2 Nephi 9–10

Pasiuna

Sa miaging leksyon imong gitun-an ang pagpamatuod ni Jacob kon unsay buhaton ni Jesukristo alang kanato pinaagi sa Iyang Pag-ula. Niini nga leksyon imong kompletuhon ang imong pagtuon sa 2 Nephi 9 ug ang unang adlaw sa wali ni Jacob ug magkat-on kon unsay kinahanglan natong buhaton aron makadawat sa mga panalangin sa Pag-ula. Si Jacob mipasidaan batok sa paghimo og mga desisyon nga mosangput ngadto sa pagkahimulag gikan sa Dios, ug gidapit niya ang tanan sa pagduol ngadto kang Kristo ug maluwas. Basahon usab nimo ang 2 Nephi 10 ug tun-an kon unsay gisulti ni Jacob sa katawhan pagkasunod adlaw. Si Jacob mitudlo pag-usab nga bisan og ang Israel pagakatagon tungod sa sala, ang Ginoo mohinumdom sa Iyang mga pakigsaad ngadto kanila, ug mopundok Siya kanila kon sila maghinulsol ug mobalik Kaniya. Si Jacob miingon nga “walay lain nga nasud sa ibabaw sa yuta nga molansang sa ilang Dios sa krus” (2 Nephi 10:3). Iyang gipanagna nga ang America mahimong usa ka yuta sa kalingkawasan, gilig-on batok sa tanang mga nasud, ug walay mga hari ibabaw niini. Si Jacob nagpamatuod nga ang tawo kinahanglang mosumiter ngadto sa kabubut-on sa Dios ug mohinumdom nga pinaagi lamang sa grasya sa Dios nga sila maluwas.

2 Nephi 9:28–54

Si Jacob nagpasidaan sa mga lihok ug mga kinaiya nga makapahimulag kanato gikan sa Dios ug nagdapit sa tanan sa pagduol ngadto kang Kristo

Tungod sa Pagkapukan ug tungod sa atong personal nga mga sala, ang matag usa kanato nagkinahanglan sa Manluluwas. Si Jacob mipamatuod nga pinaagi sa Pag-ula kita makalingkawas gikan sa mga epekto sa Pagkapukan ug makabuntog sa atong mga sala ug makadawat og kinabuhing dayon. Si Jacob migamit sa imahe sa usa ka ganghaan ug dalan aron sa paghulagway niini. Basaha ang 2 Nephi 9:41, ug pangitaa kon giunsa paghulagway ni Jacob ang dalan nga kinahanglan natong subayon aron makakab-ot sa kinabuhing dayon. Pamalandungi ang mosunod nga mga pangutana: Unsa kaha ang gipasabut sa “duol kamo sa Ginoo”? (Hunahunaa kon anaa ka sa dalan nga makapaduol kanimo ngadto sa Manluluwas.) Unsay gipasabut niini kanimo nga “ang dalan [ngadto sa Manluluwas] mapig-ot, apan kini gihan-ay sa usa ka matul-id nga agianan”?

Si Jacob mihulagway usab sa Manluluwas isip “ang magbalantay sa ganghaan.” Simbolikanhon kini sa tahas sa Manluluwas isip ang atong maghuhukom. Kini Siya ang mihatag sa mga panalangin sa Iyang Pag-ula ngari kanato base sa atong mga kinaiya ug mga lihok. Si Jacob mitudlo usab sa mas piho kon sa unsang paagi ang atong mga kinaiya ug mga lihok makaapekto sa atong abilidad sa pagduol ngadto sa Manluluwas.

Aron sa pagtabang kanimo nga makaila sa mga kinaiya, mga hunahuna, ug mga lihok nga makagiya nato ngadto sa Manluluwas, buhata ang mosunod diha sa imong scripture study journal:
1. Pagdrowing og linya paubos sa tunga sa usa ka pahina sa imong scripture study journal, ug sulati og Pagpalayo sa Atong mga Kaugalingon gikan ni Kristo sa usa ka bahin ug Pagpaduol ngadto ni Kristo sa pikas nga bahin.
2. Basaha ang 2 Nephi 9:27–39, ug pangitaa ang bisan unsa nga mga lihok o mga kinaiya nga gipasidaan ni Jacob nga makapalayo kanato gikan sa Manluluwas. Paghimo og lista sa unsay imong nakit-an nga nahisakup sa kolum nga “Pagpalayo sa Atong mga Kaugalingon gikan ni Kristo” diha sa imong scripture study journal. Mahimo usab nimong markahan ang unsay imong nakit-an diha sa imong mga kasulatan. (Timan-i nga ang 2 Nephi 9:28–29 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)
3. Pagpili og usa sa mga lihok o kinaiya nga imong nailhan, ug tubaga ang mosunod nga pangutana sa lahi nga pahina sa imong scripture study journal: Sa unsang paagi kini nga lihok o kinaiya makapugong kanato sa pagduol kang Kristo ug pagdawat sa hingpit nga mga panalangin sa Iyang Pag-ula?
4. Agig dugang sa pasidaan mahitungod sa mga lihok ug mga kinaiya nga makapalayo kanato gikan sa Ginoo, si Jacob mitudlo mahitungod sa mga lihok ug mga kinaiya nga makatabang kanato nga makaduol kang Jesukristo. Basaha ang 2 Nephi 9:23, 42, 45–46, 49–52, ug pangitaa kon unsay gitudlo ni Jacob nga modala kanato ngadto sa Ginoo. Ilista ang imong makit-an diha sa kolum nga “Pagpaduol ngadto ni Kristo” sa imong tsart.

Sa pagtuon sa 2 Nephi 9:28–54, imong nakat-unan ang baruganan nga: Pinaagi sa pagpili nga moduol sa Ginoo ug magpuyo sumala sa Iyang kabubut-on, makadawat kita sa hingpit nga mga panalangin sa Pag-ula.

Aron sa pagtabang kanimo nga magamit ang unsay imong nakat-unan, isulat ang imong mga tubag sa mga pangutana sa duha o labaw pa sa mga assignment sa ubos sa imong scripture study journal:
1. Sa 2 Nephi 9:23 imong nabasa nga ang Ginoo misugo kanato sa paghinulsol ug pagpabunyag. Bisan kon nabunyagan na ka, sa unsang paagi ang pagbag-o sa mga pakigsaad sa bunyag pinaagi sa sakrament makatabang kanimo sa pagduol sa Ginoo ug pagdawat sa mga panalangin sa Iyang Pag-ula?
2. Unsa kaha ang gipasabut sa “hugot nga pagtuo diha sa Usa nga Balaan sa Israel” (2 Nephi 9:23)? Unsa ang pipila sa mga paagi nga nagpakita ka karon og hugot nga pagtuo sa Ginoo?
3. Unsay gipasabut sa “biya gikan sa inyong mga sala” (2 Nephi 9:45)? Unsay makatabang kanimo sa pagbiya sa imong mga sala?
4. Unsa ang pipila ka mga ehemplo sa paggasto og salapi “alang niana nga walay bili” o sa pagtrabaho “niana nga dili makatagbaw” (2 Nephi 9:51)? Sa unsang paagi ang paglikay sa dautan o walay hinungdan nga mga paningkamot makatabang kanimo sa pagduol ngadto sa Ginoo? Sa unsang paagi nga mas maayo nimong pagbalanse ang paggahin sa imong panahon sa lain-laing mga kalihokan sa eskwelahan, pagtuon, Simbahan, lingaw-lingaw, ug sosyal?
5. Unsa ang pipila ka paagi nga ikaw “[m]agbusog … niana nga dili mahanaw” (2 Nephi 9:51)?
6. Giawhag ni Jacob ang katawhan sa “pagpasalamat” ug nga “himoa ang inyong mga kasingkasing nga magmalipayon” (2 Nephi 9:52). Ngano kaha nga importante ang pagsunod niini nga tambag samtang maningkamot ka sa pagduol sa Manluluwas?
Isulat sa imong scripture study journal kon sa unsang paagi ang usa o sobra pa sa mga lihok ug mga kinaiya nga imong gitun-an mas nakapaduol nimo sa Manluluwas.

Scripture Mastery—2 Nephi 9:28–29

Unsay imong gibuhat aron mapahimuslan og maayo ang imong mga oportunidad sa edukasyon karon? Unsay imong mga plano sa umaabut alang sa imong edukasyon?

Basaha ang mosunod nga pamahayag gikan ni Presidente Gordon B. Hinckley, ug badlisi ang mga panalangin nga moabut gikan sa pagkat-on: “Makasinati kamo og talagsaong mga hagit sa umaabut. Naglihok kamo sa kalibutan nga hilabihan ang kompetisyon. Kinahanglan makakuha kamo sa tanang edukasyon kutob sa inyong mahimo. Ang Ginoo nagtudlo kanato kabahin sa kaimportante sa edukasyon. Makapakwalipay kini ninyo alang sa mas nindot nga mga oportunidad. Makasangkap kini kaninyo sa pagbuhat og mapuslanong butang diha sa talagsaong kalibutan sa oportunidad nga anaa sa umaabut. Kon makahimo ka sa pag-eskwela sa koliheyo ug kana ang inyong tinguha, nan buhata kana. Kon wala kamoy tinguha sa pagtungha sa kolehiyo, nan pag-eskwela og vocational o patigayon aron sa pagbaid sa inyong mga kahanas ug sa pagpalambo sa inyong kapasidad” (“Converts and Young Men,” Ensign, Mayo 1997, 49–50).

Basaha ang 2 Nephi 9:28, ug markahi kon unsay gisulti ni Jacob nga maoy mga peligro sa pagkat-on uban sa sayop nga kinaiya.

Tubaga ang mosunod nga pangutana diha sa imong scripture study journal:
1. Unsa kaha ang kahulugan sa pamahayag nga “kon sila makinaadmanon sila nagtuo nga sila maalamon”?
2. Unsa ang mga kakuyaw sa paghunahuna nga kita mas maalamon kay sa ginikanan, sa atong bishop o branch president, sa propeta, o sa atong Langitnong Amahan?

Basaha ang 2 Nephi 9:29, ug hibaloi kon unsay kinahanglan nimong hinumduman samtang nagtinguha ka og edukasyon.

Sa imong scripture study journal, tubaga ang mosunod nga pangutana: Sa unsang paagi ang makugihon nga pagtuon sa kasulatan makatabang nimo sa pagpuyo sumala sa baruganan diha sa 2 Nephi 9:29?

2 Nephi 10

Si Jacob nag-awhag sa mga katawhan nga magmaya ug moduol sa Ginoo

Sa ikaduhang adlaw sa iyang pagtudlo, si Jacob mipamatuod pag-usab sa gahum sa Ginoo sa pagluwas gikan sa mga sangputanan sa sala. Si Jacob mitudlo usab sa iyang mga katawhan kon unsay ilang buhaton agig tubag sa maloloy-ong gasa sa Pag-ula. Basaha ang 2 Nephi 10:20, 23–25, ug markahi ang mga pulong nga nagpakita kon unsay gitudlo ni Jacob nga angay natong buhaton agig tubag sa sakripisyo sa Manluluwas alang kanato.

Tubaga ang usa o sobra pa sa mosunod nga mga pangutana diha sa imong scripture study journal:
1. Nagkonsiderar sa unsay imong natun-an mahitungod sa Manluluwas, nganong gusto man ka nga kanunay “siya nga hinumduman” (2 Nephi 10:20)?
2. Nganong gibati nimo nga ang pagsalikway o paghinulsol sa usa ka butang nga sayop nimong gibuhat mopakita sa imong pasalamat ug gugma sa Manluluwas?
3. Unsay imong nakat-unan mahitungod sa Manluluwas nga nagtabang kanimo nga mobati og paglaum imbis nga “iduko” ang imong ulo tungod sa kawalay paglaum?

Usa ka importante nga mga pulong niini nga kapitulo mao ang “pakig-uli sa inyong kaugalingon ngadto sa kabubut-on sa Dios” (2 Nephi 10:24). Nagpasabut kini nga kinahanglan mobalik kita pag-establisar og suod nga pakigrelasyon sa Ginoo diin kita nagmasulondon ug nahiuyon sa Iyang kabubut-on. Ribyuha ang bisan unsa nga mga kasulatan nga imong gimarkahan sa 2 Nephi 9–10. Tinguhaa ang giya sa Balaang Espiritu samtang motino ka og usa ka butang nga imong mabuhat aron sa pakig-uli sa imong kaugalingon ngadto sa kabubut-on sa Dios.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 9–10 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: