Unit 20: Day 4

Alma 43–44

Pasiuna

Sa Alma 43–44, nagsugod si Mormon sa pagsulat mahitungod sa mga gubat tali sa mga Lamanite ug sa mga Nephite. Dihang si Alma ug ang iyang mga anak nga lalaki padayon nga nangalagad sa mga tawo, ang mga Zoramite mitipon sa mga sundalo nga Lamanite aron mosulong sa mga Nephite. Gipakita ni Kapitan Moroni ang hugot nga pagtuo ug kaalam sa pagpanalipud sa mga Nephite batok sa mga sundalo nga Lamanite. Bisan og mas diyutay ra sila, ang pagpangandam sa mga sundalong Nephite ug ang ilang hugot nga pagtuo kang Jesukristo naghatag kanila og bintaha sa pakig-away. Dihang nakabantay sila nga mapildi na sila, ang mga Lamanite mihimo og pakigsaad sa kalinaw ug mibiya sa dapit sulod sa usa ka panahon.

Alma 43

Ang mga pagpangandam ug mga estratehiya ni Kapitan Moroni miguba sa mga plano sa mga sundalo nga Lamanite

1. Diha sa imong scripture study journal, ilista ang pipila sa imong mga plano, mga tumong, ug mga tinguha alang sa umaabut. Samtang magsulat ka, hunahunaa ang paglakip sa espirituhanong mga tumong ug tinguha, sama sa pagmisyon, pagminyo sulod sa templo, ug pamilya.

Pagkahuman nimo og sulat sa imong lista, ilha ang mga tinguha ug mga tumong nga gibati nimo nga gusto ni Satanas nga dili nimo matuman. Samtang magtuon ka sa Alma 43–44, pangitaa ang mga baruganan nga makatabang kanimo nga matuman ang matarung nga mga tumong bisan sa mga paningkamot sa kaaway nga mapugngan ang paglampus.

Sa Alma 43:1–4, bisan sa mga paningkamot ni Alma sa pagdala sa mga Zoramite balik sa Simbahan, daghan kanila ang mipasakop sa mga Lamanite sa ilang pagpangandam sa pagsulong sa mga Nephite. Basaha ang Alma 43:5–8, ug ilha ang mga “laraw” (plano) sa lider sa Lamanite nga si Zerahemnah. Mahimo nimong markahan ang mga intensyon ni Zeramhemnah samtang makit-an nimo kini. Pamalandunga sa unsang paagi ang mga plano ug tinguha ni Zerahemnah alang sa mga Nephite susama sa mga plano ni Satanas para kanimo.

Sunod basaha ang Alma 43:9–11, ug hibaloi ang mga plano o mga tinguha sa mga Nephite. Karon pamalangdunga sa unsang paagi kaha kini nga mga tinguha susama sa matarung nimong mga tinguha.

Si Kapitan Moroni, ang labaw nga kapitan sa mga sundalo nga Nephite, miandam sa iyang mga tawo sa pagpanalipud sa ilang yuta ug mga pamilya gikan sa dautang mga intensyon ni Zerahemnah. Basaha ang Alma 43:16–19, nga mangita kon unsang mga pagpangandam ang ghimo ni Kapitan Moroni ug sa mga Nephite.

2. Sa imong scripture study journal, pagdrowing og duha ka butang nga gihatag ni Moroni ngadto sa iyang mga tawo aron makaandam sila sa gubat.

Karon basaha ang Alma 43:20–22 aron mahibaloan unsay reaksyon sa mga Lamanite sa gihimong pagpangandam sa mga Nephite. Pamalandunga nganong ang mga Lamanite miatras man sa ilang pagsulong bisan og mas daghan sila kay sa mga Nephite.

Samtang tun-an nato ang mga istorya sa pisikal nga mga gubat diha sa Basahon ni Mormon, kini atong ikapahisama sa espiritwal nga mga pakig-away nga atong giatubang.

3. Tubaga ang mosunod nga mga pangutana diha sa imong scripture study journal: Unsa ang imong makat-unan gikan sa pagpangandam ni Moroni sa gubat bahin sa pagpanalipud sa imong kaugalingon batok sa pagpang-atake ni Satanas ug sa mga tintasyon?

Human misibug ang mga Lamanite, wala mahibalo si Moroni kon sa sunod asa kaha sila sulungon sa mga kaaway. Kon ikaw pa si Moroni, unsa kaha ang imong buhaton aron mapaningkamutan ang pag-andam sa lain nga pagsulong?

Basaha ang Alma 43:23–24 aron mahibaloan unsay gihimo ni Moroni.

Gikan sa ehemplo ni Moroni atong makat-unan nga: Kon kita maningkamot ug mosunod sa propetikanhong tambag, mas makapanalipud kita sa atong kaugalingon batok sa kaaway. Sama nga si propeta Alma nakasulti kang Moroni sa unsang paagi makapanalipud ang mga Nephite batok sa ilang mga kaaway, ang mga propeta sa Ginoo karon nagtudlo kanato unsaon sa pagpanalipud ang atong mga kaugalingon batok sa espirituhanong mga pag-atake sa kaaway.

4. Sa imong scripture study journal, pagsulat og pipila ka mga sentence mahitungod sa propetikanhong tambag nga gihatag sa ulahing mga adlaw nga, kon ikaw mopatalinghug niini, ikaw matabangan sa pagpanalipud sa imong kaugalingon gikan sa mga plano ug mga tintasyon ni Satanas.

Sumala sa narekord sa Alma 43:25–43, si Moroni milihok sumala sa kahibalo nga iyang nadawat gikan sa propeta pinaagi sa pagbahin sa iyang mga sundalo ug pagpatago kanila sa may agianan sa nagsingabut nga mga Lamanite. Dihang nagsingabut ang mga Lamanite, ang katunga sa mga Nephite nga sundalo miatake ug midala sa mga sundalo nga Lamanite ngadto sa suba sa Sidon. Human ang mga Lamanite nakatabok sa suba, ang laing katunga sa mga Nephite nga sundalo misulong. Dihang nakita sa mga Lamanite nga giliyukan na sila, nakig-away sila sa hilabihan ka makahadlok nga ang mga Nephite nagsugod og kaluya.

Imong makat-unan ang mga baruganan unsaon sa pagtuman ang imong matarung nga mga tumong ug tinguha pinaagi sa pagtuon sa nahibilin sa Alma 43. Basaha ang Alma 43:43–54, ug ikumpara kini sa mga tinubdan ug kusog sa mga Lamanite ug sa mga Nephite.

Pamalandunga unsay mas maayo kabahin sa kawsa nga gipakig-awayan sa mga Nephite kay sa kawsa sa mga Lamanite. Kon atong ikumpara si Moroni ug ang matinud-anon niyang mga sundalo sa atong pakig-away sa kaaway, atong makat-unan nga kon mag-ampo kita og panabang aron matuman ang matarung natong mga plano ug tinguha, tabangan kita sa Dios nga matuman kini.

5. Sa imong scripture study journal, isulat ang usa ka panahon dihang nasinati nimo ang tabang sa Ginoo sa pagtuman sa imong matarung nga mga tumong.

Alma 44

Human sa kadaugan sa mga Nephite, gimandoan ni Kapitan Moroni ang mga Lamanite sa paghimo og pakigsaad sa kalinaw

Hinumdumi nga diha sa Alma 43 dihang si Kapitan Moroni nakakita nga ang mga Lamanite giliyukan ug nangahadlok, gimandoan niya ang iyang mga tawo nga hunungon ang pakig-away. Basaha ang mga pulong ni Moroni sa Alma 44:1–6, ug pangitaa kon kinsa ang gipasidunggan ni Moroni sa kadaugan sa mga Nephite.

6. Base sa pagpamatuod ni Moroni diha sa Alma 44:4–6, pagsulat og kamatuoran diha sa imong scripture study journal nga makatabang sa imong pag-atubang sa espiritwal nimong mga pakig-away.

Si Presidente Boyd K. Packer, Presidente sa Korum sa Napulog Duha ka mga Apostoles, misaad sa mga kabatan-onan nga ang Ginoo manalipud kanila kon sila magpabiling matinud-anon. Samtang imong basahon ang iyang mga pulong, butangi og timaan ang mga bahin nga makahupay kanimo ug imong gibati nga magamit diha nimo.

“Ang kabatan-onan karon gipadako diha sa teritoryo sa kaaway nga adunay nagkakunhod nga sumbanan sa moralidad. Apan isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghug mo sa mga aghat nga gikan sa Balaang Espiritu.

“Pagsinina og tarung; pagmatinahuron sa pagsulti; paminaw sa makadasig nga musika. Likayi ang tanang pagka-imoral ug mga binuhatan nga makadaut sa pagkatawo. Kontrolaha ang inyong kinabuhi ug mandoi ang inyong kaugalingon nga magmatinud-anon. Tungod kay nagdepende gyud mi ninyo, mapanalanginan mo sa talagsaong paagi. Ang inyong mahigugmaong Langitnong Amahan kanunay nga nagbantay ninyo” (“Tambag ngadto sa mga Kabatan-onan,” Ensign o Liahona, Nob. 2011, 18).

Sa Alma 44:7–10, gipamahayag ni Zerahemnah nga wala siya motuo nga ang Dios mao ang tinubdan sa kalig-on sa mga Nephite. Mitanyag siya nga itahan ang hinagiban sa mga Lamanite, apan midumili siya nga mohimo og pakigsaad sa kalinaw. Basaha ang tubag ni Moroni sa Alma 44:11. Hunahunaa kon ngano kaha nga importante man kang Moroni nga ang mga Lamanite mohimo og pakigsaad sa kalinaw.

Samtang daghan sa mga Lamanite mihimo og pagkigsaad sa kalinaw, gipundok ni Zerahemnah ang nahibilin sa iyang mga tawo aron makig-away sa mga sundalo ni Moroni. Dihang ang mga Nephite misulong sa mga Lamanite ug nagsugod sa pagpatay kanila, nakita ni Zerahemnah nga nag-ungaw sa kalaglagan ang iyang mga sundalo ug misaad nga mosulod sa pakigsaad sa kalinaw (tan-awa sa Alma 44:12–20).

7. Sa imong scripture study journal, isulat kon unsaon nimo sa paggamit ang pipila ka mga baruganan ug kamatuoran nga imong nakat-unan niini nga leksyon aron mapanalipdan ang imong kaugalingon batok sa mga tintasyon ug pag-atake sa kaaway ug pagtuman sa matarung nimong mga tinguha ug mga tumong.

8. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 43–44 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: