Unit 26: Day 2
3 Nephi 18
Pasiuna
Samtang gitapos ni Jesukristo ang unang adlaw sa Iyang pangalagad sa mga Nephite, Iyang gipangalagad ang sakrament ug misugo sa katawhan sa pag-ampo kanunay ngadto sa Amahan ug sa pagpakigdait sa tanang katawhan. Ang Manluluwas misaad og daghang mga panalangin niadtong kinsa motuman niini nga mga sugo. Dayon gihatagan Niya ang Iyang napulog duha ka Nephite nga mga disipulo og mga instruksyon mahitungod sa ilang pangalagad diha sa Simbahan. Sa wala pa mokayab ngadto sa langit, gihatagan Niya sila og gahum sa paghatag og gasa sa Espiritu Santo.
3 Nephi 18:1–14
Gipangalagad ni Jesukristo ang sakrament ngadto sa mga Nephite
Basaha ang mosunod nga istorya ni Elder Gerald N. Lund, kinsa nagserbisyo isip usa sakop sa Seventy, ug hunahunaa kon unsa kaha kon ikaw mao ang tawo niini nga istorya:
“Kaniadto dihay usa ka makapaikag nga artikulo mahitungod sa pagkatkat sa bukid [nga dunay] usa ka istorya nga naghatag og talagsaong tubag sa pangutana, ‘Unsaon nato isip dili mapuslanon nga mga sulugoon nga makabayad ni Kristo sa unsay Iyang nahimo alang kanato?’
“Ang artikulo mahitungod sa usa ka tawo nga ginganlan og Czenkusch kinsa nagdumala og climbing school. … Si Czenkusch naghulagway sa nag-interbyu niya sa belay system sa pagkatkat og bukid. Mao kini ang sistema diin ang mga tigkatkat manalipod sa ilang kaugalingon gikan sa pagkatagak. Usa ka tigkatkat anaa sa luwas nga posisyon ug mosiguro sa pisi alang sa ubang tigkatkat, sa kasagaran libut sa iyang kaugalingong lawas. ‘Anaa ka sa belay,’ nagpasabut nga, ‘Nagbantay ko nimo. Kon dunay mahitabo, mapugngan ko ikaw sa pagkahulog.’ Usa kini ka importante nga bahin sa pagkatkat sa bukid. Karon timan-i unsay misunod sa artikulo: ‘Ang belaying nakapakita ni Czenkusch sa iyang labing maayo ug labing dili maayo sa pagkatkat. Si Czenkusch sa makausa nahulog gikan sa taas nga pangpang, nakalangkat sa tulo ka mekanikal nga mga suporta ug mitangtang sa iyang pisi gikan sa nahimutangan niini. Nahunong siya, nga nagtuwad, 10 ka pye (3 ka metros) gikan sa yuta sa dihang ang pisi nga gihigot kaniya nakasanta sa pagkatagak ginamit ang kusog sa iyang mga kamot. “Giluwas ni Don ang akong kinabuhi,” miingon si Czenkusch. “Unsay imong reaksyon sa tawo nga sama niana? Hatagan siya og ginamit nga pisi sa pagkatkat alang sa regalo sa Pasko? Dili, hinumduman nimo siya. Kanunay nimo siyang hinumduman”’ [Eric G. Anderson, “The Vertical Wilderness,” Private Practice, Nob. 1979, 21; emphasis gidugang]” (“The Grace and Mercy of Jesus Christ,” sa Jesus Christ: Son of God, Savior, ed. Paul H. Peterson, Gary L. Hatch, ug Laura D. Card [2002], 48).
Basaha ang 3 Nephi 18:1–11, ug pangitaa unsay gisugo ni Jesukristo sa mga Nephite sa paghinumdom Kaniya. Mahimo nimong markahan ang mga pulong nga handumanan ug mahinumdom diha sa bersikulo 7 ug 11. Ngano sa imong hunahuna nga importante nga kanunay mahinumdom sa maulaong sakripisyo sa Manluluwas alang nimo? Sa unsa nga paagi ka molihok nga lahi kon mahinumdom sa Manluluwas?
Ang sugo sa Manluluwas sa paghinumdom sa Iyang lawas ug dugo makahuluganon kaayo sa katawhan tungod kay bag-o lang nilang nahikap ang mga samad sa Iyang lawas dili pa lang gayud dugay. Bisan og wala nimo makita ang mga samad sa lawas sa Manluluwas, sama sa katawhan sa Basahon ni Mormon, mahinumduman nimo ang Iyang maulaong sakripisyo sa imong pag-ambit sa sakrament.
-
Sa imong scripture study journal, tubaga ang mosunod nga pangutana: Sa unsang paagi nga ang paghinumdom sa sakripisyo sa Manluluwas panahon sa sakrament nakatabang nimo nga mobati og pasalamat alang Kaniya?
Ang mga pulong ni Jesukristo nga narekord sa 3 Nephi 18:7–11 nagtudlo sa mosunod nga mga baruganan: Sa atong pag-ambit sa sakrament, nagsaksi kita sa Amahan nga kita andam sa pagbuhat sa tanan nga Iyang gisugo. Sa atong pag-ambit sa sakrament, nagsaksi kita sa Amahan nga hinumduman nato kanunay ni Jesukristo. Ribyuha ang 3 Nephi 18:7–11, ug markahi ang mga pulong nga nagtudlo niini nga mga baruganan. Samtang basahon nimo ang bersikulo 11, hunahunaa unsay imong bation kon ang Manluluwas misulti niadto nga mga pulong nganha kanimo.
-
-
Unsa ang pipila ka mga aspeto sa kinabuhi sa Manluluwas nga tingali imong mahinumduman panahon sa ordinansa sa sakrament?
-
Unsay imong mahimo sa paghinumdom kanunay sa Manluluwas panahon sa semana?
-
Kon ikaw sinsero nga maningkamot sa paghinumdom sa Manluluwas panahon sa sakrament, sa unsa kaha nga paagi nga makaapekto kini nimo panahon sa mosunod nga semana?
-
Hibaloi ang laing baruganan nga gitudlo sa 3 Nephi 18:7, 11 pinaagi sa pagkompleto sa mosunod nga pamahayag uban sa mga pulong nga nagpasabut unsa ang gisaad sa Manluluwas niadtong kinsa moambit sa sakrament ug mahinumdom Kaniya. Sa atong pag-ambit sa sakrament ug kanunay nga mahinumdom sa Manluluwas, kita .
-
-
3 Nephi 18:15–25
Gitudloan ni Jesus ang mga Nephite sa pag-ampo kanunay ngadto sa Amahan ug sa pagpundok kanunay
Human gipangalagad ni Jesukristo ang sakrament ngadto sa mga Nephite, gitudloan Niya sila sa importante nga mga baruganan mahitungod sa pag-ampo. Usa sa mga baruganan nga Iyang gitudlo mao nga: Kon kita magmabinantayon ug mag-ampo kanunay ngadto sa Amahan, mabuntog nato ang tintasyon ni Satanas. Kon kita mabinantayon, espirituhanon kita nga alerto, vigilante, o nagbantay.
Basaha ang 3 Nephi 18:15–21, ug markahi ang mga pulong nga nagtudlo sa baruganan nga gipakita sa ibabaw. Ngano sa imong hunahuna nga ang pagbantay ug pag-ampo importante sa pagbatok sa tintasyon?
Timan-i nga ang 3 Nephi 18:15, 20–21 usa ka pakisayran sa scripture mastery. Ikonsiderar ang pagmarka niini nga mga bersikulo diha sa imong mga kasulatan.
-
-
Sa unsang paagi nga ang pag-ampo nakatabang nimo sa pagbatok sa mga tintasyon ni Satanas?
-
Unsay imong mahimo sa pagpalambo sa imong personal nga mga pag-ampo?
-
Unsa nga mga panalangin ang imong nasinati tungod sa pag-ampo uban sa imong pamilya? (tan-awa sa 3 Nephi 18:21).
-
Unsay imong mahimo sa pagtabang sa imong pamilya nga dunay makanunayon ug makahuluganong pag-ampo sa pamilya?
-
Sa atong pag-ampo ngadto sa Langitnong Amahan ug magpaduol ngadto sa atong Manluluwas, nga si Jesukristo, sa kasagaran gusto kitang motabang usab sa uban nga magpaduol ngadto Kaniya. Paghunahuna og usa ka tawo nga gusto nimong tabangan aron mas mahiduol sa Manluluwas. Basaha ang 3 Nephi 18:22–24, ug pangitaa ang mosunod nga baruganan diha sa mga bersikulo: Sa atong pagpangalagad sa uban, makatabang kita nila nga moduol ngadto ni Kristo.
Sumala sa narekord sa 3 Nephi 18:24, ang Manluluwas mitudlo nga ang matag usa nato kinahanglan nga mopakita sa atong kahayag aron kini moiwag sa kalibutan. Miingon usab Siya nga Siya mao ang kahayag nga atong ipakita. Si Elder Robert D. Hales sa Korum sa Napulog Duha ka mga Apostoles mitudlo nga atong ipakita ang kahayag sa Manluluwas pinaagi sa pagtuman sa Iyang mga sugo ug pagsunod sa Iyang ehemplo:
“Kinahanglang mahisama kita sa Manluluwas sama sa Iyang gipahimangno nato nga ‘Dali, sunod kanako.’ Dili ba makapahimuot kini kang Jesus kon ang atong kahayag atong pahayagon pag-ayo aron kadtong kinsa mosunod kanato mosunod sa Manluluwas? Adunay nagpangita sa kahayag [kinsa] malipay nga magpabunyag paingon sa higpit ug pig-ot nga dalan nga padulong ngadto sa kinabuhing dayon (tan-awa sa 2 Nephi 31). Kamo ba kana nga kahayag nga mogiya nila ngadto sa luwas nga dapit? …
“Mihunong ba kamo sa paghunahuna nga tingali kamo mao ang kahayag nga gipadala sa Langitnong Amahan sa paggiya sa laing tawo nga luwas nga makapauli o mahimong suga sa pagpakita sa agianan balik ngadto sa higpit ug pig-ot nga dalan nga padulong ngadto sa kinabuhing dayon? Ang inyong kahayag mao ang suga ug kinahanglang dili mohunong sa pagsiga o makapahisalaag niadtong nangita sa agianan pauli. …
“… Si Jesukristo mao ang kahayag nga gihatag kanato aron nga kita makasunod ug makahibalo asa paingon. [Ako nag-ampo] nga ang matag usa nato mopili sa sakto [aron nga kita maka] bayaw ug makalig-on niadtong anaa sa atong palibut” (“That Ye May Be Children of Light” [Church Educational System nga fireside alang sa mga young adult, Nob. 3, 1996], 6–7).
Ang pag-ampo alang sa uban, pagdapit nila sa pagtambong sa mga miting sa Simbahan, ug pagpakita og Kristohanong ehemplo mao ang mga paagi nga kita makapangalagad sa uban. Pamalandong kon unsay imong gibati sa dihang misunod ka sa ehemplo ni Jesukristo ug mitabang og usa ka tawo nga mahiduol ngadto sa Manluluwas. Unsay imong buhaton karon o niining semanaha aron imong mapakita ang imong kahayag aron nga kadtong kinsa mosunod kanimo mosunod usab sa Manluluwas?
3 Nephi 18:26–39
Ang Manluluwas nagtudlo sa Iyang mga disipulo sa pagpakigdait sa tanang katawhan
Human pasiugdahi sa Manluluwas ang sakrament ug mitudlo sa mga Nephite mahitungod sa pag-ampo, miatubang Siya sa napulog duha ka mga disipulo nga Iyang gipili ug mitudlo nila unsaon sa paggiya ug pagdumala ang mga kalihokan sa Simbahan (tan-awa sa 3 Nephi 18:26–39). Timan-i sa 3 Nephi 18:26 nga ang Manluluwas mihunong sa pagpakigsulti ngadto sa pundok sa katawhan ug miatubang sa mga lider “kinsa siya mipili.” Ang iyang mensahe sa mga bersikulo 28–29 gihatag ngadto sa mga priesthood lider isip pasidaan batok sa pagtugot niadtong dili takus nga moambit sa sakrament.
Ang mga miyembro sa Simbahan kinahanglang motutok sa ilang kaugalingong katakus sa pag-ambit sa sakrament ug ihatag ang responsibilidad sa pagtino sa katakus sa uban sa pag-ambit sa sakrament ngadto sa gitawag sa Ginoo sa paghimo sa mga paghukom, sama sa bishop o stake president. Basaha ang 3 Nephi 18:32, nga mangita kon giunsa sa pagtudlo sa Manluluwas ang mga disipulo sa pag-atiman niadtong nahisalaag gikan sa pagtuo. Paghunahuna unsaon nimo nga “magpadayon sa pag-alagad” sa usa ka higala, sakop sa pamilya, o sa usa ka tawo sa imong ward o branch nga nahisalaag gikan sa pagtuo.
Scripture Mastery—3 Nephi 18:15, 20–21
Ikonsiderar ang paggahin og pipila ka minuto sa pagsag-ulo sa 3 Nephi 18:15, 20–21. Isulat ang tulo ka bersikulo sa piraso sa papel, ug dayon praktisa ang pagsulti niini. Human makabasa niini sa pipila ka higayon, sugdi ang pagpapas sa lain-laing bahin sa mga bersikulo samtang nagpadayon ka sa pagsulti sa mga bersikulo. Mahimo nimong balikon kini nga proseso hangtud ang tanang mga pulong napapas na.
Samtang ikaw nagsag-ulo niini nga mga bersikulo, hunahunaa unsa ang gitudlo sa Manluluwas. Sumala sa narekord sa 3 Nephi 18:15, gitudloan ni Jesukristo ang mga Nephite unsaon sa pagbatok sa mga tintasyon sa yawa. Timan-i ang gahum nga moabut tungod sa pag-ampo. Pinaagi sa pag-ampo mahatagan kita og kalig-on sa pagpakigbatok sa tintasyon.
Sumala sa narekord sa 3 Nephi 18:20–21, nagtudlo si Jesukristo nga kon kita mag-ampo pinaagi sa pagtuo, ang Amahan motubag kanunay sa atong mga pag-ampo, apan motubag Siya sumala sa Iyang plano alang sa Iyang mga anak ug unsay Iyang nahibaloan nga matarung alang kanato. Kusga pagsulti pag-usab ang bersikulo 20: “Ug bisan unsa nga kamo mangayo sa Amahan diha sa akong ngalan, nga matarung, magtuo nga kamo makadawat, tan-awa kini ihatag nganha kaninyo.” Unsa sa imong pagtuo ang gipasabut sa pulong “nga matarung” niini nga tudling? (Mahimo kang mo-refer sa Santiago 4:3.)
Si Presidente Gordon B. Hinckley mipakigbahin niini nga pagpamatuod: “Ang Dios, ang atong Mahangturong Amahan buhi. Siya ang Tiglalang ug Magmamando sa universe ug Siya ang atong Amahan. Siya ang Labawng Makagagahum ug labaw sa tanan. Maabut Siya pinaagi sa pag-ampo. … Maminaw ba Siya sa pag-ampo sa usa ka bata? Siyempre maminaw Siya. Motubag ba Siya niini? Siyempre motubag Siya. Dili kanunay sumala sa atong gusto, apan Siya motubag. Siya maminaw ug motubag” (Teachings of Gordon B. Hinckley [1997], 468).
Elder Dallin H. Oaks sa Korum sa Napulog Duha ka mga Apostoles mitudlo: “[Sa 3 Nephi 18:20] ang Manluluwas nagpahinumdom kanato nga ang hugot nga pagtuo, bisan unsa kalig-on niini, dili makahimo og resulta nga supak ngadto sa kabubut-on kaniya nga maoy nanag-iya niini nga gahum. Ang pagpakita og hugot nga pagtuo diha ni Ginoong Jesukristo kanunay nga nag-agad sa lagda sa langit, sa kaayo ug kabubut-on ug kaalam ug tayming sa Ginoo. Mao nga dili kita makaangkon og tinuod nga hugot nga pagtuo sa Ginoo nga dili usab hingpit nga mosalig sa kabubut-on sa Ginoo ug sa tayming sa Ginoo” (“Faith in the Lord Jesus Christ,” Ensign, Mayo 1994, 100).
-
Akong natun-an ang 3 Nephi 18 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: