Unit 24: Day 1

3 Nephi 1

Pasiuna

Sa wala pa mobiya sa yuta, si propeta Nephi (ang anak ni Helaman) mihatag sa mga rekord ngadto sa iyang kamagulangang anak, nga si Nephi. Ang mga dili tumutuo nagplano nga ang mga matinud-anon pamatyon kon ang mga panagna mahitungod sa pagkatawo ni Jesukristo dili matuman sa gitakda nga adlaw. Samtang nangamuyo si Nephi sa Ginoo alang sa mga tumutuo, ang tingog sa Ginoo miabut ngadto kaniya ug mipahayag nga ang timailhan sa Iyang pagkatawo ihatag nianang gabhiona. Agig katumanan sa panagna ni Samuel ang Lamanite, sa dihang misalop na ang adlaw walay kangitngit nga miabut ug usa ka bag-ong bitoon ang nagpakita. Bisan pa sa padayon nga pagsulay ni Satanas sa pagguba sa pagtuo sa mga tawo, “ang labaw nga bahin sa mga katawhan mituo, ug nakabig ngadto sa Ginoo” (3 Nephi 1:22).

3 Nephi 1:1–26

Ang mga panagna mahitungod sa pagkatawo ni Jesukristo natuman, ug daghan sa mga Nephite ang nakabig

On the Morrow Come I into the World

Paghunahuna og pipila ka mga tawo sa mga kasulatan o sa kasaysayan sa Simbahan kinsa misakripisyo sa ilang mga kinabuhi alang sa ebanghelyo ni Jesukristo. Ngano sa imong hunahuna nga andam silang mohimo niana nga sakripisyo?

Sumala sa narekord sa 3 Nephi 1, usa ka grupo sa matinud-anong mga Nephite kinahanglang mohukom kon andam ba silang mohatag sa ilang kinabuhi aron magpabilin nga matinud-anon sa ilang mga gituohan. Ang kapitulo nagsugod pinaagi sa pagpasabut nga gihatag ni Nephi ang sagrado nga mga rekord ngadto sa iyang anak nga lalaki, nga ginganlan usab og Nephi, ug dayon mibiya sa yuta (tan-awa sa 3 Nephi 1:1–3). Dayon naghisgot kini sa pagsulay sa pagtuo nga nasinati sa daghang mga Nephite.

Basaha ang 3 Nephi 1:4–9, ug pangitaa ang mahagiton nga sitwasyon nga giatubang sa matinud-anong mga Nephite. Unsay imong bation kon ikaw si Nephi ug miabut ang panahon sa dihang ang mga tumutuo hapit na pagalaglagon? Pamalandunga sa makadiyot ngano nga ang pipila ka mga tawo mahimong makigbisog nga magpabiling matinud-anon niini nga sitwasyon.

Basaha ang 3 Nephi 1:10–12, ug pangitaa kon unsay gibuhat ni Nephi niining kritikal nga higayon. Basaha ang tubag sa Ginoo ngadto ni Nephi sa 3 Nephi 1:13–14. Mahimo nimong markahan ang pamahayag sa 3 Nephi 1:13 nga nagpakita niini nga baruganan: Ang Ginoo motuman sa tanang mga pulong nga Iyang gipasulti sa Iyang mga propeta.

1. Sulayi sa paghunahuna kon unsa kaha ang gibati ni Nephi human gayud gihatag ang timailhan sa pagkatawo sa Manluluwas. Isulat diha sa imong scripture study journal unsa sa imong hunahuna ang imong reaksyon kon ikaw didto pa nianang higayuna. Unsa sa imong hunahuna ang imong bation kon ikaw pa si Nephi ug ang timailhan bag-o lang gyud nahitabo?

Ibutang ang Imong Kaugalingon sa Kahimtang Niadtong Kinsa Misulat sa mga Kasulatan

Sa makausa si Brigham Young miingon: “Nagbasa ba kamo sa mga Kasulatan … nga daw sama nga kamo nagbarug diha sa mga dapit sa mga tawo kinsa nagsulat niini? … Inyo kining pribilehiyo sa pagbuhat sa ingon, aron mahimo kamong sama ka sinati sa espiritu ug kahulugan sa gisulat nga pulong sa Dios sama sa inyong inadlaw-adlaw nga lakaw ug pakig-istorya” (Mga Pagtulun-an sa mga Presidente sa Simbahan: Brigham Young [1997], 139).

Basaha ang 3 Nephi 1:4, 14–15, 19–21, ug pangitaa ang dugang nga mga pulong nga naghatag og gibug-aton sa pagkamakanunayon sa Ginoo sa pagtuman sa mga pulong sa Iyang mga propeta. Mahimo nimong markahan kini nga mga pulong diha sa imong mga kasulatan. Samtang basahon nimo ang 3 Nephi 1:14, tingali makatabang nga masabtan nga ang Tawo kinsa namulong dunay duha ka tahas ug nagsulti sa duha ka mga panglantaw: isip Jehova (kinsa mao ang Amahan pinaagi sa balaan nga pagtugyan sa awtoridad [divine investiture of authority]) ug isip Jesukristo, ang mahimong mortal nga Anak sa Dios sa dili madugay.

Aron makita kon sa unsa nga paagi nga ang mga panagna sa pagkatawo sa Manluluwas natuman, isulat ang panagna nga gihatag ni Samuel ang Lamanite sa wala nga kolum sa mosunod nga tsart. Dayon isulat ang bersikulo gikan sa 3 Nephi 1 ug mubo nga paghulagway sa katumanan niini sa tuo nga kolum.

Mga Panagna ni Samuel ang Lamanite	Katumanan
Unang panagna (Helaman 14:3–4):	3 Nephi 1:
Ikaduhang panagna (Helaman 14:5):	3 Nephi 1:
Ikatulong panagna (Helaman 14:6):	3 Nephi 1:
Ikaupat nga panagna (Helaman 14:7):	3 Nephi 1:

Samtang basahon nimo ang 3 Nephi 1:16–18, timan-i kon unsay reaksyon sa dautan sa dihang ang mga timailhan miabut. Mahimo nimong markahan ang pipila sa ilang mga reaksyon. Atong makat-unan sa 3 Nephi 1:18 nga ang ubang mga tawo “misugod sa pagkahadlok tungod sa ilang mga kadautan ug sa ilang pagkawalay pagtuo.” Pamalandong sa mosunod nga pangutana: Sa unsa nga paagi nga ang sala ug pagkawalay pagtuo mosangput ngadto sa kahadlok?

Basaha ang 3 Nephi 1:22–23, ug pangitaa kon unsay gisulayan nga buhaton sa yawa human gihatag ang mga timailhan sa pagkatawo sa Ginoo. Kompletuha ang mosunod nga pamahayag sa pagpadayag sa baruganan nga imong nakita sa bersikulo 22: Kon mag-atubang kita sa mga pamakak ni Satanas, makapili kita sa .

Si Bishop Richard C. Edgley, kinsa nagserbisyo sa Presiding Bishopric, mitanyag og tambag kon unsaon nato pagtubag panahon sa atong kaugalingong mga pagsulay sa pagtuo. Markahi ang bisan unsa niya nga mga pulong nga nag-awhag nimo sa pagpili sa pagtuo bisan pa sa mga pagduha-duha nga itintal ni Satanas kanimo:

Bishop Richard C. Edgley

“Tungod sa mga panagbingkil ug mga hagit nga atong giatubang sa kalibutan karon, gusto ko nga mosugyot og usa ka pagpili—usa ka pagpili sa kalinaw ug panalipod ug usa ka pagpili nga angay alang sa tanan. Kana nga pagpili mao ang hugot nga pagtuo. Timan-i nga ang hugot nga pagtuo dili libre nga gasa nga gihatag sa walay paghunahuna, tinguha, o paningkamot. … Ang Manluluwas miingon, “Umari kanako” (Mateo 11:28) ug …Pangayo, ug kamo paga[hatagan]’ (Mateo 7:7). Kini mga pulong sa paglihok—duol, tuktok. Kini mga pagpili. Mao nga ako moingon, pilia ang hugot nga pagtuo. Pilia ang hugot nga pagtuo kay sa pagduhaduha, pilia ang hugot nga pagtuo kay sa kahadlok, pilia ang hugot nga pagtuo kay sa wala maila ug sa wala makita, ug pilia ang hugot nga pagtuo kay sa pagka-negatibo. …

“… Kon ang pangatarungan, hinungdan, o personal nga salabutan mosukwahi sa sagrado nga mga pagtulun-an ug doktrina, o nagkasumpaki nga mga mensahe moataki sa inyong mga tinuohan … pilia nga dili ilabay ang binhi [sa hugot nga pagtuo] sa inyong kasingkasing tungod sa pagkawalay pagtuo. Hinumdumi, nga kita dili makadawat og saksi hangtud human sa pagsulay sa atong hugot nga pagtuo (tan-awa sa Ether 12:6)” (“Hugot nga Pagtuo—ang Pagpili Inyo,” Ensign o Liahona, Nob. 2010, 31–33).

2. Unsa nga mga bakak ug mga pangilad ang gipasiugdahan sa yawa karon sa pagsulay sa pagpatig-a sa mga kasingkasing sa katawhan batok sa kamatuoran? Isulat diha sa imong scripture study journal, unsay imong mabuhat nga magpadayon ang imong hugot nga pagtuo diha ni Jesukristo ug sa Iyang gipahiuli nga ebanghelyo bisan kon ang yawa naningkamot nga ikaw magduha-duha sa imong hugot nga pagtuo.

Basaha ang 3 Nephi 1: 24–25, ug pangitaa ang dugang nga hagit nga giatubang sa pipila ka mga tumutuo. Pamalandungi kon unsay imong makat-unan gikan sa tubag niining mga katawhan sa dihang nakahibalo sila nga sayop sila.

3 Nephi 1:27–30

Ang masupilon nga mga Nephite ug pipila sa kabatan-onan nga Lamanite miapil sa mga tulisan ni Gadianton

Pipila ka mga tuig human gihatag ang mga timailhan sa pagkatawo ni Jesukristo, ang pipila ka masupilon nga mga Nephite nagsugod nga makabaton og epekto sa abilidad sa matinud-anon sa pagbarug nga lig-on diha sa ebanghelyo. Sa unsa nga paagi ikaw makabarug nga lig-on diha sa ebanghelyo, bisan taliwala sa mga pangataki batok sa Simbahan sa atong panahon? Basaha ang 3 Nephi 1:27–30, ug pangitaa kon ang “nagtubo nga kaliwatan” sa mga Lamanite aduna bay negatibo nga epekto sa hugot nga pagtuo sa uban.

Timan-i nga daghan sa kabatan-onan nga Lamanite “nahimo alang na sa ilang mga kaugalingon” (3 Nephi 1:29) ug misalikway sa ebanghelyo. Si Sister Kathleen H. Hughes, kinsa nagserbisyo sa kinatibuk-ang kapangulohan sa Relief Society, misugyot og kahulugan sa pulong “nahimo alang na sa ilang mga kaugalingon”: “[Kini] nasabtan nako nga sila naniguro una sa ilang mga kaugalingon ug nagtagbaw sa ilang mga kaibog nga gipahimangno sa mga propeta nga ilang likayan. Minunot sila sa mga pangdani ug mga panghaylo ni Satanas” (“Magtubo ngadto sa Ginoo,” Liahona, Peb. 2010, 42).

Mahimo nimong isulat ang mosunod nga baruganan sa imong mga kasulatan tupad sa 3 Nephi 1:29–30 o sa imong scripture study journal: Kon kita magpadala sa tintasyon, ang atong ehemplo adunay negatibo nga epekto sa hugot nga pagtuo ug pagkamatarung sa uban.

3. Aron matabangan ka nga makasabut kon sa unsa nga paagi nga kini nga baruganan may kalabutan nimo, tubaga ang mosunod nga mga pangutana diha sa imong scripture study journal:

   1. Kanus-a nimo nasaksihi ang ehemplo sa baruganan sa ibabaw? Sa unsa nga paagi nga ikaw magpabilin nga matinud-anon bisan kon kadtong anaa sa imong palibut mipili nga dili magmatinud-anon?

   2. Samtang importante nga makahibalo nga ang atong ehemplo dunay negatibo nga epekto sa uban, importante usab nga mahinumdom nga ang atong ehemplo makatabang sa pagpalig-on sa uban. Kanus-a ka nakakita sa “nagtubo nga kaliwatan,” o kabatan-onan sa Simbahan karon, nga adunay positibo nga epekto sa hugot nga pagtuo sa uban?

4. Diha sa imong scripture study journal, paglista og pipila ka mga paagi nga ikaw makahatag og positibo nga impluwesnya sa hugot nga pagtuo sa mga tawo sa imong kaugalingong pamilya, sa imong ward o branch, o sa imong kaedad. Pagpili og duha ka mga ideya gikan sa imong lista, ug isulat kon unsay imong buhaton sa pagtuman niini.

5. Isulat ang mosunod sa ubos sa mga buluhaton karong adlawa diha sa imong scripture study journal:

   Akong natun-an ang 3 Nephi 1 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: