Mosiah 27

Pasiuna

Ang Mosiah 27 nagsaysay sa pagkakabig ni Alma (ang anak nga lalaki ni Alma) ug ang anak nga mga lalaki ni Haring Mosiah. Nagsaysay kini sa ilang masupilong mga pagsulay sa pagdaot sa Simbahan sa Dios, sa pagbisita sa usa ka anghel, sa milagrusong kausaban ni Alma, ug sa mga paningkamot niining batan-ong mga lalaki sa pag-ayo sa kadaot nga ilang nabuhat. Ang saysay sa pagkakabig ni Alma naghatag og gibug-aton sa panginahanglan sa tanang tawo nga matawo pag-usab ug magpuyo diha sa pagkamatarung. Kini nga kapitulo nagpakita usab sa mga panalangin sa pag-ampo alang niadtong mipili sa dili pagsunod sa ebanghelyo ni Jesukristo.

Mosiah 27:1–23

Usa ka anghel nanawagan ni Alma nga Batan-on ug sa anak nga mga lalaki ni Mosiah sa paghinulsol

Hunahunaa kadtong imong mga kaila nga walay mga pagpamatuod sa ebanghelyo o mibiya sa Simbahan. Unsay imong buhaton kon ang usa kanila mobalibad sa tanan nimong mga paningkamot sa pagtabang kaniya? Pangita og mga panabut niini nga pangutana samtang magtuon ka karon.

Basaha ang Mosiah 27:8–10, ug hibaloi kon sa unsang paagi kini nga mga bersikulo naghulagway ni Alma ug sa mga anak nga lalaki ni Mosiah. Unsay gipaningkamutang buhaton ni Alma ug sa mga anak nga lalaki ni Mosiah ngadto sa Simbahan ug sa mga miyembro niini?

Unsa nga bahin sa paghulagway kang Alma ug sa mga anak nga lalaki ni Mosiah ang labing nakapainteres kanimo? Ngano?

Usahay, matintal kita sa pagtuo nga ang piho nga mga tawo dili na gayud mausab ug moduol sa Ginoo. Hunahunaa kini nga kinaiya samtang magpadayon ka sa imong pagtuon sa Mosiah 27.

Basaha ang Mosiah 27:11–14, ug linyahi kon nganong ang anghel mipakita ni Alma ug sa mga anak nga lalaki ni Mosiah.

Ang Mosiah 27:14 nagtudlo niini nga baruganan: Ang Ginoo motubag sa atong matinud-anong mga pag-ampo alang sa uban. Mahimo nimong isulat kini nga baruganan diha sa imong mga kasulatan tupad sa Mosiah 27:14. Dili tanan nga kinahanglang maghinulsol ug dili tanan nga atong giampo makadawat og pagbisita sa usa ka anghel. Ang Ginoo motubag sa atong matinud-anong mga pag-ampo alang sa uban sumala sa Iyang kaugalingong kaalam.

Sa imong scripture study journal, tubaga ang usa o duha sa mosunod nga mga pangutana:
1. Kanus-a ka mibati nga ang imong mga pag-ampo nakahimo og kalainan sa kinabuhi sa uban?
2. Sa unsang paagi ang pagtuo nga ang Ginoo motubag sa atong matinud-anong mga pag-ampo alang sa uban makaapekto sa paagi sa imong pag-ampo?

Pamalandungi kon unsaon nimo sa paggamit sa istorya ni Alma ug sa anak nga mga lalaki ni Mosiah diha sa imong kinabuhi. Makapadayon ka sa pag-ampo alang niadtong imong mga kaila ug mga gihigugma kinsa mipili sa paglihok nga sukwahi sa mga pagtulun-an sa Ginoo. Makahinumdom ka nga ang Ginoo nakadungog sa imong mga pag-ampo ug motubag sumala sa Iyang kaugalingong paagi ug panahon ug bisan pa niini nagtugot sa matag tawo sa iyang kabubut-on. Usab, hunahunaa og maayo ang mosunod nga mga pangutana: Kinsa kaha ang nag-ampo alang sa imong kaayohan? Sa unsang paagi kaha nga gusto sa Ginoo nga mausab ka? Unsa ang kinahanglan nimong buhaton aron mahitabo kana nga kausaban?

Basaha ang sumpay sa mga pulong sa anghel ngadto kang Alma, sumala sa narekord diha sa Mosiah 27:15–16. Hinumdumi nga ang anghel namulong “uban sa usa ka tingog sa dugdog, diin nakahimo sa yuta sa pag-uyog” (Mosiah 27: 11). Hunahunaa kon sa unsang paagi kini nga kasinatian makaapekto kanimo kon kauban ka ni Alma ug sa mga anak nga lalaki ni Mosiah.

Unsaon nimo pag-summarize sa mensahe sa anghel?

Human sa mensahe sa anghel, si Alma dili makasulti. Nawad-an siya sa kusog, ug siya “gidala nga walay umoy” (Mosiah 27:19) ngadto sa iyang amahan. Sa pagkadungog sa amahan ni Alma sa nahitabo, siya “nalipay, kay siya nasayud nga kini mao ang gahum sa Dios” (Mosiah 27:20). Iyang gipapundok ang katawhan “nga sila unta makasaksi unsa ang nahimo sa Ginoo alang sa iyang anak nga lalaki” (Mosiah 27:21). Ang amahan ni Alma mihangyo sa mga pari nga magpuasa ug mag-ampo aron ang iyang anak makadawat sa iyang kusog ug abilidad sa pagpamulong (tan-awa sa Mosiah 27:22). Ang Ginoo mitubag sa ilang mga pag-ampo.

Mosiah 27:24–31

Si Alma nga Batan-on ug ang mga anak nga lalaki ni Mosiah naghinulsol ug natawo pag-usab

Basaha ang Mosiah 27:23–24, 28–30 sa pagdiskubre kon sa unsang paagi si Alma nga Batan-on nausab isip resulta sa iyang kasinatian uban sa anghel. Sa mosunod nga tsart, pagsulat og mga pulong gikan niini nga mga bersikulo nga naghulagway sa espirituhanong kahimtang ni Alma sa wala pa ug sa pagkahuman na sa iyang kausaban sa kasingkasing.

Sa wala pa	Pagkahuman

Sa imong scripture study journal, pagsulat og usa ka hugpong sa mga pulong nga imong gisulat diha sa Pagkahuman nga kolum nga imong gilauman nga maghulagway kanimo sa tibuok nimong kinabuhi. Ipasabut kon ngano.

Ribyuha ang Mosiah 27:24, 28, ug markahi kon unsay gibuhat ni Alma ug unsay gibuhat sa Ginoo nga miresulta sa kausaban sa kasingkasing ni Alma.

Sa imong scripture study journal, isulat kon nganong importante nga masabtan unsay angay natong buhaton samtang nagtinguha kita sa pag-usab sa atong kinabuhi ug usab kon unsa ang buhaton sa Ginoo alang kanato.
Tubaga ang usa o duha sa mosunod nga mga pangutana diha sa imong scripture study journal:
1. Sa unsang paagi ang Mosiah 27 makatabang sa mga tawo nga nawad-an sa kadasig ug naghunahuna nga dili sila makahinulsol ug makaduol sa Ginoo?
2. Sa unsang paagi ang Mosiah 27 makatabang sa mga tawo nga nagtuo nga ang usa ka tawo dili gayud maghinulsol ug moduol sa Ginoo?

Basaha ang Mosiah 27:25–26, ug ilha kon kinsa ang kinahanglang mausab pinaagi sa Pag-ula—o sa laing pagkasulti, kinahanglan nga matawo sa Dios.

Kini nga mga bersikulo nagtudlo sa baruganan: Ang matag usa kanato kinahanglan gayud nga matawo pag-usab pinaagi sa Pag-ula ni Jesukristo. Ang matawo sa Dios nagpasabut nga ang Espiritu sa Ginoo nakahimo og usa ka dako nga kausaban diha sa kasingkasing sa usa ka tawo nga sa ingon siya wala nay tinguha sa pagbuhat og dautan, apan hinoon nagtinguha sa pagpangita sa mga butang sa Dios (tan-awa sa Mosiah 5:2). Si Alma ug ang mga anak nga lalaki ni Mosiah nakasinati og dakong kausaban sa kasingkasing nga diha-diha dayon, apan kadaghanan kanato mausab pinaagi sa Pag-ula nga mas anam-anam. Ang pagpakatawo diha sa Dios usa ka proseso kay sa usa ka panghitabo.

Tubaga ang mosunod nga mga pangutana diha sa imong scripture study journal:
1. Sa unsang paagi nausab ka pinaagi sa Pag-ula samtang naghinulsol ka ug naningkamot kada adlaw sa pagsunod sa Manluluwas?
2. Unsa ang usa ka butang nga imong mabuhat aron mas maayong makaduol sa Ginoo ug matugotan ang Pag-ula nga makahimo og kalainan sa imong kinabuhi?

Mosiah 27:32–37

Si Alma nga Batan-on ug ang mga anak nga lalaki ni Mosiah mibiyahe sa tibuok yuta, mikumpisal sa ilang mga sala ug naglig-on sa Simbahan

Ang sunod nga mga bersikulo nga imong tun-an diha sa Mosiah 27 naghulagway sa baruganan: Aron tinud-anay nga maghinulsol, ang tawo kinahanglan nga mobuhat gayud sa tanan nga posibleng mabuhat sa pag-ayo sa kadaut nga iyang nahimo. Ang pag-uli [restitution] nagpasabut sa pagbuhat sa unsay atong mahimo aron makorihian ang mga epekto sa atong ngil-ad nga mga pagpili ug mahibalik ang unsay nadaot tungod sa atong mga binuhatan. Sama pananglit, kon ang usa ka tawo nangawat og usa ka butang gikan sa usa ka silingan, ang pag-uli naglakip sa pagbalik sa gikawat nga butang. Basaha ang Mosiah 27:32–37, ug hibaloi kon unsay gibuhat ni Alma ug sa anak nga mga lalaki ni Mosiah aron sa pagpahigayon og pag-uli [restitution] alang sa ilang mga sala.

Isulat kon sa unsang paagi ang usa ka tawo makapahigayon og pag-uli alang sa mosunod nga mga sala:

Namakak ngadto sa usa ka ginikanan:
Nanglibak mahitungod sa laing tawo:
Nanikas sa usa ka assignment sa eskwelahan:

Samtang maghunahuna ka kon sa unsang paagi mahimo kang mausab pinaagi sa Pag-ula, hunahunaa kon unsaon nimo sa paghinulsol ug pagpahigayon og pag-uli alang sa imong mga sala.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Mosiah 27 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: