Unit 18: Day 1
Alma 25–29
Pasiuna
Human sa mga katuigan nga pagsangyaw sa ebanghelyo, gidayeg ni Ammon ang Ginoo ug mipahayag sa pagpasalamat sa mga panalangin sa pagkahimong instrumento sa Iyang mga kamot aron madala ang ebanghelyo ngadto sa mga Lamanite. Daghang Lamanite ang nagsugod sa pagtuo sa Ginoo, naghinulsol, ug mitawag sa ilang mga kaugalingon nga mga Anti-Nephi-Lehi. Human ang mga Anti-Nephi-Lehi nakahimo og pakigsaad uban sa Dios nga dili na gayud mogamit pag-usab og mga hinagiban sa gubat, ang mga Amalikite ug mga Lamanite nagsugod sa pagpangandam sa pakig-away batok kanila. Aron matabangan sila sa pagtuman sa ilang pakigsaad sa Ginoo, ang mga Anti-Nephi-Lehi midawat sa tanyag nga proteksyon gikan sa mga Nephite. Ang Nephite nga propetang si Alma mipahayag sa kalipay nga iyang gibati gumikan sa pagsangyaw sa ebanghelyo ug pagdapit sa uban sa pagduol ngadto kang Jesukristo.
Alma 25
Ang panagna ni Abinadi natuman, ug daghang Lamanite ang nakabig
Paghunahuna og bisan unsang mga kausaban nga imong nahimo samtang mas labaw kang nakabig sa ebanghelyo ni Jesukristo. Ang Alma 25 naghisgot mahitungod sa katumanan sa panagna ni Abinadi nga ang mga kaliwatan sa mga pari ni Noah panggukuron ug pamatyon ug nagpakita nga ang Ginoo manalipud sa iyang mga propeta ug motuman sa dinasig nilang mga panagna (tan-awa sa Alma 25:9). Naghisgot usab kini kon unsa kadaghan sa mga Lamanite ang naghinulsol ug mipasakop sa mga Anti-Nephi-Lehi. Basaha ang Alma 25:14, ug hibaloi kon unsa ang gipanghimo niini nga mga Lamanite dihang nakabig sila sa ebanghelyo. Sa Alma 25:15 atong nakat-unan ang duha ka rason nganong gituman nila ang balaod ni Moises.
Alma 26
Si Ammon nagmaya sa kamanggiloy-on sa Ginoo ngadto sa mga Lamanite ug sa anak nga mga lalaki ni Mosiah
Unsay gikinahanglan aron makatukod og usa ka balay o simbahan? Unsa nga matang sa simbahan ang matukod sa usa ka hanas nga trabahante gamit ang saktong mga himan o mga instrumento? Sa Alma 26, gihulagway ni Ammon ang iyang kaugalingon ug ang iyang mga igsoon isip mga instrumento sa mga kamot sa Dios sa paghimo og talagsaong buhat. Basaha ang Alma 26:1–5, 12–13, ug hibaloi kon unsay natuman sa Ginoo pinaagi sa paggamit kang Ammon ug sa iyang mga igsoon isip mga instrumento sa Iyang mga kamot. (Mahimo nimong markahan ang mga tubag nga imong nakita sa imong mga kasulatan.) Sa bersikulo 5 ang mga pulong nga “miduso sa galab” nagpasabut sa pagkugi, ang “bugkos” nagrepresentar sa mga kinabig, ang “kamalig” nagrepresentar sa Simbahan, ug ang mga pulong nga kadtong kinsa gipundok “dili mausik” nagpasabut sa Dios nga nagpreserbar sa mga kinabig ug naghatag kanila og kinabuhing dayon.
Ilha o markahi ang usa daghan pang mga pulong diha sa Alma 26:12 nga nakasabut si Ammon nga siya usa lamang ka himan sa mga kamot sa Ginoo ug ang Ginoo mao ang mipatuman sa mga milagro atol sa iyang misyon.
Gikan niini nga mga bersikulo atong makat-unan kini nga baruganan: Kon kita mangandam ug ipaubos ang atong kaugalingon, lig-unon kita sa Ginoo ug gamiton kita nga usa ka instrumento sa Iyang mga kamot. Ang kauban nga baruganan nga nakat-unan sab nato sa Alma 26 mao: Atong masinati ang hingpit nga kalipay kon magmatinud-anon kitang moserbisyo sa Ginoo ug sa Iyang mga anak. Basaha ang Alma 26:11, 13, 16, ug markahi sa matag higayon nga makita nimo ang pulong nga hingpit nga kalipay o pagmaya.
Basaha ang Alma 26:13-16, ug pangitaa ang mga rason sa paglipay ni Ammon.
-
Sa imong scripture study journal, isulat kon ngano kaha nga masinati man nato ang hingpit nga kalipay kon anaa kita sa pag-alagad sa Ginoo. Mahimo usab nga isulat nimo ang mahitungod sa usa ka panahon dihang gibati nimo ang hingpit nga kalipay isip resulta sa imong pagserbisyo sa Simbahan.
Basaha ang mosunod nga mga bersikulo, ug paghunahuna og mga tubag sa nag-uban nga mga pangutana:
Alma 26:22–23, 26–29. Timan-i ang mga rekisito nga gilista aron mahibaloan ang mga misteryo sa Dios. Unsa nga saad ang gihatag ngadto sa mga misyonaryo nga aduna niini nga mga kwalipikasyon? Unsa nga mga babag ang giatubang ni Ammon ug sa iyang mga igsoon sa ilang pagserbisyo sa Ginoo ug sa mga Lamanite? Asa niini nga mga babag ang susama sa mga babag nga giatubang niadtong kinsa moserbisyo sa Ginoo karon? Unsay makat-unan sa modernong mga misyonaryo gikan sa Alma 26:29 kon asa sila kinahanglang magtudlo sa ebanghelyo?
Alma 26:30. Unsa ang nakadasig sa mga anak ni Mosiah aron magpadayon sa pagserbisyo bisan sa lisud nga mga panahon?
-
-
Unsa nga mga kamatuoran ang gitudlo niini nga mga bersikulo ang maghatag nimo og mga rason sa pagmaya tungod sa pagkamaayo sa Dios? (Mahimo nimong markahan ang mga pulong nga nagpasabut niini nga mga kamatuoran.)
-
Unsa ang nahimo nga kalainan sa pagkahibalo nga ang Dios mahunahunaon kanimo?
-
Alma 27
Gidala ni Ammon ang mga tawo sa Anti-Nephi-Lehi ngadto sa kasiguroan sa mga Nephite
Samtang mangandam ka sa pagtuon sa Alma 27, paghunahuna og mga tubag sa mosunod nga mga pangutana:
-
Aduna bay tawo nga misaad nimo ug unya wala tumana kana nga saad?
-
Aduna ka bay nailhan kinsa kanunay nga motuman sa iyang mga saad kanimo?
-
Unsay gibati nimo sa mga tawo nga mituman sa ilang mga saad? Ngano man?
Human sa dili malampuson nilang paningkamot sa paglaglag sa mga Nephite, ang mga Lamanite misulay sa paglaglag sa mga Lamanite (mga Anti-Nephi-Lehi) kinsa nakabig ni Ammon ug sa iyang mga igsoon. Hinumdumi nga ang mga Anti-Nephi-Lehi milubong sa ilang mga hinagiban sa gubat sa pagpakita nga motuman sila sa ilang mga pakigsaad nga dili na gayud mopatay pag-usab. Aron mahibalo unsa kamapasaligon ang mga Anti-Nephi-Lehi sa pagtuman nila niana nga pakigsaad, basaha ang Alma 27:2–3.
Hunahunaa ang kalig-on sa pasalig nga gihimo sa mga Anti-Nephi-Lehi sa pagtahud sa ilang pakigsaad nga dili na mogamit sa ilang mga hinagiban dihang gisulong na sila. Ikonsiderar kon unsaon nimo paglig-on ang imong pasalig sa pagtuman sa mga pakigsaad uban sa Langitnong Amahan kon ingon og lisud ang pagbuhat niini.
Tungod sa pagpanglutos ug pagpang-atake gikan sa dautang mga Lamanite, gidala ni Ammon ang mga Anti-Nephi-Lehi ngadto sa Zarahemla—siyudad sa mga Nephite—diin ang mga Nephite misaad nga manalipud kanila gikan sa ilang mga kaaway. Ikonsiderar kon unsay imong mahimo aron matabangan ang mga tawo sa imong palibut sa pagtuman sa mga pakigsaad nga ilang gihimo sa Ginoo.
Kausa didto sa Zarahemla, ang mga Anti-Nephi-Lehi gitawag og mga tawo ni Ammon sa mga Nephite. Basaha ang Alma 27:27–30, nga mangita kon unsay gingalan sa mga katawhan ni Ammon. Markahi ang bisan unsang mga pulong o hugpong sa mga pulong nga nagtudlo sa mosunod nga baruganan: Kon kita hingpit nga nakabig ngadto sa Ginoo, atong tumanon ang mga pakigsaad nga atong gihimo uban Kaniya.
-
-
Unsay imong mga kasinatian dihang lisud para nimo ang pagtuman sa mga pakigsaad uban sa Ginoo, apan gituman gihapon nimo kini?
-
Kinsang tawhana ang gihimo nimong ehemplo nga nagmatinud-anon ug matinuoron sa iyang mga pakigsaad sa Ginoo? Sa unsang paagi kanang tawhana mipakita sa kamatinud-anon niadto nga mga pakigsaad?
-
Alma 28
Gipildi sa mga Nephite ang mga Lamanites sa grabe kaayo nga away
-
-
Unsa ang gibayad sa mga Nephite sa pagtabang sa mga katawhan ni Ammon sa pagtuman sa ilang mga pakigsaad? (Tan-awa sa Alma 28:1–3.)
-
Unsa ka dako ang epekto niini nga mga pagkamatay ngadto sa mga Nephite? (Tan-awa sa Alma 28:4–6.)
-
Nganong nangahadlok man ang ubang mga tawo dihang nangamatay ang ilang mga minahal samtang ang uban nagmaya ug nagmalaumon? (Tan-awa sa Alma 28:11–12.)
-
Pagsulat og usa ka baruganan sa pagpamahayag nga mag-summarize kon unsay imong nakat-unan gikan sa Alma 28:11–12:
Usa sa mga baruganan nga gitudlo sa Alma 28 mao: Kon kita dunay pagtuo kang Jesukristo ug sa Iyang mga saad, makabaton kita og paglaum ug kalipay bisan sa kamatayon.
-
-
Kanus-a ka nakasaksi og tawo nga nag-atubang sa kaugalingon niyang kamatayon o kamatayon sa usa ka minahal nga adunay paglaum tungod sa pagtuo kang Jesukristo?
-
Unsaon man nimo sa pagpasabut ang kamatayon ngadto sa usa ka tawo aron matabangan kanang tawhana sa pagbaton og paglaum human sa pagkamatay sa usa ka minahal?
-
Ilha ang tulo ka “ug sa ingon kita nakasabut” nga mga pamahayag ni Mormon diha sa Alma 28:13–14. Mahimo nimong markahan kini diha sa imong mga kasulatan. Unsa nga mga punto ang gihatagan ni Mormon og importansya dihang gitapos niya ang istorya kabahin sa misyon sa mga anak ni Mosiah ngadto sa mga Lamanite? Pamalandunga kon nganong kini nga mga kamatuoran importante nga imong mahibaloan.
Alma 29
Gihimaya ni Alma ang pagdala og mga kalag ngadto sa Dios
Nakapanghinaot ka na ba nga unta ikaw sa kaugalingon makabaton og gahum sa pagpahitabo og pipila ka maayong mga butang o makapahunong sa grabing kadautan sa kalibutan? Ang Alma 29 naglangkob sa mga ekspresyon ni Alma sa tinguha nga mamahimong instrumento sa mga kamot sa Ginoo. Siksika ang Alma 29:1–3, ug pangitaa ang tinguha ni Alma sa iyang kasingkasing.
Sa paghinumdom kon unsay nahitabo ni Alma sa batan-on pa, ikonsiderar ngano kaha nga si Alma may tinguha man sa iyang gipahayag. Bantayi diha sa Alma 29:3 kon nganong mibati man siya nga nakasala sa iyang tinguha. Basaha ang Alma 29:4–5, ug hibaloi kon unsay ihatag sa Ginoo niadtong dunay matarung nga mga tinguha.
Siksika ang Alma 29:10, 14–16, ug markahi ang ganti nga nadawat ni Alma sa pagdala og mga kalag ngadto kang Kristo. Mahimo nimong markahan sa matag higayon nga gigamit ni Alma ang pulong nga hingpit nga kalipay niini nga mga bersikulo.
Ang usa ka baruganan nga gitudlo diha sa Alma 29 mao: Atong masinati ang hingpit nga kalipay samtang motabang kita sa uban sa paghinulsol ug pagduol ngadto kang Jesukristo. Unsa nga mga kasinatian ang imong nasinati nga nakatabang nimo nga mobati og kalipay nga nakatabang sa uban sa pagduol ngadto kang Kristo?
Pamalandunga sa makadiyot ang mga paagi diin ikaw makatabang og mga indibidwal sa mosunod nga grupo sa mga tawo sa paghimo sa gikinahanglan nga mga kausaban sa ilang kinabuhi ug pagduol ngadto kang Jesukristo: (a) imong mga higala, (b) mga sakop sa imong pamilya, ug (c) niadtong wala pa kaayo nimo mailhi. Tinguhaa ang giya sa Espiritu samtang mangita ka og mga oportunidad sa pagdala sa uban ngadto kang Jesukristo.
-
Akong natun-an ang Alma 25–29 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: