Alma 5:1–36

Pasiuna

Dihang ang Simbahan gihulga sa kadautan ug panaglalis (tan-awa sa Alma 4:9–11), Nasayud si Alma nga ang tinuod nga pag-usab moabut lang pinaagi sa dakong kausaban sa kasingkasing sa mga miyembro sa Simbahan. Isip halangdong mga pari o high priest sa Simbahan, gisugdan ni Alma ang iyang misyon sa pag-angkon og balik sa mga tawo sa Zarahemla pinaagi sa pagpamatuod mahitungod ni Jesukristo ug pagtawag sa mga tawo aron maghinulsol. Iya silang giawhag sa pagpangandam alang sa paghukom sa Ginoo pinaagi sa pagbaton og hugot nga pagtuo sa pulong sa Dios ug pagtimbang-timbang sa esprituhanong kahimtang sa ilang mga kasingkasing. Samtang magtuon ka sa unang katunga sa Alma 5, hunahunaa kon unsaon nimo paggamit ang imong nakat-unan aron imong masinati o mapadayon sa pagsinati ang dakong kausaban sa kasingkasing nga gihisgutan sa kapitulo.

Alma 5:1–13

Gisugilon ni Alma ang pagkakabig sa iyang amahan ug kadtong mga misunod kaniya

Unsa ka dako ang imong kausaban sukad sa 8 anyos ka pa? Unsa ka dako ang imong kausaban sukad sa 12 anyos ka pa? Hunahunaa ang lain-laing mga pamaagi diin ang mga tawo mausab, sama sa ilang panagway, pamatasan, o kinaiya. Pamalandunga kon unsa kaha ang magdala og pipila ka mga kausaban diha sa mga tawo. Dayon basaha ang Alma 5:12, ug tan-awa kon unsay nausab diha kang Alma nga Tigulang. Samtang magtuon ka sa Alma 5:1–13, hunahunaa kon sa unsang paagi ang kasingkasing sa tawo mausab.

Si Elder Gerald N. Lund, kinsa sa wala madugay miserbisyo isip sakop sa Seventy, mitudlo nga kon ang pulong nga kasingkasing gamiton sa mga kasulatan, sa kasagaran nagpasabut kini sa “sa tinuod, sa sulod nga kinaiya sa tawo” (“Understanding Scriptural Symbols,” Ensign, Okt. 1986, 25). Hunahunaa sa makadiyot kon sa unsang paagi ang “dakong kausaban sa kasingkasing” lahi sa ubang mga paagi diin ang mga tawo mausab—lakip ang mga pamaagi nga imong gihunahuna dihang gisugdan nimo kini nga leksyon.

Hinumdumi nga ang mga katawhan ni Haring Benjamin nakasinati og “dakong kausaban” sa ilang kasingkasing, hinungdan nga sila “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2). Mahimo nimong isulat ang gihatag nga katin-awan gikan ni Elder Lund ug ang Mosiah 5:2 nga scripture reference diha sa margin sa imong mga kasulatan tupad sa Alma 5:11–13.

Si Elder D. Todd Christofferson sa Korum sa Napulog Duha ka mga Apostoles mipasabut: “Kamo mangutana, Ngano nga kining dakong kausaban dili diha-diha dayon moabut kanako? Kinahanglang hinumduman ninyo ang talagsaong mga ehemplo sa mga katawhan ni Haring Benjamin, si Alma ug ang uban sa kasulatan ingon lamang niana—katalagsaon ug dili kasagaran. Alang sa kadaghanan kanato, ang mga kausaban, mas hinayhinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal” (“Natawo Pag-usab,” Ensign o Liahona, Mayo 2008, 78).

Basaha ang Alma 5:3–7, ug tan-awa unsay gisulti ni Alma sa iyang mga katawhan sa Zarahemla aron matabangan og andam ang ilang mga kasingkasing nga mag-usab.

Tubaga ang mosunod nga pangutana niini nga manwal: Gisultihan ni Alma ang mga tawo sa Zarahemla mahitungod sa pagkakabig sa iyang amahan ug sa uban, ingon man sa ilang pagkahaw-as gikan sa pagkaulipon. Sa unsang paagi kaha kini nga mga kasinatian nakatabang sa mga tawo nga maandam sa pagsinati og kausaban sa kasingkasing?

Basaha ang Alma 5:10, ug lingini ang mga question mark sa katapusan sa tulo ka mga pangutana nga gipangutana ni Alma sa mga tawo. Dayon siksika sa Alma 5:11–13, diin si Alma nagsugod sa pagtubag niini nga mga pangutana, aron makakita og suporta niini nga pamahayag: Kon motuo kita sa pulong sa Dios ug gamiton ang pagtuo kang Jesukristo , atong masinati ang dakong kausaban sa kasingkasing.

Ang pagtuo sa pulong sa Dios magdala og dakong kausaban sa kasingkasing tungod kay ang pulong sa Dios motudlo kanato mahitungod sa Manluluwas. Ang mga tawo ni Alma mituo sa pulong sa Dios, nga gihatud ngadto kanila pinaagi sa balaang mga propeta. Ilang nakat-unan ang mahitungod sa matubsanong gahum sa Pag-ula ni Jesukristo, ug ang ilang mga kasingkasing nausab samtang gipalambo nila ang ilang pagtuo sa Manluluwas.

Sa imong scripture study journal, ipasabut sa kaugalingon nimong mga pulong kon sa unsang paagi ang pagtuo sa Pag-ula ni Jesukristo magdala og dakong kausaban sa kasingkasing.
Isulat sa imong scripture study journal kon sa unsang paagi ang imong kasingkasing nausab. Kon nakabantay ka og kausaban sa kasingkasing samtang nagtuon ka sa Basahon ni Mormon niining tuiga sa seminary, mahimo nimong ihulagway ang imong kasinatian isip kabahin sa imong tubag.

Alma 5:14–36

Gitudlo ni Alma nga ang dakong kausaban sa kasingkasing gikinahanglan sa pagsulod sa gingharian sa langit

Human matudlo ni Alma nga ang pagtuo sa pulong sa Dios makatabang kanato aron masugdan ang proseso sa pagdawat og dakong kausaban sa kasingkasing, gihangyo niya ang mga tawo sa paghunahuna og daghang pangutana. Kini nga mga pangutana makatabang sa atong pagtimbang-timbang sa kahimtang sa atong mga kasingkasing—sa mga tinguha ug mga pagbati sa sulod sa tawo.

Basaha ang Alma 5:14, ug markahi ang tulo ka pangutana nga gipangutana ni Alma sa mga tawo nga ilang hunahunaon sa ilang kaugalingon. Kining tulo ka mga pangutana naghulagway sa kausaban nga atong nasinati samtang migamit kita og hugot nga pagtuo sa katubsanan nga gitanyag pinaagi ni Jesukristo. Hinumdumi gikan sa miaging mga leksyon (tan-awa sa Mosiah 5 ug sa Mosiah 27) nga ang “matawo pag-usab” nagpasabut sa nasinati sa tawo nga kausaban dihang iyang gidawat si Jesukristo ug nagsugod og bag-ong kinabuhi dili lang isip Iyang disipulo apan usab isip Iyang anak nga lalaki o babaye sa espirituhanong paagi (tan-awa sa Mosiah 27:25).

Sa imong scripture study journal, isulat kon sa unsang paagi ang kausaban sa kasingkasing makita sa panagway sa usa ka tawo. Niini nga konteksto, ang pulong nga panagway nagpasabut sa panagway nga makita sa nawong sa tawo, nga nagpakita sa kinaiya sa tawo, taras, o espirituhanong kahimtang. Paghulagway og usa ka tawo nga imong nailhan kinsa nakadawat sa hitsura sa Manluluwas diha sa iyang panagway.

Sa medikal nga pagtuon ang cardiogram usa ka tsart nga gigamit sa mga doktor sa pagtimbang-timbang sa kahimtang sa atong pisikal nga kasingkasing. Nagtabang kini sa pag-ila sa mga kahimtang nga nagkinahanglang tambalan. Tun-i ang mga bersikulo sa Alma 5 nga gilista sa kinaubsan diha sa espirituhanong cardiogram sa ubos. Samtang tun-an nimo ang matag bersikulo, markahi ang box diha sa tsart nga pinakamaayong naghulagway unsaon nimo sa pagtubag ang pangutana o mga pangutana sa matag bersikulo. (Kon gusto nimo nga himoong mas pribado ang imong mga tubag, mahimo nimong kopyahon kini nga tsart sa lahi nga papel o sa imong personal nga journal ug dayon kompetuhon kini.)

Alma 5 Espirituhanong Cardiogram
Kanunay
Hapit makanunay
Kasagaran
Usahay
Panagsa ra, kon wala man gani
Mga bersikulo gikan sa Alma 5	15	16	19	26	27	28	29	30–31

Kon nakompleto na nimo ang imong espirituhanong cardiogram, basaha ang Alma 5:21–25. Pangitaa kon unsay gitudlo ni Alma mahitungod niini nga kamatuoran: Pinaagi sa pagsinati og kausaban sa kasingkasing, atong giandam ang atong kaugalingon aron makadawat og luna sa gingharian sa langit (ang celestial nga gingharian).

Buhata ang mosunod diha sa imong scripture study journal:
1. Paghimo og lista sa mga pulong nga gigamit ni Alma diha sa Alma 5:21−25 sa paghulagway sa kahimtang nga gusto nimong masinati karon.
2. Ipasabut kon ngano nga ang kausaban sa kasingkasing mag-andam kanato aron makadawat og luna sa gingharian sa langit.

Basaha ang Alma 3–36, ug hunahunaa unsay imong gibati mahitungod sa mensahe ni Alma. Pangitaa ang mga pulong ug hugpong sa mga pulong nga makatabang nimo nga matubag ang mosunod nga mga pangutana:

Unsa ang gidapit sa Ginoo nga akong buhaton?
Unsa ang mga ganti sa pagdawat niini nga pagdapit?
Unsa ang gitudlo niini nga mga bersikulo mahitungod sa Manluluwas?

Basaha ang mosunod nga pamahayag ni Presidente Ezra Taft Benson nga nagpakita unsang matang sa pagpakabuhi ang gusto sa mga tawo nga may kausaban sa kasingkasing:

Kon pilion ninyo ang pasunod kang Kristo, gipili ninyo nga mausab. …

“Ang Ginoo moimpluwensya gikan sa sulod sa tawo padulong sa gawas. Ang kalibutan moimpluwensya gikan sa gawas padulong sa sulod. Ang kalibutan mokuha sa mga tawo gikan sa mahugaw nga mga dapit. Apan si Kristo mokuha sa mga mahugaw gikan sa tawo, ug sila mismo ang mokuha sa ilang kaugalingon gikan sa mahugaw nga mga dapit. Ang kalibutan makahulma sa mga tawo pinaagi sa pag-usab sa ilang palibut. Si Kristo makausab sa mga tawo, kinsa mousab sa ilang palibut. Ang kalibutan makahulma og kinaiya sa tawo, apan si Kristo makausab og kinaiya sa tawo. …

“Ang mga lalaki [ug mga babaye] nga mag-usab alang kang Kristo giyahan ni Kristo. Sama ni Pablo mangutana sila “Ginoo, unsa ang buot nimong ipabuhat kanako?’ (Mga Buhat 9:6.) …

“Ang ilang kabubut-on nahisubay sa Iyang kabubut-on. (Tan-awa sa Juan 5:30.)

“Gihimo nila kanunay ang mga butang nga nagpahimuot sa Ginoo. (Tan-awa sa Juan 8:29.)

“Dili lang sila magpakamatay alang sa Ginoo, apan mas importante gusto nilang magpakabuhi alang Kaniya.

“Sudla ang ilang mga panimalay, ug ang mga litrato sa ilang mga bongbong, ang mga basahon sa ilang butanganan, ang musika sa kahanginan, ilang mga pulong ug mga buhat nagtug-an nga sila mga Kristiyano.

“Nagbarug sila isip mga saksi sa Dios sa tanang panahon, ug sa tanang butang, ug sa tanang dapit. (Tan-awa sa Mosiah 18:9.)

“Anaa sa ilang hunahuna si Kristo, samtang sila nagtan-aw Kaniya sa matag hunahuna. (Tan-awa sa D&P 6:36.)

“Anaa sa ilang kasingkasing si Kristo kay ang ilang mga pagbati napahimutang diha Kaniya hangtud sa hangtud. (Tan-awa sa Alma 37:36.)

“Hapit matag semana sila moambit sa sakrament ug mosaksi pag-usab ngadto sa ilang Mahangturong Amahan nga sila andam sa pagdala diha kanila sa ngalan sa Iyang Anak, sa kanunay mohinumdom Kaniya, ug maghupot sa Iyang mga sugo. (Tan-awa sa Moro. 4:3.)” (“Born of God,” Ensign, Nob. 1985, 5–7).

Sa pagtapos niini nga leksyon, pagbadlis og usa ka ideya gikan sa pamahayag ni Presidente Benson nga nakatabang kanimo sa paghunahuna kon unsa nga matang sa pagpakabuhi ang imong gusto isip tawo nga nakasinati og kausaban sa kasingkasing. Paghimo og tumong nga makatabang nimo aron magamit unsay imong gibati samtang gitun-an nimo ang mga pagtulun-an ni Alma mahitungod sa pagsinati og kausaban sa kasingkasing (mahimo nimong isulat kini sa imong personal journal o sa lahi nga papel). Samtang padayon ang imong tinguha nga matawo sa Dios ug makasinati og kausaban sa kasingkasing, ikaw mahimong andam sa pagsulod sa gingharian sa Dios.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 5:1–36 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: