Unit 5: Day 2

2 Nephi 1

Pasiuna

Samtang magtuon ka sa 2 Nephi 1, timan-i nga kini naglangkub sa mga pulong sa usa ka mahigugmaong ginikanan ug lider sa priesthood nga hapit na mamatay. Si Amahang Lehi nangamuyo sa iyang pamilya sa pagsunod sa mga sugo sa Dios (tan-awa sa 2 Nephi 1:16). Iyang gipanagna nga kon mosunod sila sa mga sugo sa Dios, sila mouswag sa gisaad nga yuta. Giawhag usab niya ang iyang mga anak ug kadtong mikuyog kanila gikan sa Jerusalem sa pagsunod sa propetikanhong pagpangulo ni Nephi. Samtang magtuon ka niini nga kapitulo, timbang-timbanga ang imong personal nga pagkamasulundon ngadto sa mga sugo sa Ginoo. Unsa man kamaayo ang imong pagsunod sa tambag sa mga lider sa Simbahan?

2 Nephi 1:1–23

Si Lehi nag-awhag sa iyang mga katawhan sa pagpuyo nga matarung

Hunahunaa nga kinahanglang kalit ka nga mobiya sa imong pamilya ug dili na gayud makakita kanila pag-usab. Aduna kay katapusan nga oportunidad sa pagpamulong ngadto kanila. Unsa kaha ang imong isulti ngadto kanila niini nga sitwasyon?

Sa 2 Nephi 1–4, si Nephi mirekord sa katapusang tambag sa iyang amahan ngadto sa iyang pamilya. Samtang magtuon ka niini nga mga kapitulo, paghunahuna og mga paagi nga magamit nimo ang katapusang narekord nga mga pagtulun-an ni Lehi.

Basaha ang 2 Nephi 1:1–4, ug hibaloi unsa ang “mahinungdanon [nga] mga butang nga gihimo sa Ginoo” alang sa pamilya ni Lehi.

1. Pagsulat og mugbo nga mga tubag sa mosunod nga mga pangutana diha sa imong scripture study journal:

   1. Sa unsang paagi ang Ginoo mipakita og kalooy sa pamilya ni Lehi?

   2. Unsang “mahinungdanong mga butang” ang gibuhat sa Ginoo alang kanimo ug sa imong pamilya? Unsa ang imong mga pagbati alang sa Ginoo kon maghunahuna ka kon unsa Siya ka maloloy-on nganha kanimo ug sa imong pamilya?

Si Lehi mitudlo sa iyang pamilya nga ang pagpili sa pagsunod sa mga sugo sa Dios motino kon padayon ba nilang madawat o dili ang “mahinungdanong mga butang” ug ang “mga kalooy sa Dios” sa ilang kinabuhi.

Pagpangita sa mga Doktrina ug mga Baruganan

Ang pagkat-on kon unsaon sa pag-ila sa mga doktrina ug mga baruganan sa ebanghelyo nga makita diha sa mga kasulatan magkinahanglan og mahunahunaon nga paningkamot ug pagpraktis. Ang pagsulat sa mga kamatuoran nga imong nadiskubrehan sa mga kasulatan sa format nga “kon-nan” makatabang nimo nga makasabut sa mga baruganan nga magamit dayon sa imong kinabuhi.

2. Aron sa pagtabang kanimo nga makasabut nga ang Ginoo mopanalangin kanato kon motuman kita sa Iyang mga sugo, ug Iyang ihikaw ang mga panalangin kon dili kita mosunod sa Iyang mga sugo, pagdrowing og diagram nga sama sa ubos diha sa imong scripture study journal. Basaha ang 2 Nephi 1:7–11, ug pangitaa ang mga aksyon (“kon”) nga maoy giingon ni Lehi nga moresulta sa piho nga mga sangputanan (“nan”). Isulat kon unsay imong nadiskubre diha sa ubos sa angay nga kolum sa diagram sa imong study journal.

Kon (mga lihok)	Nan (mga sangputanan)

Lehi teaching

Si Lehi nabalaka kaayo mahitungod sa espirituhanong kahimtang ni Laman ug Lemuel ug nakaamgo nga kinahanglan nila nga maghinulsol. Samtang nag-awhag siya kanila, migamit siya og pipila ka mga simbolo sa pagtabang kanila nga makasabut sa sala ug paghinulsol. Siksika ang 2 Nephi 1:13–14 alang sa mga simbolo nga gigamit ni Lehi sa pag-awhag sa iyang mga anak nga lalaki sa paghinulsol, ug isulat ang imong mga tubag sa mga blangko sa ubos:

“ gikan sa usa ka lawom nga ”

“ ang mga ”

“ gikan sa ”

3. Tubaga ang mosunod nga pangutana diha sa imong scripture study journal: Sa unsang paagi ang paghinulsol susama sa matag usa sa hugpong sa mga pulong sa kalihokan sa ibabaw?

Basaha ang 2 Nephi 1:15, ug markahi diha sa imong mga kasulatan ang tulo ka hugpong sa mga pulong nga gigamit ni Lehi sa paghulagway sa mga panalangin nga iyang nadawat tungod sa iyang pagkamasulundon sa mga sugo sa Dios. Itandi kini nga mga panalangin ngadto sa negatibong mga sangputanan sa 2 Nephi 1:17–18, 22 nga giingon ni Lehi nga moabut niadtong wala motuman sa mga sugo sa Dios.

Markahi ang tambag ni Lehi sa 2 Nephi 1:23, ug pamalandungi kon unsay kinahanglan nimong buhaton sa imong kinabuhi aron sa “pagmata” o “[mo]wakli” o “[mo]tindog” aron makadawat kamo sa mga panalangin nga gipamulong ni Lehi niini nga kapitulo.

2 Nephi 1:24–32

Si Lehi nag-awhag sa iyang mga anak nga lalaki sa pagsunod sa propetikanhong pagpangulo ni Nephi

Si Lehi mipahinumdom dayon sa iyang pamilya ug sa uban sa laing tinubdan sa direksyon ug inspirasyon nga gipanalangin kanila aron sa pagtabang kanila sa paghimo og matarung nga mga desisyon sa ilang kinabuhi. Basaha ang 2 Nephi 1:24, ug ilha kini nga tinubdan.

Samtang imong basahon ang 2 Nephi 1:24–27, pangitaa kon giunsa pag-awhag ni Lehi ang iyang katawhan sa pagsunod ni Nephi. Hunahunaa ang imong mga tubag sa mosunod nga mga pangutana:

• Unsa nga mga kinaiya ang gihatagan og gibug-aton ni Lehi nga makatabang kanimo sa pagsalig kang Nephi isip usa ka lider?

• Nganong mosalig man ka sa usa ka lider nga aduna niini nga mga kinaiya?

• Sa unsang paagi imong nabantayan ang mga lider sa Simbahan karon nga nagpakita niining sama nga mga kinaiya?

Basaha ang 2 Nephi 1:28–32, ug markahi diha sa imong mga kasulatan ang mga saad nga gihatag ni Lehi ngadto niadtong mosunod sa pagpangulo ni Nephi. Kini nga mga saad nagpakita nga samtang mosunod kita niadtong gitawag sa Dios nga mangulo kanato, mapanalanginan kita og espirituhanon nga kauswagan ug seguridad. Pamalandungi ang bag-o lang gitudlo kanimo sa mga lider sa Simbahan kon sa unsang paagi ang pagkamasulundon sa dinasig nga tambag makagiya ngadto sa imong espirituhanon nga kauswagan ug seguridad.

President Wilford Woodruff

Basaha ang mosunod nga kinutlo ni Presidente Wilford Woodruff, ug linyahi ang mga saad nga gihimo niya kon mosunod kita sa tambag sa mga sulugoon sa Ginoo: “Nanghinaut ako nga atong subayon ang agianan nga gipahimutang kanato sa mga sulugoon sa Ginoo, kay kon kini atong sundon nasayud ako nga luwas kita niining kalibutana, ug makaangkon og kalipay ug kahimayaan sa umaabot nga kalibutan. … Kon kita matinud-anon modala sila kanato sa dalan sa kinabuhi, ug ingon nga aduna kitay hugot nga pagtuo sa pagsunod sa ilang mga panudlo, sa mga pagtulun-an sa Balaang Espiritu pinaagi kanila, kita anaa kanunay sa luwas nga dalan, ug makasiguro sa atong ganti” (Mga Pagtulun-an sa mga Presidente sa Simbahan: Wilford Woodruff [2004], 221).

4. Isulat diha sa imong scripture study journal ngano kaha nga ang pagkamasulundon sa mga sugo sa Ginoo ug sa tambag sa Iyang mga sulugoon importante nga buhaton sa tibuok nimong kinabuhi.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 2 Nephi 1 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: