2 Nephi 9

Pasiuna

Ang imong pagtuon sa wali ni Jacob, nga nagsugod sa 2 Nephi 6–8, magpadayon sa 2 Nephi 9. Sa 2 Nephi 6–8 nagtuon ka sa mga pagtulun-an ni Jacob mahitungod sa kalooy sa Manluluwas ug sa Iyang gahum sa pagluwas sa balay ni Israel gikan sa ilang nawala ug nagkatibulaag nga kahimtang. Sa kapitulo 9 imong tun-an ang pagpamatuod ni Jacob kabahin sa gahum sa Pag-ula sa Manluluwas aron sa pagluwas kanato gikan sa mga epekto sa Pagkapukan, lakip sa pisikal ug espirituhanon nga kamatayon ingon man usab sa mga sangputanan sa atong mga sala. Si Presidente Joseph Fielding Smith mitudlo nga ang 2 Nephi 9 “usa sa labing makapalamdag nga mga pakigpulong nga nahatag sukad kalabut sa pag-ula. … Kinahanglang basahon kini pag-ayo sa matag tawo nga nagtinguha og kaluwasan”(Answers to Gospel Questions, comp. Joseph Fielding Smith Jr., 5 vols. [1957–66], 4:57).

2 Nephi 9:1–9

Si Jacob nagtudlo nga ang Pagkapukan nagdala og pisikal ug espirituhanon nga kamatayon sa tanang katawhan

Unsay mosantup sa hunahuna kon imong hunahunaon ang pulong nga mangtas?

Ang pulong nga mangtas kasagaran nagpasabut sa usa ka butang nga makalilisang ug makahimo sa pagpahamtang og dako nga kadaot. Bisan tuod daghan sa mga tawo maghunahuna lang sa hinanduraw nga mga nilalang kon maghunahuna sila og usa ka mangtas, ikonsiderar kon aduna bay usa ka butang nga tinuoray nga makahimo sa pagdala og malungtarong kadaut kanimo ug, busa, tinud-anay nga makahahadlok. Si Jacob migamit sa imahe sa usa ka mangtas aron sa pagsimbolo og usa ka makahahadlok nga kahimtang nga atong atubangong tanan sa mortalidad. Basaha ang 2 Nephi 9:10, ug ilha ang duha ka mga elemento sa mangtas nga gihulagway ni Jacob. Dayon sulati ang mga blangko diha sa tsart sa ubos.

Makalilisang nga Mangtas
K	I
“k sa l”	“k sa e”

Importante nga masabtan nga sa dihang si Jacob mitudlo mahitungod sa “kamatayon sa espiritu” wala siya magpasabut nga ang atong mga espiritu tinud-anay nga mamatay, apan nga kita espirituhanong mahimulag o isalikway gikan sa atubangan sa Dios (tan-awa sa 2 Nephi 9:6). Kini nga pagkahimulag kasagarang gipasabut isip espirituhanon nga kamatayon diha sa mga kasulatan. Mahimo nimong isulat ang mga pulong nga isalikway gikan sa atubangan sa Dios diha sa margin sa imong mga kasulatan tupad sa “kamatayon sa espiritu” diha sa 2 Nephi 9:10.

Basaha ang 2 Nephi 9:6, ug timan-i nga misugod si Jacob pinaagi sa paghisgut mahitungod sa kamatayon sa lawas ug natapos pinaagi sa paghisgut sa pagsalikway gikan sa atubangan sa Dios. Siksika pag-ayo kini nga bersikulo. Unsa nga panghitabo ang midala sa pisikal nga kamatayon ug espirituhanon nga kamatayon sa tibuok katawhan?

Basaha ang 2 Nephi 9:7–9, ug hibaloi kon unsay gitudlo ni Jacob nga mahitabo sa atong mga lawas ug sa atong mga espiritu kon walay Pag-ula ug kon magpabilin sa hangtud ang pisikal ug espirituhanon nga kamatayon. Sa dili pa ka mobasa, makatabang nga imong masayran ang kahulugan sa mosunod nga mga termino nga gigamit ni Jacob sa bersikulo 7: Ang mga pulong nga “ang unang hukom nga midangat sa tawo” (2 Nephi 9:7) nagpasabut sa mga sangputanan sa Pagkapukan ni Adan ug Eva. Ang termino nga madunuton nagpasabut sa mortal nga lawas tungod kay kini dili hingpit ug sa katapusan mamatay. Ang termino nga dili madunuton nagpasabut sa nabanhaw nga lawas, nga mabuhi sa kahangturan.

Sa imong scripture study journal, paglista og pipila ka mga pulong nga imong nahibaloan sa 2 Nephi 9:7–9 nga naghulagway kon unsay mahitabo sa atong mga lawas ug mga espiritu kon walay Pag-ula.

Basaha ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles aron maklaro kon unsay atong kapalaran kon walay Pag-ula ni Jesukristo: “Kon ang atong pagkahimulag sa Dios ug ang atong pisikal nga kamatayon permanente, ang moral nga kabubut-on walay pulos. Oo, gawasnon kita sa paghimo og mga pagpili, apan unsa man ang punto? Ang resulta kanunay nga mao ra gihapon bisan unsa pa ang atong mga buhat: kamatayon nga walay paglaum nga mabanhaw ug walay paglaum sa langit. Bisan unsa ka maayo o kadautan nga kita gusto nga mahimo, kitang tanan mamahimo ra nga ‘mga anghel ngadto sa usa ka yawa’” (“Moral Agency,” Ensign, Hunyo 2009, 50).

Pagsulat og sentence sa imong scripture study journal nga nagpasabut sa imong kaugalingong mga pulong kon unsay imong hunahuna sa gisulti ni Elder Christofferson mahitungod sa atong napukan nga kahimtang. Dugangi og mubo nga pagpasabut kon nganong gitandi ni Jacob ang pisikal nga kamatayon ug ang pagkahimulag gikan sa Dios ngadto sa usa ka “makalilisang nga mangtas.”

2 Nephi 9:10–27

Si Jacob nagtudlo kon sa unsang paagi ang pag-antus sa Manluluwas miluwas kanato gikan sa mga epekto sa pagkapukan ug sa mga sangputanan sa sala

Wala kita pasagdi sa Dios nga mag-antus sa kinatibuk-ang mga epekto “niana nga makalilisang nga mangtas, kamatayon ug impyerno.” Basaha ang 2 Nephi 9:10, ug markahi kon unsay giandam sa Dios alang kanato.

Basaha ang mosunod nga pasumbingay gikan ni Presidente Joseph Fielding Smith nga naghulagway sa atong panginahanglan alang sa usa ka Manluluwas:

“Usa ka tawo nga naglakaw sa dalan nahulog ngadto sa usa ka lungag nga lawom ug ngitngit kaayo nga dili siya makasaka paibabaw ug makaangkon og balik sa iyang kagawasan. Unsaon niya pagluwas sa iyang kaugalingon gikan sa iyang kahimtang? Dili sa bisan unsa nga paningkamot sa iyang bahin, tungod kay walay paagi nga makaeskapo sa lungag. Nangayo siya og tabang ug usa ka buotang tawo, nga nakadungog sa iyang pagpangayo og tabang, nagdali sa pagtabang kaniya ug pinaagi sa pagpaubus og hagdanan, naghatag kaniya sa paagi nga siya makahimo sa pagsaka pag-usab.

“Mao gayud kini ang kahimtang nga gibutang ni Adan ang iyang kaugalingon ug ang iyang kaliwatan, dihang mikaon siya sa gidili nga bunga. Ang tanan nagkatapok diha sa lungag, walay usa nga makaadto sa ibabaw ug makatabang sa uban. Ang lungag mao ang pagpahawa gikan sa presensya sa Ginoo ug ang temporal nga kamatayon, ang pagkadugta sa lawas. Ug kay ang tanan ubos sa kamatayon, walay makahatag sa paagi sa paglingkawas.

“Busa, sa iyang walay kinutuban nga kalooy, ang Amahan nakadungog sa hilak sa iyang mga anak ug mipadala sa iyang Bugtong Anak, kinsa dili ulipon sa kamatayon ni sa sala, aron sa paghatag og paagi nga makalingkawas. Iya kining gibuhat pinaagi sa iyang walay kinutuban nga pag-ula ug walay katapusan nga ebanghelyo”(Doctrines of Salvation, ed. Bruce R. McConkie, 3 vols. [1954–56], 1: 126–27).

Kadaghanan sa mensahe ni Jacob sa kapitulo 9 nagtutok sa paagi nga giandam sa Ginoo alang kanato aron makalingkawas sa pagkupot sa pisikal ug espirituhanon nga kamatayon, ug nagsiguro kini kanato nga kita maluwas.

Siksika ang 2 Nephi 9:5, 19–21, ug tubaga ang mosunod nga mga pangutana diha sa imong scripture study journal:
1. Sumala sa 2 Nephi 9:5, 21, unsa ang nasinati sa Manluluwas aron maluwas kita gikan sa kamatayon ug impyerno?
2. Alang kang kinsa nga nag-antus ang Manluluwas, sumala sa 2 Nephi 9:21?

Hunahunaa kon unsa ka daghan ang mga tawo nga “nahisakop sa banay ni Adan” (2 Nephi 9:21). Naglakip kini sa tanan nga nabuhi kaniadto, nga nabuhi karon, ug sa mabuhi sa umaabut dinhi sa yuta—lakip kanimo. Mahimo nimong isulat ang imong pangalan tupad sa 2 Nephi 9:21 aron sa paghinumdom nga ang sakripisyo sa Manluluwas gihimo alang kanimo.

Si Jacob nagtudlo nga ang pag-antus sa Manluluwas motabang kanato nga makalingkawas gikan sa makahahadlok nga mangtas—ang pisikal nga kamatayon ug ang pagsalikway gikan sa presensya sa Dios hangtud sa kahangturan. Basaha ang 2 Nephi 9:22, ug pangitaa ang mga pulong nga nag-ingon nga makahimo kita sa pagbuntog sa pisikal nga kamatayon ug ang mga pulong nga nagpakita nga maanaa kita sa presensya sa Dios pag-usab. Isulat ang imong nakit-an sa mga sentence sa ubos:

Tungod sa Pagkapukan, ang atong mga lawas mamatay, apan tungod sa pag-antus ni Kristo, ang atong mga lawas .

Tungod sa Pagkapukan, kita gisalikway gikan sa presensya sa Dios, apan tungod sa pag-antus ni Kristo, ang tanan mobarug og usab .

Gikan sa mga pagtulun-an ni Jacob atong nakat-unan ang doktrina nga: Ang Pag-ula ni Jesukristo nagluwas sa tanan nga mga katawhan gikan sa pisikal ug espirituhanon nga kamatayon nga miresulta sa Pagkapukan.

Agi og dugang niini nga mensahe sa paglaum, si Jacob mitudlo nga ang pag-antus sa Manluluwas makaluwas usab kanato gikan sa espirituhanong kamatayon nga resulta sa atong kaugalingong mga sala. Basaha ang 2 Nephi 9:27, ug hibaloi kon giunsa paghulagway ni Jacob ang kahimtang niadtong nakalapas o nakasala. Basaha ang 2 Nephi 9:15–16, ug markahi ang espirituhanong kasakit o kahasol nga dad-on sa atong mga sala ngari kanato kon dili kita maghinulsol.

Agi og dugang niini nga kahasol, timan-i ang mga pulong sa 2 Nephi 9:16 nga “sila mopahilayo”. Tungod sa Pag-ula, ang tanang katawhan mobalik ngadto sa presensya sa Dios aron pagahukman. Hinoon, kon wala kita makahinulsol sa atong mga sala, mahimulag kita pag-usab gikan sa presensya sa Dios. Samtang ang kaluwasan gikan sa Pagkapukan usa ka gasa ngadto sa tanang katawhan, ang atong kaluwasan gikan sa mga sangputanan sa atong personal nga mga sala mag-agad sa atong mga tinguha ug mga lihok. Basaha ang 2 Nephi 9:21, 23–24. Tungod sa Pag-ula, unsa ang atong mahimo aron maluwas gikan sa mahangturong mga sangputanan sa atong mga sala?

Human mobasa sa mga pulong ni Jacob, kompletuha ang mosunod nga baruganan: Pinaagi sa Pag-ula ni Jesukristo, atong mabuntog ang mga sangputanan sa atong mga sala kon kita.

Hunong sa makadiyot ug hunahunaa kon unsay imong mabuhat aron mas hingpit nga mobati sa makalimpyo nga gahum sa Pag-ula sa Manluluwas. Aduna bay mga butang nga gusto sa Ginoo nga imong hinulsulan? Pamalandungi kon unsaon nimo sa paghinulsol niining mga butanga. Sa unsang paagi nga mas makapatalinghug ka sa Iyang tingog?

Pagsulat og mubo nga paragraph diha sa imong scripture study journal nga nagpahayag sa imong gibati mahitungod sa maulaong sakripisyo sa Manluluwas alang kanimo.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 9 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: