Human motudlo mahitungod sa “higpit ug pig-ot nga dalan nga mopadulong sa kinabuhi nga dayon” (2 Nephi 31: 18), nakita ni Nephi nga ang iyang katawhan naghunahuna kon unsay angay nilang buhaton human makasugod niana nga dalan. Iyang gitubag ang ilang mga pangutana pinaagi sa pagdasig nila sa “pagbusog sa mga pulong ni Kristo” ug “mag-ampo sa kanunay” (2 Nephi 32:3, 9). Iyang gisiguro kanila nga kon sila mobuhat niini nga mga butang, ang Espiritu Santo motabang kanila nga mahibalo unsay buhaton.
Si Nephi mitambag kanato sa pagtinguha og balaan nga direksyon pinaagi sa mga pulong ni Jesukristo
Paghunahuna og higayon nga ang usa ka tawo mihatag kanimo og direksyon aron makaadto gikan sa usa ka dapit padulong sa lain. Sayon ra ba o lisud ang pagsabut niadto nga mga direksyon? Nganong importante man nga adunay tawo nga mohatag og klaro nga mga direksyon?
Sa miagi nga leksyon imong gitun-an ang pipila ka mga direksyon nga gihatag ni Nephi ngadto sa iyang katawhan. Human mopakigbahin niini nga mga direksyon, siya miingon, “Kini mao ang agianan” (2 Nephi 31:21). Dali-a pagsiksik ang 2 Nephi 31:17–18, ug ribyuha kon sa unsang paagi ang usa ka tawo makasugod diha sa dalan padulong sa kinabuhing dayon. Dayon basaha ang 2 Nephi 32:1, ug pangita og usa ka pangutana nga anaa sa kasingkasing sa katawhan kabahin sa unsay gitudlo ni Nephi kanila. Ihulagway ang pangutana sa mga tawo sa imong kaugalingong mga pulong:
Basaha ang 2 Nephi 32:2–3, ug pangitaa kon unsay gisulti ni Nephi nga kinahanglan natong buhaton human kita makasulod diha sa dalan. Mahimong makatabang nga masayud nga ang pagpamulong sa pinulongan sa mga anghel, sumala ni Presidente Boyd K. Packer, Presidente sa Korum sa Napulog Duha ka mga Apostoles, “yanong nagpasabut nga kamo makasulti sa gahum sa Espiritu Santo” (“Ang Gasa sa Espiritu Santo: Unsa ang Angay Mahibaloan sa Matag Miyembro,” Liahona, Ago. 2006, 21).
Mahimo nimong markahan ang mga pulong nga “pagbusog sa mga pulong ni Kristo” diha sa 2 Nephi 32:3 (kini nga bersikulo usa ka scripture mastery passage). Si Nephi migamit sa mga pulong nga “sa mga pulong ni Kristo” aron sa paghulagway sa mga pagtulun-an nga dinasig sa Espiritu Santo. Paglista og pipila ka mga paagi o mga dapit nga makabasa, makadungog, o makadawat kamo og mga pagtulun-an nga dinasig sa Espiritu Santo.
Ang mga pulong ni Kristo naglakip sa mga kasulatan ug sa mga pulong sa mga propeta sa modernong panahon. Aron sa pagtabang kanimo sa pagpamalandong kon unsay gipasabut sa “pagbusog sa mga pulong ni Kristo”, basaha ang mosunod nga mga kinutlo:
Imahe
Elder Russell M. Nelson
Si Elder Russell M. Nelson sa Korum sa Napulog Duha ka mga Apostoles mitudlo: “Ang pagbusog nagpasabut og sobra pa kay sa pagtilaw. Ang pagbusog nagpasabut og pagtagamtam. Atong tagamtamon ang mga kasulatan pinaagi sa pagtuon niini diha sa diwa sa maanindot nga pagdiskubre ug sa matinud-anon nga pagsunod. Kon kita magbusog sa mga pulong ni Kristo, kini … mahimong hingpit nga parte sa atong kinaiyahan.” (“Living by Scriptural Guidance,” Ensign, Nob. 2000, 17).
Si Elder Robert D. Hales sa Korum sa Napulog Duha ka mga Apostoles miingon: “Kon kamo ug ako magbusog sa mga pulong ni Kristo, kinahanglan kitang magtuon sa mga kasulatan ug magkat-on gikan sa Iyang pulong pinaagi sa pagpamalandong niini ug sa paghimo niini nga parte sa matag hunahuna ug lihok” (“Healing Soul and Body,” Ensign, Nob. 1998, 15).
Sa imong scripture study journal, isulat sa imong kaugalingong mga pulong kon unsa kaha ang gipasabut nga magbusog sa mga pulong ni Kristo.
Pamalandungi ang kalainan tali sa mga pulong nga nagbusog, nag-snack, ug nagpagutom. Hunahunaa sa makadiyot kon sa unsang paagi ang pipila ka dili kaayo epektibo nga mga paagi sa pagtuon sa mga pulong ni Kristo tingali ikakumpara sa pag-snack o gani sa pagpagutom.
Tiwasa ang mosunod nga baruganan sumala sa 2 Nephi 32:3: Kon magbusog kita sa mga pulong ni Kristo, ang mga pulong ni Kristo .
Sa imong scripture study journal, pagsulat mahitungod sa usa ka panahon dihang ang pagbusog sa mga pulong ni Kristo nakatabang kanimo nga mahibalo unsay buhaton sa imong kinabuhi o paghulagway og usa ka sitwasyon nga imong giatubang karon diin ang pagbusog sa mga pulong ni Kristo makatabang kanimo.
Sulati ang blangko sa ubos aron sa pagtimbang-timbang kon unsa ka maayo ang imong pagbusog sa mga pulong ni Kristo ug sa unsang paagi ka mahimong molambo. Sa matag usa sa mga ehemplo sa ubos, isulat ang pulong nga—nagbusog, nag-snack, o nagpagutom—nga labing naghulagway kon unsa ka maayo ka nga nagtinguha nga masayud sa mga pulong ni Kristo niana nga sitwasyon. Sama pananglit, ikaw tingali nagbusog sa mga kasulatan sa imong personal nga pagtuon apan nag-snack lamang sa mga pulong ni Kristo diha sa kinatibuk-ang komperensya.
Personal nga pagtuon sa kasulatan:
Sakrament miting:
Kinatibuk-ang komperensya:
Pagtuon sa kasulatan sa pamilya:
Seminary:
Family home evening:
Miting sa korum sa Aaronic Priesthood o klase sa Young Women:
Sunday School:
Personal nga pag-ampo:
Gahini kadiyot og panahon sa pagpili og usa sa mga kalihokan diin imong gisulat nga sa pagkakaron “nag-snack” o “nagpagutom” ka. Sa imong scripture study journal, isulat kon unsaon nimo nga mas maayo ang imong pagbusog sa mga pulong ni Kristo niana nga sitwasyon. Dayon sunda ug buhata kini.
Basaha ang 2 Nephi 32:4–7, ug pamalandungi ang mga tubag sa mosunod nga mga pangutana (imong isulat ang imong tubag sa usa sa mga pangutana alang sa assignment 4):
Sa bersikulo 4, unsa kaha ang gipasabut sa “mangutana” o “motuktok”? Sa unsang paagi ang pag-ampo maoy usa ka maayo nga ehemplo sa pagpangutana o pagpanuktok?
Usab sa bersikulo 4, unsay gisulti ni Nephi nga maoy sangputanan niadtong dili mangutana o manuktok?
Sa bersikulo 5, unsa nga panalangin ang gisaad ni Nephi nga atong maangkon kon atong dawaton ang Espiritu Santo?
Sa bersikulo 7, unsa ang mga kinaiya sa katawhan ni Nephi nga nakapahimo kaniya nga magbangutan alang kanila? Ngano kaha nga kini nga mga kinaiya makapugong sa katawhan sa pagsiksik ug pagsabut sa “mahinungdanon nga kasayuran”?
Pagsulat sa imong scripture study journal og usa ka kamatuoran nga imong nakat-unan gikan sa 2 Nephi 32:4–7, ug ipasabut kon nganong kini nga kamatuoran importante sa imong kinabuhi.
Unsa ka dugay kaha nga imong masag-ulo ang 2 Nephi 32:3 kon imo kining i-recite sa matag higayon nga mokaon ka? Isulat ang bersikulo sa usa ka kard o sa gamay nga piraso sa papel, ug dala-dalaha kini. Sa mosunod nga pipila ka adlaw, pagbusog sa mga pulong ni Kristo pinaagi sa pagtinguha sa pagsag-ulo sa 2 Nephi 32:3 sa dili pa ka mokaon ug sa pagkahuman nimo og kaon sa matag kan-anan. Sa imong scripture study journal, i-report kon pila ka kan-anan usa nimo nasag-ulo ang kasulatan.
Daghang mga tawo moingon nga human sila nakasala dili sila gusto nga mag-ampo ngadto sa Langitnong Amahan. Hunahunaa sa makadiyot kon nganong ingon niini. Kinsay dili gusto nga mag-ampo ka bisan kanus-a, ilabi na kon human ka nakasala? Ngano? Tan-awa sa 2 Nephi 32:8 kon unsay gitudlo sa Espiritu Santo nga atong buhaton kabahin sa pag-ampo. Pamalandungi ang mosunod nga mga pangutana: Ngano kaha nga gusto sa Ginoo nga mag-ampo ka? Ngano kaha nga dili gusto si Satanas nga mag-ampo ka?
Basaha ang 2 Nephi 32:9, ug pangitaa kon kapila kita angay nga mag-ampo ug unsa nga mga panalangin ang gisaad kanato sa Ginoo kon kita mag-ampo. Samtang imong basahon kini nga bersikulo, tingali makatabang nga masayud nga ang mopahinungod nagpasabut nga ihalad ngadto sa pag-alagad sa Dios o himoon nga balaan.
Gikan sa 2 Nephi 32:9 atong nakat-unan kini nga baruganan: Samtang mag-ampo kita sa kanunay, makahimo kita sa pagbuhat sa tanan nga gustong ipabuhat sa Ginoo kanato alang sa kaayohan sa atong mga kalag. (Timan-i nga ang 2 Nephi 32:8–9 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)
Imahe
young woman praying
Pamalandungi kon unsay gipasabut sa pag-ampo sa kanunay. Samtang imong basahon ang mosunod nga pamahayag ni Elder David A. Bednar sa Korum sa Napulog Duha ka mga Apostoles, linyahi ang usa o sobra pa nga mga paagi nga makahimo kita sa pagtuman sa sugo nga “mag-ampo sa kanunay”:
Imahe
Elder David A. Bednar
“Tingali adunay mga butang sa atong kinaiya, sa atong pamatasan, o kabahin sa atong espirituhanon nga pagtubo diin kita nanginahanglan sa pagpakigtambag ngadto sa Langitnong Amahan diha sa pag-ampo sa buntag. Human sa pagpahayag og tukma nga pagpasalamat alang sa mga panalangin nga nadawat, kita mangamuyo alang sa pagsabut, panudlo, ug panabang sa pagbuhat sa mga butang nga dili nato mabuhat sa atong kaugalingong kusog lamang. …
“Sulod sa dagan sa adlaw, maghupot kita og pag-ampo diha sa atong kasingkasing alang sa mapadayunon nga panabang ug paggiya. …
“Atong namatngunan nga atol gayud niini nga adlaw nga adunay mga higayon diin sa kasagaran kita may purohan sa pagsulti og sakit, ug kita dili mosulti og sakit; o tingali kita may kahilig nga masuko, apan kita dili masuko. Atong mamatikdan ang langitnon nga panabang ug kalig-on ug mapainubsanon nga nakaila sa mga tubag sa atong pag-ampo. Gani diha niana nga higayon sa pag-ila, mohalad kita og hilum nga pag-ampo sa pagpasalamat.
“Sa pagkahuman sa atong adlaw, moluhod na usab kita ug motaho pagbalik ngadto sa atong Amahan. Atong balikon pagtan-aw ang mga panghitabo niana nga adlaw ug mopahayag og kinasingkasing nga mga pagpasalamat alang sa mga panalangin ug sa panabang nga atong nadawat. Kita maghinulsol ug, uban sa panabang sa Espiritu sa Ginoo, atong hibaloan ang mga paagi nga atong mabuhat ug mahimo nga mas labaw pa ka maayo sa pagka-ugma. Sa ingon ang atong pag-ampo sa gabii mapalig-on ug usa ka sumpay sa atong pag-ampo sa buntag. Ug ang atong pag-ampo sa gabii mao usab ang pagpangandam alang sa makahuluganon nga pag-ampo sa buntag.
“Buntag ug gabii nga mga pag-ampo—ug ang tanang gisal-ot nga mga pag-ampo— dili walay kalabutan, lahi nga mga panghitabo; hinonoa, sila gisumpay matag adlaw ug daghang mga adlaw, mga semana, mga bulan, ug gani mga katuigan. Mao kini ang kabahin kon giunsa nato sa pagtuman ang tambag sa kasulatan sa ‘pag-ampo sa kanunay’ (Lucas 21:36; 3 Nephi 18:15, 18; D&P 31:12). Ang ingon nga makahuluganon nga mga pag-ampo makatabang sa pagpanag-iya sa labing taas nga mga panalangin ang Dios nagtagana alang sa Iyang matinud-anon nga mga anak” (“Pag-ampo sa Kanunay,” Ensign o Liahona, Nob. 2008, 41–42).
Isulat sa imong scripture study journal kon sa unsa kaha nga paagi ang pagsunod sa mga instruksyon ni Elder Bednar kon unsaon sa “pag-ampo sa kanunay” makatabang kanimo sa imong kinabuhi.
Sa pagtapos niini nga leksyon, basaha ang mosunod nga pagpamatuod gikan ni Elder Spencer J. Condie, kinsa niadtong higayona nagserbisyo isip sakop sa Seventy, kabahin sa pagbusog sa mga pulong ni Kristo: “Tingali nag-atubang kamo og mga desisyon kabahin sa pagmisyon, sa inyong trabaho sa umaabut, ug, sa katapusan, kaminyoon. Samtang magbasa kamo sa mga kasulatan ug mag-ampo og direksyon, dili tingali ninyo tinuoray nga makita ang tubag diha sa giimprinta nga mga pulong diha sa pahina, apan sa inyong pagbasa inyong madawat ang piho nga mga impresyon, ug mga pag-aghat, ug, sama sa gisaad, ang Espiritu Santo ‘mopakita nganha kaninyo sa tanan nga mga butang nga kinahanglan inyong buhaton’ [2 Nephi 32:5]” (“Becoming a Great Benefit to Our Fellow Beings,” Ensign, May 2002, 45).
Sa mosunod nga 24 ka oras, paningkamuti nga mahilakip sa imong kinabuhi ang unsay imong nakat-unan mahitungod sa “pag-ampo sa kanunay.” Sa pagsugod sa sunod nga leksyon, dapiton ka sa pag-report sa imong mga hunahuna ug mga pagbati mahitungod niini nga kasinatian. Isulat sa imong scripture study journal kon sa unsang paagi ang pagpaningkamot nga “mag-ampo sa kanunay” makahimo og kalainan sa imong mga pag-ampo.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 2 Nephi 32 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: