Sama sa narekord diha sa Moroni 7:20–48, nagpadayon si Mormon sa iyang wali diha sa sinagoga pinaagi sa pagtudlo sa iyang mga tigpaminaw kon unsaon “paghupot sa matag maayo nga butang” (Moroni 7:20–21, 25). Gipasabut niya ang kaimportante sa hugot nga pagtuo, paglaum, ug gugmang putli? Gitapos niya ang iyang wali pinaagi sa usa ka pangamuyo nga ang iyang mga tigpaminaw mag-ampo sa Amahan uban sa tanang kusog sa ilang kasingkasing alang sa gasa sa gugmang putli—nga gihatagan og kahulugan ni Mormon isip “ang tiunay nga gugma ni Kristo” (Moroni 7:47).
Nagtudlo si Mormon bahin sa hugot nga pagtuo diha ni Jesukristo
Ribyuha ang Moroni 7:12–13, ug ikonsiderar kon unsay imong nakat-unan sa miaging leksyon kon unsaon pag-ila sa maayong mga butang gikan sa dautang mga butang. Sa luna nga giandam, ilista ang mga ehemplo sa maayong mga butang (mga butang nga nagagikan sa Dios ug nag-agni kanato nga motuo kang Kristo) ug sa dautang mga butang (mga butang nga nag-agni kanato nga dili motuo kang Kristo ug dili moserbisyo sa Dios):
Maayong mga Butang
Dautang mga Butang
Bantayi nga nag-awhag si Mormon kanato nga “maghupot sa matag maayo nga butang” (Moroni 7:19). Pamalandunga kon unsa sa imong hunahuna ang buot ipasabut sa maghupot sa matag maayo nga butang.
Gipangutana ni Mormon ang iyang mga tigpaminaw og importante nga pangutana, nga iya dayong gitubag. Basaha ang Moroni 7:20, ug pangitaa ang pangutana nga giplanuhang ipamulong ni Mormon. Dayon siksika ang Moroni 7:21–26, nga mangita sa tubag niini nga pangutana.
Samtang magtan-aw ka sa Moroni 7:21, 25, markahi ang mga pulong nga nagtudlo niini nga baruganan: Samtang magpakita kita og hugot nga pagtuo diha ni Jesukristo, makahimo kita sa paghupot sa matag maayo nga butang.
Sa imong scripture study journal, tubaga ang mosunod nga mga pangutana:
Sumala sa Moroni 7:22–26, sa unsang mga paagi nga gitinguha sa Langitnong Amahan sa pagtabang kanato sa pag-ugmad og hugot nga pagtuo kang Jesukristo?
Kanus-a nga ang imong hugot nga pagtuo kang Jesukristo nakatabang nimo sa paghupot sa matag maayo nga butang o nakatabang nimo nga masalikway ang butang nga dautan?
Mipadayon si Mormon sa paghulagway sa pipila ka maayong mga butang nga moabut niadtong mopakita og hugot nga pagtuo kang Jesukristo. Basaha ang Moroni 7:32–34, ug markahi ang dili mominos sa usa niining mga bersikulo nga miresulta sa pagbaton og hugot nga pagtuo kang Jesukristo.
Paghunahuna ug pag-ampo bahin sa butang nga imong mahimo sa pagpakita og mas dako nga pagtuo kang Jesukristo. Kon ikaw dunay tumong sa hunahuna, isulat kini diha sa imong scripture study journal. Kini nga tumong mahimong ang pagbuhat og piho nga butang nga makatabang nimo nga masunod ang mga pulong sa mga propeta (tan-awa sa Moroni 7:23), pag-ampo uban sa mas dako nga pagtuo (tan-awa sa Moroni 7:26), o paghinulsol sa sala (tan-awa sa Moroni 7:34). Samtang magsulat ka sa imong tumong, iapil ang piho nga mga detalye kon unsaon nimo kini pagtuman. Isulat usab kon sa unsang paagi nga kini nga tumong makadala og maayong mga butang sa imong kinabuhi.
Sa wali nga narekord diha sa Moroni 7, gitino ni Mormon ang tulo ka balaanong mga baruganan nga gikinahanglan alang sa kinabuhing dayon. Si Elder M. Russell Ballard sa Korum sa Napulog Duha ka mga Apostoles nagtudlo nga kining “tulo ka balaanong mga baruganan nagporma og pundasyon diin makatukod kita sa istruktura sa atong kinabuhi.” Miingon siya nga kining tulo ka mga baruganan “nag-ubang maghatag kanato og basihan sa suporta sama sa usa ka bangko nga dunay tulo ka mga tiil” (“The Joy of Hope Fulfilled,” Ensign, Nob. 1992, 33).
Imahe
3-legged stool
Ang mosunod nga materyal makatabang nimo nga makit-an ang tulo ka mga baruganan nga gitino ni Mormon. Ang unang baruganan mao ang hugot nga pagtuo, nga bag-o lang nimong gitun-an Moroni 7:20–39. Butangi og label ang usa sa mga tiil sa bangko ibabaw sa Hugot nga pagtuo diha ni Jesukristo.) Pangitaa kon unsay girepresentar sa ikaduhang tiil pinaagi sa pagbasa sa Moroni 7:40. Isulat kana nga baruganan sa laing tiil sa bangko.
Basaha ang Mormon 7:41–42, ug hibaloi unsay gitudlo ni Mormon nga kinahanglan natong pagalauman.Ang Moroni 7:41 usa ka scripture mastery passage.) Mahimo nimong idugang ang “alang sa kinabuhing dayon” ngadto sa label nga imong gisulat sa ikaduhang tiil sa bangko aron mabasa kini nga “Paglaum alang sa kinabuhing dayon.”
Si Presidente Dieter F. Uchtdorf sa Unang Kapangulohan namulong bahin sa paglaum nga gipasabut ni Mormon:
Imahe
President Dieter F. Uchtdorf
“Ang paglaum usa ka gasa sa Espiritu. Kini usa ka paglaum nga pinaagi sa Pag-ula ni Jesukristo ug sa gahum sa Iyang Pagkabanhaw, kita mabuhi ngadto sa kinabuhing dayon ug kini tungod sa atong hugot nga pagtuo sa Manluluwas. …
“Ang paglaum dili kaalam, apan hinoon, ang kanunayng pagsalig nga ang Ginoo motuman sa Iyang saad ngari kanato. Kini ang kamasaligon nga kon kita magkinabuhi sigun sa mga balaod sa Dios ug sa mga pulong sa mga propeta karon, kita makadawat sa gitinguhang mga panalangin sa umaabut. Kini mao ang pagtuo ug pagdahum nga ang atong mga pag-ampo pagatubagon. Kini makita diha sa pagkamasaligon, positibo nga hunahuna, pagkamadasigon, ug mapailubon nga pagpadayon” (“Ang Walay Kinutoban nga Gahum sa Paglaum,” Ensign o Liahona, Nob. 2008, 22).
Usa ka baruganan nga atong makat-unan gikan sa Moroni 7:40–42 mao ang: Kon mopakita kita og hugot nga pagtuo kang Jesukristo, makabaton kita og paglaum pinaagi sa Pag-ula ni Jesukristo aron mabanhaw ngadto sa kinabuhing dayon.
Basaha ang Moroni 7:43, ug hibaloi ang mga kinaiya nga gikinahanglan aron ang usa ka tawo makabaton og hugot nga pagtuo ug paglaum nga gipamulong ni Mormon.
Ang mahimong “magmaaghup, ug magmapainubsanon sa kasingkasing” nagpasabut nga tinuod nga mapainubsanon, malumo, ug manunuton sa kabubut-on sa Ginoo. Sa imong hunahuna ngano nga ang pagkamaaghup, ug pagkamapainubsanon sa kasingkasing gikinahanglan man aron makabaton og hugot nga pagtuo ug paglaum sa Pag-ula ni Jesukristo?
Diha sa imong scripture study journal, ihulagway kon sa unsang paagi nga ang imong hugot nga pagtuo kang Jesukristo ug sa Iyang Pag-ula nakahatag kanimo og paglaum.
I-refer og balik ngadto sa diagram sa bangko sa pagsugod sa leksyon. Basaha ang Moroni 7:44, ug hibaloi ang ikatulong baruganan nga gitudlo ni Mormon. Butangi og label ang katapusang tiil sa bangko gamit niini nga baruganan.
Sama sa narekord diha sa Moroni 7:44–48, mihatag si Mormon og gamhanang pagpamatuod bahin sa gugmang putli. Basaha ang Moroni 7:45–47, ug markahi ang mga pulong nga gigamit ni Mormon sa paghatag og kahulugan sa gugmang putli. (Ang Moroni 7:45, 47–48 usa ka scripture mastery passage.) Aron matabangan ka nga mas masabtan kon unsay gitudlo ni Mormon, mahimo nimong isulat ang pipila niining mga depinisyon diha sa imong mga kasulatan: ang “mainantuson” nagpasabut sa paglahutay nga mapailubon, ang “dili masinahon” nagpasabut nga dili masuya, “dili manghambog” nagpasabut nga mahimong mapainubsanon ug maaghup, “dili mangita alang sa iyang kaugalingon” nagpasabut nga unahon ang Dios ug ang uban, “dili dali nga masuko” nagpasabut nga dili daling mapungot, ug “matuohon sa tanan nga mga butang” nagpasabut nga modawat sa tanang kamatuoran.
Sa imong scripture study journal, tubaga ang usa o mas daghan pa sa mosunod nga mga pangutana:
Base sa depinisyon diha sa Moroni 7:45–47, sa imong hunahuna ngano nga ang gugmang putli mao man ang labing mahinungdanon nga espirituhanong gasa nga atong madawat?
Sa imong hunahuna unsay gipasabut nga ang gugmang putli dili mapakyas?
Sa imong hunahuna ngano kaha nga kita walay pulos kon kita walay gugmang putli?
Human mahisguti ang pagtulun-an ni Apostol Pablo bahin sa gugmang putli diha sa 1 Mga Taga-Corinto 13, si Elder Dallin H. Oaks sa Korum sa Napulog Duha ka mga Apostoles mipasabut: “Ang rason nga ang gugmang putli dili mapakyas ug ang rason nga ang gugmang putli mas labaw pa kay sa talagsaong buhat sa kamaayo nga iyang gihisgutan mao nga ang gugmang putli, ‘ang tiunay nga gugma ni Kristo’ (Moro. 7:47), dili usa ka buhat apan usa ka kondisyon o kahimtang. Ang gugma nga putli makab-ot pinaagi sa sunod-sunod nga mga buhat agig sangputanan sa pagkakabig. Ang gugmang putli usa ka butang nga ang usa ka tawo mahimo. Sa ingon, sama sa gipamahayag ni Moroni, ‘gawas kon ang mga tawo makabaton og gugma nga putli sila dili makapanunod’ sa dapit nga giandam alang kanila didto sa mga mansyon sa Amahan (Ether 12:34; emphasis gidugang)” (“The Challenge to Become,” Ensign, Nob. 2000, 34.)
Basaha ang mosunod nga mga sitwasyon ug ikonsiderar kon unsa kaha ang imong reaksyon kon nagkulang ka sa gasa sa gugmang putli ug kon unsa kaha ang imong reaksyon kon napuno ka sa gugmang putli:
Ang ubang mga estudyante nagbugal-bugal nimo o sa laing tawo sa eskwelahan.
Duna kay igsoong lalaki o babaye nga kanunayng magpalagot nimo.
Dili ka ganahan sa usa sa bag-o nimong mga adviser sa korum o sa klase dili sama sa ganahan nimo nga lider kaniadto.
Human mapasabut kon unsa kaimportante nga makapalambo kita og gugmang putli sa atong kinabuhi, gipasabut ni Mormon kon unsaon nato pag-angkon niining mahinungdanon nga kinaiya. Basaha ang Moroni 7:48, ug markahi ang mga pulong nga nagtudlo niining baruganan: Kon mag-ampo kita sa Amahan sa tibuok natong kusog sa kasingkasing ug magpakabuhi isip tinuod nga mga sumusunod ni Jesukristo, mapuno kita sa gugmang putli. Pamalandunga nganong importante ang pag-ampo alang sa gasa sa gugmang putli uban sa tibuok kusog sa imong kasingkasing imbis nga mag-ampo sa kaswal nga paagi alang niini nga gasa.
Diha sa imong scripture study journal, pagsulat bahin sa usa ka higayon sa dihang imong gibati nga gitabangan ka sa Ginoo aron mahimong mahigugmaon. O pagsulat bahin sa usa ka higayon sa dihang nakakita ka og laing tawo nga nagmahigugmaon. Agig dugang, paghimo og piho nga tumong kon unsaon nimo pagpalambo ang usa sa mga kinaiya sa gugmang putli nga nalista diha sa Moroni 7:45. Pag-ampo alang sa gasa sa gugmang putli samtang naningkamot ka nga matuman ang imong tumong.
Isulat ang tibuok bersikulo diha sa usa ka piraso nga papel. I-recite ang bersikulo sa pipila ka higayon. Papasa (o badlisi sa tunga) ang mga pulong hangtud nga imong ma-recite ang tibuok bersikulo gikan sa hunahuna.
Isulat ang unang letra sa matag pulong niining tulo ka mga bersikulo diha sa usa ka piraso nga papel. I-refer ngadto sa papel aron matabangan ka nga ma-recite ang mga bersikulo. Human nimo ma-recite ang mga bersikulo sa pipila ka higayon, papasa o badlisi sa tunga ang mga letra hangtud imong ma-recite ang mga bersikulo gikan sa hunahuna. Dayon pagpili og usa sa mosunod nga mga grupo sa katawhan kang kinsa ganahan ka nga makabaton og dugang gugmang putli: pamilya, mga sakop sa korum o klase sa Simbahan, mga klasmeyt sa eskwelahan, mga higala, o mga silingan. Paghunahuna bahin sa mga tawo nga imong gipili samtang magbasa ka sa Moroni 7:45, ug ikonsiderar ang mga paagi nga imong mapakita niining mga tawo ang dugang nga Kristohanong gugma.
Isulat sa imong scripture study journal ang usa o duha ka mga paagi nga imong mapakita ang dugang gugmang putli alang niining mga tawhana. Atol sa moabut nga semana, pag-ampo alang sa tabang sa Ginoo sa pagpalambo og dugang nga gugmang putli alang kanila. Sa katapusan sa semana, ipakigbahin ang imong kasinatian ngadto sa usa ka higala o sakop sa pamilya.
Isulat ang mosunod diha sa ubos sa mga buluhaton karong adlawa sa imong scripture study journal:
Akong natun-an ang Moroni 7:20–48 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: