1 Nephi 8

Pasiuna

Sa 1 Nephi 8 atong mabasa ang kabahin sa panan-awon ni Lehi sa kahoy sa kinabuhi. Iyang gibati ang hilabihan nga kalipay samtang mikaon siya sa bunga sa kahoy, nga nagsimbolo sa mga panalangin sa Pag-ula. Dayon nakakita siya og lain-laing mga grupo sa katawhan nga nagkalahi ang pagtan-aw sa kahoy ug sa bunga niini. Aron sa pagtabang kanimo sa pag-andam niini nga leksyon, mahimo kang mokanta o mobasa sa mga pulong sa “The Iron Rod” (Hymns, nu. 274). Samtang magtuon ka niini nga kapitulo, pamalandungi sa unsang paagi ang Pag-ula nakahatag kanimo og dakong kalipay ug kon unsay imong buhaton karon ug sa umaabut aron makadawat sa tanang mga panalangin niini. Pamalandungi kon unsa nga mga babag ang kinahanglan nimong buntugon aron maangkon kini nga mga panalangin.

1 Nephi 8:1–18

Si Lehi mikaon sa bunga sa kahoy sa kinabuhi ug midapit sa iyang pamilya sa pagbuhat sa ingon

Paghunahuna og panahon sa imong kinabuhi sa dihang imong gibati sa personal nga paagi ang gugma sa Ginoo alang kanimo. Ikonsiderar sa unsang paagi ang mga pagpili nga imong gihimo nakaapekto sa imong kasuod sa Ginoo ug sa imong abilidad sa pagbati sa Iyang gugma. Samtang magtuon ka sa 1 Nephi 8, pangitaa unsa ang gitudlo niini nga imong buhaton ug unsa ang imong kinahanglan nga likayan aron maduol sa Ginoo ug mobati sa Iyang gugma nga mas gamhanan sa imong kinabuhi.

Basaha ang 1 Nephi 8:2, ug ilha unsa ang nasinati ni Lehi samtang didto sa kamingawan. Basaha ang 1 Nephi 8:5–12, mangita kon unsa ang maora og sentro nga hulagway o kinataliwad-an nga punto sa damgo ni Lehi.

Human nailhan ang sentro nga hulagway, ilista ang ubang mga pulong nga gigamit ni Lehi sa paghulagway sa bunga nga naa sa 1 Nephi 8:10–11.

Ang Ginoo kasagaran mogamit og mga butang nga pamilyar nato isip simbolo aron pagtabang kanato nga makasabut sa mga kamatuoran nga mahangturon. Aron pagtabang a kahoy ug bunga sa damgo ni Lehi, basaha ang mosunod nga pamahayag gikan ni Elder Neal A. Maxwell sa Korum sa Napulog Duha ka mga Apostoles: “Ang kahoy sa kinabuhi … mao ang gugma sa Dios (tan-awa sa 1 Ne. 11:25). Ang gugma sa Dios alang sa Iyang mga anak gipasabut og maayo sa Iyang gasa ni Jesus isip atong Manunubos: ‘Kay gihigugma gayud sa Dios ang kalibutan nga tungod niana gihatag niya ang iyang bugtong Anak’ (Juan 3:16). Ang pag-ambit sa gugma sa Dios mao ang pag-ambit sa Pag-ula ni Jesus ug ang pagpalingkawas [kagawasan gikan sa pagpugong o sa sala] ug ang kalipay nga gihatag niini” (Lessons from Laman ang Lemuel,” Ensign, Nob. 1999, 8).

Aron pagtabang kanimo sa pag-ila og baruganan sa ebanghelyo nga gihulagway diha sa 1 Nephi 8:10–12, linyahi sa imong mga kasulatan unsa ang gibuhat ni Lehi sa bunga diha sa 1 Nephi 8:11, ug linyahi ang mga resulta diha sa 1 Nephi 8:12. Paghunahuna og mga paagi nga ikaw “makakaon” sa Pag-ula sama ni Lehi “mikaon” sa bunga.

Ang kasinatian ni Lehi nagpakita nga ang pagduol ngadto ni Jesukristo ug pag-ambit sa Iyang Pag-ula maghatag og kalipay.

Tubaga ang mosunod nga mga pangutana sa imong scripture study journal: Kanus-a ang Pag-ula sa Manluluwas nakahatag og kalipay sa imong kinabuhi?

Pamalandung ngano nga kita, sama ni Lehi, kinahanglang magtinguha nga ang atong pamilya ug mga higala mosinati sa mga panalangin sa Pag-ula human nga kini atong masinati. Basaha ang 1 Nephi 8:3–4, 13–18, ug pangitaa kon sa unsang paagi ang mga miyembro sa pamilya ni Lehi mitubag sa pagdapit ni Lehi sa pagkaon sa bunga sa kahoy sa kinabuhi.

Dili kita makahukom kon ang uban mopili sa pag-ambit sa gugma sa Dios. Bisan pa man, sama ni Lehi, makadapit kita ug makaawhag kanila. Ikonsiderar sa unsang paagi ikaw makadapit ug makaawhag og usa ka tawo nga imong nailhan sa pagduol kang Kristo ug modawat sa mga panalangin sa Iyang Pag-ula.

1 Nephi 8:19–35

Si Lehi nakakita sa kalampusan ug kapakyasan sa uban samtang sila miduol sa kahoy sa kinabuhi ug mokaon sa bunga

Dayon diha sa 1 Nephi imong mabasa kon sa unsang paagi si Nephi gipakitaan usab sa panan-awon sa kahoy sa kinabuhi. Iyang girekord unsa ang nagkalain-laing mga simbolo ug mga dagway sa panan-awon ang gipasabut. Gamita ang mosunod nga tsart aron sa pag-ila sa mga simbolo ug sa ilang mga interpretasyon. Siksika ang imong mga kasulatan aron pagkompleto sa mosunod nga pagbansay. Nakatuon ka na ug nakakat-on sa interpretasyon sa unang duha ka mga simbolo.

Simbolo gikan sa Damgo ni Lehi	Ang Interpretasyon sa Simbolo nga Gihatag ni Nephi
Ang kahoy (tan-awa sa 1 Nephi 8:10; gitawag kini ang kahoy sa kinabuhi sa 1 Nephi 15:22)	Ang gugma sa Dios (tan-awa sa 1 Nephi 11:25)
Ang bunga sa kahoy (tan-awa sa 1 Nephi 8:10–12)	Ang labing mahinungdanon sa tanan nga mga gasa sa Dios—ang mga panalangin sa Pag-ula ni Jesukristo (tan-awa sa 1 Nephi 15:36)
Ang suba nga may (hugaw) nga tubig (tan-awa sa 1 Nephi 8:13)	(tan-awa sa 1 Nephi 12:16; 15:27)
Ang gunitanan nga puthaw (tan-awa sa 1 Nephi 8:19)	(tan-awa sa 1 Nephi 11:25; 15:23–24)
Ang gabon sa kangitngit (tan-awa sa 1 Nephi 8:23)	(tan-awa sa 1 Nephi 12:17)
Ang usa ka dako ug lapad nga gambalay (tan-awa sa 1 Nephi 8:26)	(tan-awa sa 1 Nephi 11:36; 12:18)

Makatabang nga markahan ang imong mga kasulatan pinaagi sa pagsulat sa interpretasyon sa matag simbolo (ang mga tubag sa ikaduhang kolum sa tsart sa ibabaw) sunod sa bersikulo o mga bersikulo sa unang kolum sa tsart).

Sa imong pagbasa sa mosunod nga kinutlo gikan ni Presidente Boyd K. Packer sa Korum sa Napulog Duha ka mga Apostoles, linyahi unsa ang iyang gisulti bahin kon nganong importante para nato ang pagtuon sa damgo ni Lehi:

“Kamo mahimong magtuo nga ang damgo o panan-awon ni Lehi walay talagsaon nga kahulugan alang kanimo, apan kini aduna. Kamo anaa dinhi; kitang tanan anaa dinhi. …

“Ang damgo ni Lehi o panan-awon sa gunitanan nga puthaw aduna sa tanan nga gikinahanglan sa usa ka Ulahing mga Adlaw nga Santos aron sa pagsabut sa pagsulay sa kinabuhi” (“Pagpangita sa Atong Kaugalingon sa Damgo ni Lehi,” Ensign, Ago. 2010, 22).

Samtang magtuon ka sa nahibilin sa 1 Nephi 8, ikonsiderar kon sa unsang paagi ang imong nakat-unan nakatabang kanimo sa “pagsabut sa pagsulay sa kinabuhi.” Basaha ang 1 Nephi 8:21–33 mangita kon sa unsang paagi ang suba, ang gabon sa kangitngit, ug ang dako ug lapad nga gambalay nakapugong sa katawhan sa damgo ni Lehi sa pagkaon o pagkalipay sa bunga sa kahoy sa kinabuhi. Mahimo nimong ikonsiderar ang pagmarka sa imong mga kasulatan sa mahinungdanong mga pulong nga nag-refer niining mga babag ug ang epekto nga anaa niini sa katawhan.

Unsa kaha kadtong mga babag nga nakita ni Lehi sa atong mga kinabuhi karon? Linyahi bisan asa niining mosunod nga mga babag ang nakita nimong makapugong sa usa ka tawo sa pagduol sa Manluluwas ug mobati og kalipay: pornograpiya, pagpangita sa pag-uyon o pagdayeg sa uban, pagkaadik, pagkahakog, pagkadawo, pagkamasinahon sa uban, pagkapakyas sa pag-ampo ug pagtuon sa mga kasulatan, nanubrang paggamit sa makalingaw nga electronic, nanubrang pag-apil-apil sa bisan unsang kalihokan o sport, pagkabakakon, ug pagsunod sa unsay gibuhat sa tanan. Paghunahuna og ubang moderno nga mga ehemplo niining mga babag.

Ang mosunod nga baruganan sa ebanghelyo usa ka paagi sa pag-summarize unsay imong makat-unan gikan sa pagtuon sa mga babag sa 1 Nephi 8:21–33: Garbo, pagkakalibutanon, ug pag-uyon sa mga tintasyon makapugong kanimo sa mga panalangin sa Pag-ula.

Sa imong scripture study journal, isulat ang summary ug ang imong mga pagbati kabahin sa kamatuoran niini ug mga paagi nga magamit sa imong kinabuhi.

Pamalandungi sa unsang paagi ang mga hugaw sa kalibutan, mga tintasyon ni Satanas, ug ang garbo sa kalibutan makapugong o makahinay sa imong espiritwal nga paglambo.

Siksika ang 1 Nephi 8:21–33 og usab. Karong higayona pangitaa ang mga tubag sa mosunod nga mga pangutana:

Sa unsang paagi ang gunitanan nga puthaw (ang pulong sa Dios—nga naglakip sa mga kasulatan, ang dinasig nga mga pulong sa mga propeta ug ubang mga lider sa Simbahan, ug personal nga pagpadayag) mahinungdanon niadtong malampuson nga mikaon sa bunga?
Unsa nga mga pulong sa 1 Nephi 8:30 ang naghulagway unsa ang atong kinahanglan nga buhaton aron ang pulong sa Dios luwas nga modala kanato ngadto sa kahoy sa kinabuhi?

Isulat sa imong scripture study journal sa unsang paagi ang pulong sa Dios makagiya ug makahimo kanato nga luwas gikan sa tintasyon.

Kini nga mga bersikulo nagtudlo sa mosunod nga mga baruganan sa ebanghelyo: Kon kita mopatalinghug sa pulong sa Dios, motabang kini kanato sa pagbuntog sa tintasyon ug mga impluwensya sa kalibutan. Ang paghupot sa pulong sa Dios makatabang kanato nga mas maduol sa Ginoo ug makadawat sa mga panalangin sa Pag-ula.

Aron pagtabang kanimo nga makakita niini nga mga baruganan sa imong kinabuhi, tubaga ang usa o ang duha sa mosunod nga mga pangutana sa imong scripture study journal:
1. Kanus-a ang pulong sa Dios migiya kanimo ug mihimo kanimo nga luwas gikan sa tintasyon, garbo, o kalibutanon?
2. Kanus-a ang pulong sa Dios nakatabang kanimo nga mas maduol sa Manluluwas?

Si Lehi miaghat sa iyang pamilya “inubanan sa tanan nga pagbati sa usa ka malumo nga ginikanan, nga sila mopatalinghug ngadto sa iyang mga pulong” (1 Nephi 8:37). Siya gusto nga sila mosinati sa kalipay ug mga panalangin sa Pag-ula ni Jesukristo ingon nga siya mao usab.

Sa imong scripture study journal, pagsulat og tumong alang sa pag-uswag sa imong pagtuon sa pulong sa Dios.

Sa imong pagsunod ug paghupot sa pulong sa Dios, makabuntog ka sa mga babag nga makapugong kanimo sa pag-ambit sa Pag-ula ug pagdawat sa tinuod nga kalipay.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Nephi 8 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: