa katapusan nga mga adlaw.

Mitudlo si Nephi nga kadtong moapil sa Simbahan mao kadtong daw gisumbak “ngadto sa tinuod nga kahoy nga oliba” (1 Nephi 15:16). Miingon usab siya nga, sama sa nagkatibulaag nga balay ni Israel kini nga pagsumbak o pagpundok mahitabo “pinaagi sa mga Hentil” (1 Nephi 15:17). Makatabang ang pagsabut nga “sa mga kasulatan, ang mga Hentil adunay daghan nga mga kahulugan. Usahay kini nagpasabut sa mga katawhan nga dili kaliwat sa Israel, usahay sa mga katawhan nga dili kaliwat sa mga Judeo, ug usahay sa mga nasud nga walay ebanghelyo, bisan tuod og adunay dugo sa mga Israelite diha sa mga katawhan. Kining ulahi nga paggamit mao ang kasagaran nga pulong nga gigamit diha sa Basahon ni Mormon” (Giya Ngadto sa mga Kasulatan, “Hentil, Mga,” scriptures.lds.org).

Ang Ginoo mohupot sa Iyang mga saad ug mohinumdom sa Iyang mga pakigsaad uban sa Iyang mga anak. Siya nagtinguha sa tanan Niyang mga anak nga modawat sa mga panalangin sa malungtaron nga ebanghelyo (tan-awa sa 1 Nephi 15:18). Ang imong mga paningkamot sa pagpakigbahin sa ebanghelyo sa imong mga higala ug pamilya ug ang imong pasalig nga moalagad og dungganon nga misyon makatabang sa pagpatuman sa panagna ni Lehi.

1 Nephi 15:21–36

Gitubag ni Nephi ang mga pangutana sa iyang igsoon nga lalaki kabahin sa panan-awon ni Lehi gikan sa iyang kaugalingon nga kasinatian

Ang nahibilin sa 1 Nephi 15 naglakip og mga pangutana sa igsoon nga mga lalaki ni Nephi kabahin sa damgo ni Lehi. Nangutana sila, “Unsa ang gipasabut sa gunitanan nga puthaw diin nakita sa atong amahan, nga nagpaingon sa kahoy?” (1 Nephi 15:23.) Basaha ang tubag ni Nephi sa 1 Nephi 15:24–25, ug ilha ang mga panalangin nga gisaad niadtong kinsa makugihon nga mopatalinghug sa pulong sa Dios. Sa mosunod nga mga pamahayag gikan ni Presidente Ezra Taft Benson kabahin sa gahum sa pulong sa Dios, linyahi ang mga pulong nga susama sa gitudlo ni Nephi:

“Dili lamang ang pulong sa Dios modala kanato ngadto sa bunga nga madanihon labaw sa tanan, apan sa pulong sa Dios ug pinaagi niini kita makakita sa gahum sa pagbatok sa tintasyon, ang gahum sa pagpakgang sa buhat ni Satanas ug sa iyang mga sinugo.”
“Ang pulong sa Dios … adunay gahum sa pagpalig-on sa mga Santos ug pag-andam kanila sa Espiritu aron sila makabatok sa dautan, hugot nga mogunit sa maayo, ug mangita og hingpit nga kalipay niini nga kinabuhi.”
“Ang kalampusan sa pagkamatarung, ang gahum nga makalikay sa pagpangilad ug ang pagbatok sa pagtintal, ang giya sa atong inadlaw nga kinabuhi, ang pag-ayo sa kalag—kini mao lamang ang pipila sa mga saad sa Ginoo nga gihatag niadtong kinsa modawat sa Iyang pulong. … Bisan nagkugi kita pagmaayo sa uban nga mga butang, adunay mga panalangin nga makita diha lamang sa mga kasulatan, diha lamang sa pag-angkon sa pulong sa Ginoo ug hugot nga mogunit niini samtang moagi kita sa mga gabon sa kangitngit ngadto sa kahoy sa kinabuhi” (“The Power of the Word,” Ensign, Mayo 1986, 80, 82).

Mahinungdanon nga mogunit kita sa pulong sa Dios pinaagi sa pagtuon sa kasulatan, pag-ampo, ug pagpaminaw sa dinasig nga mga lider.

Sa imong scripture study journal, pagdesinyo og gamay nga poster nga nagpauswag sa pulong sa Dios. Paninguhaa ang paglakip sa mga panalangin nga gisaad ni Nephi niadtong kinsa hugot nga migunit sa pulong sa Dios. Mahimo usab ikaw nga molista sa mga tinubdan sa pagpangita sa pulong sa Dios.

Ikonsiderar ang pagsulat sa mosunod nga baruganan diha sa imong mga kasulatan duol sa 1 Nephi 15:24–25: Ang pagtuon ug pagsunod sa pulong sa Dios matag adlaw maglig-on kanato batok sa mga tintasyon ni Satanas.

Aron pagtabang sa pagpalig-on sa imong pagpamatuod niini nga baruganan, tubaga ang usa o ang duha sa mosunod nga mga pangutana diha sa imong scripture study journal:
1. Unsa nga kasinatian kabahin sa imong personal nga pagtuon ang nakatabang kanimo sa pagkahibalo nga kini nga baruganan tinuod?
2. Unsaon nimo sa pagkahibalo kon kini nga baruganan tinuod?

Sa damgo ni Lehi, kadtong hugot nga migunit sa puthaw nga gunitanan naluwas pinaagi sa gabon sa kangitngit paingon sa kahoy sa kinabuhi. Sa 1 Nephi 15:26, ang igsoon nga mga lalaki ni Nephi mihangyo kaniya sa pagpatin-aw sa kahulugan sa suba nga duol sa kahoy sa kinabuhi. Tan-awa sa 1 Nephi 15:27–29, ug ilha unsa ang simbolo sa suba.

Basaha ang 1 Nephi 15:32–36. Ngano nga ang igsoon nga mga lalaki ni Nephi nagkaproblema man niini nga mga pagtulun-an?

Tubaga ang mosunod nga mga pangutana diha sa imong scripture study journal:
1. Unsa nga bahin sa damgo ni Lehi ug sa hubad ni Nephi sa maong damgo ang nagpakita sa gugma sa Dios ug kabalaka ni Nephi alang sa iyang igsoon nga mga lalaki?
2. Sa unsang paagi nimo makita ang gugma sa Dios ug kabalaka alang kanimo diha sa 1 Nephi 15?
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Nephi 15 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: