1 Nephi 12–14

Pasiuna

Ang istorya sa panan-awon ni Nephi, nga nagsugod sa 1 Nephi 11, nagpadayon hangtud sa 1 Nephi 12–14. Sa iyang panan-awon nakita ni Nephi ang makahahadlok nga mga trahedya, lakip na sa umaabut nga kalaglagan sa iyang kaliwatan. Nakita niya ang mga dautan nga mikuha sa yano ug bililhon nga mga kamatuoran gikan sa Biblia, maoy hinungdan sa espirituhanon nga pagkapukan sa kadaghanan. Bisan pa man, ang panan-awon ni Nephi naghatag usab kaniya og rason alang sa dakong paglaum sa umaabut. Iyang nakita si Columbus ug ang pagkolonya sa Amerika. Iyang nakita nga ang Ginoo moandam sa agianan alang sa Pagpahiuli sa ebanghelyo, lakip ang pagpahiuli sa daghang yano ug bililhon nga mga kamatuoran nga nangawala. Nasaksihan ni Nephi sa katapusang mga adlaw kon sa unsang paagi ang Ginoo motabang ug manalipod niadtong magpuyo nga matarung. Samtang magtuon ka sa 1 Nephi 12–14, pamalandungi ang kaimportante sa yano ug bililhon nga mga kamatuoran diha sa imong kinabuhi nga gitudlo sa Basahon ni Mormon ug sa ubang mga kasulatan sa katapusang mga adlaw. Samtang maningkamot ka sa pagpuyo nga matarung ug motahud sa imong mga pakigsaad uban sa Dios, ikaw usab magmalampuson batok sa kadautan.

1 Nephi 12

Si Nephi makakita sa umaabut nga mga nasud sa Nephite ug Lamanite

Sa 1 Nephi 12, si Nephi mihulagway unsay iyang nakita nga kaugmaon sa iyang kaliwatan ug sa unsang paagi sila maapektuhan sa mga impluwensya nga gisimbolohan sa gabon sa kangitngit ug sa dako ug lapad nga gambalay. Migamit siya sa pulong nga binhi sa pag-refer sa mga kaliwatan.

Nakita ni Nephi nga ang uban niya nga mga kaliwatan modawat sa tanan nga mga panalangin sa Pag-ula. Bisan pa man, nakita usab niya nga ang iyang mga kaliwatan malaglag sa mga Lamanite. Basaha ang 1 Nephi 12:19, ug linyahi ang mga rason ngano ang mga Nephite malaglag. Hunahunaa kon sa unsang paagi makapanalipud ka batok sa garbo ug malikay sa mga tintasyon sa yawa.

1 Nephi 13:1–9

Nakita ni Nephi ang dako ug salawayon nga simbahan

Lingini ang bisan asa sa mosunod nga mga sport nga imong naapilan o natan-awan, ug idugang sa lista ang bisan unsang sport nga imong naapilan o natan-awan:

Soccer
Cricket
Basketball
Baseball
Pingpong
Tennis
Rugby
Ice Hockey
Volleyball
American Football

Sa propesyunal nga mga sport, ang mga team kasagaran magtuon sa nangaging mga dula ug mga taktika sa ilang mga kontra sa dili pa sila magsangka. Ang pagsabut sa katuyoan sa kontra, mga pamaagi, ug mga taktika makatabang kanato sa pagpangandam aron kita makadepensa sa atong mga kaugalingon batok kanila.

Sa 1 Nephi 13, gihulagway ni Nephi unsa ang iyang nakita bahin niadtong kinsa mosupak sa Simbahan sa Dios sa ulahing mga adlaw. Basaha ang 1 Nephi 13:1–6, ug ilha unsa ang nakita ni Nephi nga matukod taliwala sa mga Hentil ug unsa ang gisulti sa anghel kabahin niini.

Kining “dako ug salawayon nga simbahan” nga nakita ni Nephi wala magsimbolo og usa ka partikular nga grupo, denominasyon, o simbahan. Si Elder Bruce R. McConkie sa Korum sa Napulog Duha ka mga Apostoles mipatin-aw niini nga “tanan … nga mga organisasyon sa bisan unsa nga ngalan o matang … nga gidisenyo aron sa pagdala sa mga tawo ngadto sa agianan nga mopalayo gikan sa Dios ug sa iyang mga balaod ug sa ingon gikan sa kaluwasan sa gingharian sa Dios” (Mormon Doctrine, 2nd ed. [1966], 137–38). Mahimo nimong isulat ang depinisyon ni Elder McConkie sunod sa 1 Nephi 13:4–6.

Basaha ang 1 Nephi 13:8–9, ug ilha ang mga tinguha ug hinungdan sa dako ug salawayon nga simbahan.

Tubaga ang mosunod nga pangutana diha sa imong scripture study journal: Ngano kaha nga importanting masayud nga si Satanas miorganisar sa iyang mga kaubanan aron pagdala kanato palayo sa Dios ug sa Iyang mga balaod?

Samtang magtuon pa ka og dugang sa 1 Nephi 13, makakita ka og usa ka paagi nga ang dako ug salawayon nga simbahan naningkamot sa pagbabag niadtong nangita sa Manluluwas.

1 Nephi 13:10–42

Si Nephi nakakita sa umaabut nga mga Hentil sa Biblia, ang Basahon ni Mormon, ug ubang mga kasulatan sa ulahing mga adlaw

Aron pagbatok sa mga epekto sa dako ug salawayon nga simbahan, ang Ginoo nag-andam og paagi alang sa Pagpahiuli sa Iyang ebanghelyo. Sa 1 Nephi 13, nakita nang daan ni Nephi ang maong mga hitabo sama ni Columbus ug ang mga magpapanaw padulong sa yuta nga saad tungod kay “ang Espiritu sa Dios … migiya [anaa o nagbuhat] [kanila]” (tan-awa sa 1 Nephi 13:12–13). Nakita usab niyang daan ang Gubat sa Amerika alang sa Kagawasan—sa dihang “ang mga Hentil kinsa nakalingkawas gikan sa pagkabihag” nakig-away batok sa “ilang inahan nga mga Hentil [kinsa] nagkatigum … batok kanila,” apan sila “giluwas pinaagi sa gahum sa Dios gikan sa mga kamot sa tanang uban nga mga kanasuran” (tan-awa sa 1 Nephi 13:16–19).

Basaha ang 1 Nephi 13:20–23, ug ilha ang basahon nga nakita ni Nephi nga dad-on sa mga hentil nga tig-kolonya sa yuta nga saad.

Isulat “ang Biblia” sa imong mga kasulatan sa 1 Nephi 13:20. Si Nephi mipasabut nga ang Biblia mahimong “mahinungdanon kaayo” ngari kanato (1 Nephi 13:23) ug nga sa pagsulat niini sa orihinal “kini naglangkob sa kahingpitan sa ebanghelyo sa Ginoo” (1 Nephi 13:24). Gamita ang 1 Nephi 13:26–27, 29 aron masulatan ang mga blanko sa mosunod nga summary:

Ang dako ug salawayon nga simbahan mikuha sa “daghan nga mga bahin nga ug labing ; ug daghan usab sa Ginoo nga sila mikuha” gikan sa Biblia (1 Nephi 13:26). Ilang gikuha kini nga mga butang sa “ mga matarung nga mga pamaagi sa Ginoo, nga sila unta mga mata ug mga kasingkasing sa mga katawhan” (1 Nephi 13:27). Tungod kay kini nga mga butang nangawala, “hilabihan ka daghan kaayo ang ” (1 Nephi 13:29).

Basaha og usab ang summary human nimo masulatan ang mga blanko.

Usa sa mga katuyoan sa dako ug salawayon nga simbahan mao ang “[pagtuis] sa mga matarung nga mga pamaagi sa Ginoo” (1 Nephi 13:27) pinaagi sa pagkuha sa daghang yano ug bililhon nga mga kamatuoran. Ang “pagtuis” mao ang pagbali o pagpalayo gikan sa usa ka butang nga matarung. Hunahunaa ang negatibo nga mga sangputanan sa pagbali o pagpalayo gikan sa “matarung nga mga pamaagi sa Ginoo.”

Gamita ang imong mga kasulatan sa pagtubag sa mosunod nga mga pangutana:

Sumala sa 1 Nephi 13:34, unsa man ang dad-on sa Ginoo tungod sa iyang kalooy? (Makatabang ang masayud nga ang ulohan o tawag nga “Kordero” nag-refer sa Manluluwas, si Jesukristo.)
Sa 1 Nephi 13:35–36, unsa ang gisulti sa Manluluwas nga pagatagoan aron modangat ngadto sa mga Hentil?
Sa 1 Nephi 13:36, unsa ang gisulti sa anghel nga gisulat sa talaan nga gitago—sa Basahon ni Mormon?
Agig dugang sa Basahon ni Mormon, unsa ang “lain nga mga basahon” sa 1 Nephi 13:39 ang gi-refer?

Basaha ang 1 Nephi 13:40–41, ug linyahi unsa ang ipahibalo sa Basahon ni Mormon ug niining “lain nga mga basahon” ngadto sa mga katawhan. Mahinungdanon ang pagtan-aw nga kinahanglan kitang moduol sa Manluluwas “sumala sa mga pulong nga matukod pinaagi sa ba-ba sa Kordero” (1 Nephi 13:41)—ang mga kasulatan.

Pinaagi niini nga porsyon sa panan-awon ni Nephi, atong makat-unan nga ang Basahon ni Mormon ug ang mga kasulatan sa ulahing mga adlaw mipahiuli sa yano ug bililhon nga mga kamatuoran nga makatabang kanato sa pagkasayud nga si Jesukristo mao ang Anak sa Dios ug makatabang kanato sa pagkasayud unsaon pagduol ngadto Kaniya.

Isulat ang tubag sa mosunod nga mga pangutana diha sa imong scripture study journal:
1. Sa unsang paagi ang yano ug bililhon nga mga kamatuoran sa Basahon ni Mormon ug ubang mga kasulatan sa ulahing mga adlaw nakaimpluwensya sa imong pagpamatuod kang Jesukristo?
2. Sa unsang paagi kini nakatabang kanimo sa pagsabut ug pagsunod sa Iyang ebanghelyo?

Hunong sa makadiyot aron sa pagtimbang-timbang sa unsang paagi ang imong pagtuon sa kasulatan nakatabang kanimo nga mas mapaduol sa Manluluwas.

1 Nephi 14:1–17

Nakita ni Nephi ang gubat tali sa dako ug salawayon nga simbahan ug ang Simbahan sa Kordero sa Dios

Sa 1 Nephi 14 atong mabasa ang kabahin sa gubat tali sa dako ug salawayon nga simbahan ug sa Simbahan sa Kordero sa Dios. Basaha ang 1 Nephi 14:10–13, ug ilha asa nga dapig ang daghang mga tawo. Tan-awa sa 1 Nephi 14:12 ngano ang numero sa mga tawo nga nagsuporta sa Simbahan sa Kordero dyutay ra ug ngano ang dako ug salawayon nga simbahan nakahimo sa pagpundok og katawhan.

Unsay imong bation kon dyutay ra kamo ug nakiggubat? Basaha ang 1 Nephi 14:14, ug linyahi ang mga pulong nga nag-ila sa tabang “sa mga santos sa simbahan sa Kordero” ug “sa mga katawhan sa pakigsaad sa Ginoo” nga madawat samtang sila makiggubat batok sa dautan.

Ang importante nga baruganan sa ebanghelyo nga gitudlo sa 1 Nephi 14:1–17 mao nga samtang kita magpuyo sa matarung nga paagi ug maghupot sa mga pakigsaad, ang gahum sa Dios motabang kanato nga modaug batok sa dautan.

Pagsulat og mubo nga paragraph sa imong scripture study journal nga nagpasabot sa unsang paagi nga isip usa sa “mga tawo sa pakigsaad sa Ginoo” ug isip “gisangkapan sa katarung” (nagpuyo sa matarung nga paagi) nakatabang kanimo nga modaug batok sa mga tintasyon nga makadala kanimo palayo sa Dios ug sa Iyang mga balaod.

Nakita ni Nephi nga sa katapusang mga adlaw kadtong nagdapig sa dako ug salawayon nga simbahan makakita sa “ilang hingpit nga kalaglagan” (1 Nephi 14:3). Makaangkon ikaw og pagsalig nga ang gingharian sa Dios magmadaugon sa katapusang mga adlaw.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Nephi 12–14 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: